Kol Me Nikattik Mi Apwapwai Kot

Ekkoch aramas ra apasa pwe nikattik “ewe minen aling mi akkom me ewe a kon mecheres ngeni aramas.” Ussun chok fos, nikattik eu liffang mi amwarar mi asokkalo aramas seni man. Kol me nikattik ra achungu meefien aramas. A tongeni apwapwai selingach me a nomotiu lon ekiekich. Lap seni meinisin, kol me nikattik ra tongeni apwapwai Kot.

USSUN EWE Paipel a pwarata pwe ekkewe Chon Israel ir aramas mi efich nikattik me kol. Nikattik me kol ina “eu kinikinin manauen aramas lon fansoun Paipel loom,” alon Unger’s Bible Dictionary. Pokiten ir kinikinin manuaen aramas, ra pwal eani kol me nikattik lon ar fel. Nge a kon lamot leuwen aramas.

King Tafit a awiisa ngeni ekkoch Chon Lifai “pwe repwe chon kol” lon ewe imw mangaku, mwen efinunen ewe imwen fel Solomon a aueta. (1 Kronika 6:31, 32) Lupwen ewe pworun pwon mi liosueta nonnomun Jiowa a tori Jerusalem, Tafit a akkota pwe ekkoch Chon Lifai “repwe iotekin tungor me iotekin kilisou o mwareiti ewe Samol mi Lapalap.” Ar kol a fiti “kitar me ukulele, . . . pisekin kaktai, . . . me ekewe rappwa.” Mi mak iten ekkeei mwan “pwe repwe kolun kilisou ngeni ewe Samol mi Lapalap, pun an tong ellet a nonom tori feilfeilachok.”​—1 Kronika 16:4-6, 41; 25:1.

Ewe chorus “an [Jiowa] we tong enlet epwe nonnom feilfeilo chok” a mak fan chommong lon Kol Fel, ewe puken Paipel a kon ririfengen ren kol me nikattik lap seni ekkewe puk meinisin. Ren chok awewe, ena poraus ewe oruuen kinikinin ekkewe 26 wokisin lon Kol Fel 136. “Mwochomwochan a amecheresi an aramas apasawu,” alon emon sou kaeo Paipel. “Meinisin mi rongorong ewe chorus repwe chechchemeni.”

Ekkewe superscription mi mak mwen ekkewe kol mi fel ra pwaralo nounoun pisekin nikattik. Kol Fel 150 a fos ussun rappwa, arp, timprel, sewi, me mecha mi akurang, kapachelong ewe keseng mi wor selin. Nge, leuwen aramas a lamot seni meinisin. Wokisin 6 a peseikich: “Mettoch meinisin mi ngasangas epwe mwareiti ewe Samol! Oupwe mwareiti ewe Samol!”

Pokiten kol me nikattik a pwarata ach memeef, an aramas letipechou lon fansoun Paipel loom a amwokutur le eani kolun kechiu are engi. Iwe nge, mei aukuk ei sokkun kol lon an Chon Israel kewe kol me nikattik. “Lon chok ekkewe kolun lolilen are kolun kechiu repwe mochen engi lap seni ar aea ngingiin nikattik are ngingin wenewenen fos,” alon ewe Paipel encyclopedia Insight on the Scriptures.a

Jises me noun kewe chon kaeo mi tuppwol ra eani kolun mwareiti Jiowa lon ewe pwinin mwen an Jises malo, me ese mwaal ra koluwu ekkewe Kol mi Fel mi iteit ren iter Hallel. (Kol Fel 113-​118) A ifa me ei minen apochokkul ngeni noun Jises kewe chon kaeo lupwen nour we Masta epwe pout seniir! Nge lap seni ena, ar uppos le likiitu lon ar tuppwol ngeni ewe Epinikepisom, Jiowa, a lapelo lupwen ra kol fan limu ewe chorus “pun an we tong enlet epwe nonnom feilfeilo chok!”​—Kol Fel 118:1-4, 29.

