Eitieta Pouch Mi Tuppwol Lon Iotek

“Ua mochen pwe lon leeni meinisin ekkewe mwan repwe wisen iotek, iwe, repwe eitieta pour mi tuppwol, nge esap wor song me anini.”​—1 TIMOTY 2:8.

1, 2. (a) Ifa ussun 1 Timoti 2:8 a weneiti ewe sokkun iotek noun Jiowa kkewe aramas ra kan eani? (b) Met sipwe kaeo ussun iei?

JIOWA a ekiekin kuna seni noun kkewe aramas pwe repwe tuppwol ngeni i me repwe pwal ina ussun lefiler. Ewe aposel Paul a ririfengenni tuppwol me iotek pwe iei makkeian: “Ua mochen pwe lon leeni meinisin ekkewe mwan repwe wisen iotek, iwe, repwe eitieta pour mi tuppwol, nge esap wor song me anini.” (1 Timoti 4:8) Neman Paul a mak ussun ar iotek “lon leeni meinisin” ikewe chon Kraist ra mwichfengen ie. Io epwe wisen tupuni noun Kot kkewe aramas lon ekkewe mwich? Ekkewe chok mwan mi fel, pwung, me wenechar, iwe, ra kan apwonuetafichi meinisin wiser kkewe me ren Paipel ngeni Kot. (Eklesiastis 12:13, 14) Manauer me letiper epwe limoch mwen mesen Kot, me repwe wenewenen tuppwol ngeni Jiowa Kot.

² Ekkewe elter repwe akkaewin ‘eitieta pour mi tuppwol lon iotek.’ Ar kkewe iotek seni letiper fan iten Jises Kraist a kan pwarata tuppwol ngeni Kot me a tumunur seni anini me song. Mi enlet pwe emon mwan mi wisen tupuni ewe mwichefelin Kraist lon iotek esap song, sorongau, me u ngeni Jiowa me an we mwicheich. (Jemes 1:19, 20) A wor pwal met sokkun emmwen lon Paipel fan iten ir mi wisen tupuni aramas lon iotek? Ikkefa ekkoch allukun Paipel sipwe apwonueta lupwen sipwe pwisin iotek are iotek lon ach famili?

Ekieki Akkom Met Sipwe Iotek Ussun

3, 4. (a) Pwata epwe murinno ach sipwe ekieki masouen ach iotek ika sipwe wisen tupuni eu mwich lon iotek? (b) Met Paipel a apasa ussun ttamen ach kkewe iotek?

³ Ika sipwe wisen iotek fan iten eu mwich, neman sipwe tongeni ekieki akkom met sipwe iotek ussun. Eli ena mettoch epwe ali­si­kich pwe sipwe iotek ussun mettoch mi lamot, nge esap kon ttam met sipwe apasa. Pwungun pwe sipwe pwal tongeni leuwommong lon pwisin ach kkewe iotek. Ese kauk ttamer. Jises a iotek unusen eu pwin mwen an filata noun kkewe 12 aposel. Iwe nge, lupwen a poputani Achechchemenien an malo, neman an iotek won ewe pilaua me wain a mwoch. (Mark 14:22-24; Luk 6:12-16) Iwe, sia silei pwe Kot a unusen pwapwa ren an Jises kkewe iotek mi mwoch.

⁴ Epwe ifa ussun ika sipwe tupuni eu famili lon iotek mwen ach sipwe mongo. Eli ewe iotek epwe mwoch, nge sipwe ita pwarata ach kilisou ren ewe mongo. Ika sipwe iotek le poputaan are mwirin eu mwich fan iten chon Kraist, esor lamoten ach sipwe attama ach iotek ren an epwe kapachelong chommong mettoch. Jises a apwungu ekkewe sou mak pun ‘ra eani iotek mi ttam ren eu popun ese pwung.’ (Luk 20:46, 47) Emon mi sufoliiti Kot esap mochen ffori ena mettoch. Iwe nge, fan ekkoch, epwe pwung an epwe ekis ttam iotek lon fansoun mwich. Awewe chok, emon elter mi wisen iotek le sopwoloon eu mwichelap epwe ekieki masouan akkom me eli epwe mochen ioteki fitu mettoch. Nge, pwal ena esin iotek esap kon ttam.

