Watchtower ONLINE LIBRARY
Watchtower
ONLINE LIBRARY
Chuuk
  • PAIPEL
  • PUK
  • MEETINGS
  • w03 6/1 p. 22-26
  • ‘Ami Oupwe Pwora Me Pochokkul!’

Ese wor video fán iten ei kinikin.

Omusaaló, a wor osukosuk le eppietá ewe video.

  • ‘Ami Oupwe Pwora Me Pochokkul!’
  • Ewe Leenien Mas a Esilefeili án Jiowa We Mwú—2003
  • Itelap Kisikis
  • Pwal Ekkóch
  • Pwata Sipwe Ussun Ita Fiffiu?
  • Ifa Ussun Sipwe Tufichin Amaarata Ach Pwora
  • Aramas mi Pwora, Nge a Fichiitiir Ach Sipwe Appiruur
  • Ach Uppos fan Pwora a kan Apwapwai me Mwareiti Jiowa
  • Ach Kapasfengen me Ekkan Nouwiis
  • Kopwe Tipepwora Jiowa A Etuk!
    Ewe Leenien Mas a Esilefeili án Jiowa We Mwú—2013
  • “Kopwe Apöchökülok o Tipepwora”
    Ewe Leenien Mas a Esilefeili án Jiowa We Mwú—2012
  • Kopwe Tipepwora Pwe Kopwe Féri Angang
    Ewe Leenien Mas a Esilefeili án Jiowa We Mwú (Fán Iten ewe Mwichefel)—2017
  • Sia Tongeni Pwora
    Manawach Chón Kraist me Ach Angangen Afalafal​—Minen Káé fán Iten Mwich—2021
Pwal Och
Ewe Leenien Mas a Esilefeili án Jiowa We Mwú—2003
w03 6/1 p. 22-26

‘Ami Oupwe Pwora Me Pochokkul!’

“Ami oupwe apworai letipemi! Ngang ua fen akkufu fonufan.”​—JON 16:​33, NW.

1. Pokiten minne chon Israel repwe kuna lon Kenaan, ifa ewe kapasen apochokkul mi kawor ngeniir?

LUPWEN chon Israel repwele feilo pekiloon ewe Chanpupu Jortan pwe repwe tolong lon ewe Fonu mi Pwonetiu, iei alon Moses ngeniir: “Ami oupwe pwora me pochokkul. Ousap niuokkus are ruko mwen meser, pun Jiowa ami Kot ewe emon mi fitikemi.” Iwe, Moses a kori Josua, ewe mi kefilita pwe epwe wiisen emmwenalong lon Kenan chon Israel, iwe, a apasasefalli an we fon pwe epwe pwora. (Tuteronomi 31:​6, 7, NW) Mwirin, Jiowa a apochokkula Josua, nge iei alon: “Kopwe apochokulok o tipepwora. . . Kopwe chok apochokulok o tipepwora.” (Josua 1:​6, 7, 9) Mi fichiiti chon Israel ekkena kapas. Epwe lamot ar repwe pwora pun repwe sapefengen me chon koputer mi pochokkul me pekiloon ewe Jortan.

2 Lon ei fansoun, chon Kraist mi enlet repwele tolong lon ewe fonufan sefo mi pwonetiu, iwe, a lamot ar repwe pwora, ussun Josua. (2 Piter 3:​13; Pwarata 7:​14) Iwe nge, nonnomuch a sokko seni nonnomun Josua. Josua a maun fan ketilas me siles. Kich sia fiti eu maun lon pekin ngun, nge esap fan eu sipwe angei wesewesen pisekin maun. (Aisea 2:​2-4; Efisus 6:​11-​17) Pwal och, Josua a maun fan chommong mwirin pwal mwo nge an tolong lon ewe Fonu mi Pwonetiu. Nge mi tottorikich iei chok ekkewe sossot mi kon watte​—mwen ach sipwe tolong lon ewe fonufan sefo. Sipwe nengeni ekkoch sossot mi lamot ach sipwe pwora fan.

Pwata Sipwe Ussun Ita Fiffiu?

