Kosap Mut ngeni Tipemwaramwar An epwe Atai Om Luku
Eu ran ka ekieki pwe ka pochokkul. Sorota ka meefi semmwen. Muttir chok, a unusen apwangapwang inisum. A metek mokurom me a cheuch inisum. Met a fen fis? Monun samau a fen pworaiti ekkewe minen eppetin samau lon inisum me ra toki kifetin lon inisum. Ika kese safei, ekkena monun samau repwe tongeni ataifocheelo pochokkulen inisum are pwal mwo nge nniukelo.
PWUNGUN pwe ika ese pochokkul inisum lupwen monun samau epwe tolong lon, inisum epwe fen kon muttir apwangapwangelo. Ren chok awewe, ika inisum a fen apwangapwangelo pokiten an ese naf om aea mongo mi lamot ngeni amaarin inis, an inisum tufichin fiu ngeni monun samau “epwe kon kisikis, iwe, eli kopwe tongeni malo ren och kukkun chok semmwen,” nge ina makkeien Peter Wingate, emon sou mak fan iten porausen safei.
Ika ina, ita ion epwe filata an epwe nom lon eu leeni mi osupwangen mongo ie? Neman kopwe fori minne chok epwe tufich reom pwe epwe nafoch onom mongo me epwe pochokkul inisum. Neman kopwe pwal fori minne chok epwe tufich reom pwe kopwe tumunuk seni monun samau. Iwe nge, a pwal ita ina ussun om tuttumunuk fan iten om kopwe “pochokkul lon luku”? (Taitos 2:2) Ren chok awewe, ka kan meefi efeiengauen ewe mettoch tipemwaramwar? Tipemwaramwar a mecheresin toki ekiekum me letipom, me epwe tongeni apwangapwangelo om luku me om riri ngeni Jiowa ren. A ussun ita nge ekkoch rese meefi efeiengauen ena mettoch. Rese tuttumunuur seni tipemwaramwar pun rese akkaea mongoon ngun. Om ekiek pwe epwe tufich an epwe ina ussum?
Tipemwaramwar—A Ita Ngau Fansoun Meinisin?
Pwungun pwe sap minne a ngau tipemwaramwar meinisin. Fan ekkoch, a lamot om kosap luku och poraus tori om silei mettoch meinisin ussun. Mi efeiengau me otuputup an ekkan lamalam peseiok om kopwe chok luku poraus meinisin nge kosap tipewaramwareiti och mettoch. A enlet an Paipel apasa pwe tong a “luku mettoch meinisin.” (1 Korint 13:7) Emon chon Kraist mi eani tong a wesewesen tipemecheresin luku ir mi fen pwarata pwe ra wenecher seni lom. Nge ewe Kapasen Kot a pwal ourourakich pwe sisap ‘luku mettoch meinisin.’ (An Salomon Fos 14:15) Fan ekkoch a wor popun an epwe wor tipemwaramwar pokiten fofforun emon me lom.
Ewe aposel Jon a pwal ouroura chon Kraist pwe resap lukuchou. Iei makkeian: “Ousap luku iteiten kapas mi fel, nge oupwe atittina ekkewe kapas mi fel pwe oupwe pi ika ra popu seni Kot.” (1 Jon 4:1, New World Translation) Eli a ussun ita nge eu “kapas,” weween, eu afalafal are ekiek, a popu seni Kot. Nge a wesewesen feito seni i? Ach tipemwaramwar ussun och poraus epwe tongeni an epwe eu minen tumun ngenikich pun ewe aposel Jon a makkei pwe “chommong chon otupu ra fen towu ngeni fonufan.”—2 Jon 7.
