Ewe Mwichefelin Kraist Eu Minen Apochokkula Aramas

POPI, emon fefin mi lap seni ier ruwe, a osukosuk pokiten och lapalap mi eriaffou lon an famili, nge mi weneiti nafangauen porausfengen lefiler me seman me inan.a Mwirin an awewei meefian ngeni emon elter me puluwan we, iei makkeien neminnewe ngenir: “Kilisou ngenikemi ren ami awora ewe fansoun le fos ngeniei. Ami ouse silei ukuukun ai aucheani ami alillis ngeniei. Ua kilisou ngeni Jiowa ren an awora ngeniei aramas ua tongeni eani lukuluk won me fos ngeni.”

Toula, emon fefin mi ma seni puluwan kanoto chok, nge a wor noun ruuemon sarafo, a kuna watteen osukosuk lon letipan me pwal lon pekin moni. Eu pean chon Kraist mi pupulu lon ewe mwichefel ra chuchchuuri neminnewe me noun kkewe, iwe, ra pochokkuleta ren. Mwirin an pwakini an osukosuk, a tinalo ngenir echo taropwe, iwe, a apasa: “Fansoun meinisin ua chechchemikemi lon ai kkewe iotek. Ua chechchemeni pwe fan chommong oua peniei me apochokkulaei.”

Fan ekkoch ka meefi pwe ka “choutiu” ren lapaloon mettoch mi aweires lon ei fonufan? (Mattu 11:28) Ka fen meefi cheuch lon letipom pokiten “fansoun me minne sise ekiekin kuna” a kku manauom? (Eklesiastis 9:11) Iwe, sap minne en alaemon chok. Nge ussun fite ngerou chon riaffou ra fen kuna, en mi pwal tongeni kuna alillis mi auchea lon ewe mwichefelin Chon Pwarata Jiowa. Lon ewe aewin senturi C.E., ewe aposel Paul a kuna pwe ekkoch chienan kkewe chon luku ra akkaewin eu “minen apochokkul” ngeni i. (Kolose 4:10, 11) En mi pwal tongeni kuna ena sokkun alillis.

Minen Apochokkul me Alillis

Lon ewe Tesin Kriik, ewe kapas “mwichefel” a affou seni ewe kapasen Kriik ek·kle·siʹa, nge a wewe ngeni eu mwichen aramas mi mumufengen. Ewe ekiekin lukulukfengen me ririfengen a pwal chu ngeni ena kapas.

Ewe mwichefelin Kraist a kan amwochata ewe enlet lon ewe Kapasen Kot me a ekkesilefeili ewe poraus allimen an we Muu. (1 Timoti 3:15; 1 Piter 2:9) Iwe nge, ewe mwichefel a pwal apochokkula me alisi ir mi choni. Lon ewe mwichefel, sipwe kuna eu mwichen chiechi mi pwarata tong me tumun, iwe, ra uwonuk le alisi me oururu aramas lon fansoun weires.​—2 Korint 7:5-7.

Fansoun meinisin chon fel ngeni Jiowa ra fen kukkuna tumun me lukulukoch lon an mwichefel. Ewe chon makkei kol fel a pwarata pwe a kuna chengel me lukulukoch lein noun Kot kkewe aramas mi mwichfengen. (Kol Fel 27:4, 5; 55:14; 122:1) Pwal ussun chok ikenai, ewe mwichefelin Kraist eu mwichen chon luku mi akkaufichieta me akkapochokkula emon me emon leir.​—Än Salomon Fos 13:20; Rom 1:11, 12.

