Kapas Eis Seni Chon Alleani Ei Chassi
Ika emon epwe pwisin nnielo, epwe fich ngeni emon nouwisen Chon Kraist an epwe eani ewe afalafal won?
Emon me emon chon Kraist sou afalafal epwe pwisin filata ika miritin letipan mwen mesen Kot epwe mut ngeni an epwe eani ewe afalafal fan iten emon mi pwisin nnielo. Atun an epwe fili, epwe pwisin ekieki won ekkeei kapas eis: Met ekiekin Jiowa ussun an emon nnielo pwisin i? Maloon emonewe a wesewesen fis pokiten pwisin fofforun we? An pwisin nni a fis pokiten och semmwenin ekiek are memeef? Met ekiekin aramasen ewe fonu ussun an emon nnielo pwisin i?
Kich Chon Kraist sipwe mochen silei ekiekin Jiowa ussun an emon nnielo pwisin i. Manauen aramas mi auchea me pin ngeni Jiowa. (Keneses 9:5; Kol Fel 36:9) An emon fori minne epwe pwisin malo ren a wewe ngeni an a tipisin nni manau, iwe, a mwaal mwen mesen Kot. (Ekistos 20:13; 1 Jon 3:15) Iwe nge, kapas eis, ena mettoch a wewe ngeni pwe esap pwung an emon eani eu afalafal fan iten emonewe mi pwisin nni?
Ekieki ussun King Saul lon Israel. Pokiten ese mochen chon Filistia repwe eriaffou i lupwen a kuna pwe epwe malo lon ewe amuchuloon fiu ngenir, “Saul a angei noun ketilas o pusin posu ngeni.” Lupwen ekkewe chon Filistia ra kuna inisin we, ra emeitiua won tittin ewe telinimw Petsan. Lupwen ekkewe chon Japes-Kiliat ra rongorong minne ekkewe chon Filistia ra fori, ra angei inisin we me kenalo. Mwirin, ra angei chuun kkewe me peiasini. Ra pwal mwo nge echikifel fisu ran, pun ina eu eorenien chon Israel. (1 Samuel 31:4, 8-13; Keneses 50:10) Lupwen Tafit, ewe mi kepit ren Jiowa, a rongorong ussun fofforun ekkewe chon Japes-Kiliat, a apasa: “Jiowa epwe efeiochukemi, pun oua pwarata ami kirikiroch ngeni Saul ami we samol ren ami peiasini. Nge iei Jiowa epwe pwal kirikiroch me allukuluk ngenikemi.” (2 Samuel 2:5, 6, NW) Ese mak lon ewe Paipel pwe ekkewe chon Japes-Kiliat ra kuna apwung pokiten ar foffor fan iten King Saul. Iwe, alollo ena poraus ngeni porausen chokkewe rese peias pokiten ar fofforingau. (Jeremaia 25:32, 33) Emon Chon Kraist sou afalafal epwe tongeni ekieki ussun porausen Saul ren an epwe filata ika epwe eani ewe afalafal fan iten emon mi angei pwisin manauan are esap.
Eni ewe sou afalafal epwe pwal mochen ekieki ussun ewe popun an epwe fis eu afalafal won ewe mi ma. Sokko seni ekkewe aramas mi luku pwe ngunun aramas esap tongeni malo, Chon Pwarata Jiowa rese eani eu afalafal won emon mi ma fan ewe ekiekmwaal pwe emonewe a feilo ngeni pwal eu leeni. Esap fis pwe epwe efeiochu ewe emon mi malo, nge iei popunlapen an epwe fis ewe felin ma pwe epwe aururu ekkewe mi letipechou me afalafala ekkewe chon fiti ussun lapalapen ekkewe mi malo. (An Salomon Afalafal 9:5, 10; 2 Korint 1:3-5) Iei pwal eu popun mi lamot an epwe fis eu felin ma, pwe epwe alisi ekkewe chon fiti pwe repwe ekieki ussun mwochomwochen manauen aramas. (An Salomon Afalafal 7:2) Eu afalafal fan iten emon mi pwisin nielo i epwe apwonueta ekkena popun?
Enlet, eni ekkoch repwe meefi pwe emonewe a filata an epwe pwisin nni, me a unusen weweiti pwe epwe tipis ngeni Jiowa. Nge epwe tufich ach sipwe unusen silei meefien emon? Fofforun ewe emon a chok muttir fisita? Ekkoch mi ekiekin pwisin niirelo ra siwili ar ekiek me rese chuen fori. Emon mi malo esap tongeni aier seni minne a fen fori.
Iei pwal eu mettoch sipwe ekieki, fan chommong an aramas pwisin niirelo a fis pokiten och semmwen lon pekin ekiek me memeef. Sipwe tongeni eita ngeni ekkena aramas chon feiengau. Me ren ekkoch kaeo, 90 percentin ir kkewe mi pwisin nniirelo ra uri och semmwen lon pekin ekiek, memeef, are nom fan nemenien safeien opuchopuch. Jiowa epwe omusalo ekkewe mi angei pwisin manauer pun ra apwangapwang lon ekkena pekin? Esap wisach ach sipwe apasa ika ewe emon mi ma a fori ewe sokkun tipis esap tongeni musulo mwen mesen Jiowa. Emon Chon Kraist sou afalafal epwe tongeni afanni ifa lapalapen emonewe lon pekin inis me ekiek atun epwe filata ika epwe eani ewe afalafal fan iten emon mi pwisin nielo i.
Iwe, mei wor pwal eu mettoch sipwe afanni: Ifa ekiekin chon ewe sopw ussun an emon pwisin nielo i me maloon emonewe? Epwe akkaeuin lamot ngeni ekkewe elter mi ekiekin tumunu itochun ewe mwichefelin Chon Pwarata Jiowa. Pokiten ekiekin aramas lon ewe leeni me akkaeuin meefier ussun minne a fis, eni ekkewe elter resap mochen eani eu afalafal mwen mesen aramas are eani ewe afalafal lon ewe Kingdom Hall.
Iwe nge, ika aramas ra akkota ewe felin ma nge ra tingorei emon Chon Kraist sou afalafal an epwe afalafal, epwe tongeni meefi pwe pwisin filian ika epwe fori nge esap tupuni ewe mwichefel. Ika a filata pwe epwe fori, epwe tumunu pwe esap apasa ika emonewe epwe tufichin kuna manausefal. Och apilukuluk fan iten ekkewe mi ma a nom lon poun Jiowa kkewe, iwe, esor emon a tongeni apasa ika ewe mi ma epwe kuna manausefal are esap. Ewe sou afalafal epwe tongeni kapas ussun ekkewe poraus mi enlet lon Paipel ussun ewe mettoch malo me aururu letipen ekkewe mi letipechou.