Ekkewe Chon Kraist lon Efisus me Kolose loom ra kol “ngeni Kot ren kol fel me kolun lamalam” (wesewesen, “hymns”). Ra pwal apacha ngeni “ekkewe kol lon pekin ngun” ra kol seni lon letiper. (Efisus 5:19; Kolose 3:16) Ren ar kol me kapas, ra aea auer pwe repwe mwareiti Kot. Jises a apasa pwe “seni masouen letipan, auan epwe apasata”?​—Mattu 12:34.

Kol Me Nikattik Kot Ese Pwapwa Ren

Ekkewe kol me nikattik meinisin lon ewe Paipel rese apwapwai Kot. Ekieki mwo met a fis won ewe Chuuk Sainai, ia Moses a angei me ie ewe Alluk, kapachelong ekkewe Alluk Engol. Lupwen Moses a feitiu me won ewe chuuk, met a rongorong? “Sap akurangen aramas mi win ika kuf,” nge “ngingin aramas mi kol.” Ei kol a fiti fel ngeni uluulun, ina eu foffor mi asonga Kot me a efisata maloon orun 3,000 mi eani ena kol me nikattik.​—Ekistos 32:18, 25-​28.

Inaamwo ika aramas ra tongeni for noten, ettik, me pwapwaiti sokkopaten kol me nikattik, sap weween pwe ir meinisin repwe apwapwai Kot. Pwata? Ewe aposel Paul a awewei: “Aramas meinisin ra tipis, o rese mo tori ewe lingen Kot.” (Rom 3:23) Fan chommong ekkewe kol me nikattik ra itelapei fofforun fel ngeni nounoukis, ewe luku pwe ngunun aramas ese tongeni malo, me fel ngeni Meri ussun “inen Kot”. Nge, ekkeei luku me foffor a osufolungaua ewe Koten enlet, popun pun ir mi u ngeni minne a mak lon ewe Kapas mi pin, ewe Paipel.​—Tuteronomi 18:10-​12; Isikiel 18:4; Luk 1:35, 38.

Filioch Ren Kol Me Nikattik

Mei wor sokkopaten kol me nikattik mi chommong mi afitikokokich. Opwonun ekkewe compact disc ra for pwe epwe amwokutu ekkewe chon kamo le mooni sokkopaten kol me nikattik meinisin. Nge ika ewe chon fel ngeni Kot a mochen apwapwai I, epwe tumunufichi le filioch me oputalo ekkewe kol me nikattik mi popu seni lukuen lamalam chofona are mi apochokkula lisowu mwaal me fel ngeni ekkewe timon.

Albert, emon mi piin eani ewe wiis misineri lon Africa, a apasa pwe ese kon watte an tufichin etik piano ikena ie. Iwe nge, a tufichin akkauselinga fan chommong ekkewe record a ukkuwei. Lupwen a liwiniiti wesetan fonuan, Albert a wiisen chuuri an ekkewe Chon Kraist mwichefel lon ewe wiis overseer mi sai fetal. Ese kon watte an tufichin auselinga nikattik. “Beethoven ewe emon chon for nikattik ua saani lap seni meinisin,” ina alon we. “Lon ekkewe ier a lo, ua mooni rekotun an kewe symphony, concerto, sonata, me quartet.” An auselinga ekkeei nikattik a atoto ngeni pwapwa wachemuk. Pwungun pwe, mi sokkofesen ewe sokkun kol me nikattik emon me emon a saani, nge ussun Chon Kraist, sia mochen chechchemeni an Paul we emmwen: “Ika ami oupwe mongo are un, are fori och mettoch, oupwe chok fori mettoch meinisin pwe oupwe alinga Kot ren.”​—1 Korint 10:31.

Kol Me Nikattik Me Fangelo Manauach

Ewe aewin mettoch Susie a tongei lap seni meinisin ina kol me nikattik. “Lupwen ua tori 6 ier ua poputa le etik piano, violin lupwen ua 10, me saingo ewe arp lupwen ua 12,” neminnan a awewei. Mwirin Susie a fiti ewe Royal College of Music lon London, England, ren an epwe kaeo ewe arp. A sukul ruaanu ier ren emon chon silelap etik arp mi itefoulo seni Spain me pwal eu ier lon ewe Paris Conservatoire. A angei honors degree lon music pwal chommong diploma fan iten an etik arp me asukula aramas piano.