3 Iei makkeien ewe aposel Jon: “Sia meefi pwe kich seni Kot, nge fonufan meinisin a nonnom fan nemenien ewe mi ingau.” (1 Jon 5:​19) Ekkena kapas ra affata eu popun chon Kraist repwe ussun ita fiffiu fan iten ar repwe amwochu ar luku. Ika emon chon Kraist epwe tuppwol fansoun meinisin, a ussun ita Setan a fen kkuf. Ina minne, Setan a kan feilfetal ussun “emon laion mi orior” pwe epwe aniuokkusu me oromalo chon Kraist mi tuppwol. (1 Piter 5:8) Enlet, a kan mammaun ngeni chon Kraist mi kepit me chiener kewe. (Pwarata 12:17) Lon ena maun, a kan nounou aramas, nge ir mi silei are rese silei pwe ra foffori letipan. A lamot ngenikich pwora fan iten ach sipwe tufichin uppos mwen Setan me meinisin noun kewe chon angang.

4 Pokiten Jises a silei pwe Setan me noun kewe chon angang repwe pochokkul le fiu ngeni ewe poraus allim, a iei ussun an ouroura noun kewe chon kaeo: “Lon ewe fansoun, repwe afangema ami lon riaffou, o repwe nielo ami; o ekkewe einang meinisin repwe oput ami pokiten itei.” (Mattu 24:⁠9) A pwung ekkena kapas lon ewe aewin senturi, me a pwal pwung lon ei fansoun. A fokkun enlet pwe ewe riaffou watte ekkoch me lein noun Jiowa kewe Chon Pwarata ra fen likiitu fan lon ei fansoun a lollo ngeni minne a fis fan fite lon unusen uruwoor seni lom lom. Nge, chon Kraist mi enlet ra kan pwora lupwen repwe kuna ena sokkun sossot. Ra silei pwe “ewe mettoch niuokkusiti aramas a ussun eu ssar,” me rese mochen ipwelong lon ena ssar.​—An Salomon Fos 29:​25, NW.

5 A wor pwal fitu sokkun sossot lukun ewe sossotun riaffou sipwe pwora le likiitu fan. Ren ekkoch, a weires ar repwe afalafal ngeni ekkan aramas rese kan sissileer. Pworaan ekkoch chon sukul epwe sossot lupwen chon sukul repwe uta me pwarata pwe ra tuppwol ngeni ewe muu mi nemeniir are ngeni ewe filaik. Pokiten ena sokkun kapasen pwarata a ussun eu fofforun fel, chon Kraist kukkun ra fen pwora le apposa letiper pwe repwe fori minne epwe apwapwai Kot, me sia fokkun pwapwa ren ar pwarata tuppwol fan ena sossot.

6 A pwal lamot ach sipwe pwora lupwen chon koputach repwe etipetipa ekkan pekin aporaus pwe repwe achoufetalei poraus mi ngau ussun noun Kot kewe chon angang are lupwen repwe sotuni le eppeti ewe fel mi enlet ren ar “efisata minne mi mwal ren ar kewe alluk.” (Kol Fel 94:20) Ren chok awewe, epwe ita ifa ussun meefiach lupwen epwe mwaal are chofona ekkan repot ussun Chon Pwarata Jiowa lon simpung, reitio, are tv? Sipwe ita ruko? Aapw. Sia kan ekiekin kuna ena sokkun mettoch. (Kol Fel 109:2) Iwe, sise kan pwal mairu lupwen ekkoch repwe luku ekkan repot mi chofona are mwaal, pun “eman mi wewemang a luku mettoch meinisin.” (An Salomon Fos 14:15) Nge, chon Kraist mi tuppwol rese fokkun mochen luku sokkun kapas meinisin ese lifilifil ussun pwiir kewe, me rese kan mut ngeni poraus mi ngau an epwe eppetiir seni ar fiti an chon Kraist kewe mwich, are an epwe akukkunatiu ar lukuluk are ar fiti ewe angangen afalafal. Nge, ra kan “anneta pwe ir noun Kot chon afalafal . . . fan itoch me itengau, fan poraus mi ngau me poraus allim; me a ussun ita ir chon otuputup, nge fen ir [wesewesen] chon kapas enlet.”​—2 Korint 6:​4, 8, NW.

