“Ewe Kapasen Kot A Mamarita”
“A tinalo an alluk ngeni fonufan; o an kapas a muttirito.”—KOL FEL 147:15.
1, 2. Menni wiis Jises a awiisa ngeni noun kewe chon kaeo, me met a kapachelong lon?
EU ME LEIN ekkewe oesini lon ewe Paipel mi kon amwarar seni meinisin a nom lon Fofor 1:8. Ekiselo chok mwen an feita lang, Jises a ereni noun kewe mi tuppwol: “Nge oupwe angei manaman, lupwen ewe Ngun mi Fel epwe feito womi. Iwe, oupwe chon pwarata usi . . . lon unusen fonufan meinisin.” A ifa me watteen ena angang!
2 Wiiser le esilefeili an Kot kapas won unusen fonufan epwe eu angang mi fokkun weires ngeni ena mwichen chon kaeo mi chokukkun. Ekieki mwo met epwe kapachelong lon. Repwe wiisen alisi aramas le weweiti ewe kapas allim ussun Muun Kot. (Mattu 24:14) Ar pwarata ussun Jises a pwal kapachelong ar awewe ngeni aramas aitian kewe mi manaman me ar awewei wiisen Jises lon an Jiowa we kokkot. Pwal och, ar angang a kapachelong ar fori chon kaeo me mwirin ar papataisiir. Me epwe fis won unusen fonufan!—Mattu 28:19, 20.
3. Met Jises a ereni noun kewe, me ifa ussun ra mochen apwonueta wiiser?
3 Iwe nge, Jises a ereni noun kewe chon kaeo pwe ngun mi fel epwe nom rer atun ar apwonueta ewe angang a fen awiisa ngeniir. Iwe, ikaamwo watteen ewe angang me an aramas ekkeriaffour me sotun le eppeti ar angang nge, noun Jises kewe chon kaeo loom ra sopwoch lon ar fori minne Jises a awiisa ngeniir. Ena poraus kinikinin uruwoon fonufan aramas rese tongeni u ngeni.
4. Ifa ussun an Kot tong a pwalo ren wiiser le afalafala me asukula aramas?
4 Ena angangen afalafala me asukula aramas won unusen fonufan a pwaralo an Kot tong fan iten chokkewe rese silei Kot. A fen atufichi ar arap ngeni Jiowa me ar angei omusamusen ar kewe tipis. (Fofor 26:18) Wiiser le afalafala me asukula aramas a pwal pwaralo an Kot tong fan iten chokkewe mi uwei ewe poraus, pun a fen mut ngeniir le pwarata ar tongei Jiowa me chon oruur. (Mattu 22:37-39) Ewe aposel Paul a fokkun aucheani an Chon Kraist angangen afalafal. Ina popun a eita ngeni eu “pisek auchea.”—2 Korint 4:7.
5. (a) Ia sia kuna me ie uruwo mi enlet ussun ekkewe Chon Kraist loom, me ifa ussun maaritaan me watteelon ewe angang a fen awewe won ikewe ie? (b) Met popun ewe puken Fofor a lamot ngeni noun Kot kewe chon angang ikenai?
5 Uruwoon an ekkewe Chon Kraist loom angangen afalafal mi enlet a mak lon ewe puk mi pop seni ngunun Kot itan Fofor, makkeien ewe chon kaeo Luk. Ewe puk a awewei amwararen me muttirin maaritaan ena angang. Maaritaan ewe sile ussun an Kot we Kapas a achema ngenikich ussun Kol Fel 147:15 mi apasa pwe Jiowa “a tinalo an alluk ngeni fonufan; o an kapas a muttirilo.” Porausen ekkewe Chon Kraist loom, chokkewe mi pochokkulelo ren ngun mi fel, a murinno me a lamot ngenikich ikenai. Chon Pwarata Jiowa ra foffori ena esin angangen afalafal me foraloon chon kaeo, nge ar we angang a fokkun watte seni minne a fis me loom. Sia kuna ekkewe sokkun osukosuk ekkewe Chon Kraist loom ra fen kuna. Ach lukuluk won an Kot alillis a pochokkulelo lupwen sia ekkekieki ifa ussun Jiowa a efeiochu me apochokkula ekkewe Chon Kraist loom.