Arap Ngeni Kot fan Fairo

5. (a) Met sipwe chemeni lupwen sipwe wisen tupuni eu mwich lon iotek? (b) Pwata sipwe iotek fan fairo me mennin?

⁵ Lupwen sipwe tupuni aramas lon iotek sipwe chechchemeni pwe sise kan fos ngeni aramas. Nge, kich chon tipis mi tingorei ewe Epinkepiisom Jiowa. (Kol Fel 8:3-5, 9; 73:28) Ina minne, sipwe pwarata mennin chapur pokiten ach sise mochen aletipechou i ren minne sipwe apasa me ifa ussun sia kan uwawu ach kapas. (An Salomon Fos 1:7) Ewe sou makkei kol fel Tafit a eani ei kol: “Nge ren ngang, lon somoloon om tong upwe tolong lon imwom, upwe rotiu ngeni om imwen fel fan ai mennin chapur ngonuk.” (Kol Fel 5:7) Ika sipwe eani ena ekiek, ifa ussun sipwe uwawu ach kapas lupwen sipwe wisen tupuni aramas lon iotek lon eu mwich Chon Pwarata Jiowa ra eani? Iwe, ika sipwe kapas ngeni emon king won fonufan, sipwe pwarata sufol me fairo. Esap ita lapalo ach sufol me fairo pokiten sia iotek ngeni Jiowa, ewe “Kingen feilfeilo chok”? (Pwarata 15:3) Iwe, lupwen sipwe iotek, sisap apasa, “Lesor allim, Jiowa,” “Am aua tinata reom am tong,” are, “Amwo kopwe pwapwa lon ei ran.” Paipel a pwarata pwe Noun Kot we Alaemon, Jises Kraist, ese eani ena esin kapas ngeni Seman we lon lang fan eu.

6. Met sipwe chemeni lupwen sipwe ‘arap ngeni ewe leenien umoumoch’?

⁶ Iei alon Paul: “Sipwe . . . arap ngeni ewe leenien umoumoch nge esap pinepin ach kapas.” (Ipru 4:16) Sipwe tongeni arap ngeni Jiowa nge “esap pinepin ach kapas,” inaamwo ika kich chon tipis pokiten ach luku ewe asor fan iten ewe moon kepich Jises Kraist a awo­ra. (Fofor 10:42, 43; 20:20, 21) Iwe nge, inaamwo ika “esap pinepin ach kapas” nge esap wewe ngeni pwe sia kan akkasosfengen me Kot, me sisap eani kapas mi pwarata sufolungau. Sipwe pwarata sufol me fairo ren ach sipwe eani iotek mi apwapwai Jiowa, me esap och ach sipwe uwawu poraus esilesil, fonou aramas, are eppieta mwaallin chon auseling ika sipwe wisen tupuni aramas lon iotek.

Iotek fan Ngunun Mosonoson

7. Ifa ussun Solomon a pwarata tipetekison lupwen a iotek atun afinunen an Jiowa we imwen fel?

⁷ Lupwen sipwe pwisin iotek are iotek fan iten eu mwich, sipwe chechchemeni eu an Paipel emmwen mi lamot, nge a aiti ngenikich pwe sipwe tipetekison lon ach kkewe iotek. (2 Kronika 7:13, 14) King Solomon a pwarata tipetekison lon an iotek fan iten afinunen an Jiowa we imwen fel lon Jerusalem. Solomon a fen keran awesi eu me lein ekkewe imw mi kon amwarar seni meinisin won fonufan. Iwe nge, a iei ussun an iotek fan tipetekison: “Kot epwe ita wesewesen nonnom won fonufan? Nengeni! Kosap kuchulong lon ekkewe lang, ewer, pwal mwo nge langin ekkewe lang; iwe, a fen kon kukkun senir ei imw ua fen aueta!”​—1 King 8:27.

