Ifa Ussun Sipwe Tufichin Likiitu Fan Ekkewe Sokkun Memeef Mi Efisata Letipechou
● Fan an ngunungun Asaf a apasa pwe: “Ellet a solap pwe ua tumwunu lelukei pwe epwe limoch, a solap ai usap tipis. Iteiten ran ua kuna riaffou, nge iteiten lesosor ka apwunguei.”—Kol Fel 73:13, 14.
● Fan ngungures Paruk a apasa pwe: “Feiengauei, pun ewe Samol mi Lapalap a achu riaffou ngeni ai weires. Ua malulu ren ai ngungu, nge esap wor ai kinamwe.”—Jeremaia 45:3.
● Fan letipechou Naomi a apasa pwe: “Ewe mi Unusen Manaman a amarasa letipei. Lupwen ua feila ua uren feioch, nge ewe Samol mi Lapalap a aliwinieito fan ai asoulapo. Pwata oua aita ngeniei Naomi, are ewe Samol mi Lapalap Ewe mi Unusen Manaman a u ngeniei o afeiengauaei?”—Rut 1:20, 21.
LON ewe Paipel a ekis chommong porausen ir mi tuppwol le fel ngeni Jiowa, nge fan ekkoch ra mmen riaffou pokiten letipechou. Pwungun pwe pokiten sise unusoch, epwe ina ussun meefien oukich meinisin fan ekkoch. Eli a mecheres ngeni ekkoch leich ar repwe muttir meefi letipechou pokiten a fen fis mettoch mi fokkun eriaffou lon manauer, nge eli epwe pacheri ar letipechou ewe memmeef pwe aramas rese kan tongeer.
Iwe nge, ika kese amoielo ena sokkun memmeef, epwe tongeni atai om riri ngeni aramas me Jiowa Kot. Emon fin Kraist mi mecheresin meefi pwe aramas rese tongei i a apasa pwe “Fan chommong use fiti ekkewe fansoun pwapwafengen aramas ra etiwaei ngeni pun ua meefi pwe esap ngang emon chiechi murinno ren chon ewe mwichefel.” A fet watteen ewe osukosuk ena sokkun memmeef epwe tongeni efisata lon manauen emon! Met kopwe tufichin fori ren om kopwe amoielo ena sokkun memmeef?
Akkarap ngeni Jiowa
Lon Kol Fel 73, Asaf a affata an osukosuk. Lupwen a apopofengenni pwisin manauan me pisekisekin manauen chon fofforingau, a lolowo. A kuna pwe ekkewe rese pwung ra lamalam tekia me sou kawet, me a ussun ita rese kuna liwinin ar fofforingau. Iwe mwirin, Asaf a apasa pwe a tipemwaramwar ussun lamoten an epwe achocho ngeni an epwe wenechar manauan.—Kol Fel 73:3-9, 13, 14.
Ussun Asaf, ka fen kuna pwe a ussun ita mi fokkun feioch ekkewe chon fofforingau mi asika ar kewe foffor ese pwung? Ifa ussun Asaf a amoielo an kewe memmeef ese pwung? Pwal iei alon: “Nge lupwen ai ekieki epwe ifa usun ai upwe tongeni wewe usun, pun usun pwe epwe eu angang weires ngeniei, tori fansoun ua tolong lon an Kot we leeni mi fel; iwe, ua wewe usun sopolon ar manau.” (Kol Fel 73:16, 17) Asaf a fori eu mettoch mi pwung ren an kulliiti Jiowa lon iotek. Ika sipwe nounou ekkewe fos Paul a makkei, Asaf a poonatiu ewe “aramas lon pekin futuk” ren an apwatai ewe “aramas lon pekin ngun” mi nom lon letipan. Ren an tufichin nennelosefal lon pekin ngun, a weweiti pwe Jiowa a oput fofforingau, iwe, lon eu fansoun ekkewe mi ngau repwap kuna liwinin ar tipis.—1 Korint 2:14, 15.
A ifa me watteen lamoten om kopwe mut ngeni ewe Paipel an epwe alisuk pwe kopwe annefota minne a wesewesen auchea ngeni manauen aramas! Jiowa a achchema ngenikich pwe sap minne ese kan kukkuna minne aramas mi ngau ra foffori. Iei alon Paipel: “Ami oute mwalilo! Sise tongeni otupu Kot. Pun minne emon epwe fotukatiu, iei chok epwe pwal kini . . . Iwe, sisap tilikop le fori minne mi murinno.” (Kalesia 6:7-9) Jiowa epwe anomu aramasingau won “leeni mi mitimit”; iwe, epwe “fori minne repwe turutiu ren.” (Kol Fel 73:18) Fansoun meinisin apwung seni lang epwe pwonuta le sopwoloon.
Om mommongo fansoun meinisin seni an Jiowa kokkotun kaworen mongo lon pekin ngun me om fitipach ngeni noun Kot kewe aramas epwe alisuk le apochokkula om luku me amoielo letipechou are ewe sokkun memmeef ese pwung. (Ipru 10:25) Ussun Asaf, ren om fitipach ngeni Kot, kopwe tongeni kuna an alillis mi fiti tong. Iei pwal alon Asaf: “Ua chok nonnom reom fansoun meinisin; ka akamwochu poumwani. Ekiekin letipom a emmweniei, o mwirin, kopwe angeiei lon ling.” (Kol Fel 73:23, 24) Emon chon Kraist mi kuna kirikiringau me le kukkunun a weweiti miritin ekkena kapas. Neminnewe a apasa pwe “Pokiten ua fitipach ngeni ewe mwichefel, ua kuna och mettoch ussun manauen aramas usaamwo kuna fan eu me mwan. A wenewenen ffat ngeniei pwe a watte an ekkewe elter tong, me esap ir chon atittin pwe chon masen siip.” Ewer, a mmen lamot wiisen ekkewe elterin Kraist mi pwarata tong fan iten ewe angangen amoielo ekkewe sokkun memmeef mi efeiengau.—Aisea 32:1, 2; 1 Tesalonika 2:7, 8.
