“Oupwe Arap Ngeni Kot”
“Oupwe arap ngeni Kot, iwe, epwe arap ngenikemi.”—JEMES 4:8.
1, 2. (a) Met aramas ra kan apasa? (b) Ifa ewe kapasen pesepes Jemes a ngenikich me met popun a lamot?
“KOT a nom rech.” Ekkena kapas ra fen makketiu won ekkewe esissin mi liosueta muun fonufan me pwal mwo nge won ufen sounfiu. “Sia luku Kot” a fen makkei won chommong foun moni me a peresei won choon monien ikenai. Aramas ra kan apasa pwe ra chiechioch ngeni Kot. Iwe, kosap tipeeu pwe chiechi ngeni Kot esap tongeni alongolong won kapas chok are won ach makkei won eu esissin pwe sia chiechi ngeni Kot?
2 Ewe Paipel a aiti ngenikich pwe aramas ra tufichin chiechioch ngeni Kot. Nge a lamot pwe repwe angang ngeni. Pwal mwo nge ekkoch chon Kraist mi kepit lon ewe aewin senturi ra wiisen apochokkula ar chiechi ngeni Jiowa Kot. Ewe chon Kraist mi wiiseni wiisen overseer itan Jemes a ouroura aramas pokiten mocheniangauen fituker me poutuloon ar limoch lon pekin ngun. A fen apachalong lon ewe fon ei kapasen pesepes mi manaman: “Oupwe arap ngeni Kot, iwe, epwe arap ngenikemi.” (Jemes 4:1-12) Iwe, ifa weween an Jemes kewe kapas, “arap ngeni”?
3 Jemes a nounou ekkeei kapas mi sinnelo lein chokkewe mi alleani noun we taropwe. Ewe Allukun Moses a titchik lon an awewe ifa ussun ekkewe samol fel repwe “kanoto” are arap ngeni Jiowa fan iten noun kewe aramas. (Ekistos 19:22) Makkeien Jemes epwe achema ngeni aramas pwe ar arap ngeni Jiowa esap eu mettoch mi lamot kisikis. Jiowa ewe nouwis mi tekia seni meinisin lon lang me won fonufan.
4 Iwe nge, emon sou kaeo Paipel a apasa pwe, “ei kapasen pesepes [lon Jemes 4:8] a pwaralo ekiek mi fokkun murinno.” Jemes a silei pwe Jiowa a ekketiwa aramas mi tipis ar repwe arap ngeni I. (2 Kronika 15:2) An Jises we asor a suuk ngeni aramas ewe aal fan iten ar repwe arap ngeni Kot nge ar chiechi ngeni epwe lap seni me loom. (Efisus 3:11, 12) Ikenai, ewe aal fan iten an aramas arap ngeni Kot a fen suuk ngeni fite milion aramas! Iwe, ifa ussun sipwe tongeni alamota ei tufich mi amwarar? Sipwe pwungupwung won ulungat minen alillis mi alisata ach arap ngeni Jiowa Kot.
Likiitu Lon Om “Kakkaeo” Ewe Sile Ussun Kot
5 Me ren Jon 17:3 lon ewe New World Translation, Jises a apasa: “Iei weween manau esemuch, ar repwe kakkaeo ussum, ewe emon chok Kot mi enlet, me pwal ussun ewe emon ka akunoto, Jises Kraist.” Chommong Paipel ra ekis sokkolo seni ena ren ifa ussun ra chiyakuni ei wokisin. Rese nounou “kakkaeo” ussun Kot, nge ra nounou “silei” Kot are “sissilei” Kot. Iwe nge, ekkoch sou kaeo ra apasa pwe weween ei kapas lon fosun Krik esap chok pwe sipwe silei, nge a wewe ngeni och mettoch sipwe sopwosopwolo ren, me an emon fori mi tongeni emmwen ngeni an chiechioch ngeni pwal emon.
6 An emon chiechioch ngeni Kot esap eu poraus mi fo lon ranin Jises we. Lon ewe Tesin Ipru, sia alleani porausen Samuel lupwen a chuen emon kukkun at. Sia alleani pwe Samuel, “esamwo silei ewe Samol mi Lapalap.” (1 Samuel 3:7) Weween pwe Samuel ese kon lien silei ussun noun we Kot? Aapw. Seman me inan me ekkewe samol fel ra fen aiti ngeni Samuel chommong poraus ussun Jiowa. Iwe nge, ewe kapas lon fosun Ipru, eu kapas a tongeni wewe ngeni “eu chiechi mi fokkun pacheoch.” Samuel esaamwo silei Jiowa ina ussun, nge epwe ina ussun an chiechi ngeni Jiowa mwirin, lupwen Jiowa a nounou Samuel ussun chok noun we soufos. Atun an mammarita, a kakkaeo ussun Jiowa, me a wiliiti emon mi chiechioch ngeni i.—1 Samuel 3:19, 20.