Ewe Sokkun Tipemwaramwar Esor Longolongun
Ewer, fan chommong epwe lamot ach sipwe atittina poraus meinisin fan tipewenechar me tipetekison ren ach sipwe tufichin silei minne mi enlet. Iwe nge, ena mettoch a sokko seni ach mut ngeni ewe sokkun tipemwaramwar esor longolongun, nge mi efeiengau, an epwe maarita lon ekiekich me letipach, iwe, iei ewe sokkun mi tongeni atai ach riri ngeni aramas me minne sia fen luku seni lom lom. Ena sokkun tipemwaramwar a wewe ngeni lukumwaramwar ussun och afalafal are poraus, iwe, fan chommong a oruka ach ekiek. Ka chechchemeni ifa ussun Setan a atolonga lon ekiekin If tipemwaramwar ussun Jiowa? A eis, “Kot a wesewesen apasa pwe ousap fokun mongo seni ekewe iran ei tanipi? (Keneses 3:1) Ewe tipemwaramwar ena kapas eis efisata a oruka an ekiek ussun met epwe fori. A kan ikkina ussun fofforun Setan. A mmen angoch le aea kapas mi ffatangau me kapas chofona. Setan a fen atai fite, fite, riri mi lukuchar lefilen aramas ren an ffotuki ewe sokkun tipemwaramwar mi efeiengau.—Kalesia 5:7-9.
Ewe chon kaeo Jemes a wewefichiiti ewe sokkun feiengau ena sokkun tipemwaramwar epwe tufichin efisata. Jemes a ourourakich pwe ika a wor ach tipemwaramwar ussun ewe riri lefilach me Kot, sipwe “usun chok ekkewe noon le set mi asepwal a fileiti o amokutukutu.” Sipwe ussun “emon mi tipemwaramwar o weliwelikkis lon an kewe fofor meinisin.”—Jemes 1:6, 8.
Foffori Met Sipwe Pochokkul Ren lon Pekin Ngun
Iwe, ifa ussun sipwe tongeni tumunukich seni ewe sokkun tipemwaramwar mi efeiengau? A mecheres poluen ena kapas eis: sipwe tipeppos le poonalo an Setan kewe poraus mi otuputup me aeafichi mettoch meinisin Kot a akkawora fan iten ach sipwe “nukuchar lon ewe luku.”—1 Piter 5:8-10.
A wesewesen lamot ach sipwe akkaea mongoon ngun iteitan. Ika sisap fori ena mettoch, ach luku, ussun chok eu inis ese okor anan, epwe apwangapwangelo ekis me ekis, iwe mwirin, epwe malo. Jises Kraist a menlapei ena mettoch lupwen a apasa pwe “Aramas resap manau ren pilaua chok, pwe ren iteiten kapas meinisin mi tou seni auen Kot.”—Mattu 4:4.
Ekieki mwo ussun ena. Ifa ussun sia forata luku mi pochokkul me le poputaan? Alon Jises a wewe ngeni pwe le poputaan sia forata ach lukuluk won Jiowa, an kewe pwon, me an we mwicheich ren ach mommongo seni ewe Kapasen Kot. Pwungun pwe sise chok lukuchou mettoch meinisin sia rongorong. Sia ‘kukuttafichi ran me ran seni lon Paipel, are ekkeei mettoch mi iei usun.’ (Fofor 17:11) Sia ‘anneta ngeni pwisin kich letipen Kot mi murinno, mi fich me mi unusoch,’ iwe, sia pi pwe a enlet minne sia fen rongorong.—Rom 12:2, NW; 1 Tesalonika 5:21.
Tuttumunukich pwe Site Etiualo Mongoon Ngun
Iei ewe mettoch mi forea sipwe achocho ngeni, weween, ach likiitu fan ach luku me ach tumunukich seni sokkun tipemwaramwar meinisin mi tongeni atai ach lukuluk won Jiowa me an we mwicheich. Ren ach sipwe fori ena mettoch, sipwe kakkaeo Paipel iteiten ran meinisin. Ewe aposel Paul a ourourakich pwe “lon ekkena fansoun epwe feito, ekkoch [eli a ussun ita nge mi pochokkul ar luku me le poputaan] repwe tturulo seni ewe luku, iwe, repwe afanni kapasen fel mi otuputup me ekkewe afalafal seni ekkewe timon.” (1 Timoti 4:1, NW) Ekkena kapas me afalafal mi otuputup ra kan efisata tipemwaramwar lon ekiekin ekkoch me ra atokerelo seni Kot. Met sipwe kuna tumun ren? Sipwe sopweelo ach “mammaarita ren kapasen ewe luku me pwal ren ekkewe afalafal murinno [sia] fen akkappirufichi.”—1 Timoti 4:6, NW.