Chon ewe mwichefel ra kan kait pwe repwe “akkapwonueta minne mi murinno ngeni meinisin, nge akkaewin ngeni ir mi riri ngenir lon ewe luku.” (Kalesia 6:10) Minne ra kaeo seni Paipel a amwokutur pwe repwe pwarata tongen pwipwi lefiler. (Rom 12:10; 1 Piter 3:8) Letipen ekkewe brother me sister lon pekin ngun lon ewe mwichefel a kan amwokutur pwe repwe pwarata umoumoch, kinamwe, me tong. (Efisus 4:3) Sap minne ra chok mwichfengen pwe repwe fel ngeni Kot, nge ra pwal pwarata ar tongei aramas.​—Jemes 1:27.

Ina popun, lon ewe mwichefel, ekkewe mi letipechou ra kan kuna ewe sokkun ririoch a kan nom lon famili. (Mark 10:29, 30) Ar meefi pwe ir chon eu kumi mi ririoch me pwipwioch a kan apochokkulereta. (Kol Fel 133:1-3) Ren ewe mwichefel, “ewe chon angang mi tuppwol me tipachchem” a akkawora “mongo lon fansoun mi fich.”​—Mattu 24:45.

Alillis Seni Chon Mas mi Tong

Chon ewe mwichefelin Kraist ra tongeni ekiekin kuna chon mas mi tong, wewefich, me lipwakoch lon ewe mwichefel, iwe, repwe awora minen apochokkul me alillis lon pekin ngun. Ekkewe chon mas mi eani ekkena lapalap ra ussun “eu leenien chuno seni ewe asapwal me eu leenien op seni ewe molumol.” (Aisea 32:1, 2) Ekkewe elter mi seikita me ren ewe ngun mi fel, are chon mas, ra kan tuttumunu noun Kot kkewe aramas mi ussun siip, ra akkapochokkula ir mi samau me letipechou, me ra achocho le aliwinisefalli ir mi fen mwaallilo.​—Kol Fel 100:3; 1 Piter 5:2, 3.

Pwungun pwe ewe mwichen elter lon ewe mwichefel esap eu kumiin sou silelap are tokter mi tufichin achikara chiener kkewe chon luku mi samau lon pekin aion are ekiek. Lon ei otot minen lom, mi chuen lamot ngeni chon samau “emon tokter.” (Luk 5:31) Iwe nge, ekkena chon mas repwe tongeni alisi ir mi osupwang lon pekin ngun. (Jemes 5:14, 15) Ika pwe mi tufich, ekkewe elter ra pwal akkota pwal ekkoch alillis.​—Jemes 2:15, 16.

Io a fforatiu ena sokkun kokkot mi tong? Jiowa Kot pwisin! Ewe soufos Isikiel a makkei alon Jiowa ei: “Upwe kutta nei kkewe siip me tuttumunur. . . . Upwe ioniir seni ekkewe leeni meinisin ra fen toropaselo lon . . . Upwe pwisin amongou nei kkewe siip, me upwe pwisin akoneretiu.” Kot a pwal tongei ekkewe siip mi aiengau me apwangapwang.​—Isikiel 34:11, 12, 15, 16.

Alillis mi Lukuchar lon Fansoun mi Fich

Epwe tongeni wor alillis mi lukuchar lon ewe mwichefelin Kraist? Ewer, iwe, ekkan poraus fan ra affata ekkewe lapalap mi sokkopat ewe mwichefel epwe tufichin awora alillis ren.

◆ Maloon emon attongach. Puluwen Anna we a malo mwirin an uri eu samau mi chou. Neminnewe a apasa pwe “Mwirin, ua fen kuna watte tong seni ewe mwichen pwipwi lon Kraist. Ai rongorong kapasen apochokkul me pesepes seni chienei kkewe chon luku, pachelong ar foropacheiei, a fen apochokkula letipei, iwe, use unusen letipeta, me ua kilisou ngeni Jiowa. Ar tong a fen ameef ngeniei pwe a wor chon peniei, chon aufichieita, me chon tumunuei.” Eli pwal en mi fen kuna letipechoun an a ma sonuk emon attongom. Lon ena sokkun fansoun, chon ewe mwichefel ra tongeni oururu aramas me apochokkula letiper.

