Ifa Ussun Jiowa A Emmwenikich
“Emmweniei lon efoch al mi sonosonoch.”—KOL FEL 27:11.
1, 2. (a) Ifa ussun Jiowa a emmweni noun kewe aramas ikenai? (b) Met weween ach unusen alamota ekkewe mwich?
JIOWA ewe Popun saram me enlet, ussun sia fen kaeo lon ewe lesen mwen ei. An we Kapas a asaramakich atun sia fetal won efoch aal mi sonosonoch. Jiowa a emmwenikich ren an aiti ngenikich an kewe kokkot. (Kol Fel 119:105) Ussun chok ewe soumak kol fel loom, sia kilisou le nguuri an Kot kewe emmwen me iotek: “Samol, kopwe afalafalaei usun om we al, o emmweniei lon efoch al mi sonosonoch.”—Kol Fel 27:11.
2 Jiowa a awora emmwen ikenai ren an Chon Kraist kewe mwich. Sia unusen alamota ei alillis mi tong ren ach (1) fiffiti, (2) auselingaochu ewe prokram, me (3) ren ach uwawu meefiach lupwen a fich ngeni? Pwal och, sia pwapwa le nguuri ekkewe minen emmwen mi kawor fan iten afeffeitaan ach feffetal “lon efoch al mi sonosonoch”?
Ifa Ussun Om Fiffiti Mwich?
3. Ifa ussun emon pioneer a eorenalo an fiffiti mwich?
3 Ekkoch lein ekkewe chon afalafala ewe Muu ra fen fiffiti ekkewe mwich seni le kukkunur. “Lupwen ngang me pwii watte aua maarita orun 1930,” emon pioneer Chon Pwarata Jiowa a chemenata, “sise pwal eisini semem me inem ika aupwe feilo mwich. Pun am aua silei pwe aupwe chok feilo chinnon chok ika am aua semmwen. Ai famili ese mwo ekketiwalo ekkewe mwich.” Ussun chok emon soufos fefin, itan Anna, ei sister esap mwo fan eu an epwe “etiwalo” an feilo lon an Jiowa imwen fel.—Luk 2:36, 37, New World Translation.
4-6. (a) Met popun ekkoch chon afalafala ewe Muu ra etiwalo ekkewe mwich? (b) Met popun a fokkun lamot ach sipwe fiffiti ekkewe mwich?
4 Pwal en emon me lein chokkewe mi fiffiti an Chon Kraist kewe mwich, are ka fen etiwalo ekkewe mwich fan chommong? Ekkoch Chon Kraist mi ekieki pwe ra fiffiti ekkewe mwich ra sotun cheki ika mei pwung. Ren fitu wiik, ra makkei iteiten ekkewe fansoun ra fiti mwich. Lupwen ra enniwili met ra fen makkei le muchuloon ewe fansoun ra fen filata, ra mairu pun a wor fitu mwich ra fen etiwalo.
5 ‘Ena mettoch esap minen amairu,’ eli emon epwe apasa. ‘Aramas ra kon osukosuk ikenai me a weires ngeniir ar repwe fiffiti ekkewe mwich.’ Mi enlet pwe sia manau lon fansoun weires. Pwal och, osukosuk epwe lapelo. (2 Timoti 3:13) Nge sap minne pwe ena mettoch a alapalo ewe lamoten ach fiffiti ekkewe mwich. Ika sise mommongo mettochun ngun, sise tongeni u ngeni etipetipaen ei otot. Iwe, ika sise chichchiechi ngeni chienach kewe lon pekin ngun eli sipwe unusen rikilo seni “ewe alen pwung”! (An Salomon Fos 4:18) Enlet, lupwen sia tori imwach le muchuloon eu ranin angang mi weires, eli sise kan mochen fiti mwich. Iwe nge, ika sia fiti inaamwo sia molulu, nge sia pwisin efeiochukich me sia apochokkula chienach Chon Kraist lon ewe Kingdom Hall.
