Io Noun Kot Kewe Chon Angang Mi Fel Ikenai?
“Tufichich fan iten wiisach a popu seni Kot, ewe mi wesewesen atufichikich pwe sipwe wiisen chon angang mi fel fan iten eu atipeeu sefo.”—2 KORINT 3:5, 6, New World Translation.
1, 2. Menni wiis meinisin chon Kraist lon ewe aewin senturi ra wiiseni, nge ifa ussun ena mettoch a siwil?
LON EWE aewin senturi C.E., meinisin chon Kraist ra wiiseni eu wiis mi lamot—nge iei wiisen ar repwe afalafala ewe poraus allim. Ir meinisin ra kepit ren ewe ngun mi fel me ir chon angang fan iten ewe atipeeu sefo. Ekkoch ra wiiseni pwal ekkoch wis, awewe chok ren ewe wiis chon kait lon ewe mwichefel. (1 Korint 12:27-29; Efisus 4:11) A chou wiisen ekkewe sam me in lon en me an famili. (Kolose 3:18-21) Nge meinisin ra fiti ewe angang mi auchea me lamot, nge iei ewe angangen afalafal. Me ren ewe fosun Kriik ewe Tesin Kriik a akkom mak lon, iten ena wiis di·a·ko·niʹa—nge iei eu angang mi fel.—Kolose 4:17.
2 Nge lo, lo, mettoch ra siwil. Eu mwich a fisita, nge iei ewe mwichen nouwiis, iwe, ra forata ewe kokkot pwe ir chok repwe wiisen afalafal. (Fofor 20:30) Ekkena nouwiis ra chokukkun lein ekkewe chommong mi apasa pwe ir chon Kraist. A lap me leir ra nom lon ewe tettelin chon mwichefel. Inaamwo ika ekkena chon mwichefel ra fen kait pwe a wor ekkoch wiis repwe apwonueta, me a kapachelong ar uwouto asor fan iten alillisin ekkewe nouwiis, nge a lap me leir chon auseling chok ika epwe piita porausen ewe angangen afalafal.
3, 4. (a) Ifa ussun chon Christendom ra kan angei wiiser? (b) Lon Christendom, io kewe ra wiiseni ewe wiis chon afalafal, nge pwata Chon Pwarata Jiowa ra sokko seni Christendom?
3 Ekkena nouwiis ra apasa pwe ir chon angang mi fel fan iten Kot (seni minister, eu fosun Latin mi affou seni di·aʹko·nos, “chon atawe”).a Ren ar repwe tufichin wiiseni ena wiis, ra kan sochungio seni sukul tekia are sukulen lamalam, iwe, ra kan seikita ngeni. Iei alon The International Standard Bible Encyclopedia: “‘Seikata’ me ‘seikita’ ra kan weneiti ewe wiis tekia mi kaimulo fan iten sounpetak are patere ren ekkoch fofforun lamalam mi pin, nge mi kapachelong ewe nemenem fan iten an emon wiisen afalafala ewe Kapas are fori ekkewe fofforun lamalam mi pin, are ir me ruu.” Io a wiisen seikata ekkena sou emmwen? Iei alon The New Encyclopædia Britannica: “Lon ekkewe lamalam mi amwochu ewe kokkotun bishop, fansoun meinisin emon bishop epwe wiisen seikata aramas fan iten ena wiis. Lon ewe lamalam Presbyterian, ekkewe nouwiis lon ewe presbytery ra kan seikata aramas.”
4 Ina minne, lon ekkewe lamalamen Christendom, a wesewesen pinepin an aramas tufichin wiiseni ewe wiis chon afalafal. Iwe nge, esap ina ussun Chon Pwarata Jiowa. Met popun? Pun esor ena sokkun kokkot lon ewe mwichefelin Kraist lon ewe aewin senturi.
Io Wesewesen Noun Kot kewe Chon Angang mi Fel?
5. Me ren ewe Paipel, io kewe ra kapachelong lein ir mi wiiseni ewe wiis chon angang mi fel?
5 Me ren ewe Paipel meinisin chon fel ngeni Jiowa—lon lang me pwal won fonufan—ir chon angang mi fel. Chonlang ra fori angang mi fel fan iten Jises. (Mattu 4:11; 26:53; Luk 22:43) Chonlang ra pwal “angang fan iten ekkewe aramas repwe alemwiri amanauen ngunur.” (Ipru 1:14; Mattu 18:10) Jises emon chon angang mi fel. Iei alon: “Ewe Noun aramas a feito, esap fan iten an aramas repwe angang ngeni, nge pwe epwe fori angang mi fel fan iter.” Mattu 20:28, NW; Rom 15:8) Ina minne, pokiten chon appiru Jises repwe “tapwelo mwirin lon ipwan,” esap eu mettoch mi amairu pwe pwal ir repwe chon angang mi fel.—1 Piter 2:21.