7 En mi kakkaeo ussun Jiowa pwe kopwe tongeni chiechioch ngeni i? Ren om kopwe fori ena, a lamot om “fokkun mochen” angei ewe mongo lon pekin ngun Kot a awora. (1 Piter 2:2) Kesap chok muttir menemenoch ren ekkewe popun afalafal lon Paipel. Sotun weweiti ekkoch ekkewe afalafal mi alollon lon ewe Paipel. (Ipru 5:12-14) Ka pireir le kaeo ekkena sokkun afalafal pokiten a weires om weweitiir? Ika ina ussum, kopwe chechchemeni pwe Jiowa ewe “Soukait” mi Lapalap. (Aisea 30:20) A silei ifa ussun epwe awewei ekkewe enlet mi alollon ngeni aramas mi mmang tupuwer. Me a tongeni efeiochu om achocho le weweiti met a aiti ngonuk.—Kol Fel 25:4.
8 Pwata kesap atittina pwisin om ekiek ussun ekkoch ekkeei “olololun Kot”? (1 Korint 2:10) Esap ir ewe sokkun poraus sou kaeo me nouwisin lamalam repwe anini won. Ir ekkewe luku mi wesewesen lamot me ra asaramakich me atufichi ach kaeo ussun ekiekin me letipen Semach we mi tong. Ren chok awewe, ewe moon kepichilo, ewe “monomon” mi pin, me ekkewe sokkopaten etipeeu Jiowa a fori ren an epwe efeiochu noun kewe aramas me apwonueta an kewe kokkot—ekkeei poraus pwal chommong ussun chok ir ekkewe sokkun poraus mi apwapwaikich lupwen sia kaeo ussur.—1 Korint 2:7.
9 Atun om sile ussun ekkewe mettochun ngun mi alollon a mammarita, kopwe tumunu seni ewe feiengau a tongeni pop seni silelap—lamalam tekia. (1 Korint 8:1) Lamalam tekia och mettoch a tongeni efeiengauakich popun, pun a aimukichelo seni Kot. (An Salomon Fos 16:5; Jemes 4:6) Chechchemeni mwo pwe esor emon mwan a wor popun an epwe sikasik ussun watteen an sile. Ren ach sipwe awewe won ena, sipwe pwungupwung won ekkeei kapas seni eu puk a awewei met aramas ra fori lon pekin science: “Ren lapeloon ach sile, a pwal lapelo ach weweiti pwe ach sile a chok kukkun . . . Mettoch meinisin sia fen kaeo a chok kukkun lupwen sia alollo ngeni met sisaamwo kaeo.” Ena esin tipetekison a murinno. Iwe, lupwen sia ekieki ussun ewe sile mi watte seni meinisin—ewe sile ussun Jiowa Kot—a wor popun sipwe tipetekison. Pwata?
10 Nengeni ekkoch poraus ussun Jiowa lon ewe Paipel. “Om kewe ekiek mi fakkun alollol!” (Kol Fel 92:5) “An [Jiowa] mirit esap wor aukukun.” (Kol Fel 147:5.) “An tipachem esap wor aukukun.” (Aisea 40:28) “Olololun pisekisekin Kot, me an we tipatchem, o pwal an we sineilap!” (Rom 11:33) A ffat pwe sise tongeni silei mettoch meinisin ussun Jiowa. (An Salomon Afalafal 3:11) A fen asukulakich ussun chommong mettoch mi amwarar, iwe nge, a chuen wor sile ese aukuk sipwe tongeni kaeo. Ena tufich a apwapwaikich me a pwal atipetekisonakich. Lupwen sia kaeo, amwo pwe ach sile epwe ewe longolongun ach arap ngeni Jiowa me ewe longolongun ach alisi ekkewe ekkoch ar repwe arap ngeni Jiowa—nge esap pokiten sia mochen atekiata pwisin kich.—Mattu 23:12; Luk 9:48.
Pwaralo Om Tong Fan Iten Jiowa
11 A fich an Paul aririfengenni sile me tong. A makkei: “Iwe, a iei chok usun ai iotek, pwe ami tong epwe fakkun lapelo seni lom, ren ami sinei o pwal ren sokkun tipatchem meinisin.” (Filipai 1:9) Eu me eu poraus mi enlet me auchea sia kaeo ussun Jiowa me an kewe kokkot epwe alapalo ach tong fan iten Semach lon lang nge esap efisi ach lamalam tekia.
