Alillis Fan Iten Ach Sipwe Weweiti ewe Paipel
EWE Paipel, ina eu puk mi sokko seni ekkewe ekkoch puk meinisin. Ekkewe sou makkei ra apasa pwe ra mak fan emmwenien Kot, iwe, masouan a awora chommong pisekin pwarata pwe mei enlet alor. (2 Timoti 3:16) A kapachelong me lein ekkewe poraus mi mak lon ewe Paipel porausen poputaan manauen aramas, ifa popunlapen manauach, me met epwe fis lon mwach kkan. Pwungun pwe ina eu puk epwe murinno ach sipwe kaeo!
Eni ka fen sotun alleani ewe Paipel nge a weires ngonuk le weweiti. Eni kese silei ia kopwe kutta me ie poluen om kkewe kapas eis. Ika a ina ussum, kese alaemon chok. En mi ussun chok emon mwan mi manau lon ewe aeuin senturi. A sai seni Jerusalem ngeni wesetan fonuan we itan Itiopia won efoch wokun. Ena meilapen Itiopia a alleani seni puken ewe soufos Aisea mi mak lap seni fupuku ier me mwan.
Iwe, emon mwan mi sassa unukun ewe wokun a kapong ngeni. Iten ewe mwan, Filip, emon noun Jises we chon kaeo, iwe, a eisini ewe re Itiopia: “Ifa ussun, ka wewe minne ka alleani?” Ewe re Itiopia a polueni: “Pwe ifa ussun, mi tufich rei, are esor emon chon emmweniei?” Iwe, a tingorei Filip pwe epwe tota won waan we wokun. Filip a awewei ngeni ekkewe wokisin ewe mwan a alleani me afalafala ngeni ewe “kapas allim ussun Jises.”—Foffor 8:30-35.
Ussun chok Filip a alisi ena re Itiopia le weweiti an Kot we Kapas lom lom, noun Jiowa kkewe Chon Pwarata ikenai ra alisi aramas le weweiti ewe Paipel. Repwe pwal pwapwa le alisuk. A kkan murinno an epwe tettelioch an emon kakkaeo ewe Paipel, weween, epwe poputa ren ekkewe kaeon le popun seni Paipel. (Ipru 6:1) Lupwen kopwe feffeita lon om wewe, kopwe tongeni angei minne ewe aposel Paul a iteni “mongo pochokkul”, weween, ekkewe poraus enlet mi alollol. (Ipru 5:14) Inaamwo ika kopwe kaeo ewe Paipel, nge pwal ekkoch puk—puken alillis—repwe tongeni alisuk le kutta me weweiti ekkewe wokisin lon Paipel fan sokkopaten itelap.
An emon kaeo ngonuk epwe kkan tongeni fis lon eu fansoun me leeni mi murinno ngonuk. Ekkoch ra pwal mwo nge kaeo won ewe telephone. Sap minne ewe kaeo epwe ussun chok lon eu sukul; epwe fich ngeni pwisin manauom me ukukun om sile. Ese kamo ena sokkun kaeoon Paipel. (Mattu 10:8) Esap fis test, me esap wor och mettoch kopwe sau ika osukosuk ren. Epwe polu om kkewe kapas eis, iwe, kopwe silei ifa ussun kopwe tongeni arap ngeni Kot. Iwe nge, pwata kopwe kaeo ewe Paipel? Ekieki mwo ekkoch popun om kaeo ewe Paipel epwe tongeni atoto ngeni manauom pwapwa.