Maaritaan Chochoon Chon Kaeo
6. Menni poraus a mak fan ulungat lon ewe puken Fofor, me a weneiti met?
6 Sipwe tongeni kaeo ussun pwonuetaan Fofor 1:8 ren ach ekieki ekkeei kapas “ewe kapasen Kot a mamarita.” Ekkena kapas, nge ra ekis siwil, ra mak fan ulungat lon ewe puken Fofor. (Fofor 6:7; 12:24; 19:20) “Kapasen ewe Samol,” are “ewe kapasen Kot,” lon ekkeei wokisin a weneiti ewe kapas allim—ewe poraus mi murinno ussun ewe enlet seni lang, eu poraus mi manau me manaman a fen siwili manauen chokkewe mi etiwa.—Ipru 4:12.
7. Ifa ussun an Kot kapas a maarita me ren Fofor 6:7, me met a fisita lon ranin Pentekos 33 C.E.?
7 Ewe aewin porausen maaritaan an Kot kapas a mak lon Fofor 6:7. Sia allea: “Iwe, ewe kapasen Kot a mamarita, o iteiter ekkewe chon kaeo a fakkun chommongelo lon Jerusalem, o chommong me lein ekkewe samol-fel ra pwal alleasochisi ewe luku.” Ei wokisin a fos ussun chommongoloon chochoon ekkewe chon kaeo. Me mwan, lon ranin Pentekos 33 C.E., an Kot ngun mi fel a ninatiu won orun 120 chon kaeo lon ewe rumw asan. Ewe aposel Piter a afalafal, me 3,000 lein chokkewe mi auseling ra wiliiti chon luku lon ena ran. Epwe fen watte ewe akurang atun fite ngerou aramas ra feilo ngeni ewe leenien konik are ekkewe leenien konik lon Jerusalem ren ar repwe papatais lon iten Jises, ewe mwan a fen malo ussun chok emon chon atai alluk 50 som ran me mwan!—Fofor 2:41.
8. Ifa ussun chochoon ekkewe chon afalafal a chommongolo lon ekkewe ier mwirin Pentekos 33 C.E.?
8 Chommongoloon ekkewe chon luku a keran poputa. Angangen ekkewe nouwisin lamalamen Jus le pinei ewe angangen afalafal a lamot mwaal. Ekkena nouwis ra fokkun mangau pokiten Jiowa “a apacha ngenir, ran me ran, ekkewe mi tolong lon manau.” (Fofor 2:47) Muttir chok “iteiter ekkewe mwan arap ngeni lime-ngerou.” Me mwirin, “a chommongelo ekkewe mi luku ra apacha ngeni ewe Samol, lap seni lom, chommong mwan me chommong fefin.” (Fofor 4:4; 5:14) Porausen pwal och fansoun mwirin: “Iei minne, ewe mwichefel lon unusen Jutia me Kalili me Sameria a kinamwelo, o a fefeita; ra fefetal lon niuokusun ewe Samol pwal lon aururuun ewe Ngun mi Fel, o ra chommongelo.” (Fofor 9:31) Ekkoch ier mwirin, neman orun 58 C.E., mei wor porausen “fite ngerou . . . ra fen luku.” (Fofor 21:20) Lon ena fansoun, mei pwal wor fite ngerou chon luku ir Chon Jentail.
9. Ifa ussun kopwe awewei lapalapen ekkewe Chon Kraist loom?
9 Chommongoloon ekkewe chon kaeo a kan fisita pokiten an aramas likitalo ar we lamalam loom ren ar repwe choni ewe mi fo. Iei eu minefoon lamalam—nge ekkewe chon luku ra fokkun achocho. Esap ir aramas mi feilo fiti fel chok nge ekkewe chon kaeo ra unusen tongei Jiowa me an we Kapas. Fan ekkoch repwe fen kaeo ewe enlet seni emon chon luku a fen kuna riaffou mwaal. (Fofor 16:23, 26-33) Chokkewe mi etiwa ewe lamalamen Kraist ra fori pokiten ar kaeofichi me ekiekifichi ekkewe luku mwen ar pwisin filata le etiwa. (Rom 12:1) Ra fen kait lon alen Kot kewe; ewe enlet a nonnom lon ekiekir me letiper. (Ipru 8:10, 11) Repwe tongeni fangolo manauer fan iten minne ra luku.—Fofor 7:51-60.