6 Ipru 10:25 a ekiekieta pwal eu popun mi lamot sipwe fiffiti ekkewe mwich. Lon ena wokisin ewe aposel Paul a pese ngeni chienan kewe Chon Kraist le mwichfengen ‘o alapalo ar achocho ngeni, pwe ra nengeni pwe ewe Ran a arapoto.’ Ewer, sise mochen monuki pwe “ewe ranin Kot” a arapoto. (2 Piter 3:12) Ika sia eani ewe ekiek pwe ewe sopwoloon ei otot mi chuen towau, eli sipwe mut ngeni pwisin ach mochen an epwe siwili ach foffor lon pekin ngun, awewe chok ach fiffiti mwich. Iwe, ussun chok Jises a ourourakich, ‘ewe ran epwe muttir torikich.’—Luk 21:34.
Wiliiti Emon Mi Auselingoch
7. Met popun a lamot pwe ekkewe semirit repwe auselingoch lon ekkewe mwich?
7 Ese naf ach sipwe chok fiffiti ekkewe mwich. Sipwe pwal auselingoch ngeni ekkewe afalafal. (An Salomon Fos 7:24) Nouch kewe repwe pwal auselingoch. Lupwen emon semirit a feilo sukul, a wiisen auseling alon ewe sense, inaamwo ika ese kon lien efich are esaamwo weweiti ewe poraus ewe sense a fos ussun. Ewe sense a silei pwe ika ewe semirit a auselingoch, epwe ekis feioch seni ewe lesen. Ina popun, epwe och ika ekkewe semirit mi fen poputa sukul repwe auselingoch ngeni ewe emmwen mi kawor lon ekkewe mwich nge resap onnutulo lupwen a poputa ewe mwich. Pwungun pwe, “mi wor och mi weires ngenikich ach sipwe wewe ren” lon ewe enlet mi auchea seni ewe Paipel. (2 Piter 3:16) Nge sisap ekieki pwe ekkewe semirit ra miritimmang lon fansoun kaeo. Kot ese ekieki pwe ra ina ussun. Loom, loom, a alluku pwe noun kewe chon angang mi kukkun repwe ‘rongorong o kaio usun ar repwe meniniti ewe Samol mi Lapalap ami we Kot o tumwunuochu le apwonueta kapasen ekkei alluk meinisin,’ inaamwo ika ekkoch me lein ekkewe kapasen alluk mi weires ngeni ekkewe mi kukkun ar repwe weweiti. (Tuteronomi 31:12; alollo ngeni Lifitikos 18:1-30.) Jiowa a pwal kutta ei mettoch seni ekkewe semirit ikenai?
8. Met ekkoch sam me in ra fori pwe repwe alisi nour kewe le auselingoch lon ekkewe mwich?
8 Sam me in Chon Kraist ra miritiiti pwe nour kewe repwe angei alillis lon pekin ngun seni ekkewe mwich. Ina popun, ekkoch sam me in ra akkota pwe nour kewe repwe ekis onnut mwen ekkewe mwich pwe lupwen repwe tori ewe Kingdom Hall resap molulu me repwe auselingoch. Ekkoch sam me in ra aukuku are pwal mwo nge pinei an nour kewe katon TV lon pwinin ekkewe mwich. (Efisus 5:15, 16) Me ekkeei sam me in ra tumunu pwe ese kon chommong mettoch repwe aosukusuka ngeni nour kewe, me ra peseer le auseling me kaeo me ren ukuukun ierir me tufichir.—An Salomon Fos 8:32.
9. Met epwe alisikich le amaaraata ach tufichin auseling?
9 Jises a fos ngeni ekkewe mi watte lupwen a apasa: “oupwe chok tumunu usun ami rong.” (Luk 8:18) Ikenai, fan chommong ena mettoch epwe mecheres le apasa nge weires le fori. Pwungun pwe mi weires ach wesewesen auseling, nge sipwe tongeni amaaraata ach tufichin auseling. Sotun kutta ekkewe poraus mi lamot seni ekkewe afalafal. Sotun ekieki met ewe chon afalafal epwe apasa mwirin. Kutta ekkoch poraus kopwe aea lon om angangen afalafal are met kopwe apwonueta lon manauom. Enniwili ekkeei poraus lon pwisin om ekiek lupwen ka auseling. Makkei poraus mi mwochomwoch.
10, 11. Ifa ussun ekkoch sam me in ra alisi nour kewe pwe repwe auselingoch, me met sokkun mettoch a fen alisuk?