6. Ifa ussun Jises a pwarata pwe noun kewe chon kaeo repwe chon angang mi fel?
6 Iei alon Jises ngeni noun kewe chon kaeo ekis mwen an we feita lang: “Oupwe feilo asoulangalo chon fonu meinisin, oupwe papataisir fan iten ewe Sam, me ewe Nau, me ewe Ngun mi Fel, oupwe afalafaler pwe repwe alleasochisi mettoch meinisin minne ua alluku ngenikemi.” (Mattu 28:19, 20) Noun Jises kewe chon kaeo repwe wiisen asoulangalo aramas—weween, ir chon angang mi fel. Ekkewe minefoon chon kaeo repwe kaeo pwe repwe alleasochisi meinisin ekkewe mettoch Jises a alluku ngenir, pachelong ewe alluk mi era pwe repwe feilo asoulangalo aramas. Mwan are fefin, watte are kukkun, emon mi enletin tapwelo mwirin Jises Kraist epwe emon chon angang mi fel.—Joel 2:28, 29.
7, 8. (a) Ikkefa ekkewe wokisin lon Paipel mi affata pwe meinisin chon Kraist, ir chon angang mi fel? (b) Ikkefa ekkewe kapas eis mi piita ussun seikitaan aramas fan iten ewe wiis chon angang mi fel?
7 Lon an tipeeu ngeni ena, lon ewe ranin Pentecos 33 C.E., meinisin noun Jises kewe chon kaeo mi chufengen, mwan me fefin, ra esileilo “ekkewe mettoch mi amwarar ussun Kot.” (Fofor 2:1-11, NW) Pwal och, iei makkeien ewe aposel Paul: “Ren letipan emon epwe pwarata an lukuluk fan iten pwung, nge ren auan emon epwe uwawu kapasen esilesil fan iten amanau.” (Rom 10:10, NW) Sap minne alon Paul a weneiti eu mwichen nouwiis mi kukkun, nge “noun Kot kena aramas meinisin mi achengicheng lon Rom.” (Rom 1:1, 7) Iwe pwal ussun chok, meinisin ‘ekkewe aramas mi fel lon Efisus me ir mi tuppwol lon ar eufengen me Kraist Jises’ repwe “tukum ngeni pecher ekkewe pisekin ewe kapas allim usun kinamwe.” (Efisus 1:1; 6:15) Iwe, ir meinisin mi rong ewe taropwe mi mak ngeni chon Ipru repwe ‘kamwochunnuk won ewe kapasen esilesil ussun ar apilukuluk, nge resap mwaroro.’—Ipru 10:23, NW.
8 Iwe nge, inet emon aramas epwe wiliiti emon chon angang mi fel? Weween, inet a kan seikita? Iwe, io a kan wiisen seikata ewe emon?
Inet Emon a Seikita ngeni ewe Wiis Chon Angang mi Fel?
9. Inet Jises a seikita, me io a seikata i?
9 Ren porausen inet me ifa ussun emon a kan seikita, ekieki mwo manauen Jises Kraist. Ese angei echo taropween seikita are sochungio seni eu sukulen lamalam mi anneta pwe i emon chon angang mi fel, me esor emon aramas mi seikata i. Iwe, pwata sia tongeni apasa pwe i emon chon angang mi fel? Pun an Aisea we oesini a pwonuta lon manauan: “Ngunun ewe Samol a nonnom woi, pun a epitieilo pwe upwe arongafeili ewe kapas allim.” (Luk 4:17-19; Aisea 61:1) Ekkena kapas ra affata pwe Jises epwe wiisen arongafeili poraus allim. Io a awiisa ngeni i ena wiis? Pokiten ngunun Jiowa a epiti i fan iten ewe angang, iwe, a ffat pwe Jiowa Kot a seikata i. Inet ena mettoch a fis? Ngunun Jiowa a feitiu won Jises lupwen a papatais. (Luk 3:21, 22) Ina popun, a seikita lon ewe fansoun an papatais.
