“Ousap Niuokus, Ousap Pwal Ruko”

“Ousap niuokus, ousap pwal ruko. . . . Ewe Samol mi Lapalap epwe etikemi.”​—2 KRONIKA 20:⁠17.

1. Ifa ussun porausen terrorism a kku aramas, me pwata sia weweiti ekkewe popun ra niu?

TERRORISM! Ina eu kapas mi aniuokkus. A efisi ach meefi lulukungau me tufichingau. A pwal efisi ach ruko, letipechou, me song. Chommong aramas ra luku pwe ena kapas a weneiti met aramas repwe niueti ren fite, fite ier. Ekkoch muu ra fen fiu ngeni terrorism ren fite ier nge rese kon lien sopwoch. Ina pwal eu popun an aramas niuokkus.

² Iwe nge, mei wor popun sipwe apilukulukoch. Chon Pwarata Jiowa ra afalafal lon 234 fonuen fonufan me ra apilukulukoch ussun mwach kkan. Rese ekieki pwe esap tongeni wes terrorism nge ra lukuluk pwe epwele wes. Mei wor popun aramas mi pwal tongeni eani ena luku? Io epwe tongeni awesalo terrorism meinisin seni fonufan, me ifa ussun epwe tongeni wes? Pokiten fofforun mwanesol a fen kku manauach meinisin, iwe, epwe lamot pwe aramas meinisin repwe atittina longolongun ar ekiekoch.

³ Ikenai, mei wor chommong popun aramas ra niuokkus me ruko. Ekieki mwo chommongun ekkewe aramas rese chuen tongeni ateneki pwisin ir pokiten ar chinnap, semmwen mi chou, are osukosuk ren moni lon ewe famili. Ekieki mwo lukulukungauen manauen aramas! A ussun ita pwe malo pokiten aksiten are feiengau watte a wikiiti aramas me angei senikich met sia aucheaani meinisin. Ena esin niuokkus me aurek fengen me ekkewe osukosuk lefilen aramas mi letipechou, a fen anneta pwungun an ewe aposel Paul kewe kapas ussun ach keei ran: “Nge kopwe wewe usun ekkeei mettoch, pwe fansoun weires epwe waroto lon ekkewe ran le sopolon. Pun aramas repwe tongei pwisin ir, . . . esap wor ar chen, repwe pwisin nemenemenir, repwe luapas, resap mosonoson, repwe mocho, repwe oput minne mi murinno.”​—2 Timoti 3:​1-3.

⁴ Inaamwo ika ei wokisin a fos ussun eu fansoun mi fokkun weires nge, a chuen ngenikich och mettoch sipwe apilukuluk ngeni. Nengeni pwe “ekkewe ran le sopolon” an Setan otot mi ngau ra wewe ngeni ewe fansoun weires. Weween pwe amanau mi arapoto me ei fonufan mi ingau epwe muttir siwil ren nemenien ewe Muun Kot mi unusoch, ewe Muu Jises a aiti ngeni noun kewe lon an we iotek. (Mattu 6:​9, 10) Ewe soufos Taniel a apasa pwe ena Muu, an Kot we Muu lon lang, “esap tongeni talo,” nge epwe “ataela o arosala ekewe lusun mwu, nge epwe pusin nom tori feilfeilachok.”​—Taniel 2:⁠44.

An Chon Kraist Rese Pekini Eu Pekin Me Terrorism

⁵ Lon ekkewe fitu ier a lo, fite ngerou aramas ra fen ninniilo pokiten terrorism. A fen lapelo an chon fonufan ekieki ussun terrorism pokiten ewe osukosuk lon New York City me Washington, D.C., lon September 11, 2001. Pokiten watteen ewe feiengau me choufetalin terrorism won unusen fonufan, ekkewe muun fonufan ra muttir angangfengen ren ar repwe u ngeni. Ren chok awewe, me ren poraus lon simpung, December 4, 2001, “nouwis seni 55 fonuen Iurop, Merika, me Esia, ra tipeeu lon eu kokkot” mi tongeni alisata ar angangfengen. Emon nouwis mi tekia lon Merika a pwapwa ren ei tipeeu pokiten “epwe apochokkulasefalli” ewe angangen u ngeni terrorism. Muttir chok, fite puku milion aramas ra ekieki ussun met The New York Times Magazine a eita ngeni “ewe poputaan eu maun mi fokkun watte.” Sisaamwo silei epwe ifa ukuukun sopwochun ei maun. Iwe nge, mwiriloon ei esin maun ngeni terrorism a fen efisata niuokkus me osukosuk lon letiper fan iten chommong, nge sap fan iten chokkewe mi lukuluk won Jiowa.