10. Menni wiis Chon Kraist loom ra nguuri, me ifa ussun a wewe chok me ikenai?
10 Chokkewe mi etiwa ewe afalafal ussun Kraist ra pwal meefi wiiser le afalafala ekkewe ekkoch. Ar afalafal a alisata chommongoloon ekkewe chon luku. Emon soukaeo Paipel a apasa: “Rese ekieki pwe chokkewe chok mi fokkun achocho are seikata chon afalafal ra wiisen afalafala ewe luku. Ewe angangen afalafala ewe kapas allim angangen me wiisen emon me emon lon ewe lamalam . . . An ekkewe Chon Kraist mwasangasang le alisi ekkewe ekkoch a fokkun alisata ewe lamalam seni le poputaan.” Atewe a pwal makkei: “Ewe angangen afalafal a ussun chok ewe chcha lon inisich fan iten ekkewe Chon Kraist loom.” A pwal ina ussun fan iten ekkewe Chon Kraist mi enlet ikenai.
A Choufetal
11. Ifa ussun an Kot kapas a maarita me ren Fofor 12:24, me ifa ussun a fisita?
11 Ewe oruuen poraus ussun maaritaan an Kot we kapas a makkei lon Fofor 12:24: “Nge ewe kapasen Kot a mamarita, o a choufetal.” Ikei ie mammaaritaan ewe kapas a weneiti choufetallin ewe kapas ngeni fonu chommong. Inaamwo ika ewe muu a sotun le eppeti ewe angang, nge a chuen uwaoch. Ewe ngun mi fel a akkom ninatiu won aramas lon Jerusalem, me seni ikena ie ewe kapas a muttir choufetal. Ekkewe chon kaeo ra toropasfeil pokiten ewe riaffou mwaal lon Jerusalem me ra feilo ekis meinisin lon Jutia me Sameria. Met a fisita seni ena? “Iwe, ekkewe mi kupetfesen ra chok feilfetal o afalafala ewe kapas.” (Fofor 8:1, 4) Ngun mi fel a emmwen ngeni Filip emon mwan a feilo afalafala aramas lon Itiopia mwirin an papatais. (Fofor 8:26-28, 38, 39) Ewe enlet a muttir uwaoch lon Litta, Saron, me Joppa. (Fofor 9:35, 42) Mwirin, ewe aposel Paul a sailo fite ngerou mwail won saat me fonu ren an epwe popueta mwichefel mi fo lon chommong fonu unukkun ewe saat Mediterranean. Ewe aposel Piter a feilo Papilon. (1 Piter 5:13) Ese mwo tori 30 ier seni ewe fansoun ngun mi fel a fen ninatiu atun Pentekos nge Paul mi tongeni makkei pwe ewe kapas allim a fen afalafal “ekis meinisin fan lang,” neman a fos ussun ekkewe fonu meinisin mi silelo lon ranin we.—Kolose 1:23.
12. Ifa ussun ekkewe chon u ngeniir ra affata pwe an Kot kapas a fokkun choufetal won fonufan?
12 Pwal mwo chokkewe mi u ngeni ewe lamalamen Kraist ra apasa pwe ewe kapasen Kot a fen tori ekis meinisin fan nemenemen Rom. Ren chok awewe, a mak lon Fofor 17:6 pwe lon Tesalonika, ennefennin Kris, chon u ngeni ra puchor: “Atekkeei ra kulluetiu fonufan, ra pwal feito ikei.” Pwal och, orun ewe ier 100, Pliny the Younger a makkei ngeni kepinan Rom itan Trajan seni leenian lon Bithynia ussun ewe lamalamen Kraist. A ngunungunungau le makkei: “Ese chok nom lon ekkewe telinimw nge a fen choufetal ussun eu paiking ngeni ekkewe sopw me fonu.”
13. Ifa ussun choufetallin an Kot kapas won unusen fonufan a pwaralo an Kot tongei aramas?
13 Choufetallin ewe kapas ngeni chommong fonu a pwaralo ukuukun an Jiowa tong fan iten aramas, chokkewe mi tongeni feioch seni an Jises asor. Lupwen Piter a kuna pwe ewe ngun mi fel a feitiu won Kornilios, ewe re Jentail, a apasa: “Enlet, ua koran wewe pwe Kot ese lifilifil aramas, nge lon ekkewe mu meinisin, eka e niuokusiti i o fori minne mi pung, iwe, Kot epwe etiwa i.” (Fofor 10:34, 35) Ewer, me loom me iei, ewe kapas allim eu poraus fan iten sokkun aramas meinisin, me choufetallin ewe kapas ngeni chommong fonu a atufichi aramas ekis meinisin le etiwa an Kot tong. Lon ei 21en senturi, ewe kapas allim a fen tori kinikinin fonufan meinisin.
