Pwapwa Pwe Jiowa A Aiti Ngenikich An We Al
“Ren ewe Kot mi enlet, a unusoch an we al; alon Jiowa kkewe mi fokkun murinno.”—2 SAMUEL 22:31.
1, 2. (a) Ifa ewe mettoch a lamot ngeni aramas meinisin? (b) Epwe murinno ach sipwe appiru io?
A LAMOT ngeni aramas meinisin kapasen emmwen. Pwungun pwe a lamot ngenikich emmwen fan iten fetalin manauach. Enlet, Jiowa a fen awora ngenikich ach tufichin silei me miritin letipach pwe sipwe silei minne mi pwung me minne mi mwaal. Nge a lamot ach sipwe emiriti miritin letipach fan iten an epwe emmweniochukich. (Ipru 5:14) Iwe, a lamot ngeni tupuach an epwe angei sile mi pwung—pwal ewe tufichin weweiti ekkewe poraus—fan iten ach sipwe filioch. (Än Salomon Fos 2:1-5) Iwe, inaamwo ika epwe ina ussun, nge sipwe tongeni filingau pokiten sise silei met epwe fis lon manauach. (Eklesiastis 9:11) Sise kon lien silei met epwe fis lon mwach kan.
2 Ren ekkeei popun me pwal ekkoch popun, ewe soufos Jeremaia a makkei: “Ua silei, O Jiowa, pwe aramas resap pwisin nemeni manauer. Esap pwal wisen aramas ar repwe emmweni ipwer.” (Jeremaia 10:23) Jises Kraist, ewe mwan mi lapalap seni meinisin mi fen manau won fonufan, a etiwa emmwen. A apasa: “Ewe Nau ese tongeni fori och seni pwisin i, pwe minne chok a kuna pwe ewe Sam a fori. Pun minne ewe Sam a fori, ikkena ekkewe ewe Nau a pwal fori ussun chok.” (Jon 5:19) Iwe, epwe eu alen tipatchem ach sipwe appiru Jises me kutta seni Jiowa alillis fan iten emmwenien manauach! King Tafit a eani ewe kol, a era: “Ren ewe Kot mi enlet, a unusoch an we al; alon Jiowa kkewe a fokkun murinno. A ussun chok eu tittin maun fan iten chokkewe meinisin mi op ren.” (2 Samuel 22:31) Ika sipwe akkachocho ngeni ach sipwe aleni alen Jiowa lap seni pwisin ach tipatchem, sipwe kuna emmwen mi unusoch. Ach oputa ewe alen Kot epwe emmwen ngeni kiteter.
Jiowa a Aiti Ngenikich ewe Al
3. Ifa ussun Jiowa a emmweni Atam me If, iwe, ifa ewe apilukuluk a awora ngenir?
3 Ekieki mwo ussun Atam me If. Inaamwo ika ra pin unusoch, nge a lamot ngenir emmwen. Jiowa ese awisa ngeni Atam an epwe pwisin filata mettoch meinisin minne epwe fis ngeni lon ewe malamalen Ichen mi lingoch. Kot a awora ngeni och angang pwe epwe fori. Akkom, Atam epwe wisen eita ngeni ekkewe man. Mwirin, Jiowa a ngeni Atam me If minne repwe akkachocho ngeni lon manauer. Repwe tumunu fonufan, auralo fonufan ren nour kkewe, me tumunu ekkewe man. (Keneses 1:28) Epwe eu wis mi watte, nge mwiriloon epwe eu fonufan mi ur ren aramas mi unusoch mi manaufengen ren ekkewe man fan kinamwe. Met ren eu apilukuluk mi amwarar! Pwal eu, atun Atam me If repwe fetal ren Jiowa, repwe tufichin porausfengen me Jiowa. (Alollo ngeni Keneses 3:8) Met ren aucheaan ena tufich—repwe tongeni ririoch ngeni ewe Chon Forir!
