Porausen ewe Tefil Esap Och Chok Tutulap
“Lon unusen ewe Tes mi Fo a wor eu maun mi lapalap lefilen pelien Kot kewe lon ewe epek, nge ina ewe pekin mi murinno, me pelien Setan kewe lon ewe epek, nge ina ewe pekin mi ngau. Esap ina ekiekin emon are ruuemon chok chon mak, nge ina eu poraus meinisin ra tipeeu ngeni. . . . Ina minne, a ffatoch ekkewe pisekin annet lon ewe Tes mi Fo. Mi wesewesen wor emon Setan, nge a sokkolo ngauan, iwe, fansoun meinisin a u ngeni Kot me noun Kot kewe aramas.”—“The New Bible Dictionary.”
IKA ina, iwe, pwata chommong mi era pwe ir chon Kraist me ir chon luku Paipel rese luku pwe a wesewesen wor emon Tefil? Popun, pun mi enlet pwe rese luku nge ewe Paipel, ina ewe Kapasen Kot. (Jeremaia 8:9) Ra kan apasa pwe ekkewe mi wiisen makkei Paipel ra eani ekiekin ekkewe muu lukun, nge rese wesewesen makkei ekkewe poraus mi enlet seni Kot. Ren chok awewe, iei makkeien Hans Küng, emon sou aak lon pekin Katonik: “Ekkewe tutulap ussun Setan fitifengen me chommong noun kewe timon . . . ra tolong lon ewe lamalamen Jus seni tutulapen chon Papilon, iwe, me ikena ie ra tolong lon ewe Tes mi Fo.”—On Being a Christian.
Nge ewe Paipel esap kapasen aramas, pwe ina enletin ewe Kapasen Kot mi fel. Ina popun, sipwe mirit ika sipwe wesewesen luku minne a apasa ussun ewe tefil.—2 Timoti 3:14-17; 2 Piter 1:20, 21.
Ifa Ekiekin Jises?
Jises Kraist a luku pwe a wesewesen wor ewe Tefil. Jises ese kuna sossot seni och mettoch mi ngau mi ita nom lon pwisin i. A kuna sossot seni wesewesen emon, iwe mwirin, Jises a apasa pwe ina i “samolun fonufan.” (Jon 14:30; Mattu 4:1-11) A pwal luku pwe a wor pwal fitemon ngun mi peni Setan lon an kewe rau mi ngau. A apochokkula aramas mi fen tokiir timon. (Mattu 12:22-28) Pwal mwo nge ewe puk A Rationalist Encyclopedia, makkeien chon rese luku Kot, a weweiti lamoten ena mettoch lupwen a apasa pwe “A eu mettoch mi fokkun anioput ngeni sou aak lon pekin lamalam pwe ewe Jises lon ekkewe puken Poraus Allim a luku pwe a wor timon.” Lupwen Jises a kapas ussun ewe Tefil me noun kewe timon, sap minne a chok fos ussun ekkewe tutulap seni Papilon. A silei pwe a wesewesen wor Setan me ekkewe timon.
Me ren Jon 8:44, ewe Tefil, nge ei it a wewe ngeni “chon pweni,” i emon “chon kapas chofona, pwal semen kapas chofona.” I ewe mi akkom le kapas chofona ussun Kot, nge a ina ussun lon Ichen. Jiowa a fen apasa pwe popuch kewe repwe “fokun mala” ika repwe mongo seni ewe iraan silei och me ngau. Ren an afosa emon serepenit, Setan a apasa pwe ese enlet ekkena kapas. (Keneses 2:17; 3:4) A pwung an iteni “ewe serpentin lom lom, ewe a iteni Tefil me Satan.”—Pwarata 12:9.
Lon Jon 8:44, Jises a pwal apasa pwe ewe Tefil “emon chon nielo aramas seni chok le popun” me “ese mo nonnom lon minne mi enlet.” Esap weween pwe Jiowa a forata ewe Tefil pwe epwe “emon chon nielo aramas.” Sap minne a foruta lon lapalapen emon manmwocho mi fokkun aniuaniu, iwe, a wiisen nemeni eu leenien ekkei me riaffou ren chokewe mi u ngeni Kot.
Le poputaan ewe Tefil a “nonnom lon ewe enlet.” A fen pin nom lon an Jiowa we famili lon lang, me i emon noun Kot ngun mi unusoch. Nge ese “uppos lon ewe enlet.” A efich pwisin an kewe ekiek me an kewe kokkot mi longolong won kapas chofona. Sap minne “a poputa” lupwen a foruta emon chonlangin Kot, nge lupwen a pwisin filata an epwe u ngeni Jiowa me a kapas chofona ngeni Atam me If. Setan a wiliiti “emon chon nielo aramas” lupwen a u ngeni Kot me a fori met epwe efisata maloon Atam me If me meinisin aramas won fonufan.—Rom 5:12.
Ewe Tefil Emon Chon Appoluakich mi Wenewenen Pochokkul
Ewe Tefil emon chon appoluakich mi wenewenen pochokkul. A “fefeilfetal usun chok emon laion mi orior, o a kukutta emon pwe epwe oromalo.” (1 Piter 5:8) Esap i och lapalap mi ngau a nonnom lon inisich ese unusoch. Mi enlet pwe iteiten ran sia kan fiffiu ngeni apwangapwangach kewe, apwangapwangen tipis. (Rom 7:18-20) Nge sia enletin fiffiu “ngeni ekkewe chommong sokkun ngun ingau lon lang.” —Efisus 6:12.
Ifa ukuukun watteen an ewe Tefil nemenem? Ewe aposel Jon a apasa pwe “fonufan meinisin a nonnom fan nemenien ewe mi ingau.” (1 Jon 5:19) Pwungun pwe sisap mochen kon essenuku ach ekieki ewe Tefil are mut ngeni niuokkus an epwe nemeni manauach. Iwe nge, sipwe mirit ika sipwe ekkekieki ifa ussun a kan sotuni le achunalo mesach pwe sisap kuna minne mi enlet me an ekiekin atai ach tuppwol ngeni Kot.—Hiop 2:3-5; 2 Korint 4:3, 4.
Sipwe tumunukich pwe site amecheresi an Setan otupukich, awewe chok ren ach angolong lon och mettoch mi pacheri angangen roong. (Tuteronomi 18:10-12) Kopwe emon sou kaeo ewe Kapasen Kot, iwe, chechchemeni mwo pwe fansoun meinisin Jises Kraist a eppieta ewe Kapasen Kot lupwen a kuna sossot seni ewe Tefil. (Mattu 4:4, 7, 10) Kopwe pwal tinikken le iotek ngeni Jiowa lupwen ka meefi pwe ewe Tefil me noun kewe timon ra sotunuk ren och mettoch.—Filipai 4:6, 7.
Esor popun ach sipwe kon niuokkusiti ewe Tefil. Jiowa a pwonei pwe epwe tumunukich seni mettoch meinisin Setan epwe tongeni fori. (Kol Fel 91:1-4; An Salomon Fos 18:10; Jemes 4:7, 8) Ewe aposel Paul a apasa pwe “Ami oupwe pochokkul lon ach Samol, pwal lon pochokkulun an we manaman.” Iwe mwirin, “oupwe tongeni u ngeni ekkewe tipatchem-sola an ewe tefil.”—Efisus 6:10, 11.