A Mammaarita Me A Pworacholo
14. Ifa ussun an Kot kapas a maarita me ren Fofor 19:20, me an Kot kapas a pworacho ngeni met?
14 Ewe aulungatin poraus ussun maaritaan an Kot we kapas a mak lon Fofor 19:20: “Iwe, iei ussun kapasen ewe Samol a mamarita, o a fakkun pworacho.” Ewe kapas lon fosun Kris mi affou ngeni “pworacho” a wewe ngeni “angang ren om pochokkul.” Ekkewe wokisin me mwan ra awewe ifa ussun chommong Chon Efisus ra wiliiti chon luku, me ifa ussun ekkoch sou roong ra keni nour kewe puk mwen aramas. Ina ussun ewe kapasen Kot a pworacho ngeni afalafal seni lamalam chofona. Ewe kapas allim a pwal pworacho ngeni pwal ekkoch minen eppet, awewe chok riaffou mwaal. Esor och epwe tongeni eppeti. A ussun we chok ewe lamalamen Kraist mi enlet ikenai.
15. (a) Ifa ewe poraus emon sou uruwo Paipel a makkei ussun Chon Kraist loom? (b) Ekkewe chon kaeo ra apasa pwe ar sopwoch pokiten io?
15 Ekkewe aposel me ekkewe ekkoch Chon Kraist loom ra mwasangasang le esilefeili an Kot kapas. Emon sou kaeo uruwoon Paipel a fen apasa ussuur: “Lupwen aramas ra mochen fos ussun ar Samol, ra kuna chommong sokkopaten lapalapen ar repwe fori. Iwe nge, ar mwasangasang a kon ingeitikich lap seni ifa ussun ra afalafal.” Ekkena Chon Kraist loom ra fen silei pwe sopwochun ar angang ese chok popu seni ar achocho. Kot a awiisa ngeniir ar we angang me ra fen kuna alillis seni lang ren ar repwe apwonueta. Feffeita lon pekin ngun a feito seni Kot. Ina met Paul a fen apasa lupwen a makkei ngeni ewe mwichefel lon Korint: “Ngang, ua fotukatiu, Apollos a achochonu, nge Kot a fen amarata. Pun am chon angangen Kot mi akangangfengen.”—1 Korint 3:6, 9.
Angangen Ngun Mi Fel
16. Met a pwaralo pwe ngun mi fel a atufichi ekkewe Chon Kraist le fos ren pwora?
16 Chechchemeni mwo pwe Jises a alukuluku noun kewe chon kaeo pwe ngun mi fel epwe alisata feffeitaan an Kot we kapas me ngun mi fel epwe atufichi ar apwonueta ewe angang. (Fofor 1:8) Ifa ussun a fen fisita? Ekiselo chok mwirin ewe ngun mi fel a fen ninatiu won ekkewe chon kaeo lon ranin Pentekos, Piter me Jon ra wiisen fos ngeni an Chon Jus Sanhetrin, ewe imwen kapwung mi tekia seni meinisin. Ekkena sou kapwung ra fen ngeni Jises ewe kapwungun malo. Ekkewe aposel repwe chechchech ren ar niuokkus mwen ena mwichen nouwis mi oputer? Aapwi! Ngun mi fel a fen apochokkula Piter me Jon pwe repwe fos ren pwora. Ekkewe chon u ngeniir ra ingelo, me “ra pwal sinei pwe ra pin nonnom ren Jises.” (Fofor 4:8, 13) Ngun mi fel a pwal atufichi an Stifen fos ren pwora mwen ewe Sanhitrin. (Fofor 6:12; 7:55, 56) Me mwan, ngun mi fel a pwal amwokutu ekkewe chon kaeo le afalafal ren pwora. Luk a apasa: “Iwe, mwirin ar iotek, ewe leeni ikewe ra mwichefengen ie a mokutukut, o ir meinisin ra ur ren ewe Ngun mi Fel, o ra pworacho le apasata ewe Kapasen Kot.”—Fofor 4:31.