4. Ifa ussun Atam me If ra pwarata pwe ese naf ar tuppwol me lukuluk, iwe, ifa mwiriloon?
4 Jiowa a atufichi ngeni Atam me If ar repwe pwarata ar alleasochis me ar mochen fetal won alen Jiowa, ren an alluku ngenir pwe resap mongo seni ewe iraan silei och me ngau lon Ichen. (Keneses 2:17) Ekis chok fansoun nge ar alleasochis a kuna sossot. Lupwen Setan a eani an kkewe kapasen michimich, a lamot ngeni Atam me If ar repwe pwarata tuppwol ngeni Jiowa me eani lukuluk won An kkewe pwon ika repwe akkamwochu ar alleasochis. Sia lolilen le era pwe ese wor ar tuppwol me lukuluk won Jiowa. Lupwen Setan a ereni If pwe epwe tongeni ngaselo seni an Kot nemenem me a tipimwaal ngeni Jiowa pwe a kapas chofona, If a tupulo, iwe, a alleasolapa Kot. Atam a tapwelo mwirin ngeni tipis. (Keneses 3:1-6; 1 Timoti 2:14) A watte minne ra poutalo. Ika repwe feffetal ren Jiowa, epwe lapelo ar pwapwa le foffori letipan. Nge solapan pun manauer a ur ren lichipung me fansoun weires tori ar malo. —Keneses 3:16-19; 5:1-5.
5. Ifa an Jiowa kokkot fan iten mwach kkan, me ifa ussun a kan alisi aramas mi tuppwol pwe repwe kuna pwonuetaan?
5 Iwe nge, Jiowa ese likitalo an kokkot pwe eu ran ewe fonufan epwe wiliti eu paratis fan iten aramas mi unusoch. (Kol Fel 37:11, 29) Iwe, a awora ekkewe kapasen emmwen mi unusoch iteiten fansoun menisin ngeni ir kkewe mi feffetal won an we al me eani ewe apilukuluk pwe repwe kuna pwonuetaan ena pwon. Ren kich mi wor selingach pwe sipwe auseling, alon Jiowa a nom le sokuruch me apasa: “Iei ewe al, feffetal won, ami aramas.”—Aisea 30:21.
Ekkoch Ra fen Fetal Won Alen Jiowa
6. Ikkefa ekkewe ruuemon mwan lom lom mi feffetal lon alen Jiowa we, iwe, ifa mwiriloon?
6 Me ren ewe Paipel, chokisikis chok lein mwirimwirin Atam me If kkewe ra feffetal won alen Jiowa we. Apel, i ewe akkaemonun leir. Inaamwo ika a ninnilo, nge a kuna ewe chenin Jiowa me a nom ren ewe apilukulukun “manausefalin . . . ekkewe mi pwung” lon ewe fansoun Kot epwe filata. (Foffor 24:15) Epwe kuna pwonuetaan otaen Jiowa mi lapalap fan iten ewe fonufan me aramas. (Ipru 11:4) Pwal emon mi feffetal ren Jiowa, ina i Inok, iwe, an we oesini ussun muchuloon ei ototen mettoch a mak lon ewe puken Juta. (Juta 14, 15) A pwal mwochomwoch manauan. (Keneses 5:21-24) Nge, “a fen itoch, pwe a apwapwai Kot.” (Ipru 11:5) Lupwen a malo, ir me Apel ra eani ewe apilukulukun manausefal, iwe, epwe nom lein ir kewe repwe kuna pwonuetaan an Jiowa we kokkot.
7. Ifa ussun Noa me an famili ra pwarata tuppwol me lukuluk won Jiowa?
7 Atun a ngangauelo lapalapen aramasen fonufan lon ewe fansoun mwen an a fis ewe noter, alleasochis ngeni Jiowa a kan wiliti eu sossot ngeni an aramas tuppwol. Lupwen a tori muchuloon ena fonufan, chokisikis chok ra feffetal ren Jiowa. Noa me an we famili ra auseling ngeni Kot me eani lukuluk won minne a apasa. Fan tuppwol ra apwonueta ekkewe angang a isetiu mwer me tuttumunur seni an ena fonufan foffor mi ngau. (Keneses 6:5-7, 13-16; Ipru 11:7, 2 Piter 2:5) Sipwe tongeni meefi kilisou pokiten ar tuppwol me alleasochis. Pokiten ar tuppwol, ra ngaselo seni ewe noter me ra wiliti samasamach kewe.—Keneses 6:22; 1 Piter 3:20.