12 Chommong ra apasa pwe ra tongei Kot nge rese wesewesen tongei i. Neman ir aramas mi letip wenechar me a wor sokkopaten memmeef mi pochokkul lon letiper. Ekkena sokkun memmeef mi murinno me auchea lupwen ra tipeeu ngeni sile mi enlet. Nge sap minne ra wewe chok me tong mi wesewesan fan iten Kot. Pwata? Nengeni ifa ussun ewe Kapasen Kot a awewei tong: “Pun iei weween ewe tongen Kot, pwe sipwe alleasochisi an kewe alluk.” (1 Jon 5:3) Tong fan iten Jiowa a wewe ngeni tong mi enlet lupwen a pwalo ren foffor mi tipeeu ngeni an kewe alluk.
13 Ach niuokkusiiti Jiowa epwe alisikich ach sipwe alleasochisi i. Ach ingemwareiti me sufoliiti Jiowa a pop seni ach kaeo porausan, ach kaeo ussun an pin ese aukuk, an ling, manamaman, pwung, tipatchem, me tong. Ena esin niuokkus a lamot ika sia mochen arap ngeni i. Nengeni met a mak lon Kol Fel 25:14: “Ewe SAMOL epwe chiechi ngeni ir ekkewe mi niueiti i, o epwe esinei ngeni ir an we pwon.” Iwe, ika mei wor ei sokkun niuokkus mi murinno, ika sia niueiti ach sipwe aletipengaua Semach mi tong lon lang, sia tongeni arap ngeni. Ach niueiti Kot epwe alisikich ach sipwe apwonueta ewe fon lon An Salomon Fos 3:6: “Kopwe chechemeni i won meinisin mine ka fori, nge i epwe aiti ngonuk ewe al mi pwung.” Ifa weween ena poraus?
14 Mei wor ekkewe kefil kopwe pwungupwung won iteiten ran, ekkoch ekkewe kefil mi watte ekkoch mi kukkun. Ren chok awewe, epwe ifa ussun om porausfengen me chienom kewe chon angang me chon sukul, me chon orum kewe? (Luk 6:45) Kopwe tinikken lon om angang, are kopwe fori om angang fan tinikkop? (Kolose 3:23) Kopwe chiechi ngeni chokkewe rese tongei Jiowa are chokkewe mi tongei Jiowa ekis chok, are kopwe achocho le apochokkula om chiechi me aramas mi pochokkul lon pekin ngun? (An Salomon Fos 13:20) Met kopwe fori ren om kopwe alisata Muun Kot, pwal mwo nge lon mettoch mi kisikis? (Mattu 6:33) Ika ekkena kapasen alongolongun alluk seni Paipel repwe emmweni filiom kewe ran me ran, iwe, weween pwe ka afanni Jiowa “won meinisin mine ka fori.”
15 Iwe, ren eu me eu kefil sipwe pwungupwung won, sipwe nom fan emmwenien ei poraus: ‘Met Jiowa a mochen upwe fori? Met epwe wesewesen apwapwai i?’ (An Salomon Fos 27:11) Sia tongeni pwaralo ach tong fan iten Jiowa ren ach pwari ach niuokkusiiti Kot iei ussun. Ach niuokkusiiti Jiowa epwe pwal amwokutukich ach sipwe amwochu ach limoch—lon pekin ngun, lon pekin aion, me ren ach ekiek ussun minne mi pwung me mwaal. Chemeni mwo pwe lon ewe wokisin ikewe Jemes a pesei ekkewe chon Kraist ar repwe “arap ngeni Kot,” a pwal apasa: “Oupwe limeti poumi; o ami chon tipemwaramwar, oupwe alimalima letipemi.”—Jemes 4:8.
16 Pwungun pwe pwaloon ach tongei Jiowa esap chok wewe ngeni ach sisap foffori minne mi ngau. Tong a pwal amwokutukich ach sipwe fori minne mi pwung. Ren chok awewe, ifa ussun sia polueni an Jiowa kisaseu wachemuk? Jemes a makkei: “Meinisin sokkun liffang mi murinno, o meinisin sokkun minen liffang mi unusoch, ra chok seni won; ra fefeitiu me ren Semen ekkewe saram.” (Jemes 1:17) Ren enletin, lupwen sia liffang ngeni, sise awouochu Jiowa. Meinisin ekkewe pisek me wou pwisin an. (Kol Fel 50:12) Me lupwen sia liffang ngeni Jiowa ach fansoun me pochokkul, sise alisata och an osupwang. Pwal mwo nge ika sia chipwang le esileifeili ewe kapas allim ussun ewe Muun Kot, iwe, Jiowa a tongeni efisata an ekkewe fau kokkowu! Iwe, met popun sipwe liffang ngeni Jiowa seni ach wou, fansoun, me pochokkul? Lap seni meinisin, sia fori pokiten sia mochen pwaralo ach tongei ren unusen letipach, ngunuch, ekiekich, me ach pochokkul.—Mark 12:29, 30.