8. Ifa ussun sipwe tongeni pwarata tipetekison lupwen sipwe wisen tupuni eu mwich lon iotek?

⁸ Ussun Solomon, sipwe tipetekison lupwen sipwe wisen tupuni aramas lon iotek. Inaamwo ika sisap tipin tipetekison, nge sipwe tongeni pwarata tipetekison ren leuwach. Iotek fan tipetekison esap minen asikesik are minen eingeing. Ra kan atekiata ewe Emon sia iotek ngeni, nge esap ewe emon mi wisen iotek. (Mattu 6:5) Sia pwal pwarata tipetekison ren minne sia apasa lon iotek. Ika sia iotek fan tipetekison, esap ussun ita sia ereni Kot pwe epwe ffori ekkoch mettoch me ren pwisin ach ekiek. Nge, sipwe tingorei Jiowa pwe epwe ffori met epwe tipeeu ngeni letipan mi fel. Ewe sou makkei kol fel a eani ewe sokkun ekiek mi pwung lupwen a eani ei tingor: “Jiowa, kese mochen kopwe mwo selanikem iei! Jiowa, kese mochen kopwe efeiochukem iei!”​—Kol Fel 118:25; Luk 18:9-14.

Iotek Seni Letipach

9. Ifa ewe fon mi murinno seni Jises a mak lon Mattu 6:7, me ifa ussun sipwe tongeni apwonueta ena fon?

⁹ Ika sia mochen pwe ach kkewe iotek epwe apwapwai Jiowa, nge ese lifilifil met sokkun sipwe eani, epwe popu seni letipach. Ina minne, sisap chok apiapini och iotek fan fite nge sise fen ekieki met sia kapas ussun. Lon an Jises we Afalafal won ewe Chuuk, iei an fon: “Lupwen oupwe iotek, ousap apiapini ami kapas fan fite, ussun chok chon ekkewe muu, pun ra ekieki pwe a murinno ar kkewe iotek pokiten ar nounou chommong kapas.” A pwal iei ussun alon Jises: “Ousap fospat; ousap apiapini ewe sokkun kapas esor aucheaan.”​—Mattu 6:7; footnote.

10. Pwata epwe pwung ach sipwe iotek ussun eu mettoch fan chommong?

¹⁰ Pwungun pwe eli epwe lamot ach sipwe iotek ussun eu mettoch fan chommong. Esap mwaal ena pun iei an Jises pesepes: “Oupwe tittingor, me oupwe angei; oupwe kukkutta, me oupwe kuna; oupwe fiffichifich, iwe, epwe suuk ngenikemi.” (Mattu 7:7) Eli a lamot an epwe wor eu minefoon Kingdom Hall pokiten an Jiowa efeiochu ewe angangen afalafal lon leeniach. (Aisea 60:22) Epwe pwung ach sipwe ikkioteki ena mettoch lupwen sipwe pwisin iotek are iotek lon ekkewe mwich noun Jiowa kkewe aramas repwe eani. Ach ffori ena mettoch esap weween ngeni ach ‘apiapini ewe sokkun kapas esor aucheaan.’