8. Ren ewe muun Israel, met a kapachelong lon ar feffetal won alen Jiowa we?
8 Lo, lo, lo, Jiowa a eani eu pwon ngeni mwirimwirin Jekop kewe mi tuppwol, iwe, ra wiliti an we muu mi sokkolo aucheaan. (Ekistos 19:5, 6) Jiowa a awora ngenir emmwen ren ewe Alluk, ewe kkotun samol-fel, me ekkewe oesini. Nge filien ekkewe chon Israel ika repwe alleasochis. Jiowa a amwokutu noun we soufos pwe epwe ereni ekkewe chon Israel: “Nengeni, ikenai ua anomu mwemi feioch me anumaumau. Oupwe feioch are oupwe alleasochis ngeni an Jiowa ami we Kot kkewe alluk ua ngenikemi ikenai. Nge oupwe anumaumau, are oupwe alleasolap ngeni an Jiowa ami we Kot kkewe alluk, are oupwe tok seni ekkeei alluk ua ngenikemi ikenai o fel ngeni pwal ekkoch kot ouse sileer me lom.”—Tuteronomi 11:26-28.
Pwata Ekkoch ra Likitalo Alen Jiowa we
9, 10. A lamot ngeni ekkewe chon Israel ar repwe eani lukuluk won Jiowa me amarata ar tuppwol ngeni pokiten menni poraus?
9 Ussun chok Atam me If, a lamot ngeni ekkewe chon Israel ar repwe eani lukuluk won Jiowa me tuppwol ngeni ika repwe akkamwochu ar alleasochis. Ewe muun Israel a chok kukkun me ekkewe ekkoch muu mi pwellir ra oputer. Isip me Itiopia ra nonnom ngeni notouar me Siria me Asiria ra nonnom otiuafen. Unukur a nonnom ekkewe chon Filistia, Ammon, Moap, me Itom. Lon ekkoch fansoun, eu me eu ekkena muu ra u ngeni Israel. Pwal eu, ir meinisin ra eani fel mi chofona, fel ngeni ululun, fel ngeni ekkewe fuu, me fan ekkoch epwe fis lisou-mwaal me asorun semirit. Ekkewe ekkoch muu ra kutta seni ar kot pwe repwe awora ngenir watten ar kewe famili, fansoun ras mi murinno, me winner lon maun.
10 Ekkewe chok chon Israel ra fel ngeni emon chok Kot, Jiowa. A pwon ngenir ekkewe feiochun famili watte, ras mi murinno, me tumun seni ekkewe chon u ngenir ika repwe alleasochisi an kkewe alluk. (Tuteronomi 28:1-14) Iwe nge, chommong lon ewe muun Israel rese fori ena mettoch. Ren ir kewe mi feffetal me Jiowa, chommong leir ra kuna riaffou pokiten ar tuppwol. Ekkoch ra kuna riaffou, esiit, kawet, kalapus, an aramas monei ngenir fau, me ninnilo seni chiener kewe chon Israel. (Foffor 7:51, 52; Ipru 11:35-38) A watte sossotun ar tuppwol! Iwe nge, chommong ra toko seni alen Jiowa we! Ruu poraus lon uruwoon Israel epwe alisikich ach sipwe weweiti ar ekiek-mwaal.
An Ahas Leenien Appiru mi Ngau
11, 12. (a) Lupwen Siria epwe maun ngeni, ifa ewe mettoch Ahas ese mochen fori? (b) Ahas a kutta alillis seni io kkewe?
11 Ahas a nemeni ewe muun Juta mi nonnom lon pekin or lon ewe awanuen senturi B.C.E. Ese kinamwe an nemenem. Lon eu fansoun, Siria me ewe muun Israel mi nonnom ennefen ra tipeeufengen pwe repwe maun ngeni, iwe, “a niuokus letipan me letipen noun kewe aramas.” (Aisea 7:1, 2) Iwe, lupwen Jiowa a awora an alillis me etiwa Ahas an epwe sotuni i, Ahas ese mochen! (Aisea 7:10-12) Mwiriloon, a kuf ewe muun Juta me a ninnilo chommong.—2 Kronika 28:1-8.