◆ Samau. Arthur, emon chon mas seni Poland, nge mi saifetal, a chuchchuuri ekkewe mwichefel lon Central Asia pwe epwe apochokkulereta lon pekin ngun. Atun eu an sai, a uri samau watte iwe, atun an chikareta, a mmen watte an apwangapwang. Ren watteen an kilisou, Arthur a apasa pwe “Ua mochen erenikemi ifa ussun ekkewe brother me sister lon [eu telinimw lon Kazakhstan] ra alisiei. Ekkewe brother me sister, nge use silei chommong leir, me pwal mwo nge chon kaeo, ra uwouto moni, mongo, me safei. . . . Nge ra mmen chengel le alisiei.

“Ekieki mwo watteen ai kilisou lupwen a war echo futo, nge masouan, och moni me ei taropwe mi apasa: ‘Pwii achengicheng, ua tinalo ngonuk ai kapong mi fiti tong. Mama a ngeniei och moni ren ais kirim, nge ua ekiekieta pwe upwe ngonuk fan iten safei. Amwo kopwe muttir chikareta. A lamot ngeni Jiowa pwe sipwe angang ngeni fansoun langattam. Ua aneanei om kopwe pochokkuleta. Kopwe pwal awewei ngenikem poraus mi murinno me alillisoch. Vova.’” Ewer, ussun sia kuna lon ena poraus, ekkewe kukkun me chinnap lon ewe mwichefel ra tongeni apochokkulakich lon fansoun samau.​—Filipai 2:25-29.

◆ Letipechou. Teri a mochen epwe likiitu lon ewe angangen pioneer, are chon afalafal fan iten ewe Muu full-time. Iwe nge, pokiten a wor an osukosuk, neminnewe a ukutiu seni. A apasa pwe “Ua meefi watte mengiringir ren ai sotuni le pioneer, nge esaamwo tori eu ier.” A mwaal an Teri luku pwe an Jiowa pwapwaiti i a kan longolong won chok ewe ukuukun fansoun neminnewe epwe tongeni angang ngeni. (Pi lollofesenin Mark 12:41-44) Pokiten a kon letipechou, a kaimulo seni aramas. Nge alillis a war seni ewe mwichefel.

Teri a chechchemeni pwe “Emon pioneer sister mi watte ierin a mutttir alisiei me a auseling ngeniei lupwen ua uwawu meefiei. Lupwen ua lo seni imwan we, ua meefi pwe och mettoch mi chou a fen kekilo me woi. Seni ena fansoun, ena pioneer sister me puluwan we, nge i emon elter lon ewe mwichefel, ra awora alillis mi auchea. Iteiten ran ra telephone ngeniei pwe repwe piei. . . . Fan ekkoch ra etiwaei pwe upwe fiti ar famili study, iwe, a affata lamoten an ekkewe famili ririoch fansoun meinisin.”

Chommong aramas, pwal mwo nge chon Kraist mi fen fangolo manauer ngeni Kot, ra meefi letipechou, lichipwung, me tipeppos. Epwe ifa me watteen ach kilisou pwe mi kawor alillis mi fiti tong me umoumoch lon an Kot mwichefel!​—1 Tesalonika 5:14.

Mwirin om kuna ena sokkun alillis, eli kopwe pwal aloni alon emon fin Kraist mi pwakini an kkewe osukosuk lupwen puluwan we a uri och samau watte, iwe, iei makkeian: “Pokiten ewe tong me tumun mi torikem, ua meefi pwe Jiowa a amwochukem le poun lon ei fansoun watte osukosuk. A ifa me watteen ai kilisou pokiten ua nonnom lon an Jiowa we mwicheich mi lingemwarar!”

[Footnote]

[Ekkewe sasing lón pekin taropwe 30]

Sipwe tongeni awora alillis mi apochokkulata ir mi samau, ir mi ma senir attonger, me pwal io kkan mwo