10 Sipwe kaeo ifa ussun sipwe auselingoch lupwen sia chuen kukkun. Ekkoch sam me in ra pese ngeni nour kewe resaamwo sukul pwe repwe fori “notes” fansoun mwich inaamwo ika resaamwo silei allea me mak. Ra fori eu esissin won echo taropwe lupwen ra rongorong ekkewe kapas ra silei ussun “Jiowa,” “Jises,” are “Muu.” Iei ussun, ekkewe semirit repwe kaeo ifa ussun repwe auselingoch atun ekkewe mwich.
11 Fan ekkoch alillis le auselingoch a pwal lamot ngeni ekkewe semirit mi ekis watte. Lupwen emon sam a kuna pwe noun we at, 11 ierin, ese kon auselingoch atun eu mwichelap, a ngeni ewe at eu Paipel me a ereni i le kutta ekkewe wokisin ewe chon afalafal a apasa. Ewe sam a fori notes, nge a chuen akkatola noun we mi kamwoch ewe Paipel. Mwirin ena, a ekis lapelo an ewe at pwapwa le auseling ngeni ekkewe afalafal.
Leuwommongeta Pwe Aramas Repwe Rong
12, 13. Met popun a lamot ach sipwe fiffiti an ewe mwichefel kol?
12 King Tafit a kol: “Ua pwelifeili om rongen asor, ua eani echo kolun kilisou fan leuomong.” (Kol Fel 26:6, 7) An Chon Pwarata kewe mwich ra awora ach tufichin leuwommong le pwarata ach luku. Sipwe tongeni fori ei mettoch ren ach fiti an ewe mwichefel kol. Iei eu kinikin mi lamot lon ach luku, nge a mecheres ach sipwe tunalo.
13 Ekkoch semirit resaamwo silei allea ra amwochunukun ekkewe kol repwe eani lon ekkewe mwich iteiten wiik. Ra meseik lupwen ra tufichin kol me ekkewe mi watte. Iwe nge, lupwen ekkewe semirit ra ekis watteta, eli repwe chipwangelo le fiti ewe kol. Ekkoch mi watte ra pwal pireir le kol lon ekkewe mwich. Nge, kol ina kinikinin ach fel, ussun chok ach angangen afalafal eu kinikinin ach fel. (Efisus 5:19) Sia fori ukuukun ach tufich le mwareiti Jiowa lon ach angangen afalafal. Sipwe pwal tongeni alinga i ren ach leuwommongeta seni letipach—ese lifilifil ika sia ngioch are aapw—lon kolun mwareiti Kot?—Ipru 13:15.
14. Met popun a lamot ach sipwe ammonlata ekkewe poraus sipwe kaeo mwen ach kewe mwich?
14 Sipwe pwal mwareiti Kot lupwen sia uwawu meefiach lon ekkewe kinikin mi fich ngeni. A lamot ach ammonlata ngeni ei mettoch. Mi lamot ach awora fansoun le ekiekifichi ussun ekkewe mettoch mi alollon lon an Kot we Kapas. Ewe aposel Paul, emon mi achocho le kaeo ewe Paipel, a miritiiti ei mettoch. A makkei: “Olololun pisekisekin Kot, me an we tipatchem, o pwal an we sineilap!” (Rom 11:33) Ami mokuren famili, mi lamot pwe oupwe alisi emon me emon lon ami famili le kukkutta tipatchemen Kot mi pwalo lon an Kot we Kapas. Awora fansoun lon ami famili kaeo le awewei ekkewe poraus mi weires me alisi ami famili le ammonlata fan iten ekkewe mwich.
15. Ikkefa ekkewe minen alillis epwe alisata ach uwawu meefiach lon ekkewe mwich?
15 Ika ka mochen alapalo om uwawu meefiom lon ekkewe mwich, pwata kese ammonlata eu poraus ka mochen apasawu? Ammonlata eu poraus mi mecheres. Aramas repwe aucheani ach alleani eu wokisin mi fich ngeni ewe poraus are ekkoch kapas mi mwochomwoch seni letipach. Ekkoch chon afalafal ra tingor ewe chon emmeweni ewe kaeo ika ra tongeni polueni akkom won eu parakraf. Iei ussun repwe tongeni tufichin pwarata ar luku.