Etiwa An Jiowa Fon
Paruk, sekerin ewe soufos Jeremaia, a letipengau pokiten choun wiisan we. Iwe nge, fan kirokiroch Jiowa a awena ekiekin Paruk pwe epwe kuna minne a enletin auchea. “‘Nge en, ka chok kukkutta mettoch mi lapalap fan asengesum. Kosap kukkutter. Pun ngang mi atoto eu fansoun riaffou watte ngeni aramas meinisin,’ nge iei alon Jiowa, ‘iwe, upwe tumunu manauom fan iten liwinum lon ekkewe leeni meinisin kopwe feilo ie.’”—Jeremaia 45:2-5, NW.
Ren kapas tuwenewen Jiowa a awewei ngeni Paruk pwe letipengauan a popu seni an ekiekin apwonueta pwisin mochenin. Paruk esap tongeni kuna chengel lon wiisan we seni Kot ika epwe kuttapok mettoch mi lapalap fan asengesin pwisin i. Eli kopwe pwal kuna pwe eu mettoch mi wenewenen murinno kopwe tongeni fori ren om kopwe amoielo letipechou, iei om tti sonuk mettoch mi orukoruk me om angei ewe kinamwe mi popu seni ewe mettoch menemenoch.—Filipai 4:6, 7.
A ma seni Naomi puluwan we, nge ese mut ngeni letipechou an epwe eppeti i lupwen puluwan we me noun kewe ruuemon mwan ra malo. Iwe nge, a pwalo pwe ren och fansoun a maras letipan ussun pwisin i me puluwen noun kewe. Iei alon Naomi lupwen a ekiekin tiniirelo: “A maras letipei pokitemi, pwe poun Jiowa a fen u ngeniei.” Lupwen a tori Petleem, a pwal apasa pwe “Ousap eita ngeniei Naomi [“Ai Minen Apwapwa”]. Oupwe eita ngeni Mara [“Maras”], pun ewe mi Unusen Tekia a fen amarasa letipei.”—Rut 1:13, 20, NW.
Iwe nge, Naomi ese imulo seni Jiowa me noun kewe aramas ren an nonnom lon ekkewe tentoon letipechou. Lon Moap a rong pwe “Jiowa a kulliti noun kewe aramas ren an awora ngeniir pilawa.” (Rut 1:6, NW) Neminnewe a weweiti pwe ewe nampa eu mettoch epwe tongeni fori, iei an nonnom ren noun Jiowa kewe aramas. Iwe mwirin, Naomi fitifengen me Rut ra liwiniiti Juta, iwe, a emmweniochu Rut ren met sokkun foffor epwe eani ngeni mararir we Poas fan iten an epwe monisefalliir.
Iwe, pwal ussun chok ikenai, chon tuppwol mi ma seniir puluwer ra tufichin akukkunalo weiresin letiper ren ar fiffiti angangen ewe mwichefelin Kraist. Ussun Naomi, ra akkachocho ngeni ekkewe mettoch lon pekin ngun, iwe, iteiten ran ra akkalleani Paipel.
Feioch Seni Ach Akkapwonueta Tipachchem Seni Won
Ekkena poraus seni Paipel ra awora emmwen ren ifa ussun emon epwe tufichin pwakini minne a fis pokiten ekkewe sokkun memmeef ese pwung. Asaf a kutta alillis lon an Jiowa we imwen fel me a mosonottam le witi Jiowa. Paruk a etiwa fon me a tti seni letipan ekkewe mettoch mi orukoruk lon pekin acheni pisek. Naomi a akkangang lein noun Jiowa kewe aramas, iwe, a ammolna ewe fopul Rut fan iten wiisan kewe mi auchea lon ewe lamalam ngeni ewe Kot mi enlet.—1 Korint 4:7; Kalesia 5:26; 6:4.
Kopwe tongeni amoielo letipechou me pwal fitu sokkun memmeef ese pwung ren om ekkekieki ifa ussun Jiowa a fen alisi noun kewe aramas pwe repwe pworaiti chommong mettoch lupwen ir mi alaemon chok are ir chon eu mwicheich. Ren om kopwe fori ena mettoch, ekieki mwo an Jiowa fofforun tong mi lap seni meinisin lupwen a awora ewe moon kepich fan asengesum. Akkaucheani ewe tong mi enlet a kan pwalo lon ewe mwicheichen chon Kraist. Annefota ewe manau kopwe eani lon an Kot we fonufan sefo, ewe mi kanoto chok. Iwe, amwo meefiom epwe ussun meefien Asaf ei: “Nge mi chok murinno ngeniei ai upwe arap ngeni Kot; ua fen filata ewe Samol Kot ai leenien op, pwe upwe aporausa usun om kewe fofor meinisin.”—Kol Fel 73:28.