10. Io a “atufichi” emon chon Kraist fan iten ewe wiis chon angang mi fel?
10 Nge ifa ussun noun Jises kewe chon kaeo lon ewe aewin senturi? Wiiser, wiisen chon angang mi fel a pwal feito seni Jiowa. Iei alon Paul: “Tufichich fan iten wiisach a popu seni Kot, ewe mi wesewesen atufichikich pwe sipwe wiisen chon angang mi fel fan iten eu atipeeu sefo.” (2 Korint 3:5, 6, NW) Ifa ussun Jiowa a atufichi ir mi fel ngeni i pwe repwe wiisen chon angang mi fel? Nengeni mwo porausen Timoti, nge ina i ewe emon Paul a eita ngeni “noun Kot chon angang mi fel lon ewe kapas allim ussun ewe Kraist.”—1 Tesalonika 3:2, NW.
11, 12. Ifa ussun Timoti a feffeita ngeni an epwe wiliiti emon chon angang mi fel?
11 Ekkeei kapas ngeni Timoti a alisikich le weweiti ifa ussun a wiliiti emon chon angang mi fel: “Nge en, kopwe chok likiitu lon minne ka fen kaeo o luku; pun ka sinei io ka fen kaeo seni. Ka pwal sinei ekkewe taropwe mi fel seni chok om kukkun, ekkewe taropwe mi tongeni atipatchemokelo usun ewe angangen amanau ren luku Kraist Jises.” (2 Timoti 3:14, 15) Longolongun an Timoti luku, nge iei ewe luku mi amwokutu i pwe epwe uwawu kapasen esilesil, iei sileian ussun Paipel. A naf an epwe chok pwisin alleani Paipel fan iten ena mettoch? Aapw. A lamot ngeni Timoti an epwe kuna alillis fan iten an epwe angei sile mi enlet me weweiti minne a alleani. (Kolose 1:9) A ina ussun an Timoti ‘tipetipelo pwe epwe luku.’ Pokiten an silei Paipel ‘seni an kukkun,’ neman inan we me inelapan we ra akkom kaeo ngeni, pwe a ussun ita nge seman we sap emon chon luku.—2 Timoti 1:5.
12 Iwe nge, a wor pwal fitu mettoch mi kapachelong lon an Timoti wiliiti emon chon angang mi fel. Eu leir, an luku a pochokkuleta ren an fiffiti chon Kraist lon ekkewe mwichefel mi kan ngeni. Ifa ussun sia silei ena? Pun lupwen Paul a keran aewin chuuri Timoti, ei aluwol a “iteuoch me lein pwin kewe Soulangin Listra me Aikoniom.” (Fofor 16:2) Pwal och, lon ena fansoun ekkoch brother ra kan mak taropwe ngeni ekkewe mwichefel ren ar repwe apochokkulereta. Ekkewe elter ra pwal chuchchuuriir pwe repwe alisiir. Ekkena mettoch ra alisi chon Kraist ussun Timoti pwe repwe feffeita lon pekin ngun.—Fofor 15:22-32; 1 Piter 1:1.
13. Inet Timoti a seikita emon chon angang mi fel, me pwata kopwe apasa pwe an feffeita lon pekin ngun ese ukutiu me ikana ie?
13 Pokiten a mak an Jises alluk lon Mattu 28:19, 20, esor ach tipemwaramwar pwe a tori eu fansoun lupwen an Timoti luku a amwokutu i pwe epwe appiru Jises, iwe, a papatais. (Mattu 3:15-17; Ipru 10:5-9) Ina esissinnen an Timoti fangolo manauan ngeni Kot ren unusen letipan. Lon ena fansoun an a papatais, Timoti a seikita emon chon angang mi fel. Seni ena fansoun a walong le poun Kot manauan, pochokkulan me mettoch meinisin a nom ren. Ina eu mettoch mi pacheri an fel ngeni Kot, “eu angang mi fel.” Iwe nge, Timoti ese meefi pwe a ina chok ukuukun wiisan. A chuen chok mammaarita lon pekin ngun, iwe, a wiliiti emon noun Kraist chon angang mi asimau. Ena mettoch a fis pokiten an Timoti fitipach ngeni chon Kraist mi asimau, awewe chok ren Paul, me an pwisin kaeo, me an tinikken lon ewe angangen afalafal.—1 Timoti 4:14; 2 Timoti 2:2; Ipru 6:1.
14. Ikenai, ifa ussun emon mi “fichiiti an epwe eani ewe apilukulukun manau esemuch” a kan feffeita ngeni an epwe wiliiti emon chon angang mi fel?
