Met Jiowa A Kutta Senikich Ikenai?

“Och mongungu me lon ewe kuchu a [apasa]: ‘Iei nei at mi achengicheng rei, ua unusen pwapwa ren. Oupwe auseling ngeni.’”​—MATTU 17:5.

1. Inet a pwonueta popun ewe Alluk?

JIOWA a ngeni muun Israel ewe Alluk, mi wor chommong kinikinin. Ewe aposel Paul a mak ussur: “Ra chok lamot ngeni ar mongo o un o sokkun totol, usun chok alluk ren inisich mi isetiu tori ewe fansoun epwe awenechara mettoch meinisin.” (Ipru 9:10) Lupwen a emmweni lusun ekkewe chon Israel pwe repwe nguuri Jises ewe Messaia, are Kraist, a apwonueta popunlapan. Ina minne, Paul a apasa: “Kraist mi sopwolon ewe Alluk.”​—Rom 10:4; Kalesia 3:19-​25; 4:4, 5.

2. Io kkewe ra nonnom fan ewe Alluk, me inet ra ngaselo seni?

² Ita weween pwe ewe alluk esap weneitikich ikenai? Pwungun pwe lap ngeni aramas meinisin rese fen nom fan ewe Alluk fan eu, ussun ewe sou kol a awewei: “[Jiowa] a arongafeili an kapas ngeni Jekop, an kkewe alluk me an kkewe afalafal ngeni Israel. Ese fori iei ussun ren pwal eu muu, ekkewe ekkoch rese silei an kkewe alluk.” (Kol Fel 147:19, 20) Lupwen Kot a foretiu ewe alluk mi fo mi popu seni ewe asorun Jises, pwal mwo nge ewe muun Israel ese chuen nom fan nemenian pwe repwe alleasochis ngeni. (Kalesia 3:13; Efisus 2:15; Kolose 2:13, 14, 16) Ika ese chuen pochokkul woch ewe alluk, ifa ewe mettoch Jiowa epwe kutta seni ir kkewe mi mochen angang ngeni ikenai?

Ewe Mettoch Jiowa A Mochen Sipwe Fori

3, 4. (a) Met Jiowa a kan kutta senikich ikenai? (b) Pwata sipwe tapwelo mwirin lon ipwen Jises?

³ Lon ewe amuchuloon ierin an Jises angangen afalafal, noun kkewe aposel Piter, Jemes, me Jon ra fiti i won eu chuuk mi tekia, eni ina eu kinikinin ewe Chuuk Ermon. Ikkewe ie ra kuna eu langepwi ussun Jises lon eu ling mi amwarar me rongorong leuwen Kot mi apasa: “Iei Nei at mi achengicheng, ua unusen pwapwa ren. Oupwe auseling ngeni.” (Mattu 17:1-5) Iwe, ina ewe mettoch Jiowa epwe kukkutta senikich​—ach sipwe auseling ngeni Noun we me tapwelo mwirin an we leenien appiru me an kkewe afalafal. (Mattu 16:24) Ina minne, ewe aposel Piter a makkei: “Kraist a pwal kuna riaffou fan asengesimi, o a isetiu eu leenien appiru mwemi, pwe ami oupwe tapwelo mwirin lon ipwan.”​—1 Piter 2:21.

⁴ Pwata sipwe tapwelo mwirin lon ipwen Jises kewe? Popun, pun ren ach sipwe akkappiru i, sipwe akkappiru Jiowa Kot. Jises a sileifichi ewe Sam, pun a nonnom ren fite fite pillion ier lon lang mwen an a feitiu fonufan. (Proferp 8:22-31; Jon 8:23; 17:5; Kolose 1:15-17) Atun a nonnom won fonufan fan tuppwol Jises a tupuni Seman we. A awewei: “Ussun chok ewe Sam a aiti ngeniei, ua kapas ussun ekkeei mettoch.” Pwungun pwe pokiten Jises a wesewesen akkappiru Jiowa, a tongeni apasa: “Ewe mi kunaei a pwal kuna ewe Sam.”​—Jon 8:28; 14:9.

