Ifa Ussun Ekkoch Kapas Eis Ra Fen Polu

CHOMMONG aramas ra iotek. Ekkoch ra luku pwe a polu ar kewe iotek. Pwal ekkoch ra tipemwaramwar ika emon a auselinga ar iotek. Nge ekkoch ra kutta poluen ar kapas eis nge rese ekiekin tingorei Kot lon iotek.

Ewe Paipel a apasa pwe ewe Kot mi enlet a “auseling iotek.” (Kol Fel 65:2) Ika ka iotek, ka wesewesen silei ika en mi iotek ngeni ewe Kot mi enlet? Om kewe iotek ewe sokkun iotek Kot epwe polueni?

Chommong aramas won unusen fonufan repwe polueni ewer! Ifa ussun a polu ar kewe iotek? Met ra fen kaeo?

Io Ena Kot?

Emon sense lon Portugal mi fen pin kaeo seni ekkewe nienkatek me patere a fokkun achocho lon an we lamalam. A osukosuk lupwen an we lamalam a siwil me a poutalo ekkoch luku a fen kaeo pwe mi lamot. An sai ngeni pwal eu fonu a atufichi an kaeo pwal eu sokkun lamalam, me a poputa le ekieki ika mei wor emon chok Kot mi enlet. Menni lamalam epwe fiti? Lupwen a eisini noun we patere ussun ekkoch mettoch seni ewe Paipel, ese polueni an kewe kapas eis, iwe neminnewe a letipechou.

Ewe lamalamen Katolik a fen achoufetalei echo taropwe lon telinimwen ewe sense mi ouroura aramas pwe resap kapas ngeni Chon Pwarata Jiowa. Nge neminnewe a chok ekkekieki ussun an kewe kapas eis. Eu ran lupwen emon Chon Pwarata a chuuri i, a fokkun auseling me a saani met a rongorong. Iei ewe aewin fansoun a fos ngeni Chon Pwarata Jiowa.

Ren an epwe polu an kewe kapas eis mi chommong, ei fefin a poputa le kaeo ewe Paipel ren ekkewe Chon Pwarata. Iteiten wiik, a chommong an kapas eis. A mochen silei iten Kot, ika mei wor emon chok Kot mi enlet, ika Kot a pwapwa ren ach nounou lios lon ach fel, me pwal chommong kapas eis. Neminnewe a kuna pwe poluen an kewe kapas eis meinisin a feito seni ewe Paipel, esap chok seni an aramas ekiek, ina popun a mairu me pwapwa ren minne a kakkaeo. Ekis me ekis, a polu chommong an kewe kapas eis. Ikenai, neminnewe a fel ngeni Jiowa ren ngun me enlet, ussun chok Jises Kraist a apasa pwe “ekkewe chon fel mi let” repwe fori.​—Jon 4:​23.

Riaffou​—Met Popun?

Ewe mwan iten Jop a riaffou watte. Noun kewe meinisin ra nninniilo lon eu molumol, me a woungauolo. A pwal riaffou ren semmwen mi chou me a likiitu fan sossot seni chienan kewe mi chofona. Lupwen a fiffis ekkeei osukosuk, Jop a muttir kapas mwen an ekieki met a mochen apasa. (Hiop 6:3) Nge Kot a ekieki ussun met a fen fisita. (Hiop 35:15) A silei masouen letipen Jop me a awora emmwen mi lamot ngeni Jop. A pwal fori ena mettoch fan iten aramas ikenai.

Lon Mozambique, Castro a chok engol ierin lupwen inan we a malo. A fokkun letipechou. A eani kapas eis: “Met popun a malo me nikitikemilo?” Inaamwo ika Castro a ffol ren seman me inan mi niuokkusiti Kot, nge iei a fokkun osukosuk. Met epwe akinamwelo ekiekin me tupuwan? A kuna auruur seni an akkalleani eu kukkun Paipel me ren an popporaus ussun minne a allea ren pwiin we watte.

Feil, feil, Castro a miritiiti pwe inan we a malo, esap pokiten pwungungauen Kot, nge pokiten an alemwiri tipis. (Rom 5:​12; 6:​23) Ewe pwon lon ewe Paipel pwe epwe wor manausefal a fokkun aururu i pokiten a alukuluku i pwe epwe kunasefalli inan we. (Jon 5:​28, 29; Fofor 24:15) A mmen alolilen pwe ruaanu ier chok mwirin, seman we a malo. Nge lon ei fansoun Castro a tongeni likiitu fan an riaffou. Ikenai, a tongei Jiowa me a tuppwol le angang fan iten Kot. Ewe pwapwa a fen kuna a pwapwalo ngeni aramas meinisin mi sissilei i.