12 Inaamwo ika Ahas ese mochen pii ika Jiowa epwe alisi i, nge a kutta alillis seni ewe kingen Asiria. Iwe nge, a sopweilo an ewe muun Juta kuna riaffou seni ekkewe ekkoch muu. Lupwen Asiria a pwal u ngeni Ahas me “eriaffou i,” ewe king “a poputa le eani asor ngeni ekkewe koten Tamaskos mi efisata an riaffou, iwe, a apasa: ‘Pokiten ekkewe koten ekkewe kingen Siria ra alisir, ngang upwe asor ngeniir pwe repwe pwal alisiei.’”—2 Kronika 28:20, 23.
13. Ifa ewe mettoch Ahas a pwarata lupwen a kutta alillis seni ekkewe koten Siria?
13 Lon pwal eu fansoun, Jiowa a apasa ngeni Israel: “Ngang, Jiowa, ami Kot, ewe Emon mi aiti ngenikemi minne oupwe feioch ren, ewe Emon mi emmweni ngonuk ewe al oupwe feffetal won. Amwo oupwe auselinga ai kewe alluk! Iwe, ami kinamwe epwe ussun chok eu chanpupu, me ami pwung epwe ussun chok nomongun lematau.” (Aisea 48:17, 18) Ren an kul ngeni ekkewe koten Siria, Ahas a pwarata ifa ukukun touauen an ‘feffetal won ewe al epwe ita fetal won.’ A unusen michilo ren ekiekin ekkewe ekkoch muu, iwe, a kutta alillis seni ar kewe kot chofona nge sap Jiowa.
14. Pwata a fokkun mwaal an Ahas kutta alillis seni ekkewe kot chofona?
14 A fen pwapwalo pwe a “lamot-mwaal” koten ekkewe ekkoch muu, pachelong ekkewe koten Siria. (Aisea 2:8) Me mwan we, lon fansoun muun King Tafit, a ffat pwe Jiowa a lapalap seni ekkewe koten Siria lupwen ekkewe chon Siria ra wiliti noun Tafit kewe chon angang. (1 Kronika 18:5, 6) Jiowa chok, “ewe Koten ekkewe kot me Samolun ekkewe samol, ewe Kot mi tekia o manaman pwal eniuwokus,” epwe tongeni awora lukulukoch. (Tuteronomi 10:17) Iwe nge, Ahaz a sape seni Jiowa me a kutta lukulukoch seni koten ekkewe ekkoch muu. Iwe, mwiriloon, a watte feiengauen ewe muun Juta.—2 Kronika 28:24, 25.
Ekkewe Chon Jus Ren Jeremaia lon Isip
15. Ifa ussun ekkewe chon Jus lon Isip lon fansoun Jeremaia ra tipis?
15 Pokiten alleasolapen noun kewe aramas lon 607 B.C.E., Jiowa a mut ngeni ewe chon Papilon ar repwe ataielo Jerusalem me an we imwenfel. Lap ngeni ekkewe chon Israel meinisin, ir chon eolo lon Papilon. Nge ra mut ngeni ekkoch ar repwe nonnom, iwe, Jeremaia emon leir. Lupwen ewe Kepina Kedalaia a ninnilo, chokana ra su ngeni Isip, iwe, ra uweialo Jeremaia pwe epwe fitir. (2 King 25:22-26; Jeremaia 43:5-7) Ikkewe ie ra poputa le eani asor ngeni ekkewe kot chofona. Jeremaia a achocho le apwungu ekkewe chon Jus mi alleasolap, nge ra lukumach. Rese fokkun mochen kul ngeni Jiowa me apasa pwe repwe chok keni apach mi pwokus ngeni ewe “kiwinen lang.” Pwata? Pun ina ewe mettoch ir me samasamer kkewe ra pin foffori ‘lon ekkewe telinimwen Juta me lon alen Jerusalem kewe, lon ewe fansoun a wor chommong aner mongo, ra feffeita, me esor ar feiengau.’ (Jeremaia 44:16, 17) Ekkewe chon Jus ra pwal apasa: “Seni ewe fansoun am aua ukutiu le keni apach mi pwokus ngeni ewe kiwinen lang o kaulo le ninatiu ngeni asoren un, am aua osupwangen mettoch meinisin, aramas ra malo lon maun pwal lengita.”—Jeremaia 44:18.