17. Ifa ussun ewe ngun mi fel a pwal alisata an ekkewe chon kaeo angangen afalafal?
17 Ren an ngun mi fel mi fokkun manaman, Jiowa, fengen me Jises Kraist mwirin an manausefal, ra emmweni ewe angangen afalafal. (Jon 14:28; 15:26) Lupwen ewe ngun a fen tori Kornilios, aramasan, me chienan kewe, ewe aposel Piter a miritiiti pwe Chon Jentail rese sirkumsais ra pwal fich ngeni ar repwe papatais lon iten Jises Kraist. (Fofor 10:24, 44-48) Mwirin, ewe ngun a fen alisata kefilitaan Parnapas me Saul, (ewe aposel Paul) fan iten eu angangen misineri, me a affata ia repwe me resap feilo ie. (Fofor 13:2, 4; 16:6, 7) A pwal emmweni ekiekin ekkewe aposel me ekkewe mwan mi asimau lon Jerusalem lupwen ra wiisen pwungupwung won poraus mi lamot. (Fofor 15:23, 28, 29) Ngun mi fel a pwal awora emmwen ren kefilitaan ekkewe chon mas lon ewe mwichefellin Chon Kraist.—Fofor 20:28.
18. Ifa ussun Chon Kraist loom ra pwaralo ar tong?
18 Pwal och, ngun mi fel a pwalo lon manauen ekkewe Chon Kraist ren an amaaraata ekkewe uwaan ngun, ussun chok tong. (Kalesia 5:22, 23) Tong a fen efisi an ekkewe chon kaeo alillisfengeniir. Ren chok awewe, mwirin Pentekos, 33 C.E., a fen kawor moni fan iten osupwangen ekkewe chon kaeo lon Jerusalem. Alon ewe Paipel: “O ese mo wor emon mi osupwang me leir, pun ir ekkewe mi wor fonuer are imwer ra amomolo; o ra wato liwinin minne ra amomolo, o ra isetiu unukkun pechen ekkewe chon kuno, Iwe, ra inetingeni emon me emon usun ar osupwang.” (Fofor 4:34, 35) Ei tong ese chok pwaralo ngeni chiener chon luku nge a pwal pwaralo ngeni ir kewe rese luku ren an Chon Kraist afalafaler ewe kapas allim me kirokiroch ngeniir. (Fofor 28:8, 9) Jises a apasa pwe aramas repwe essina noun kewe chon kaeo pokiten repwe eani ewe sokkun tong mi amwokutur pwe repwe pennuku pwisin manauer. (Jon 13:34, 35) Pwungun pwe ei esin tong epwe luki aramas ngeni Kot me a fokkun alisata feffeitaan ewe angang lon ewe aewin senturi ussun chok ikenai.—Mattu 5:14, 16.
19. (a) Ifa ussun an Jiowa kapas a mammaarita lon ulungat lapalap atun ewe aewin senturi? (b) Met sipwe atittina lon ewe lesen mwirin ei?
19 Mei mak fan 41 porausen “ngun mi fel” lon ewe puken Fofor. A ffat pwe watteeloon angangen Chon Kraist lon ewe aewin senturi a riri ngeni ewe manaman me emmwen seni ngun mi fel. A fen chommongolo chochoon ekkewe chon kaeo, me porausen an Kot kapas a watteelo won fonufan, me a pworacho ngeni lamalamen me ekiekin aramas lon ena fansoun. Maaritaan angangen Chon Pwarata Jiowa ikenai a ussun chok maaritaan an Kot kapas lon ewe aewin senturi. Lon ewe lesen mwirin ei, sipwe atittina maaritaan me watteeloon ren an Kot kapas mi amwarar lon ei fansoun.
En Mi Chechchemeni?
• Ifa ussun ekkewe Chon Kraist loom ra chochchomongolo?
• Ifa ussun an Kot kapas a choufetal won fonufan?
• Ifa ussun an Kot kapas a pworacho lon ewe aewin senturi?
• Ifa wiisen ngun mi fel lon maaritaan an Kot kapas?
[Picture on page 22]
Filip a afalafala ewe re Itiopia, me ewe kapas allim a choufetal
[Picture on page 23]
Ngun mi fel a emmweni ekkewe aposel me ekkewe mwan mi asimau lon
[Picture Credit Line on page 20]
Peniemwanin, asan: Liosun ewe telimwen Jerusalem atun ewe oruuen imwen fel a chuen ukkuta - a nom won fonuen ewe Holyland Hotel, Jerusalem