5. Ekkewe Chon Kraist ra nonnom fan menni alluk, me inet a poputa pochokkulen ewe alluk?

⁵ Met weween ach sipwe auseling ngeni Jises me akkappiru i? Epwe ita wewe ngeni ach sipwe nonnom fan eu alluk? Paul a makkei: “Use chuen nom fan ewe alluk.” Iwe, a kapas ussun “ewe pwonen allukun lom,” ewe Alluk Kot a ngeni Israel. Paul a pwarata pwe a “nom fan ewe allukun Kraist.” (1 Korint 9:20, 21; 2 Korint 3:14) Le muchuloon ewe Allukun lom, a poputa eu “pwon mi fo” eti an we “allukun Kraist” ekkewe chon angangen Kot meinisin ikenai repwe alleasochisi.​—Luk 22:20; Kalesia 6:2; Ipru 8:7-​13.

6. Met sipwe tongeni apasa ussun “ewe allukun Kraist,” me ifa ussun sipwe alleasochis ngeni?

⁶ Jiowa ese fori pwe “ewe allukun Kraist” epwe makketiu won taropwe me akotetiu lon fitu kinikinin ussun an a fen fori ren ewe Allukun lom. Ena minefon alluk fan iten noun Jises kkewe chon kaeo ese wor chommong alluk mi titchik ren minne repwe fori me minne resap fori. Iwe nge, lon an we Kapas, Jiowa a isoni ruanu poraus mi unus ussun manauen Noun we me an kkewe afalafal. Pwal eu, Kot a amwokutu ekkoch noun Jises kkewe chon kaeo lom lom pwe repwe makkei ekkewe kapasen emmwen ussun fofforun aramas, ekkewe angang lon ewe mwichefel, ekkewe foffor lein chon eu famili, me pwal ekkoch poraus. (1 Korint 6:18; 14:26-35; Efisus 5:21-33); Ipru 10:24, 25) Lupwen sipwe atipeeufengenni manauach ngeni an Jises leenien appiru me an kkewe afalafal, me akkapwonueta ekkewe kapasen fon an ekkewe sou makkei ekkewe puken Paipel lon ewe aeuin senturi, sipwe alleasochisi “ewe allukun Kraist.” Jiowa a kutta ekkena mettoch seni noun kkewe chon angang ikenai.

Lamoten ewe Lapalapen Tong

7. Ifa ussun Jises a apochokkula longolongun an we alluk ren noun kkewe aposel atun a fis ewe amuchuloon Pasofer?

⁷ Inaamwo ika a lamot ewe lapalapen tong fan ewe Alluk, nge ina wesewesen longolongun are ewe mettoch mi lamot lap seni meinisin lon ewe Allukun Kraist. Ei mettoch a pochokkululo ren Jises lupwen a chuufengen me noun kewe aposel pwe repwe fori ewe Pasofer lon 33 C.E. Me ren an ewe aposel Jon poraus ussun minne a fis lon na pwinin, fan 28 Jises a kapas ussun tong. A menlapei minne a lamot are ngunun an we alluk ngeni noun kkewe aposel. Ina minne, Jon a poputani makkeian ussun minne a fis lon na pwinin ren an apasa: “Iwe, pokiten a fen silei mwen ewe fetellapen Pasofer pwe a tori ewe fansoun an epwe feilo seni fonufan ngeni ewe Sam, Jises, emonewe mi tongei noun kewe won fonufan, a tongei ir tori le sopwolon.”​—Jon 13:1.

8. (a) Met a pwarata pwe a sopwosopwolo tipefesen lein ekkewe aposel? (b) Ifa ussun Jises a aiti ngeni noun kkewe aposel eu lesen ussun ewe lapalap tipetekison?

