Kapas Eis Seni Ekkewe Chon Allea
Lon Rom 12:19, Testament Mi Fo, ewe aposel Paul a apasa pwe ita Chon Kraist resap song, lupwen a apasa: “Ousap pusin kutta liwin, achengicheng kana, pwe oupwe wasi leni en song en Kot”?
Aapw. Ewe aposel Paul a fos ussun an Kot song. Nge, sap minne pwe esor lamotan ika Chon Kraist repwe kkuf fan song. Ewe Paipel a fonoukich pwe sisap song. Ekieki mwo ekkeei fon seni Kot.
“Kopwe tumunuk seni song, o likitalo om lingeringer! Kosap pwisin eriaffouk pun le sopolon mi chok ingau.” (Kol Fel 37:8) “Ir meinisin mi meefi song ren pwin repwe tolong lon kapung.” (Mattu 5:22) “Ekkewe angangen fituk mi chok pwapwalo: lisou, fofor-ingau, angolsa, fel ngeni anu, angangen rong, oput, anini, aweires, song.” (Kalesia 5:19, 20) “Oupwe poutalo senikemi sokkun tipingau meinisin, pwal tipekoum, pwal song, pwal kapasechou, pwal esiit, o pwal sokkun ekiekingau meinisin.” (Efisus 4:31) “Aramas meinisin repwe muttir le rong; repwe mang le kapas, repwe mang le song.” (Jemes 1:19) Pwal och, An Salomon Fos a fonoukich fan chommong ach sisap kkuf fan song pokiten och mettoch mi lamot kisikis are tipisin aramas.—An Salomon Fos 12:16; 14:17, 29; 15:1; 16:32; 17:14; 19:11, 19; 22:24; 25:28; 29:22.
Ekkewe wokisin mwan me mwirin Rom 12:19 a tipeeu ngeni ekkena fon. Paul a peseikich pwe ach tong esap likotuputup, pwe sipwe efeiochu ekkewe mi eriaffoukich, pwe sipwe ekiekoch ussun aramas, pwe sisap liwini ngeni emon an we ngau, me sipwe achocho le kinamwefengen me aramas meinisin. Mwirin Paul a peseikich: “Ousap pusin kutta liwin, achengicheng kana, pwe oupwe wasi leni en song en Kot. Pun ach Samol a apasa: ‘Wisei chok kukutta liwin; ngang upwe ngeni ir liwil in ar fofor.’”—Rom 12:9, 14, 16-19, TMF.
Ewer, sisap mut ngeni ach song epwe amwokutukich le eliwini och fofforingau ren foffor mwanesol. Ese unus ach silei ussun minne a fiffis me ach ekiekin pwung. Ika sia mut ngeni ach song epwe amwokutukich le eliwini ngau ngeni aramas, sipwe mwaallilo fan chommong. Epwe apwonueta letipen ewe Chon Oputa Kot, ewe Tefil. Lon pwal eu leeni, Paul a makkei: “Oupwe song, nge ousap fori tipis; ami song esap nom tori an ewe akkar tuputiu. O ami ousap wasi leenien ewe tefil.”—Efisus 4:26, 27.
Ewe aal mi murinno o tipatchem seni, ina alen ach mut ngeni Kot le filata ineet me io epwe kuna kapwung. Kot epwe tongeni fori nge epwe unusen silei porausen emonnewe epwe apwungu, me an kapwung epwe pwalo an pwung mi unusoch. Sipwe tongeni kuna pwe ina ewe mettoch Paul a mochen apasa lon Rom 12:19 lupwen a aloni alon Tuteronomi 32:35, 41, mi kapachelong ekkeei kapas: “Ewe Samol mi Lapalap epwe ngeniir chapen ar fofor me liwiningauer lon ewe fansoun.” (Alollo ngeni Ipru 10:30.) Iwe, inaamwo ika ekkewe kapas “an Kot” rese nom lon tesin Kriik, chommong chon chiyaku ikenai ra fen walong ekkena kapas lon Rom 12:19. Ina popun sipwe alleani “mut ngeni an Kot liwini ngeni aramas” (The Contemporary English Version); “wasi leenien an Kot song” (American Standard Version); “mut ngeni an Kot kapwung ika ina letipan” (The New Testament in Modern English); “wasi leenien kapwung seni Kot.”—The New English Bible.
Pwal mwo nge lupwen sia weires are kuna riaffou mwaal seni ekkewe chon oputa ewe enlet, sipwe tongeni eani apilukuluk won ewe awewe ussun lapalapen Jiowa Kot Moses a fen rongorong: “Ngang ewe Samol mi Lapalap, ngang ewe Samol mi Lapalap, ngang eman Kot mi eani umoumoch me kirikiroch, ua songomang, ua pwal woun tong me allukuluk. Ua eani tong ngeni ngerou o amusalo foforingau me pupungau me tipis. Nge usap amusafatei chon tipis.”—Ekistos 34:6, 7.