14 Ikenai, a pwal ina ussun seikitaan aramas ngeni ewe wiis chon angang mi fel fan iten Kraist. Emon mi “fichiiti an epwe eani ewe apilukulukun manau esemuch” a akkangei alillis pwe epwe silei ussun Kot ren an kaeo Paipel. (Fofor 13:48) Ewe emon epwe kaeo ifa ussun an epwe apwonueta an Paipel kewe alluk lon manauan me ifa ussun an epwe eani ewe sokkun iotek Kot epwe pwapwaiti. (Kol Fel 1:1-3; An Salomon Fos 2:1-9; 1 Tesalonika 5:17, 18) Epwe fiffiti chienan kewe chon luku me akkangei alillis seni minne “ewe chon angang mi tuppwol me tipatchem” a kan awora me akkota. (Mattu 24:45-47; An Salomon Fos 13:20; Ipru 10:23-25) A ina ussun an mammaarita lon eu kokkotun kaeo.
15. Met a fis lupwen emon aramas a papatais? (Pwal pi ewe footnote.)
15 Iwe, lo, lo, ewe chon kaeo Paipel, pokiten an amaarata an tongei Jiowa Kot me an luku mi pochokkul lon ewe moon kepich, a mochen fangolo unusen manauan ngeni Seman we lon lang. (Jon 14:1) A fori ena mettoch ren an pwisin iotek ngeni Kot, iwe mwirin, a papatais fan iten eu esissin mi pwari ngeni aramas pwe a fen fori ena mettoch le monomon. An papatais, ina ewe fansoun an seikita, pun ina ewe atun aramas ra weweiti pwe i emon noun Kot chon angang, weween, emon di·aʹko·nos, ren an fangolo unusen manauan ngeni. Epwe imulo seni fonufan fansoun meinisin. (Jon 17:16; Jemes 4:4) A fen mwei ngeni Kot unusen manauan, iwe, a ussun “eu asor mi manau, asor mi fel, asor Kot epwe pwapwa ren,” weween, esap amwochu och mettoch seni Kot. (Rom 12:1)b I noun Kot chon angang mi fel, iwe, a akkappiru Kraist.
Met Weween An Chon Kraist Angang mi Fel?
16. Met sokkun mettoch Timoti a fori lon wiisan we, wiisen chon angang mi fel?
16 Met a kapachelong lon an Timoti angang mi fel? A wor wiisan kewe mi sokkolo pokiten an eti Paul le saifetal. Lupwen a seikita ngeni emon elter, Timoti a angang weires le asukula me apochokkula chienan kewe chon Kraist. Nge ewe mettoch mi akkaewin lamot lon an angang mi fel, iei an afalafala ewe poraus allim me an kutfetal chon kaeo, pwe a ina ussun Jises me Paul. (Mattu 4:23; 1 Korint 3:5) Iei alon Paul ngeni Timoti: “Nge en, kopwe chok ononoto ren mettoch meinisin, o likiitu fan riaffou; kopwe fori angangen sounpetaken ewe kapas allim, o kopwe apwonueta wisom.”—2 Timoti 4:5.
17, 18. (a) Menni angangen afalafal chon Kraist ra fiffiti? (b) Ifa ukuukun lamoten ewe angangen afalafal ngeni emon chon Kraist mi wiiseni ewe wiis chon angang mi fel?
17 A pwal ina ussun noun Kraist kewe chon angang mi fel ikenai. Ra foffori eu angangen afalafala aramas meinisin ese lifilifil, eu angangen uweifeili poraus allim, iwe, ra aiti ngeni aramas ussun ewe kokkotun amanaua aramas, ewe mi longolong won an Jises asor, me ra asukula chon mosonoson pwe repwe kokkori iten Jiowa. (Fofor 2:21; 4:10-12; Rom 10:13) Ra anneta seni Paipel pwe ewe Muu, iei ewe eu chok apilukuluk fan iten aramas mi kukkuna riaffou me ra pwarata pwe pwal mwo nge iei chok nonnomuch a murinno ika sipwe akkapwonueta allukun Paipel lon manauach. (Kol Fel 15:1-5; Mark 13:10) Nge noun Kraist kewe chon angang mi fel rese akkafalafal ussun ewe sokkun tipeeu me kinamwe aramas repwe pwisin achocho le efisata. Nge ra eani afalafal pwe ‘sufol mi alollol ngeni Kot a amwochu pwonen ewe manau iei me ewe epwe feito.’—1 Timoti 4:8, NW.