7 Iei makkeien Paul ngeni Timoti: “Kot ese mo ngenikich ngunun niuokkus, pwe ngunun manaman . . . Iwe, kosap sau ren om pwarata usun ach Samol.” (2 Timoti 1:​7, 8; Mark 8:​38) Mwirin ach alleani ekkena kapas, sipwe tongeni eisinikich: ‘Ngang mi sau ren minne ua luku, are ngang mi pwora? Lon ai we leenien angang (are lon ai sukul), ua ereni aramas pwe ngang emon Chon Pwarata Jiowa, are ua kan tukumi ena mettoch? Ngang mi sau pokiten ua sokko seni aramas, are ngang mi pwapwa pwe ua sokkolo seni aramas pokiten ai riri ngeni Jiowa?’ Ika sia letipengau ussun ach afalafala ewe poraus allim are ussun ach kamwochunnuk won och mettoch aramas rese lien saani, sipwe chechchemeni an Jiowa fon ngeni Josua: “Kopwe apochokulok o tipepwora.” Sisap monuki pwe sap minne a lamot ekiekin chienach kewe chon angang are chon sukul, nge a lamot ekiekin Jiowa me Jises Kraist.​—Kalesia 1:​10.

Ifa Ussun Sipwe Tufichin Amaarata Ach Pwora

8 Ifa ussun sipwe tufichin amaarata ewe sokkun pwora epwe atufichikich pwe sipwe tuppwol lon ekkeei fansoun weires? Iwe, ifa ussun ekkewe popun chon Kraist ra tufichin amaarata ar pwora? Ekieki mwo minne a fis lupwen ekkewe samol fel lapalap me sou emmwen lon Jerusalem ra ereni Piter me Jon pwe repwe ukutiu seni ar afalafal fan iten Jises. Ekkewe chon kaeo rese auseling ngeniir, iwe, ekkena meilap ra akkom amosokuur, iwe mwirin, ra angaserelo. Mwirin, ra chufengen me pwiir kewe, me ir meinisin ra iotekfengen, nge iei alor: “Iwe, iei, Samol, kopwe chok nennengeni ar kewe kapasen eriani, o kopwe pwal mut ngeni noum keei chon angang pwe repwe fakkun pworacho le apasata om kapas.” (Fofor 4:​13-​29) Jiowa a polueniir ren an apochokkulereta ren ewe ngun mi fel, iwe, ussun ekkewe sou emmwen lon pekin Jus ra anneta mwirin, ra “auralo Jerusalem” ren ar afalafal.​—Fofor 5:​28.

9 Sipwe atittina minne a fis lon ena fansoun. Lupwen ekkewe sou emmwen lon pekin Jus ra amosoku ekkewe chon kaeo, rese ekiekin fangeta fan ena sossot. Nge, ekkena chon kaeo ra iotek pwe repwe pwora fan iten ewe angangen afalafal. Iwe mwirin, ra atipeeufengenni ar foffor me ar iotek, iwe, Jiowa a apochokkulereta ren an we ngun mi fel. Minne a fis ngeniir a affata pwe makkeien Paul we fitu ier mwirin lon pwal och sokkun awewe a kan weneiti chon Kraist lupwen repwe kuna riaffou. Iei makkeien Paul: “Ngang mi tufich ren mettoch meinisin lon ewe emon mi apochokkulaei.”​—Filipai 4:​13.

10 Iwe nge, epwe ifa ussun ika emon a nisasau pokiten ina pukun nikinikin? Epwe tufichin angang ngeni Jiowa fan pwora mwen mesen chon u ngeni? Ewer, fokkun ina! Chechchemeni minne Jeremaia a apasa lupwen Jiowa a awiisa ngeni ewe wiis soufos. Iei alon ena aluwol: “Ngang eman mi chok ier kukun.” A ffat pwe a meefi nge a tufichingau. Nge, Jiowa a apochokkula ren ekkeei kapas: “Kosap apasa pwe en eman mi chok ier kukun. Pun kopwe feila ren chokana meinisin upwe tinukela rer, nge kopwe apasa meinisin mine ua akuno ngonuk. Kosap niuokusitiir, pun ngang upwe etuk o tumwunuk.” (Jeremaia 1:​6-​10) Jeremaia a luku Jiowa, ina minne, fan pochokkulen Jiowa a pworaiti an tipemwaramwar, iwe mwirin, a wiliiti emon chon pwarata mi fokkun pwora lon Israel.