⁸ Jises a tongei noun kkewe aposel, inaamwo ika ese tongeni wesewesen alisir ar repwe pworaiti ar mocheniaiti manaman me nemenem. Fitu maram me mwen ar wareiti Jerusalem, ‘ra aninifengen lefiler ika ion leir mi lapalap.’ Iwe, me mwen chok ar ra tori ewe telinimw fan iten ewe Pasofer, a fissefal ar aninifengen ussun wiser. (Mark 9:33-37; 10:35-45) A pwapwalo pwe ena osukosuk a chok sopwosopwolo ren minne a fis ekis chok fansoun mwirin an ekkewe aposel tolong lon ewe ruum asan pwe repwe forfengenni ewe amuchuloon Pasofer. Lon na fansoun, esor emon leir a fori minne ra eoreni ren ar repwe tolu pechen ekkewe ekkoch. Ren an epwe aiti ngenir eu lesenin tipetekison, Jises a pwisin tolu pecher kkewe.​—Jon 13:2-​15; 1 Timoti 5:9, 10.

9. A ffet Jises pokiten minne a fis mwirin ewe amuchuloon Pasofer?

⁹ Inaamo ika ra kuna ewe lesen, nge mwirin an a fis ewe Pasofer me Jises a foratiu ewe Achechemenien an we malo mi chok kanoto, nengeni met a fissefal. Lon ewe puken Luk a apasa: “Iwe, a poputa aninifengen lefiler ussun io leir mi lapalap.” Jises ese song are kapas pochokkul ngeniir, nge ren kirikiroch a fonour ussun ewe lamoten ar repwe sokko seni ekkewe sou nemenemen fonufan mi efich ar samoluni aramas. (Luk 22:24-27) Iwe, lon na fansoun a ngenir minne sipwe tongeni eita ngeni longolongun ewe allukun Kraist ren an a apasa: “Ua ngenikemi eu alluk mi fo, pwe oupwe tongfengen lefilemi; ussun chok ua tongeikemi, oupwe pwal tongfengen lefilemi.”​—Jon 13:34.

10. Ifa ewe alluk Jises a ngeni noun kkewe chon kaeo, me met weween ngeniir?

¹⁰ Ekiselo mwirin lon na pwinin Jises a aiti ngenir ifa ukukun ar repwe pwarata ewe sokkun tong Jises a eani. A apasa: “Iei ai alluk, pwe oupwe tongfengen lefilemi ussun chok ua tongeikemi. Esor an emon och tong epwe lap seni ei tong, pwe epwe fangelo manauan fan iten chienan kkewe.” (Jon 15:12, 13) Jises a ita apasa pwe noun kkewe chon kaeo repwe tipeeu ngeni ar repwe malo fan iten chiener kkewe chon luku ika epwe toriir ena sokkun sossot? A ina ussun an Jon weweiti, pun i emon chon pwarata lon na fansoun, iwe, mwirin a makkei: “A iei ussun ach silei ussun tong, pun [Jises Kraist] a likitalo manauan fan asengesich, o sipwe pwal likitalo manauach fan asengesin pwich kkewe chon luku.”​—1 Jon 3:16.

11. (a) Ifa ussun sipwe apwonueta ewe allukun Kraist? (b) Ifa ewe leenien appiru Jises a awora?

¹¹ Ina minne, sisap apwonueta ewe allukun Kraist ren ach sipwe chok afalafala aramas ussun. Epwe lamot ach sipwe akkappiru manauen Jises me an kkewe foffor. Enlet, alon Jises kkewe lon an kkewe afalafal a fokkun amwarar. Nge, a pwal alisi aramas ren an isetiu mwer eu leenien appiru. Inaamwo ika Jises a pin emon ngun mi manaman lon lang, nge a tinikken lupwen a tori fansoun pwe epwe fori letipen Seman we won fonufan me aiti ngeni aramas ifa ussun sipwe manau. A tipetekison, kirikiroch, me ekkekieki ussun ekkewe ekkoch, iwe, a alisi ir kkewe mi chouchou me osukosuk. (Mattu:11:28-30; 20:28; Filipai 2:5-8; 1 Jon 3:8) Iwe, Jises a pesei noun kkewe chon kaeo ar repwe tongfengen lefiler, ussun chok an a tonger.