18 Mi enlet pwe lap ngeni ekkan chon angang mi fel a wor pwal fitu angang ra kan foffori, iwe, eli wiisen emon me emon chon Kraist epwe sokkolo. Chommong leir a wor wiiser ngeni ar kewe famili. (Efisus 5:21–6:4) Ekkewe elter me ministerial servant a wor wiiser lon ewe mwichefel. (1 Timoti 3:1, 12, 13; Taitos 1:5; Ipru 13:7) Chommong chon Kraist ra kan awora ar alillis le aueta Kingdom Hall. Ekkoch ra wiiseni ewe wiis mi auchea, wiisen ar repwe angang lon eu me lein ekkewe Bethel home an ewe Watch Tower Society. Iwe nge, meinisin noun Kraist kewe chon angang mi fel ra fiffiti ewe angangen afalafala ewe poraus allim. Esor emon leir ese foffori ena angang. Ar fiffiti ena angang a pwarata ngeni aramas meinisin pwe ir wesewesen noun Kraist kewe chon angang mi fel.
Ekiekin Noun Kraist kewe Chon Angang mi Fel
19, 20. Menni ekiek chon Kraist mi wiisen chon angang mi fel repwe amaarata?
19 A lap me lein ekkewe nouwiisin Christendom ar ra ekiekin kuna an aramas asamoluur, iwe, ra angei ekkan itelap fan iten wiiser, awewe chok ren “sounpetak” me “patere.” Iwe nge, emon noun Kraist chon angang mi fel a silei pwe mi fichiiti Jiowa chok an aramas repwe asamolu. (1 Timoti 2:9, 10) Emon noun Kraist chon angang mi fel ese ekiekin kuna an aramas atekiata i, me ese ekiekin angei och itelap fan iten wiisan. (Mattu 23:8-12) A silei pwe di·a·ko·niʹa a wewe ngeni “angang.” Fan ekkoch ewe Paipel a nounou ewe kapas mi kan ngeni ena ren och sokkun angang fan iten aramas, awewe chok ren an emon alisi chon etto mongo lon eu kafie. (Luk 4:39; 17:8; Jon 2:5) Inaamwo ika nounoun ewe kapas fan iten an chon Kraist angang mi fel a tekia seni ena sokkun angang, nge emon di·aʹko·nos a chuen wewe ngeni chok emon chon atawe.
20 Ina minne, esor popun emon noun Kraist chon angang mi fel epwe meefi pwe a sokkolo lamoten manauan. Wesewesen noun Kraist kewe chon angang mi fel, ir chon atawe mi tipetekison, pwal mwo nge ir mi wiiseni wiis mi sokkolo aucheaar lon ewe mwichefel. Iei alon Jises: “Are emon a mochen pwe epwe lapalap leimi, iwe, epwe chok noumi chon alilis; o are emon epwe mochen nampa eu leimi, iwe, epwe chok noumi chon angang.” (Mattu 20:26, 27) Lupwen Jises a aiti ngeni noun kewe chon kaeo ewe ekiek mi pwung repwe amaarata, a tolu pecher kewe, weween, a fori ewe sokkun angang emon chon atawe mi tekison seni meinisin a kan fori. (Jon 13:1-15) A ifa me tekisossonun ena angang! Ina minne, noun Kraist kewe chon angang mi fel ra kan angang ngeni Jiowa Kot me Jises Kraist fan tipetekison. (2 Korint 6:4; 11:23) Ra kan pwarata ekiek tekison le angang fan asengesin chiener kewe. Iwe, lupwen repwe afalafala ewe poraus allim, ra kan angang fan kisaseu ngeni chon orur kewe rese fitiir lon ar lukuluk.—Rom 1:14, 15; Efisus 3:1-7.
Likiitu lon ewe Angang mi Fel
21. Ifa liwinin Paul pokiten an likiitu lon wiisan we, wiisen chon angang mi fel?
21 A lamot ngeni Paul likiitu lon an wiiseni ewe wiis chon angang mi fel. A ereni chon Kolose pwe a kuna riaffou watte ren an epwe afalafala ngeniir ewe poraus allim. (Kolose 1:24, 25) Iwe nge, pokiten an likiitu, chommong ra etiwa ewe poraus allim, iwe, ra wiliiti chon angang mi fel. Ra upsefal pwe repwe wiliiti noun Kot me pwiin Jises Kraist, iwe, ra eani ewe apilukulukun ar repwe wiliiti ngun unukkun i lon lang. A fet lingemwararen liwinir ren ar likiitu!