Chommong aramas mi fen pout seniir attonger kewe ra kuna auruur seni ekkewe poraus mi enlet lon ewe Paipel a fen pwal aururu Castro. Ekkoch mi riaffou watte pokiten fofforingauen aramas ra eani ei kapas eis, ussun chok an Jop: “Pwota ekewe aramasangau ra manau?” (Hiop 21:⁠7) Lupwen aramas ra wesewesen auselinga met Kot a polueni lon an we Kapas, ra kuna pwe lapalapen an Kot pwakini osukosuk a fokkun efeiochuur.​—2 Piter 3:⁠9.

Barbara, emon a maarita lon Merika, ese pwisin kuna ekkewe mettoch mi anniuokkus lon maun. Nge a maarita lon eu fonufan mi ur ren maun. Porausen fofforingau lon maun a kawor lon simpung iteiten ran. Atun an kaeo lon sukul, a osukosuk ren ifa ussun met a fis me loom a chok fiffis nge a ussun ita pwe aramas rese tongeni silei ussur me mwan. Pwata? Kot a kuna met a fiffis? A luku pwe a wor emon Kot, nge a tipemwaramwar meefian ussun Kot.

Iwe nge, ekiekin Barbara ussun manau a siwil lupwen a chiechi ngeni ekkewe Chon Pwarata Jiowa. A auseling ngeniir me a kaeo ewe Paipel reer. A fiti ekkewe mwich lon ewe Kingdom Hall. A pwal mwo fiti eu mwichelap. Pwal och, lupwen a eani kapas eis, a kuna pwe ekkewe Chon Pwarata rese chok polueni an kewe kapas eis seni pwisin meefier. Nge, ekkewe Chon Pwarata ra kapas lon tipeeu pokiten ar ekiek a alongolong won ewe Paipel.

Ekkewe Chon Pwarata ra pwaralo ewe pisekin annet seni ewe Paipel pwe Setan ewe Tefil a etipetipa ewe fonufan, an sou nemenen, me ewe fonufan a pwaralo ngunun we. (Jon 14:30; 2 Korint 4:4; Efisus 2:​1-3; 1 Jon 5:​19) Ra awewei pwe ewe Paipel a fen oesini ekkewe mettoch a fen fis mi aosukosuka Barbara. (Taniel, sopwun 2, 7, me 8) Kot a fen oesini ussur pokiten a tufichin kuna met epwe fis lon mwach kkan ika a mochen kuna. Kot a efisata ekkoch me leir. Kot a chok mutata pwal ekkoch pwe repwe fisita. Ekkewe Chon Pwarata ra aiti ngeni Barbara pwe ewe Paipel a pwal oesini ussun eu fonufan sefo ia pwung epwe nonnom ie me ia riaffou esap nonnom ie.​—2 Piter 3:​13; Pwarata 21:​3, 4.

Ekis me ekis, Barbara a poputa le weweiti pwe inaamwo ika Jiowa Kot ese efisata riaffoun aramas nge, ese pinei riaffou ren an eriani aramas le alleasochisi an kewe alluk ika rese mochen fori. (Tuteronomi 30:​19, 20) Barbara a apposa letipan le kaeo ussun an Kot kewe alluk me apwonuureta. A pwal kuna lein ekkewe Chon Pwarata Jiowa ewe sokkun tong Jises a apasa epwe esissinata noun kewe chon kaeo mi enlet.​—Jon 13:​34, 35.

En kopwe pwal kuna feioch seni ekkewe mettoch a alisi i.

Chokkewe mi mak porauser lon ei lesen rese kefil pwe repwe kuna pwapwa lon manauer. Nge ra fen kaeo pwe mei wor an Jiowa Kot we kokkot mi tong epwe efeiochu aramas meinisin mi filata pwe repwe alleasochi an kewe alluk. (Fofor 10:34, 35) A kapachelong lon ena kokkot manau esemuch lon eu fonufan ese wor maun ie, mi ngaselo seni semmwen me echik​—pwal mwo nge seni malo. (Aisea 2:4; 25:​6-8; 33:24; Jon 3:​16) Ina met ka mochen? Ika pwe wuu, kopwe pwal tongeni kaeo ifa ussun om kopwe kuna ewe kki ngeni om manaueni ewe manau mi menemenoch ren om fiffiti ekkewe mwich mi alongolong won ewe Paipel lon ewe Kingdom Hall an Chon Pwarata Jiowa. Am aua etiwok le fiti.

[Picture Credit Line on page 4]

Hiker: Chad Ehlers/Index Stock Photography