Ewe Ese Lipwakoch A Tipatchemelo
16, 17. Ifa ewe emmwen emon elter a ngeni emon ministerial servant, me pwata ewe emmwen a alisi i?
16 Fan chommong lon an Chon Pwarata kewe mwich, mei wor kapasen achechchem ngenikich le akkalleani an Kot we Kapas. Ach fori ei mettoch epwe apochokkulakich. Epwe pwal alisikich le filioch, awenechara lapalapach ese pwung, u ngeni sossot, me pochokkulelo sefal ika sia mwaallilo.—Kol Fel 19:7.
17 Ekkewe elter mi lipwakoch lon ewe mwichefel ra mmonleta le awora emmwen seni ewe Paipel mi fich ngeni minne mi lamot ngenikich. Sipwe chok “ufireta” ren ach kukkutta seniir emmwen seni Paipel. (An Salomon Fos 20:5) Eu ran emon ministerial servant aluwon mi achocho a tingor alillis seni emon elter won ifa ussun epwe tongeni alapalo an awora alillis ngeni ewe mwichefel. Ewe elter, emon mi sileiochu ewe aluwon, a suuki noun we Paipel lon 1 Timoti 3:3, mi apasa pwe ekkewe mwan mi kefil repwe “umoumoch.” Ewe elter a aiti ngeni ewe aluwon ren tong epwe ifa ussun epwe tongeni pwarata umoumoch ngeni aramas. Ewe brother aluwon a song pokiten ewe emmwen? Aapw! “Ewe elter a nounou ewe Paipel,” ewe aluwon a awewei, “ina popun ua miritiiti pwe ewe emmwen a feito seni Jiowa.” Ewe ministerial servant a apwonueta alon ewe emmwen ren kilisou me a feffeita.
18. (a) Met a alisi emon sarafo Chon Kraist le u ngeni sossot lon sukul? (b) Menni wokisin seni Paipel ka chechchemeni lupwen ka kuna sossot?
18 An Kot we Kapas epwe pwal tongeni alisi ekkewe sarafo le “imu seni ekkewe mochenia-ingauen aluwon.” (2 Timoti 2:22) Emon Chon Pwarata Jiowa fopwul mi keran sochungio seni high school a tongeni u ngeni sossot lon unusen ekkewe ier a fiti sukul ren an ekkekieki won me an apwonueta alon ekkoch wokisin seni ewe Paipel. Fan chommong a ekieki ussun ewe emmwen a makkei lon An Salomon Fos 13:20: “Eman mi chiechi ngeni aramas mi tipachem epwe tipachemela.” Ina popun, neminnewe a sotun chiechi chok ren chokkewe mi fokkun sufoliiti allukun ewe Paipel. A ekieki iei ussun: “Ngang mi ussun chok ekkewe ekkoch. Ika ua chiechi ngeni ekkewe aramas mi ngau, upwe mochen apwapwai chienei kewe, me ena mettoch epwe emmwen ngeni osukosuk.” An Paul emmwen mi mak lon 2 Timoti 1:8 a pwal alisi neminnewe. A makkei: “Kosap sau ren om pwarata usun ach Samol, . . . nge kopwe etiei le riaffou fan asengesin ewe kapas allim ren manamanen Kot.” A apwonueta alon ena emmwen ren an pworacho le esilefeili an kewe luku seni ewe Paipel ren chienan kewe lon sukul iteiten fansoun a fich ngeni. Ika a wiisen fori eu repot ngeni ewe class, a filata eu poraus epwe atufichi i le afalafal ussun an Kot we Muu.