12. Pwata sipwe tongeni apasa pwe ewe allukun Kraist ese akukkunatiu lamoten ewe tong ngeni Jiowa?

¹² Ifa lamoten ewe lapalapen tong ngeni Jiowa​—ewe lapalap mi lap seni meinisin lon ewe alluk​—lon ewe allukun Kraist? (Mattu 22:37, 38; Kalesia 6:2) A ita lamot kisikis? Esap fokkun ena! Ach tongei Jiowa me ach tongei chienach kkewe Chon Kraist ra wesewesen ririfengen. Emon esap tongeni enletin tongei Jiowa ika esap pwal tongei pwin we chon luku, pun ewe aposel Jon a makkei: “Ika emon epwe apasa: ‘Ua tongei Kot,’ nge a oputa pwin we, iwe, i emon chon kapas chofona. Pun are emon esap tongei pwin we mi a fen kuna, iwe, esap tongeni tongei Kot mi ese mwo kuna.”​—1 Jon 4:20; alollofengenni 1 Jon 3:17, 18.

13. Ifa mwiriloon an ekkewe chon kaeo alleasochisi an Jises we alluk mi fo?

¹³ Lupwen Jises a ngeni noun kkewe chon kaeo ewe alluk mi fo pwe repwe tongfengen lefiler ussun chok an a tonger, a kapas ussun met epwe efisata. A apasa, “Epwe iei ussun aramas meinisin repwe silei pwe ami nei chon kaeo, ika mi wor ewe tong lefilemi.” (Jon 13:35) Me ren Tertullian, emon mi manau lap seni ipuku ier mwirin maloon Jises, ewe tong lefilen ekkewe Chon Kraist lom a efisata ena mettoch. Tertullian a aloni alon ekkewe chon lukun ussun noun Jises kkewe chon kaeo, ra era: ‘Nengeni ifa ussun a wor tongfengen lefiler, iwe, ra pwal mwo nge ekiekin malo fan iten chiener kkewe.’ Iwe, sipwe tongeni pwisin eisinikich, ‘Ngang ua pwarata ena sokkun tong ngeni chienei kkewe Chon Kraist pwe epwe annetata pwe ngang emon noun Jises chon kaeo?’

Ifa Ussun Sipwe Annetata Ach Tong

14, 15. Ifa ewe mettoch epwe tongeni aweiresi ach alleasochis ngeni ewe allukun Kraist, nge met epwe tongeni alisikich pwe sipwe alleasochis ngeni?

¹⁴ A lamot pwe noun Jiowa kkewe chon angang repwe pwarata ewe sokkun tong Kraist a eani. Nge en mi kuna pwe a weires ngonuk om kopwe tongei chienom kkewe chon Kraist mi ekieki chok pwisin ir? Iwe, ussun sia fen kuna, pwal mwo nge ekkewe aposel ra anini me sotun atekiata pwisin ir. (Mattu 20:20-24) Ekkewe chon Kalesia ra pwal aninifengen lefiler. Mwirin an apasa pwe tong ngeni chon orur a apwonueta ewe Alluk, Paul a ourourer: “Ika ami oupwe kukfengen pwal ochochfengen, iwe, tumunu pwe ousap awesifengennikemilo.” Mwirin an alollofesenni ekkewe angangen fituk me uwan an Kot we ngun, Paul a apachelong ei kapasen emmwen: “Sisap lamalam tekia, sisap efisata akkuffengen lefilach, sisap pwal lolowofengen.” Iwe, mwirin Paul a peseer: “Oupwe uwoufengen ami chourek, iei ussun oupwe apwonueta ewe allukun Kraist.”​—Kalesia 5:14​–6:2.

¹⁵ Ren an kutta ach sipwe akkalleasochisi ewe allukun Kraist, ita a kon watte minne Jiowa a mochen sipwe fori? Inaamwo ika eni epwe weires ach sipwe kirikiroch ngeni ir kkewe mi kapas pochokkul ngenikich me achou letipach, nge sipwe chuen nom fan ewe alluk pwe sipwe “appiru Kot, ussun chok noun kkewe mi achengicheng, me fefetal lon tong.” (Efisus 5:1, 2) A lamot ach sipwe nennengeni an Kot we leenien appiru, ewe emon mi “fen pwarata an we tong ngenikich, pun lupwen kich mi chuen chon tipis, Kraist a malo fan asengesich.” (Rom 5:8) Ren ach sipwe akkom mwokut le alisi ekkewe ekkoch, pachelong ir kkewe mi fofformwaal ngenikich, sipwe tongeni pwapwa le silei pwe sia akkappiru Kot me alleasochisi ewe allukun Kraist.