⁶ Chommong ra silei pwe Chon Pwarata Jiowa rese peni eu pekin lon politics. Lape-ngeni aramas resap osukosuk ren ei luku lupwen a wor kinamwe nge, repwe tongeni song lupwen osukosuk watte a ppiita. Fan chommong, niuokkus me tiperueru pokiten ewe maun epwe efisata lapeloon an emon tongei fonuan. Ina popun epwe weires ngeni ekkoch ar repwe weweiti ewe popun emon ese mochen alisi eu pekin. Iwe nge, chon Kraist mi enlet ra silei pwe repwe alleasochisi an Jises alluk pwe “resap kinikinin ewe fonufan.” (Jon 15:​19, NW; 17:14-​16; 18:36; Jemes 4:⁠4) Weween pwe resap pekini eu pekin lon politics are lon pwal och sokkun osukosuk lefilen aramas. Jises a isetiu ewe leenien appiru mi pwung. Pokiten unusochun tupuwan me watteen an kewe tufich, Jises a tongeni wesewesen amurinnoolo nonnomun aramas. Nge, ese mochen angolong lon politics. Jises a poutalo minne Setan a mochen fangolo ngeni me le poputaan an angangen afalafal, ewe nemenemen muun fonufan meinisin. Mwirin, a ffat pwe ese mochen seikita me ren aramas fan iten ewe wiis king.​—Mattu 4:​8-​10; Jon 6:​14, 15.

⁷ Sap minne pwe an Chon Pwarata Jiowa rese pekini eu pekin a ita wewe ngeni ar alisata are tipeeu ngeni fofforun mwanesol. Ar tipeeu ngeni fofforun mwanesol epwe u ngeni ar fos pwe ra angang ngeni ewe “Koten tong me kinamwe.” (2 Korint 13:11) Ra fen kaeo ekiekin Jiowa ussun fofforun mwanesol. Ewe soumak kol mi fel a makkei: “Ewe SAMOL a sotuni ekkewe aramas mi pung, o pwal ekkewe mi ingau; o ngunun a oputa ekkewe ir mi mochen mwanesol.” (Kol Fel 11:⁠5) Ra pwal chechchemeni alon Jises we ngeni Piter: “Kopwe aliwinalong om katilas lon leenian. Pun ir meinisin mi angei katilas repwe malo ren katilas.”​—Mattu 26:52.

⁸ Inaamwo ika uruwoon fonufan a pwalo pwe chon Kraist mi chofona ra fen amwochu “katilas” nge, Chon Pwarata Jiowa rese fori ena. Ra fen poutalo ena esin foffor meinisin. Ekkewe Chon Pwarata ra alleasochisi ewe alluk lon Rom 13:​1, 2: “Aramas meinisin repwe alleasochisi ewe mu mi nemeni ir. Pun esor an mu nemenem are esap seni Kot, nge ekkewe mi wor, ra chok popu seni Kot. Iei minne, ir mi lukumach ngeni ekkewe mu ra lukumach ngeni minne mi popu seni Kot; o chon lukumach repwe pwisin kuna ar apung.”

⁹ Iwe, pokiten terrorism och mettoch mi fokkun ngau, esap ita pwe Chon Pwarata Jiowa repwe fori och mettoch fan iten wesiloon terrorism? Ewer repwe fori me ra foffori. Akkom rese angolong lon ena esin foffor. Oruuen, ra aiti ngeni aramas ekkewe kapasen alongolongun alluk mi awesalo fofforun mwanesol lupwen aramas ra apwonuureta.a Lon ewe ier a lo, ekkewe Chon Pwarata ra eani 1,202,381,302 awa ren ar repwe alisi aramas ar repwe kaeo manauen chon Kraist. Ese fen solap ekkeei awa pun 265,469 aramas ra wiliiti Chon Pwarata Jiowa pokiten ei angang me, ra fen pwalo pwe ra fen poutalo fofforun mwanesol meinisin ren ar papatais.

¹⁰ Pwal och, Chon Pwarata Jiowa ra silei pwe rese tongeni pwisin awesalo fofforingau meinisin won fonufan. Ina popun ra eani lukuluk lon ewe emon a tongeni fori​—⁠Jiowa Kot. (Kol Fel 83:18) Inaamwo ika ra angang weires nge, aramas rese tongeni awesalo fofforun mwanesol won fonufan. Ewe soumakkei Paipel a ourourakich ussun ach ei fansoun, “ekkewe ran le sopolon,” me a apasa: “Ekkewe aramas ingau, pwal ekkewe chon likotuputup, repwe chok alapalo ar fofor-ingau, ra otupu ekkoch, nge ekkoch ra pwal otupu ir.” (2 Timoti 3:​1, 13) Lupwen sia chechchemeni ena poraus, ese watte an aramas kewe tufichin awesalo ingau. Nge, sia tongeni lukuluk pwe Jiowa epwe unusen awesalo fofforun mwanesol me esap ppiita sefal.​—Kol Fel 37:​1, 2, 9-​11; An Salomon Fos 24:​19, 20; Aisea 60:18.