19. Pwata emon aluwon ese tongeni u ngeni sossotun ei fonufan, nge met a apochokkula i lon pekin ngun?
19 Ika sipwe rikilo seni “ewe alen pwung,” an Kot we Kapas epwe tongeni alisikich le awenechara ipwach kewe. (An Salomon Fos 4:18) Emon aluwon seni Africa a pwisin kaeo ei mettoch. Lupwen emon Chon Pwarata a chuuri i, a etiwa an epwe kaeo ewe Paipel. A pwapwaesini minne a kakkaeo nge a poputa le chiechi ngeni aramas mi ngau lon sukul. Lo, lo, lo, a pwal lisou mwaal. “Mwelien letipei a fokkun aosukusukaei, iwe ua ukutiu le fiffiti ekkewe mwich,” alon ewe aluwon. Mwirin, a poputa sefal le fiffiti ekkewe mwich. Ewe aluwon a apasa: “Ua miritiiti pwe ewe popunlapen a fiffis ai osukosuk pwe ua echik lon pekin ngun. Use pwisin kakkaeo. Ina ewe popun use tongeni u ngeni sossot. Iwe, ua poputa le alleani Ewe Leenien Mas me Awake! Ekis me ekis ua pochokkulelo sefal lon pekin ngun me ua limeti manauei. Ina eu minen pwarata mi murinno ngeni ekkewe mi kuna ekkewe siwil ua fori lon manauei. Ua papataiselo, me iei ua pwapwa.” Met a apochokkula ei aluwon le omoralo an kewe apwangapwang? A pochokkulelo sefal lon pekin ngun ren an pwisin kaeo ewe Paipel.
20. Ifa ussun emon sarafo epwe tongeni u ngeni an Setan kewe sossot?
20 Ami sarafo Chon Kraist, mei wor emon a maunei kemi ikenai! Ika kopwe u ngeni an Setan kewe sossot, epwe lamot om kopwe mommongo lon pekin ngun. Ewe soumak kol fel, eli i pwal emon aluwon, a weweiti ei mettoch. A kilisou ngeni Jiowa ren an awora an Kapas, pwe ‘emon aluwol epwe fori pwe an fofor epwe limelimoch.’—Kol Fel 119:9.
Ese Lifilifil Ia Kot A Emmwenikich Ie, Sipwe Tapwelo Mwirin
21, 22. Met popun sisap ekieki pwe ewe alen enlet a kon weires?
21 Jiowa a emmweni ewe muun Israel seni Isip tori ewe Fonuen Pwon. Eli me ren ekiekin aramas a kon weires ewe aal a filata ar repwe aleni. Jiowa ese emmweniirelong won ewe aal mi mecheres pen ewe Setin Mediterranean, nge a emmweni noun kewe aramas lon eu aal mi weires lon eu fonu mi poon. Iwe nge, ei mettoch a pwarata an Kot kirokiroch. Inaamwo ika a mwochomwoch, ewe aal pen ewe saat epwe emmweni ekkewe Chon Israel ngeni fonuen ekkewe Chon Filistia mi oputeer. Ren an Jiowa filata pwal eu aal, a tumunu noun kewe aramas seni ar muttir maun ngeni ekkewe Chon Filistia.
22 Pwal ussun we chok ikenai, fan ekkoch ewe aal Jiowa a emmwenikichelong lon ikenai epwe ussun ita weires. Iteiten wiik, mei wor chommong wiisach lon pekin ngun, mi kapachelong ach kewe mwich, ach pwisin kaeo, me ach angangen afalafal. Eli pwal ekkoch aal repwe ekis mecheres. Nge sipwe chok tori ewe leeni sia fokkun angang weires le tikeri ika sipwe tapwelo mwirin an Kot emmwen. Ina popun, sipwe sopweilo ach etiwa emmwen seni Jiowa me nommolo won “ewe alen pwung” tori feilfeilo!—Kol Fel 27:11.
Kopwe Tongeni Awewei?
• Met popun mi lamot ach fiffiti an Chon Kraist kewe mwich?
• Met ekkewe sam me in repwe tongeni fori pwe repwe alisi nour kewe le auselingoch lon ekkewe mwich?
• Met a kapachelong lon ach wiliiti emon mi auselingoch?
• Met epwe alisikich le uwawu meefiach lon ekkewe mwich?
[Sasing lon pekin taropwe 14]
Ach fiffiti an Chon Kraist kewe mwich a alisikich le ekkekieki ranin Jiowa
[Sasing lon pekin taropwe 16]
Mei wor sokkopaten mettoch sipwe tongeni fori ren ach sipwe mwareiti Jiowa lon an Chon Kraist kewe mwich