11 Lon ei fansoun wiisen chon Kraist mi kepit a ussun chok wiisen Jeremaia, iwe, ren ewe alillis ewe “mwich mi lapalap,” mwichen ekkewe “pwal fitemon siip” ra kan awora ngeniir, ra sopweilo ar esilefeili an Jiowa kewe kokkot, inaamwo ika aramas rese mochen etiwer, are ra kan kuna esiit me riaffou seniir. (Pwarata 7:9; Jon 10:16) Alon Jiowa ngeni Jeremaia a kan apochokkulereta: “Kosap niuokusitiir.” Resap monuki fan eu pwe wiiser a popu seni Kot me ra ekkesilefeili an poraus.​—2 Korint 2:​17.

Aramas mi Pwora, Nge a Fichiitiir Ach Sipwe Appiruur

12 Sipwe tongeni kuna alillis le amaarata pwora ika sipwe ekilapei fofforun pwal fitemon mi pwarata pwora ussun Jeremaia. (Kol Fel 77:⁠12) Ren chok awewe, ika sipwe nengeni an Jises angangen afalafal, sia ingeiti an pwora lupwen a kuna sossot seni Setan me lupwen ekkewe sou emmwen lon pekin Jus ra wenewenen pochokkul le u ngeni. (Luk 4:​1-​13; 20:19-​47) Fan pochokkulen Jiowa, Jises a uppos, iwe, ekis mwen an we malo, iei alon ngeni noun kewe chon kaeo: “Mi wor ami riaffou me lon fonufan, nge oupwe chok apilukuluk allim, ngang ua fen pworacho ngeni fonufan.” (Jon 16:33; 17:16) Ika noun Jises kewe chon kaeo repwe appiru fofforun, pwal ir repwe chon akkufu fonufan. (1 Jon 2:6; Pwarata 2:​7, 11, 17, 26) Nge epwe lamot ar repwe “apworai letiper.”

13 Fitu ier mwirin an Jises malo, Paul me Sailas ra kalapus lon Filipai. Mwirin, Paul a pesei ewe mwichefelin Filipai pwe repwe “likiitu lon eu chok ngun, ren tipeeu chok oua achochofengen ren ach luku usun ewe kapas allim, o ami ouse niuokus och ren ekkewe chon oput ami.” Ren an epwe apochokkulereta pwe repwe ina ussun, iei alon Paul ngeniir: “Iwe, epwe chok oesini ngenir ar kiteter, nge ngenikemi ami manau. Iwe, nge ekkeei mettoch ra popu seni Kot. Pun a fen fang ngenikemi pwe ousap luku chok fan iten Kraist, nge oupwe pwal kuna riaffou fan iten i.”​—Filipai 1:​27-​29.

14 Lupwen Paul a mak ngeni ewe mwichefel lon Filipai, a fen kalapussefal, nge a nom lon Rom. Iwe nge, a chuen afalafal ngeni aramas fan pwora. Met a fis mwirin? Iei makkeian: “Meinisin ekkewe sounfiu lon ewe Praitorium, tori ekkewe ekkoch aramas meinisin, ra sinei pwe ai fotek a fis fan iten Kraist. Iwe, ai fotek a alololata chommong pwich Soulang lon ewe Samol; iwe, ra alapalo ar pworacho le apasa ewe kapasen Kot, nge rese niuokus.”​—Filipai 1:​13, 14.

15 Fofforun Paul a apochokkulakich. A pwal ina ussun fofforun chon Kraist lon ei fansoun, ir kewe mi likiitu fan riaffou lon ekkewe fonu mi nom fan nemenien emon chok aramas are ekkan nouwiisen lamalam. Porausen chommong leir a fen mak lon ewe Leenien Mas me Awake! chassi me pwal lon ekkewe Yearbook of Jehovah’s Witnesses. Ika kopwe alleani ekkena poraus, chechchemeni mwo pwe ese sokkolo pochokkulen ekkena aramas pwe ra ussuch; nge lupwen a toriir mettoch mi fokkun weires, Jiowa a ngeniir ewe pochokkul mi sokkolo watteen, iwe, ra likiitu. Sipwe tongeni wesewesen achifoua pwe epwe pwal fori ena mettoch fan asengesich ika epwe lamot ngenikich ena alillis.