Chechchemeni Kilisou me Kapasen Mwareiti

11. Ifa ussun Filipai 4:6, 7 a weneiti sokkun iotek meinisin, ese lifilifil?

¹¹ Chommong aramas ra iotek fan iten chok ar repwe tingor och mettoch, nge ach tong ngeni Jiowa Kot epwe ita amwokutukich pwe sipwe mwareiti i me ereni ach kilisou lon ach kkewe iotek, ese lifilifil ineet atun sipwe iotek. Iei makkeien Paul: “Ousap aurek ren och mettoch, nge lon mettoch meinisin ren iotek me kokko fitifengen me kilisou oupwe esile ngeni Kot ami kkewe tingor; iwe, ewe kinamwe seni Kot mi somolo seni sokkun ekiek meinisin epwe tumunu letipemi me ami tufichin ekiek me ren Kraist Jises.” (Filipai 4:6, 7) Ewer, ach kilisou ngeni Jiowa ren ekkewe feioch lon pekin ngun me pekin aion epwe pwal kapach ngeni ach kkewe kokko me tingor. (An Salomon Fos 10:22) Ewe sou makkei kol fel a eani ei kol: “Eani kapasen kilisou fan iten om asor ngeni Kot, me apwonueta om kkewe pwon ngeni ewe mi Unusen Tekia.” (Kol Fel 50:14) Ekkeei kapas a nom lon eu kol Tafit a eani: “Upwe mwareiti iten Kot ren kol, me upwe atekiata i ren kilisou.” (Kol Fel 69:30) Esap ina ewe chok mettoch sipwe ffori, ese lifilifil ineet atun sipwe iotek?

12. Ifa ussun Kol Fel 100:4, 5 a kan pwonuta ikenai, ina minne, sipwe tongeni mwareiti Kot me apasa ach kilisou ngeni ren met?

¹² Ewe sou makkei kol fel a eani ei kol ussun Kot: “Ou tolong lon tittin leenian fan kilisou, lon kiannin aparin fan kapasen mwareiti i. Oupwe apasa ami kilisou ngeni i, me mwareiti itan we. Pun Jiowa a murinno, an tong epwe nonnom tori feilfeilo chok, me an tuppwol epwe nonnom tori ekkewe tappin aramas meinisin.” (Kol Fel 100:4, 5) Ikenai, chon ekkewe muu meinisin ra tottolong lon kiannin an Jiowa we leeni mi fel, me sipwe tongeni mwareiti i me pwarata ach kilisou ngeni i ren ena mettoch. Ka kan apasa om kilisou ngeni Kot ren ewe Kingdom Hall me ka kan pwarata om aucheani ena mettoch ren om mwimwichfengen me chokkewe mi tongei i iteiten wiik? Lupwen ka fiti mwich, ka kan leuwommong le eani ekkewe kolun kilisou mi mwareiti Semach we lon lang mi ur ren tong?

Sisap Ukutiu Seni Iotek Pokiten Ach Mengiringir

13. Menni poraus lon Paipel a pwarata pwe sipwe iotek ngeni Jiowa inaamwo ika sia meefi pwe ese pwung manauach pokiten ach mengiringir?

¹³ Inaamwo ika ach mengiringir epwe ameef ngenikich pwe ese auchea manauach, nge sipwe tinikken le iotek ngeni Kot. Lupwen ekkewe chon Jus ra tipis ren ar pulueni fin ekis, Esra a fotopukutiu, a eitiewu poun kkewe mi tuppwol ngeni Kot, me a iotek fan tipetekison: “Ai Kot, ua mengiringir me sau le nenneta reom, ai Kot, pun am kkewe ffofformwaal a fen chuukuta asen mokurem me am tipis a fen chommongolo tori lang. Seni fansoun semelapem kkewe a fen watte am tipis tori ei ran . . . Iwe, mwirin am kuna liwinin am kkewe ffofforingau me am tipis mi lapalap​―pun pwisin en, am Kot, kese apwungukem me ren ukuukun am tipis, me ka fen ngenikem chokkeei mi fen ngaselo​—iwe, aupwe ita ataisefalli om kkewe alluk me fforata ririin pupulu ngeni aramas mi ffori mettoch mi anioput? Ifa ussun, esap lapalo om song ngenikem tori am aupwe rosolo me esap wor emon epwe ngaselo? Jiowa ewe Koten Israel, en mi pwung, pun am eu mwichen aramas mi fen ngaselo lon ei ran. Am aua nonnom mwen mesom lon am tipis, pun ese pwak am aupwe uta mwom pokiten ei mettoch.”​—Esra 9:1-15; Tuteronomi 7:3, 4.