22, 23. (a) Ikenai, pwata likiitu a lamot ngeni chon Kraist mi wiisen chon angang mi fel? (b) Menni uwa mi murinno a kan fisita seni likiituun chon Kraist?
22 Ikenai likiitu a lamot ngeni ir mi wesewesen noun Kot chon angang mi fel. Chommong ra weiresin likiitu fan samau are cheuchen chinnap iteiten ran. Ekkewe sam me in ra angang weires pwe repwe amaarata nour kewe, nge chommong leir esor puluwer. Chon sukul ra pwora le fiu ngeni ekkewe mettoch mi ngau mi pwellifeiliir. A mmen weires ngeni chommong chon Kraist ar repwe awora tufichin manauer. Iwe, chommong ra kuna riaffou seni chon oputer are watte osukosuk pokiten an a torikich ikenai “fansoun fitikoko watte mmen weires ach sipwe pwakiniir”! (2 Timoti 3:1, NW) Ewer, ekkewe arapakan wonu milion noun Jiowa chon angang mi fel repwe tongeni eti ewe aposel Paul le apasa: “Lon mettoch meinisin sia pwisin pwarata pwe kich noun Kot chon angang mi fel, ren ach likiitu fan chommong mettoch.” (2 Korint 6:4, NW) Chon Kraist mi wiisen chon angang mi fel rese kan fangeta. Sipwe enletin mwareitiir pokiten ar likiitu.
23 Pwal och, likiitu a kan efisata uwa mi murinno, pwe a ina ussun Paul. Ren ach likiitu, sia akkamwochu ach ririoch ngeni Jiowa me sia akkapwapwai letipan. (An Salomon Fos 27:11) Sia akkapochokkula ach luku me akkalisi aramas pwe repwe wiliiti chon kaeo, iwe, a kan lapalo ewe mwicheichen chon Kraist. (1 Timoti 4:16) Jiowa a fen alisi noun kewe chon angang mi fel me efeiochuur lon ekkeei ranin le sopwoloon. Ina minne, ir mi mwirifochofoch lein ekkewe 144,000 ra fen ionfengen, me fite milion ra fen pwal eani ewe apilukulukun ar repwe pwapwaesini manau esemuch lon eu paratis won fonufan. (Luk 23:43; Pwarata 14:1) Mi enlet pwe an chon Kraist angang mi fel eu mettoch mi pwarata umoumochun Jiowa. (2 Korint 4:1) Amwo oukich meinisin sipwe aucheani ena angang me meefi kilisou pwe uwaan epwe pwapwaalo tori feilfeilo chok.—1 Jon 2:17.
[Ppii ekkewe pwóróus fan]
a Ewe kapas “deacon,” weween, emon nouwiis lon lamalam, a popu seni ewe kapasen Kriik di·aʹko·nos. Lon ekkewe lamalam mi mut ngeni fefin ar repwe wiisen deacon, eli repwe iteni deaconesses.
b Inaamwo ika Rom 12:1 a wesewesen weneiti chon Kraist mi kepit, nge aucheaan a pwal weneiti ekkewe “pwal fitemon siip.” (Jon 10:16) Chokena ra ‘pacheri Jiowa pwe repwe angang ngeni i me tongei iten Jiowa, ren ar repwe wiliiti noun chon atawe.’—Aisea 56:6.
En mi Tufichin Awewei?
• Menni wiis meinisin chon Kraist lon ewe aewin senturi ra wiiseni?
• Inet emon chon Kraist a kan seikita ngeni ewe wiis chon angang mi fel me io a kan seikata i?
• Menni ekiek emon chon Kraist mi wiisen chon angang mi fel epwe amaarata?
• Pwata emon chon Kraist mi wiisen chon angang mi fel epwe likiitu lon fansoun weires?
[Pictures on page 14, 15]
Timoti a kait ussun an Kot Kapas seni le monukolun. A seikita ngeni emon chon angang mi fel lupwen a papatais
[Picture on page 16]
Papatais a liosueta an emon fangolo manauan ngeni Kot me ina esissinnen an emon seikita ngeni ewe wiis chon angang mi fel
[Picture on page 18]
Chon Kraist mi wiisen chon angang mi fel ra tipemecheres ngeni ar repwe angang fan iten aramas