Susie a poputa le fiti eu mwichefelin Chon Pwarata Jiowa lon London. Ikkena ie a kuna tong enlet seni lein chienan kewe Chon Pwarata. Ekis me ekis, an tong fan iten Kot a lapelo, me an achocho ngeni ewe angangen afalafal a amwokutu i le kutta ifa ussun epwe angang ngeni. Ei mettoch a emmwen ngeni an fangelo manauan ngeni Kot me papatais. “Lupwen ua angang fan iten nikattik, a ussun ita ua fangelo manauei ngeni ena mettoch, ina popun ua weweiti weween fangelo manauach,” Susie a apasa. A ekisalo ekkewe fansoun a etik noun kewe pisekin nikattik mwen aramas pokiten an alleasochisi allukun Jises le afalafala ewe kapas allim ussun an Kot we Muu.​—Mattu 24:14; Mark 13:10.

Met meefian iei pokiten ese chuen kon awattei an ekketik noun kewe pisekin nikattik mwen aramas? “Fan ekkoch ua mangau pokiten ese naf ai fansoun praktis,” iei alon, “nge ua chuen etik nei kewe pisekin nikattik me efich kol me nikattik. Kol me nikattik eu liffang seni Jiowa. A lapelo ai efich ekkeei mettoch iei pun ua akkomwa an we angang lon manauei.”​—Mattu 6:33.

Kol Me Nikattik Mi Mwareiti Kot

Albert me Susie kapachelong ekkewe arapakan wonu milion Chon Pwarata Jiowa ra akkeani kol me nikattik le mwareiti Jiowa Kot. Lon ar kewe mwich lon ekkewe Kingdom Hall lon 234 fonu, ra poputani me awesi ar kewe mwich, ika mi mumu ngeni, ren ar eani kol ngeni Jiowa. Lon tikiken me leuopong, nikattik mi ngingioch ra apasawu kol mi alongolong won kapas seni Paipel pwe repwe mwareiti Jiowa Kot.

Meinisin mi fiti ewe mwich ra leummongeta le kol pwe Jiowa emon Kot mi tong (Kol 44). Ra eani kolun mwareiti Jiowa (Kol 190). Ar kewe kol ra awewe won pwapwaan me wiisen meinisin mi fiti an ewe mwichen pwipwi lon Kraist, manauen Chon Kraist, me ekkewe lapalapen Chon Kraist. Sokkopaten lapalapen kol me nikattik ekkewe Chon Pwarata seni Esia, Australia, Iurop, me North me South America ra aea lupwen ra fori ekkewe kol me nikattik a alapalo ar pwapwa.b

“Oupwe kol ngeni ewe Samol echo kol mi fo; oupwe kol ngeni ewe Samol, ami chon fonufan meinisin! Oupwe kol ngeni ewe Samol, o mwareiti itan,” ina ekkewe kapasen le poputaan ewe kolun mwareiti mi lapalap mi mak lon ranin ewe soumak kol fel. “Oupwe aporausa usun an we angangen amanau ran meinisin! Oupwe arongafeili an we ling lein ekkewe mu, an kewe angang mi amwarar lein ekkewe aramas meinisin!” (Kol Fel 96:1-3) Ina met ekkewe Chon Pwarata Jiowa ra foffori lon fonuemi, me ra etiwakemi le fitiir le eani ei kolun mwareiti. Repwe etiwok lon ar kewe Kingdom Hall, ia kopwe kaeo ie ifa ussun kopwe mwareiti Jiowa ren kol me nikattik mi apwapwai i.

[Ppii ekkewe pwóróus fan]

[Sasing lon pekin taropwe 20]

Sipwe eani kolun mwareiti Jiowa