Pwora Lupwen Epwele Fis Maun

¹¹ Pokiten ewe Koten kinamwe a oputa fofforun mwanesol, sia tongeni weweiti ewe popun a fen angang ngeni an epwe ataielo ewe popun fofforun mwanesol, Setan ewe Tefil. Ren enletin a fen asaua Setan ren an kkuf fan poun ewe chonlang mi lapalap, Maikiel​—⁠ewe minefoon King mi seikita me ren Kot, Kraist Jises. A iei ussun ewe Paipel a awewei met a fis: “Iwe, a fis maun lon lang. Maikiel o noun kewe chonlang ra fiu ngeni ewe traikon. O ewe traikon a fiu, pwal noun kewe chonlang; nge ra kuf, o ese chuen mo wor leenier lon lang. Iwe, ewe traikon mi lap a turutiu, ewe serpentin lom lom, ewe a iteni Tefil me Satan, ewe mi otupu fonufan meinisin. Ra oturatiu i won fonufan, o noun kewe chonlang ra pwal eti i.”​—Pwarata 12:​7-9.

¹² Alleaan ekkewe ier lon Paipel me met a fen fisita won fonufan ra tipeeu pwe ena maun lon lang a poputa lon ewe ier 1914. Seni ena fansoun lapalapen ei fonufan a fen ngangngauolo. Ewe popun a fen awewe won lon Pwarata 12:12: “Iei minne, oupwe pwapwa, ami kena lang o pwal ami kena mi nonnom lon ir! Nge riaffou ngenikemi fonufan o matau, pun ewe tefil a fen feitiu remi lon an song mi lap, pun a sinei pwe an we fansoun a chok mochomoch.”

¹³ Sia weweiti pwe an ewe Tefil song epwe kon lap ngeni noun Kot kewe mi kepit me chiechier, “ekkewe ekkoch siip.” (Jon 10:16; Pwarata 12:17) An Setan u ngeniir epwe kon lapalap lupwen epwe maunei chokkewe meinisin mi alisata an Kot we Muu mi nemenem seni lang, me chokkewe mi eani lukuluk won ena Muu. Iei eu maun mi lapalap. Isikiel sopwun 38 a affata pwe ei maun an “Kok seni ewe fonuen Makok.”

¹⁴ Fan ekkoch, seni ewe fansoun Setan a koturutiu seni lang, noun Kot kewe aramas ra fen kuna ekis tumun seni ekkoch muu mi awewe won ren kapas mi monomonolo lon Pwarata 12:15, 16. Epwe sokkolo lupwen Setan epwe tooki noun Kot kewe, pun esap wor alillis seni aramas won fonufan fan iten chokkewe mi eani lukuluk won Jiowa. Pokiten esap wor alillis seni aramas, ekkewe chon Kraist repwe niuokkus are ruko? Aapwi!

¹⁵ Kot epwe alisi noun kewe aramas ussun chok a fen alisi muun Israel lon ranin King Jehosafat. Sia alleaani: “Oupwe rongorong, en Jehosafat me ami chon Juta me chon Jerusalem meinisin. Iei alon ewe Samol mi Lapalap ngenikemi, ‘Ousap niuokus, ousap pwal ruko ren ei mwichemongun aramas. Pun ei maun sap ami, pwe an Kot. . . . Ami ousap fiu lon ei maun. Oupwe atettelikemi o ukuta chok. Oupwe nengeni usun an ewe Samol mi Lapalap awinnakemi.’ Ami chon Juta me chon Jerusalem, ousap niuokus, ousap pwal ruko. Lesor oupwe feila maun ngeniir, nge ewe Samol mi Lapalap epwe etikemi.”​—2 Kronika 20:15-​17.