16. Ifa ussun sipwe annetata ach tong ngeni Kot me Kraist?

¹⁶ Sipwe chechemeni pwe sipwe annetata ach tong ren minne sipwe fori, nge esap chok ren minne sipwe apasa. Fan eu, pwal mwo nge Jises a meefi pwe a weires eu mettoch Kot a kutta seni pokiten minne epwe fis ngeni. Jises a iotek: “Semei, ika ina letipom, kopwe angei seniei ei kap.” Nge a muttir pwal apasa: “Nge sap letipei, pwe letipom epwe pwonueta.” (Luk 22:42) Inaamwo ika Jises a kuna riaffou watte, nge a apwonueta letipen Kot. (Ipru 5:7-8) Alleasochis epwe eu minen annetata ach tong me epwe pwarata pwe sia silei pwe an Kot we al, ina ewe al mi murinno seni meinisin. Ewe Paipel a apasa: “Iei weween ewe tongen Kot, pwe sipwe alleasochisi an kkewe alluk.” (1 Jon 5:3) Iwe, Jises a ereni noun kkewe aposel: “Ika oua tongeei, oupwe alleasochisi ai kkewe alluk.”​—Jon 14:15.

17. Ifa ewe alluk mi sokkolo aucheaan Jises a ngeni noun kkewe chon kaeo, me ifa ussun sia silei pwe a weneitikich ikenai?

¹⁷ Lukun an alluku ngeni noun kkewe chon kaeo pwe repwe tongfengen lefiler, ifa ewe alluk mi sokkolo aucheaan Kraist a ngeniir? A alluku ngeniir ar repwe foffori ewe angangen afalafal a fen aiti ngenir. Piter a apasa: “A alluku ngenikem pwe oupwe afalafala aramas, o unusen apwonueta ena angang.” (Foffor:42) Jises a titchiki ewe alluk: “Ina minne, oupwe feilo asoulangalo chon fonu meinisin, oupwe papataisir fan iten ewe Sam, me ewe Nau, me ewe ngun mi fel, oupwe afalafaler pwe repwe alleasochisi mettoch meinisin ua alluku ngenikemi.” (Mattu 28:19, 20; Foffor 1:8) Jises a pwarata pwe ekkena kapasen emmwen epwe pwal weneiti noun kkewe chon kaeo iei lon “ewe fansoun sopwolon,” pun a apasa: “Ei kapas allim ussun ewe muu epwe esileifeili won unusen fonufan, pwe epwe pwar ngeni einang meinisin. Iwe, a ina sopwolon.” (Taniel 12:4; Mattu 24:14) Pwungun pwe ina letipen Kot pwe sipwe afalafal. Nge, eni ekkoch repwe ekieki pwe a kon watte an Kot kutta senikich ach sipwe foffori ei angang. Nge, a fokkun ina ussun?

Pwata Ussun Ita Nge A Weires

18. Met sipwe mochen chechemeni lupwen sia kuna riaffou pokiten ach foffori minne Jiowa a kutta senikich?

¹⁸ Ussun sia fen kuna, lon uruwoon aramas Jiowa a kutta seni aramas ar repwe fori mettoch mi sokkopat. Iwe, ussun an a sokkolo minne a kutta emon me emon, a pwal sokkolo ekkewe sossot ra kuna. Iwe, a tori Noun Kot we mi achengicheng ekkewe sossot mi fokkun weires, iwe, mwirin, a ninnilo fan riaffou watte pokiten an foffori minne Kot a kutta seni. Nge lupwen sipwe kuna riaffou pokiten minne Jiowa a kutta senikich, sipwe chechemeni pwe ese popu seni i. (Jon 15:18-20; Jemes 1:13-15) An Setan fofforun u ngeni Kot a efisata tipis, riaffou, me malo, iwe, ina i ewe emon a efisata ekkewe lapalap mi fokkun aweiresi noun Kot kkewe chon angang ar repwe foffori minne Jiowa a kutta senir.​—Job 1:6-​19; 2:1-8.