Ach Uppos fan Pwora a kan Apwapwai me Mwareiti Jiowa

16 Ika emon epwe uppos fan iten minne mi enlet me pwung, ena emon a pwora. Ika emon epwe ina ussun inaamwo ika a meefi niuokkus, a mmen watte an pwora. A enlet pwe emon chon Kraist epwe tongeni pwora ika a wesewesen mochen fori letipen Jiowa, me ika a pposolo letipan pwe epwe tuppwol, me ika a anomu an lukuluk won Kot, me ika a chechchemeni fansoun meinisin pwe Jiowa a fen apochokkula chommong, chommong aramas mi ussun i. Pwal och, ika sia weweiti pwe ach uppos fan pwora a kan apwapwai me mwareiti Jiowa, epwe lapalo tipepposuch pwe sisap apwangapwangelo. Sipwe fen mmonleta fan iten ach sipwe likiitu fan kapasen esiit are fan ekkewe mettoch mi ngau seni ena pokiten a wesewesen watte ach tongei i.​—1 Jon 2:5; 4:​18.

17 Sisap monuki fan eu pwe ika sipwe kuna riaffou fan iten minne sia luku, esap weween pwe sia fen fori och mettoch mi mwaal. (1 Piter 3:​17) Mi torikich riaffou pokiten ach peppeni an Jiowa nemenem, me ach foffori minne mi murinno, me pwal pokiten ach ikkimulo seni ei otot mi ngau. Iei alon ewe aposel Piter ussun ena mettoch: “Nge are oupwe kuna ninni ren ami fofor-murinno, o likiitu lon ewe ninni, iei mi murinno fan mesen Kot.” Pwal iei alon Piter: “Iei minne, ir mi kuna riaffou pokiten letipen Kot repwe chok fori minne mi murinno, o repwe chok likitalo ngunur ngeni ewe Chon Forata mi tuppwel.” (1 Piter 2:​20; 4:​19) Ewer, ach luku a kan apwapwai ach Kot mi ur ren tong, Jiowa, me a mwareiti i. A ifa me watteen ena popun ach sipwe pwora!

Ach Kapasfengen me Ekkan Nouwiis

18 Lupwen Jises a ereni noun kewe chon kaeo pwe aramas repwe eriaffouur, pwal iei alon ngeniir: “Repwe afangema ami ngeni chon pungupung, o repwe ninni ami lon ar kewe sinakok. Repwe pwal atekinikemilo mwen mesen kepina o pwal king pokitei, pwe oupwe pwarata ngenir me ekkewe re Jentail.” (Mattu 10:17, 18) Emon esap tufichin uta mwen mesen sou kapwung are sou nemenem pokiten och tipimwaal ika ese pwora. Nge, ika sipwe afalafal fan pwora ngeni chokana, sipwe fen siwili eu fansoun weires ngeni eu fansoun ach sipwe tufichin fori eu mettoch mi lamot. Epwe ussun ita sipwe pwari ngeni chokewe mi eani apwung wooch alon Jiowa we mi mak lon ewe oruuen Kol Fel: “Iei minne, ami king kena, oupwe tipatchemelo; o ami sou nemenemen fonufan, oupwe miritilo. Oupwe angang ngeni ewe SAMOL eti niuokus.” (Kol Fel 2:​10, 11) Fan chommong, lupwen a wor tipimwaal ngeni Chon Pwarata Jiowa lon imwen kapwung, ekkewe sou kapwung ra amwochata och pwuung mi nom ren aramas, nge iei ewe pwuung fan iten ar repwe pwisin filata menni lamalam repwe fiti, me sia kan kilisou ren ena mettoch. Iwe nge, ekkoch sou kapwung ra piitelo ren chon u ngeni ekkena Chon Pwarata. Iei alon ena wokisin asan ngeni ekkena sou kapwung: “Oupwe miritilo.”

19 Ekkan sou kapwung repwe ita miritiiti pwe an Jiowa kewe alluk a tekia seni sokkun alluk meinisin. Repwe ita chechchemeni pwe aramas meinisin, pachelong sou kapwung, repwe atittin mwen mesen Jiowa Kot me Jises Kraist. (Rom 14:10) Nge ren kich, inaamwo ika epwe pwung are esap pwung minne emon sou kapwung epwe apwungalo fan itach, nge a wor chommong popun sipwe pwora pun Jiowa a kan peppenikich. Iei alon ewe Paipel: “Mi feioch ir meinisin mi opelong lon i.”​—Kol Fel 2:​12.