14. Ussun a pwalo lon fansoun Esra we, met aramas repwe ffori ren ar repwe kuna omusomus seni Kot?

¹⁴ Ren ach sipwe kuna omusomus seni Kot, sipwe pwarata ach tipis, nge epwe fiti mengiringir me “uwa mi fichiiti aier.” (Luk 3:8; Hiop 42:1-6; Aisea 66:2) Lon fansoun Esra, an aramas aier a fiti ar achocho le siwili ar ffofformwaal ren ar poutalo puluwer kkewe fin ekis. (Esra 10:44; alollo ngeni 2 Korint 7:8-13.) Ika sia kutta an Kot omusomus ren och tipisilap, sipwe pwarata ach tipis ren ach iotek fan tipetekison me ach uwaani uwa mi fichiiti aier. Ach aier me ach mochen amoielo ewe ffoffor mi mwaal epwe pwal amwokutukich pwe sipwe kutta alillis lon pekin ngun seni ekkewe elter.​—Jemes 5:13-15.

Kuna Auruur Seni Iotek

15. Ifa ussun minne a fis ngeni Anna a pwarata pwe sipwe tongeni kuna auruur seni iotek?

¹⁵ Lupwen letipach epwe cheuch pokiten och mettoch, sipwe tongeni kuna auruur seni iotek. (Kol Fel 51:17; An Salomon Fos 15:13) A ina ussun neminnewe mi tuppwol, Anna. A manau lupwen a kan watte ekkewe famili lon Israel, nge neminnewe esaamwo nounou. Puluwan we, Elkana, a nouni at me nengngin me won pwal emon puluwan itan Peninna, nge neminnei a kan esiita Anna pokiten an ese nounou. Anna a tinikken le iotek me a pwonei pwe ika epwe nouni emon at, ‘epwe liffang ngeni Jiowa ranin manauan meinisin.’ Pokiten an kuna auruur seni an iotek me pwal ren alon ewe Samol Fel Lapalap, Ilai, Anna “ese chuen lolilen.” Neminnewe a nounatiu emon at, iwe, a eita ngeni Samuel. Mwirin, a uwei ngeni an Jiowa imwen fel pwe epwe angang ie. (1 Samuel 1:9-28) Pokiten an kilisou ren an Kot kirokiroch ngeni i, a eani eu iotekin kilisou, nge an iotek a mwareiti Jiowa pun a apasa pwe esor emon mi lollo ngeni i. (1 Samuel 2:1-10) Sipwe pwal tongeni kuna auruur seni iotek ussun Anna, me luku pwe Kot a kan polueni meinisin tingor mi tipeeu ngeni letipan. Lupwen sipwe suuki letipach ngeni i, sisap “chuen lolilen,” pun epwe amoielo minne a chounikich are epwe atufichikich pwe sipwe likiitu fan.​—Kol Fel 55:22.

16. Ussun a pwalo lon porausen Jekop, pwata sipwe iotek lupwen sia niuokkus are lolilen?

¹⁶ Ika och mettoch epwe efisata niuokkus, letipechou, are lolilen, sisap tunalo ach iotek ngeni Kot ren auruur. (Kol Fel 55:1-4) Jekop a niuokkus lupwen epwele chuuri pwiin we Iso pwe a fen wor fitikoko lefiler me lom. Nge iei an Jekop iotek: “Koten semei we Eperiam me Koten semei we Aisek, O Jiowa, en mi apasa ngeniei, ‘Liwiniti fonuom me mararum kkewe, iwe, upwe efeiochuk,’ nge ese fichiitiei ekkewe ffofforun tong me ewe tuppwol ka fen pwarata ngeni noum ei chon angang, pun fan chok woki ei ua fen feilo pekiloon ei Jortan, iwe iei, am aua kaimufesen lon ruu kumi. Ua iotek ngonuk pwe kopwe selaniei seni poun pwiin we, seni poun Iso, pun ua niuokkusiti i pwe ina epwe feito me awatakem, in fitifengen me nour kkewe. Iwe en, ka fen apasa, ‘Esor tipemwaramwar pwe upwe efeiochuk me upwe achommonga mwirimwirum kkewe pwe repwe ussun chok ekkewe foun ppi leset, nge esap wor emon epwe tongeni alleanir pokiten chommongur.’” (Keneses 32:9-12) Iso ese awata Jekop me chokkewe mi eti i. Ina minne, Jiowa a “efeiochu” Jekop lon ena fansoun.