17 Lupwen sia liffang ngeni Jiowa, sipwe fori fan chengel, “pun Kot a tongei ir mi pwapwaiti fangelo.” (2 Korint 9:7) Ewe kapasen alongolongun alluk mi makketiu lon Tuteronomi 16:17 a tongeni alisata ach fori liffang fan chengel: “Iteiten eman me eman mwan epwe fang usun an tufich ukukun mine ewe Samol mi Lapalap ami we Kot a afeiochu ngeni.” Lupwen sia chechchemeni ukuukun an Jiowa kisaseu ngenikich, sia mochen liffang ngeni i. Ena esin liffang a fokkun apwapwai letipan, ussun we chok an emon nau liffang epwe apwapwai letipen seman me inan kewe. Ach pwaralo tong iei ussun a alisikich le arap ngeni Jiowa.
Apochokkula Om Chiechi Ngeni Ren Iotek
18 Lupwen sia alaemon chok me sia iotek, iwe, a kawor eu fansoun sia tufichin fos ussun poraus mi alollon ngeni Semach lon lang nge epwe lefilach chok. (Filipai 4:6) Pokiten iotek eu minen alillis ngeni ach sipwe arap ngeni Kot, a lamot ach pwungupwung won lapalapen ach iotek. Sap minne pwe ach kewe iotek repwe fokkun itiitioch me lingoch, nge ika ra enletin pwari minne a nonnom lon letipach. Ifa ussun sia tongeni amurinnoolo lapalapen ach kewe iotek?
19 Neman sipwe achocho le ekiekifichi ussun met sipwe apasa mwen sia iotek. Ika sia eani ei sokkun ekiek me mwan, ach kewe iotek repwe titchik me epwe wor aucheaar, me sisap chok rewainei ekkewe mwuten fos sia kan nounou. (An Salomoon Fos 15:28, 29) Eli epwe alisikich ika sia pwungupwung won ekkoch ekkewe mettoch Jises a fos ussun lon an we iotek, me mwirin, ekieki ifa ussun ekkena poraus ra weneiti nonnomun manauach. (Mattu 6:9-13) Ren chok awewe, sia tongeni pwisin eisinikich ussun ach angang mi weneiti pwonutaan letipen Jiowa won fonufan. Sia tongeni affata ngeni Jiowa ach mochen pwe kich sipwe noun chon angang ukuukun ach tufich me tingor fan iten an we alillis ren ach sipwe apwonueta ekkewe wiis meinisin a fen ngenikich? Sia fen choutiu ren ach lolileniesini ach kewe osupwang lon pekin aion? Ikkefa ekkewe tipis sipwe tingor omusamus ren, me sipwe omusalo tipisin io kewe? Ikkefa ekkewe sossot a torikich, me ika sia wesewesen esinna atapwalapwalen ach osupwangen an Jiowa tumun fan ekkena sossot?
20 Pwal och, eli sipwe pwungupwung won io kewe ra osupwangen an Jiowa alillis. (2 Korint 1:11) Sisap monuki ewe lamoten ach sipwe kilisou ngeni Kot. Ika sipwe ekieki mwen sia iotek, sipwe tongeni chechchemeni chommong popun sipwe kilisou ngeni Jiowa me mwareiti i iteiten ran, pokiten murinnoon mi wachemuk. (Tuteronomi 8:10; Luk 10:21) Ach eani ei esin ekiek a wor pwal eu feioch—epwe alapalo ach kilisou me ekiek murinno ussun pwisin manauach.
21 Ach kaeo a pwal tongeni amurinnoolo ach kewe iotek. Mei wor chommong iotek mi makketiu lon ewe Paipel, iotekin mwan me fefin mi tuppwol. Iwe, ika epwe torikich eu osukosuk, me sia aurek are pwal mwo nge niuokkus pokiten kich are attongach kewe mi tongeni feiengau, sia tongeni alleani an Jekop we iotek lupwen epwe chuufengen me pwiin we Iso mi songokkai. (Keneses 32:9-12) Are sia tongeni kaeo an King Asa we iotek lupwen eu milion chon Itiopia ra mochen maunei noun Kot kewe aramas. (2 Kronika 14:11, 12) Ika sia osukosuk ren och mettoch a tongeni aitengaua iten Jiowa, iwe, a murinno ach pwungupwung won an Elias we iotek mwen ekkewe chon fel ngeni Paal won ewe Chuuk Carmel, pwal an Nehemaia we iotek ussun met a fiffis lon Jerusalem. (1 King 18:36, 37; Nehemaia 1:4-11) Ach alleani me pwungupwung won ekkeei sokkun iotek a tongeni apochokkula ach luku me ngenikich ekkoch ekiek won ifa ussun sipwe fos ngeni Jiowa lupwen sia lolilen ren aurek mi achou manauach.