16. Pwata a fokkun mwaal ekiekin ekkewe chon Jus lon Isip?
16 Aramas ra chok filata minne repwe mochen chechemeni! Ikkefa ekkewe poraus mi enlet? Ekkewe chon Jus ra eani asor ngeni ekkewe kot chofona lon ewe fonu Jiowa a ngenir. Fan ekkoch, awewe chok lon fansoun Ahas, ra kuna feiengau pokiten ar rikilo seni Kot. Iwe nge, Jiowa a “mang le song” ngeni noun kewe aramas mi kefil. (Ekistos 34:6; Kol Fel 86:15) A tinalo noun kewe soufos pwe repwe peser ar repwe aier. Fan ekkoch, lupwen ewe king epwe tuppwol, Jiowa a efeiochu, me ekkewe aramas ra pwal kuna alillis seni ena feioch, inaamwo ika lap ngenir meinisin rese tuppwol. (2 Kronika 20:29-33; 27:1-6) Ekkewe chon Jus lon Isip ra mwaal ren ar repwe apasa pwe ar kkewe feioch lon wesetan fonuer a popu seni ar kkewe kot chofona!
17. Pwata a pout seni Juta fonuan me an we imwenfel?
17 Mwen 607 B.C.E., Jiowa a pesei ewe chon Juta: “Oupwe alleasochisiei, iwe, ngang upwe wiliti ami Kot, me ami oupwe wiliti nei kkewe aramas. Iwe, oupwe fetal won ewe al ngang upwe alluku ngenikemi pwe oupwe kuna feioch ren.” (Jeremaia 7:23) A pout seni ekkewe chon Jus ar we imwenfel me fonuer pokiten rese mochen fetal ‘won ewe al Jiowa a alluku ngenir.’ Sipwe tuttumunu pwe sisap pwal fori ena foffor-mwaal mi atoto malo.
Jiowa a Efeiochu Ekkewemi Fetal Won An we Al
18. Ifa ewe mettoch mi lamot ngeni ir kewe mi feffetal won alen Jiowa we ar repwe foffori?
18 Ikenai, ussun chok me lom, ach feffetal lon alen Jiowa we epwe wewe ngeni ach sipwe tuppwol—ach tipeppos le angang ngeni i chok. Epwe wewe ngeni ach sipwe eani lukuluk—sipwe unusen lukuluk pwe a enlet an Jiowa kkewe pwon me epwe wesewesen pwonueta. Ach feffetal ren Jiowa epwe wewe ngeni alleasochis—ach sipwe alleasochisi an kkewe alluk nge sisap rikilo seni ach sipwe akkamwochu an kkewe alluk mi tekia. “Jiowa mi pwung; a tongei ekkewe foffor mi pwung.”—Kol Fel 11:7.