17. Me ren minne a mak lon Kol Fel 119:52, ifa ussun iotek epwe tongeni auruurukich lupwen sipwe kuna sossot watte?

¹⁷ Atun ach sipwe iotek, eli sipwe kuna auruur ren ach chemeni ekkewe mettoch mi mak lon ewe Kapasen Kot. Lon ewe kol fel mi ttam seni meinisin​—eu iotek mi ussun eu kol​—eli ewe Samol Hesekaia a eani ei kol: “Ua fen chemeni om kkewe apwung seni fansoun ese kauk, O Jiowa, me ua kuna auruur rer.” (Kol Fel 119:52) Ika sipwe iotek fan tipetekison lupwen sipwe kuna sossot watte, eli sipwe chemeni eu kapasen emmwen are alluk lon Paipel, iwe, epwe tongeni alisikich pwe sipwe aleni eu aal mi alukulukatiu ngenikich pwe sia kan apwapwai Semach we lon lang.

Chon Tuppwol ra kan Likiitu le Iotek

18. Pwata sia tongeni apasa pwe ‘iteiten chon tuppwol meinisin epwe iotek ngeni Kot’?

¹⁸ Meinisin mi tuppwol ngeni Jiowa Kot repwe “likiitu le iotek.” (Rom 12:12) Lon Kol Fel 32, nge eli a mak mwirin an Tafit tipis ngeni Patsipa, a awewei an riaffou pokiten an ese kutta omusomus me ewe kinamwe a kuna lupwen a aier me a pwarata an tipis ngeni Kot. Iwe mwirin, Tafit a eani ei kol: “Pokiten ei mettoch [pun an Jiowa omusomus a suuk ngeni chokkewe mi enletin aier] iteiten chon tuppwol meinisin epwe iotek ngonuk lon ewe chok fansoun en kopwe pwato rer.”​—Kol Fel 32:6.

19. Pwata sipwe eitieta pouch mi tuppwol lon iotek?

¹⁹ Ika sia aucheani ach riri ngeni Jiowa Kot, sipwe iotek ren an umoumoch fan iten an Jises we asorun penmanau. Fan lukuluk, sipwe tongeni arap ngeni ewe leenien umoumoch, nge esap pinepin ach kapas, ren ach sipwe kuna umoumoch me alillis. (Ipru 4:16) Nge a wor chommong popun sipwe iotek! Ina minne, sipwe iotek “fansoun meinisin,” nge fan chommong epwe kapacheta kapasen mwareiti Kot me ach kilisou ngeni i. (1 Tesalonika 5:17) Le pwin me le ran, sipwe eitieta pouch mi tuppwol lon iotek.

Ifa Ussun Kopwe Polueni?

◻ Pwata a murinno ach sipwe ekieki masouen ach iotek mwen ach sipwe wisen tupuni eu mwich lon iotek?

◻ Pwata sipwe iotek fan sufol me fairo?

◻ Menni lapalap sipwe eani lupwen sipwe iotek?

◻ Lupwen sipwe iotek, pwata sipwe chemeni kapasen kilisou me kapasen mwareiti Kot?

◻ Ifa ussun Paipel a pwarata pwe sipwe tongeni kuna auruur seni iotek?

[Sasing lón pekin taropwe 21]

King Solomon a pwarata tipetekison lon an iotek atun afinunen an Jiowa imwen fel

[Sasing lón pekin taropwe 22]

Ussun Anna, kopwe tongeni kuna auruur seni iotek