22 A ffat pwe esap wor pwal och feioch are och mettoch sipwe achocho ngeni a tongeni murinno seni ach apwonueta alon an Jemes fon pwe sipwe “arap ngeni Kot.” (Jemes 4:8) Amwo sipwe fori ren ach feffeita lon ach sile ussun Kot, ren ach kutta ifa ussun sipwe pwari ach tongei i, me, ren ach alapalo ach chiechioch ngeni ren ach iotek. Atun ewe ier 2003, lupwen sipwe chechchemeni ewe lesenin ier seni Jemes 4:8, amwo sipwe sopweilo le atittina pwisin kich ren ach sipwe silei ika sia akkarap ngeni Jiowa. Iwe nge, met porausen ewe eu kinikinin ena poraus? Ifa ussun Jiowa epwe “arap ngenikemi” me epwe wato met sokkun feioch? Ewe lesen mwirin ei epwe polueni ena kapas eis.
En Mi Chechchemeni?
• Met popun ach arap ngeni Jiowa och mettoch mi lamot ngenikich?
• Ikkefa ekkoch mettoch sipwe achocho ngeni ren ach kaeo ussun Jiowa?
• Ifa ussun sipwe pwari pwe ach tong fan iten Jiowa mi enlet?
• Ifa ussun sipwe tongeni chiechioch ngeni Jiowa lon iotek?
3, 4. (a) Chokkewe mi alleani an Jemes kewe kapas lon ewe aewin senturi repwe tongeni chechchemeni met lupwen ra alleani ekkewe kapas “oupwe arap ngeni Kot”? (b) Pwata sia luku pwe sia tongeni arap ngeni Kot?
5, 6. Ifa ussun met Samuel a fori me le kukkunun a affata ngenikich met sipwe fori ren ach sipwe “kaeo” ussun Kot?
7, 8. (a) Met popun sisap pireir ren ach sipwe atittina ekkewe afalafal mi alollol lon ewe Paipel? (b) Ikkefa ekkoch ekkewe poraus mi alollol lon ewe Paipel sipwe kaeo?
9, 10. (a) Met popun lamalam tekia a tongeni efeiengauakich, me met epwe alisikich ach sipwe su seni? (b) Met popun sipwe achocho ach sipwe alapalo tipetekison lupwen sia kakkaeo poraus ussun Jiowa?
11, 12. (a) Epwe ifa ussun ach sile ussun Jiowa epwe kku kich? (b) Met epwe anneta ika an emon tongei Kot mi enlet?
13. Ifa ussun ach niuokkusiiti Kot epwe alisata ach pwaralo tong fan iten Jiowa?
14, 15. (a) Ikkefa ekkoch ekkewe kefil sia pwungupwung won ran me ran? (b) Ifa ussun sipwe tongeni pwarata ach niuokkusiiti Kot lupwen sia pwungupwung won ach kewe kefil?
16. Met sise tongeni fori, nge met sipwe tongeni sopweilo le fori iteiten lupwen sia liffang ngeni Jiowa?
17. Met epwe amwokutukich ach sipwe liffang ngeni Jiowa fan chengel?
18. Met popun sipwe feioch seni ach pwungupwung won ifa ussun sipwe amurinnoolo lapalapen ach iotek?
19, 20. Met popun sipwe ekiekifichi won met sipwe apasa mwen sipwe iotek, me ikkefa ekkoch ekkewe poraus sipwe tongeni ekiekifichi?
21. Ach kaeo menni poraus lon ewe Paipel epwe tongeni alisikich lupwen sia mochen arap ngeni Jiowa lon iotek?
22. Ifa ewe lesenin ier fan iten 2003, me met sipwe tongeni pwisin eisinikich fan ekkoch atun 2003?
[Blurb on page 8]
Iei ewe lesenin ier fan iten 2003, “Oupwe arap ngeni Kot, iwe, epwe arap ngenikemi.”—Jemes 4:8.
[Picture on page 8]
An Elias iotek won ewe Chuuk Carmel eu leenien appiru mi murinno fan itach