19. Pwata ina eu wis auchea ach sipwe fori minne Kot a kutta senikich me ren Noun we?

¹⁹ Me ren Noun we, lon ei fansoun le sopwolon, Jiowa a ereni Noun kkewe chon angang ar repwe afalafal won unusen fonufan pwe nemenien chok ewe Muu epwe awesalo an aramas kkewe riaffou meinisin. Ewe muun Kot epwe awesalo ekkewe fitikoko meinisin won fonufan​—maun, atai alluk, woungau, an aramas chinnapelo, semmwen, malo. Ewe Muu epwe pwal atoto ngeni fonufan eu paratis mi ling, ikkewe ie pwal mwo nge ekkewe mi pin malo repwe kuna manausefal ie. (Mattu 6:9, 10; Luk 23:43; Foffor 24:15; Pwarata 21:3, 4) Ina ewe wis auchea ach sipwe afalafala ewe kapas allim ussun ekkena mettoch! A ffat pwe ese fokkun wor och osukosuk ren minne Jiowa epwe kutta senikich ach sipwe fori. Aramas repwe u ngenikich, nge a popu seni Satan ewe Tefil me an we fonufan.

20. Ifa ussun sipwe tongeni pworacho ngeni ekkewe sossot meinisin ewe Tefil epwe efisata?

²⁰ Ifa ussun sipwe tongeni sopwoch le pworacho ngeni an Satan kkewe sossot meinisin? Ren ach sipwe chechemeni ekkeei kapas: “Kopwe tipatchem, nei we, me apwapwai letipei pwe upwe tongeni polueni emonewe mi aitengauaei.” (Proferp 27:11) Jises a awora minne Jiowa epwe polueni ngeni an Satan turunufasei ren an likitalo lukulukochun manauan lon lang pwe epwe fori letipen Seman we won fonufan. (Aisea 53:12; Ipru 10:7) Atun i emon aramas, Jises a likiitu fan iteiten sossot meinisin, a pwal mwo nge malo won efoch iraan ninni. Ika sipwe tapweilo mwirin i ussun ach Leenien Appiru, sipwe pwal tongeni likiitu fan ekkewe riaffou me fori minne Jiowa epwe kutta senikich.​—Ipru 12:1-3.

21. Ifa ach memeef ussun ewe tong Jiowa me Noun we ra pwarata ngenikich?

²¹ A ifa me watten ewe tong Kot me Noun we ra pwarata ngenikich! Pokiten an Jises asor, a wor ewe apilukulukun manau esemuch lon ewe paratis ren aramas mi alleasochisi. Iwe, sisap mut ngeni och mettoch an epwe eppeti ach luku. Nge, sipwe pwisin eani lukuluk won met Jises a atufichi, ussun chok Paul, a apasa: “Noun Kot we . . . a tongeei me pwisin fangelo manauan fan asengesi.” (Kalesia 2:20) Iwe, sia mochen pwarata ach kilisou ngeni ach Kot mi tong, ewe emon ese kutta senikich minne a kon watte.

Ifa Ussun Kopwe Polueni?

◻ Met Jiowa a kan kukkutta senikich ikenai?

◻ Lon ewe amuchuloon pwinin an Jises nonnom ren noun kkewe aposel, ifa ussun Kraist a apochokkula lamoten ewe mettoch tong?

◻ Ifa ussun sipwe annetata pwe sia tongei Kot?

◻ Pwata ina eu wis auchea ach sipwe fori minne Jiowa a kutta senikich?

[Sasing lon pekin taropwe 23]

Ifa ewe lesen Jises a aiti ngeni noun kkewe aposel lupwen a tolu pecher?

[Sasing lon pekin taropwe 25]

Inaamwo ika aramas repwe u ngenikich, nge ach esileifeili ewe kapas allim, ina eu wis mi fokkun apwapwa