Ra Fori Letipen Jiowa

Asor Seni Letip Le Alisata Fel Mi Limelimoch

EKKEWE Chon Israel ra kuna manamanen Jiowa mi amanaua aramas. Ra kuna ewe manaman lupwen ewe Setipar a kinikinfesen lon ruu pekin, iwe, ra tufichin pwerelo won fonu mi pwas me su seni ewe mwichen sounfiuen Isip. Lupwen ra tori ewe epek, ra katon seni leenier mi ekis touwau pwe resap feiengau ifa ussun ewe saat a pwoluelo ekkewe mi tapwelo mwiriir. Jiowa a selaani manauer!​—Ekistos 14:21-​31.

Iwe nge, a mmen solap pwe ekkoch Chon Israel rese aucheani met Kot a fen fori. Lupwen Moses a nonnom won ewe Chuuk Sinai, ra ngeni Aaron pisekir kewe mi for seni kolt me ra erenii pwe epwe fori eu uluulun fan iter pwe repwe fel ngeni. Lupwen Moses a liwin, a kuna pwe ei mwichen u ngeni ra mommongo, ukkun, pwopwpworuk, me chachchappetiu ngeni emon kou mi for seni kolt! Fan emmwenien Jiowa 3,000 som​—eli ekkewe mi poputani ewe u ngeni​—ra nninniilo. Lon ena ran, noun Kot kewe aramas ra kaeo eu lesen mi fokkun auchea ussun ewe lamoten ar repwe fel ngeni Jiowa chok.​—Ekistos 32:1-6, 19-​29.

Ekisilo chok mwirin an a fis ei mettoch, Moses a ammonlata le apwonueta an Kot we kapas le aueta eu imw mangaku, eu imwen fel mi for seni mangaku repwe tongeni uweifetalei ia repwe lo ie. Epwe lamot ngeni ei project chommong pisek mi liwinimmong me chon angang mi lipwakoch. Ekkeei mettoch repwe feito me ia? Me met sipwe tongeni kaeo seni ei poraus seni Paipel?

Ekkewe Asoren Pisek me Tufich

Jiowa a alluku ngeni ekkewe Chon Israel me ren Moses: “Oupwe uwato eu alillis fan iten ewe Samol mi Lapalap seni mine oua eani. Eman mi fangafangaoch seni lelukan epwe uwato an alilis fan iten ewe Samol mi Lapalap.” Met sokkun asor? Moses a eiteita ekkewe pisek ussun kolt, silifer, kapa, suwain, mangaku, unuchen man, ira, me ekkewe fau mi auchea.​—Ekistos 35:5-9.

Ekkewe Chon Israel ra tufich le eani ena esin asor. Chechchemeni mwo pwe, lupwen ra su seni Isip, ra uwei pisek mi for seni kolt me silifer, kapachelong sokkopaten uf. Pwungun pwe, “ra angeala woun Isip.”a (Ekistos 12:35, 36) Me mwan, ekkewe Chon Israel ra tipemecheresin fangelo pisekir mi for seni kolt pwe repwe fori eu uluulun fan iten fel mi chofona. Iwe, iei repwe pwal tipemecheresin eani asor fan iten alisataan fel mi enlet?

Nengeni mwo pwe Moses ese ereniir ifa ukuukun emon me emon epwe ita awora, are asaueer pwe repwe liffangelo. Nge, a chok tingor pwotete “seni lelukan” emon me emon. Moses a meefi pwe esor popun an epwe eriani noun Kot kewe aramas. A lukuluk pwe emon me emon epwe liffangelo me ren ukuukun an tufich.​—Alollo ngeni 2 Korint 8:10-​12.

Iwe nge, mei pwal wor och mettoch a lamot ngeni ewe project esap chok kaworen pisek. Jiowa a pwal ereni ekkewe Chon Israel: “Ekewe mwan meinisin mi lipwakoch le angang me leimi repwe feito o fori meinisin mine ewe Samol mi Lapalap a alluk.” Ewer, a lamot chon angang mi lipwakoch le fori sokkopaten angang fan iten ei project. Enlet, “tufichin fori sokopaten angang meinisin”​—kapachelong falafal ira, nechenech mecha, me for pisek mi ling​—epwe lamot fan iten ei project. Pwungun pwe, Jiowa epwe emmweni tufichin ekkewe chon angang, me ewe ling pokiten sopwochun ewe project epwe tori i.​—Ekistos 35:10, 30-​35; 36:1, 2.

Ekkewe Chon Israel ra mwotores le awora ar kewe pisek me ar kewe tufich. Ewe Paipel a apasa: “Murin ra liwinto eman me eman fan mefien letipan, pwal fan pusin an mochen, o uwato ar alilis ren ewe imw mangaku ia aramas ra churi Kot ie me angangan meinisin, pwal fan iten ekewe uf mi pin. Iwe, ra feito mwan me fefin.”​—Ekistos 35:21, 22.

Lesen Fan Itach

Ikenai a fisita ewe angangen afalafala ewe kapas allim ussun an Kot we Muu ren asor. Fan chommong, ewe asor a wewe ngeni moni. Fan ekkoch, pwiich kewe Chon Kraist ra aea ar sile pwe repwe awora ar alillis le aueta ekkewe Kingdom Hall, Assembly Hall, me branch ofes. Mei pwal wor ekkewe angang mi fiffis won ekkewe lap seni ipuku Bethel won unusen fonufan, me a lamot sokkopaten tufich ngeni pwonuetaan ei angang. Meinisin mi fen awora ar tufich seni letiper repwe lukuluk pwe Jiowa esap monukalo ar angang weires!​—Ipru 6:10.

A pwal ina ussun ren ewe angang sia fori lon ewe angangen afalafal. Mei wor kapasen pesepes ngenikich meinisin pwe sipwe akkotaochu ach fansoun pwe sipwe tongeni afalafal. (Mattu 24:14; Efisus 5:15-​17) Ekkoch ra afalafal full-time, are pioneer. Pokiten nonnomun manauer, ekkoch rese tufichin pioneer. Nge, ir mi pwal apwapwai Jiowa. Ussun chok ekkewe asor fan iten ewe imwen mangaku, Jiowa ese titchiki ifa ukuukun emon me emon epwe awora. Iwe nge, a kutta pwe sipwe fel ngeni i ren unusen letipach, ngunuch, ekiekich, me ach pochokkul. (Mark 12:30) Ika sia fori ena mettoch, sipwe lukuluk pwe epwe efeiochukich pokiten ach kewe asor fan iten an epwe alisata fel mi enlet.​—Ipru 11:6.

[Pworous fan]