Iwe nge, a solap pwe ikenai ekkoch rese mochen ar repwe “mammaarita ren kapasen ewe luku”—inaamwo ika ena mongoon ngun a kawor ekis meinisin. Ussun an a pwalo ren emon chon makkei ewe puken An Salomon Fos, epwe tufich an epwe kawor mongoon ngun mi murinno, iwe nge, aramas resap akkaea me nunufichi ena mongo.—An Salomon Fos 19:24; 26:15.
Ina ewe mettoch a fis ngeni ekkoch lon ewe popun mwichefelin Kraist. Neman ra tunalo ar pwisin kaeo Paipel, iwe, ra apwangapwangelo lon pekin ngun. (Ipru 5:12) Ewe aposel Paul a awewei efeiengauen ena mettoch lon makkeian we ngeni chon Ipru mi wiliiti chon Kraist: “Iei minne, sipwe fakkun alapalo ach lolileniesini ekkewe mettoch sia fen rong, pwe site pase seni ir.” A silei pwe a mmen mecheres ach sipwe paselo, iwe, paseiti ekkewe foffor mi ngau ika sipwe “tunalo ewe kokkotun amanau mi fokkun lapalap.”—Ipru 2:1, 3, NW.
Mi amairu pwe ika ese naf an emon aramas akkaea mongo mi lamot ngeni amaarin inis, sap minne inisin epwe ussun nikinikin chon samau are pinengau. Iwe, pwal ussun chok, eli esap muttir pwalo pwe emon a nafangau an akkaea mongoon ngun. Epwe tufich pwe epwe ussun ita nge en mi aumanau lon pekin ngun, inaamwo ika ese naf om akkaea mongoon ngun, nge ren chok ekis fansoun! Lo, lo, kopwe apwangapwangelo lon pekin ngun, iwe, epwe mecheres an epwe pwukuta tipemwaramwar, me kosap tufichin akkachocho ngeni om kopwe likiitu lon ewe luku. (Juta 3) En mi silei ukuukun om pwisin akkaea mongoon ngun, inaamwo ika ese wor pwal emon mi silei.
Ina minne, sopweelo om pwisin kakkaeo Paipel. Kopwe tinikken le fiffiu ngeni tipemwaramwar. Ika sise amoielo ach kewe tipemwaramwar sia aurek ren, eli epwe wesewesen watte sopwongauach. (2 Korint 113) ‘Sia wesewesen manau lon ekkewe ranin le sopwoloon? Sipwe tongeni luku mettoch meinisin mi mak lon Paipel? Iei wesewesen an Jiowa mwicheich?’ Setan a fokkun mochen an epwe ffotukalong lon ekiekum ena sokkun tipemwaramwar. Kosap mut ngeni ewe mettoch tunalo mongoon ngun an epwe amecheresi om ttupulong lon an kewe afalafal mi otuputup. (Kolose 2:4-7) Kopwe apwonueta ewe fon Timoti a angei. Kopwe emon chon kaeo mi tinikken fan iten “ekkewe taropwe mi fel” pwe kopwe tufichin “likiitu lon minne ka fen kaeo o luku.”—2 Timoti 3:13-15.
Akkamwochu “Luku mi Pochokkul”
Eli epwe lamot watte alillis me kapasen pesepes ngeni emon mi fen tunalo an pwisin kakkaeo Paipel fan iten an epwe mwonsefal mongoon ngun. Ika pwe a ina ussum, kopwe kutta alillis me etiwa fan pwapwa sokkun fon meinisin mi kawor fan iten om kopwe auetasefalli om pochokkul lon pekin ngun.—Jemes 5:14, 15.
Kopwe ekilapei efeiengauen ewe mettoch tipemwaramwar. Ika kopwe tunalo om akkaea mongoon ngun pokiten om kese pwisin kaeo Paipel me om kese fiti an chon Kraist kewe mwich, kopwe amecheresi an Setan mammaun ngonuk. Kopwe akkaeafichi ewe mongoon ngun mi chommong, ewe mi kawor lon fansoun mi fich me ren “ewe chon angang mi tuppwel o tipatchem.” (Mattu 24:45) Sopweelo om “tipeeu ngeni ekkewe kapas mi murinno” me amwochu om “pochokkul lon luku.” (1 Timoti 6:3; Taitos 2:2) Kosap mut ngeni tipemwaramwar an epwe atai om luku.
[Pictures on page 20]
Ifa ukuukun om akkaea mongoon ngun?