19. Ikkefa ekkewe kot chommong aramas ra fel ngeni ikenai, me ifa mwiriloon?
19 Ahas a kutta lukulukoch seni ekkewe koten Siria. Atun ekkewe chon Israel ra nonnom lon Isip, ra eani apilukuluk pwe ewe “kiwinen lang” ewe finesamol aramas ra kan fel ngeni lon ewe Middle East me lom, epwe apisekisekir. Ikenai, sap minne chommong kot, ir wesewesen ululun. Jises a ouroura pwe sisap angang ngeni “Mammon” nge sap Jiowa. (Mattu 6:24) Ewe aposel Paul a kapas ussun “tipemmong, ewe sokkun ekiek ussun chok fel ngeni ununun.” (Kolose 3:5) A pwal kapas ussun ekkewe aramas mi eani “kot luker.” (Filipai 3:19) Ewer, moni me pisek, ir ra nonnom lein ekkewe kot chommong aramas ra kan fel ngeni ikenai. Pwungun pwe lap ngeni aramas meinisin—pwal chommong chon lamalam—‘ra apilukuluku pisek mi epwe morelo.’ (1 Timoti 6:17) Chommong ra angang weires fan iten ar angang ngeni ekkena kot, iwe, ekkoch ra kuna feioch seni ren ar imweni ekkewe imw mi murinno seni meinisin, ar pwapwaiti ekkewe pisek mi mommong, me mommongo chommong aner mongo mi anno. Iwe nge, sap minne meinisin ra tufichin manaueni ena sokkun manau. Iwe, lo, lo, lo, pwal mwo nge ir kewe mi pisekisek rese pwapwaesini manauer. er. Repwe tongeni morelo, resap nonnomottam, me rese pwakini an aramas kewe osupwang lon pekin ngun.—Mattu 5:3.
20. Ifa ewe ekiek pwung a lamot ach sipwe akkamwochu?
20 Pwungun, mei lamot ach sipwe mirit atun sipwe manau lon ekkeei ranin le sopwolon. Sipwe foffori minne epwe atufichi ach kewe famili lon pekin inis. Iwe nge, ika sipwe akkomwa kinamween manauach, chechchei moni me pisek lap seni ach angang ngeni Kot, sipwe turulo lon och sokkun fel ngeni ululun, iwe, sisap chuen feffetal won alen Jiowa we. (1 Timoti 6:9, 10) Iwe nge, epwe ifa ussuch ika epwe torikich semmwen, nafangauen moni, are pwal ekkoch osukosuk? Sisap ussun chok ekkewe chon Jus lon Isip mi tipi ngeni ar kewe osukosuk won ar angang ngeni Kot. Iwe nge, sipwe sotuni Jiowa, nge ina ewe mettoch Ahas ese fori. Ren tuppwol sipwe kul ngeni Jiowa Kot pwe epwe emmwenikich. Ren lukuluk, sipwe akkapwonueta an kewe kapasen emmwen, me iotek fan iten pochokkul me tipatchem pwe sipwe foffori minne mi pwung. Mwirin, sipwe lukulukoch le witiwiti an Jiowa feioch.
21. Ikkefa ekkewe feioch epwe tori ir kewe mi feffetal won alen Jiowa we?
21 Lon uruwoon Israel, Jiowa a efeiochu ir kewe mi feffetal won an we al. King Tafit a eani ewe kol: “O Jiowa, emmweniei lon om pwung, pokiten ekkewe chon oputaei.” (Kol Fel 5:8) Iwe, Jiowa a ngeni winnan lon an maun ngeni ekkewe ekkoch muu, ekkewe mi aosukosuka Ahas mwirin. Fan nemenien Salomon, Israel ra kuna feiochun kinamwe me lukulukoch, ekkewe mettoch ekkewe chon Jus lon Isip repwe kutta mwirin. Ren noun Ahas we, Hesikaia, Jiowa a pwal mwo nge ngeni winnan lon an maun ngeni Asiria. (Aisea 59:1) Ewer, ese mwochomwoch poun Jiowa ngeni noun kkewe mi tuppwol, ir kewe rese “uta lon alen aramas mi tipis” nge repwe pwapwaiti allukun Kot kkewe. (Kol Fel 1:1, 2) A chuen enlet ena poraus. Iwe nge, ifa ussun sipwe tongeni luku pwe sia kkan aleni alen Jiowa we? Ina ewe poraus epwe katou lon ewe lesen mwirin.
En mi Chechemeni?
◻ Ikkefa ekkewe lapalap a lamot ngenikich ika sipwe feffetal won alen Jiowa we?
◻ Pwata a mwaal ekiekin Ahas?
◻ Ifa mwaallin ekiekin ekkewe chon Jus lon Isip?
◻ Ifa ussun sipwe tongeni apochokkulata ach tipeppos le feffetal won alen Jiowa we?
[Sasing lón pekin taropwe 21]
Ahas a kutta alillis seni ekkewe koten Siria lap seni Jiowa