20 Iei alon Jises lon an we Afalafal won ewe Chuuk: “Ami oupwe feioch, lupwen repwe laleitikemi are eriaffoukemi are chofanata sokkun mi ingau meinisin usun ami pokitei. Ami oupwe chengel o pwapwa chapur, pun liwinimi epwe lapalap lon lang, pwe a iei usun ar eriaffou ekkewe soufosun lom, ekkewe mi akkom mwemi.” (Mattu 5:​11, 12) Pwungun pwe sise kan pwapwa lupwen aramas repwe eriaffoukich, nge ika sipwe uppos fan riaffou, pachelong an aramas pwenikich lon ekkewe minen aporaus, iei eu minen apwapwa. A wewe ngeni pwe sia kan apwapwai Jiowa me sipwap angei liwinich. Ach uppos fan pwora a kan pwarata pwe mi enlet ach luku me epwe wesewesen nom rech an Kot chen. A enletin affata pwe sia anomu unusen ach lukuluk won Jiowa. Ena sokkun lukuluk a fokkun lamot ngeni chon Kraist, ussun en eu lesen mwirin ei epwe affata.

Ikkefa Ekkewe Lesen Ka fen Kaeo?

• Lon ei fansoun, a lamot ach sipwe pwora lupwen met sokkun mettoch epwe torikich?

• Ifa ussun sipwe tongeni amaarata ewe mettoch pwora?

• Io kkan mi fen isetiu leenien appiru mi murinno fan iten ewe mettoch pwora?

• Met popun sia mochen mwokutukut fan pwora lon unusen manauach?

2. Mei fet nonnomuch lon ei fansoun, me met a lamot ngenikich?

3. Met ewe Paipel a pwarata ussun ewe nampa eu chon u ngenikich?

4. Ifa ewe ourour Jises a uwawu, nge a fen pwalo pwe menni lapalap a nom ren chon Kraist mi enlet?

5, 6. (a) A lamot ach sipwe pwora lupwen met sokkun mettoch epwe torikich? (b) Met chon Kraist mi tuppwol ra kan fori lupwen epwe toriir sossotun ar pwora?

7. Ikkefa ekkewe kapas eis sipwe tongeni atittina pwisin kich ren?

8, 9. (a) Lon eu fansoun, ifa ussun pworaan ekkewe popun chon Kraist a nom fan sossot? (b) Met Piter me Jon ra fori lupwen aramas ra amosokuur, me met ir me pwiir kewe chon Kraist ra kuna?

10. Ifa ussun minne Jeremaia a kuna epwe alisi ekkewe mi kan nisasau?

11. Lon ei fansoun, met a kan alisi chon Kraist pwe repwe ussun Jeremaia?

12. Ifa ewe leenien appiru mi fokkun murinno fan iten ewe mettoch pwora Jises a isetiu, me ifa ussun a apochokkula noun kewe chon kaeo?

13. Ifa ewe kapasen apochokkul Paul a awora ngeni chon Filipai?

14. Met a fis lon Rom pokiten pworaan Paul?

15. Sipwe tongeni kuna me ia ekkan poraus, porausen chon lukuluk, epwe apochokkula tipepposuch pwe sipwe pwora?

16, 17. Lon ei fansoun, ifa ussun sipwe tongeni amaarata ewe mettoch pwora lon ekiekich me letipach?

18, 19. Ika sipwe uppos fan pwora mwen mesen emon sou kapwung, ifa ewe poraus sipwe ussun ita esile ngeni aramas?

20. Pwata sipwe tongeni meefi pwapwa ika sipwe likiitu fan an aramas eriaffoukich me pwenikich?

[Picture on page 24]

Sise kan sau ren ewe poraus allim

[Picture on page 25]

Pworaan Paul lupwen a kalapus a afeffeitai choufetalin ewe poraus allim

    Meinisin mi Peres lón Fósun Chuuk (1987-2025)
    Log Out
    Log In
    • Chuuk
    • Share
    • Preferences
    • Copyright © 2025 Watch Tower Bible and Tract Society of Pennsylvania
    • Terms of Use
    • Privacy Policy
    • Privacy Settings
    • JW.ORG
    • Log In
    Share