¹⁶ Kot a alukuluku aramasen Juta pwe resap fiu. Ussun we chok, lupwen Kok seni Makok a maunei noun Kot kewe aramas, resap amwochu katilas ren ar repwe pwisin tumunuur. Nge, repwe ‘uta chok lon leenier kewe me kuna an Jiowa amanau.’ Pwungun pwe ar uta chok esap wewe ngeni an esap wor wiiser. Mei wor wiisen noun Kot kewe aramas lon ranin Jehosafat. Sia allea: “Murin, Jehosafat a chapetiu lepwul, nge chon Juta me chon Jerusalem meinisin ra pwal chapetiu me fan mesen ewe Samol mi Lapalap o fel ngeni. Iwe, ekewe mwan seni ewe ainangen Lefi seni an Kohat me an Kora kewe cho ra uta o kolun mwareiti ewe Samol mi Lapalap. . . . Ewe king a filata ekoch chon kol, pwe repwe kolun mwareiti ewe Samol mi Lapalap fan ufer mi pin, repwe akomwola mwen ewe mwichen sounfiu o kol, ‘Ousipwe kilisou ngeni ewe Samol mi Lapalap, pun an tong ellet a nonnom tori feilfeilachok.’ ” (2 Kronika 20:​18-​21) Ewer, inaamwo ika eu mwichen sounfiu a mauneer nge, ra chuen mwareiti Jiowa. Iei ewe kokkot fan iten Chon Pwarata Jiowa lupwen Kok a tookiir.

¹⁷ Tori ena fansoun​—pwal mwo nge mwirin ewe poputaan an Kok maun a fen poputa​—⁠Chon Pwarata Jiowa repwe chuen alisata an Kot we Muu. Repwe chuen kutta ar pochokkul me tumun seni ar chiechi ngeni ekkewe 94,600 mwichefel won unusen fonufan. (Aisea 26:20) A ifa me murinnoon ei fansoun fan iten ach sipwe mwareiti Jiowa fan pwora! Ach silei pwe Kok epwele mauneekich esap efisi ach nimaramarsefal fan niuokkus. Nge ach silei a amwokutukich ach sipwe alapalo ach mwareiti Kot me ren ach tufich.​—Kol Fel 146:2.

¹⁸ Ei esin ekiek mi murinno a pwalo ren ekkewe fite ngerou anuwol me fopwul won fonufan mi pioneer. Ewe tract, Youths​—What Will You Do With Your Life? a fen katowu atun ewe district mwichelap lon 2002, a fen menlapei ochun ar filata ena esin angang. Chon Kraist, kukkun me chinnap ra kilisou ren ena sokkun minen achechchem.​—Kol Fel 119:​14, 24, 99, 119, 129, 146.

¹⁹ Chon Kraist resap niuokkus are ruko pokiten met a fiffis won fonufan. Ra silei pwe Muun Jiowa we epwe unusen toluelo fofforun mwanesol seni fonufan. Porausen ewe manausefal mi amanauasefalli chokkewe mi fen pout seniir manaueer pokiten fofforun mwanesol a pwal auruuruur. Ei manausefal epwe atufichi ekkoch aramas ar repwe rongorong porausen Jiowa, me epwe atufichi pwal ekkoch ar repwe sopweilo ar angang fan iten Jiowa.​—Fofor 24:15.

²⁰ Pokiten kich chon Kraist mi enlet, sia weweiti ewe lamoten ach sisap pekini eu pekin me a ina met sia apposa letipach ngeni. Sia mochen amwochu ach apilukuluk mi amwarar, ewe apilukulukun ach sipwe “ukuta chok” me kuna an Jiowa ‘awinnakich.’ Ewe lesen mwirin ei epwe apochokkula ach luku ren an asaramakich ussun ekkewe porausen fonufan mi alisata ach weweiti pwonuetaan oesini lon Paipel.

[Footnotes]

En Mi Tongeni Awewei?

• Met popun aramas chommong ra ekiekingau?

• Met popun Chon Pwarata Jiowa ra ekiekoch ussun mwach kkan?

• Met Jiowa a fen ffor ngeni ewe chon efisata fofforun mwanesol?

• Met popun sisap niueiti an Kok mauneikich?

2. Met Chon Pwarata Jiowa ra fori ussun ei osukosuk ren terrorism, me ikkefa ekkewe kapas eis ra ppiita?

3. Ikkefa ekkewe mettoch ra efisata niuokkus, me met a fen oesini ussun ach kewe ran?

4. Ifa ewe ekiek mi murinno a pop seni porausen ekkewe osukosuk lon 2 Timoti 3:​1-3?

5. Met ekkewe muun fonufan ra fori pokiten terrorism?

6. (a) Met popun ekkoch aramas rese tongeni weweiti ewe popun Chon Pwarata Jiowa rese pekini eu pekin lupwen a wor osukosuk? (b) Ifa ewe leenien appiru Jises a isetiu ren an ese pekini eu pekin politics?

7, 8. (a) An Chon Pwarata Jiowa rese pekini eu pekin lon politics esap wewe ngeni met, me met popun? (b) Met popun resap u ngeni eu muu me ren Rom 13:​1, 2?

9. Ikkefa ekkewe ruu mettoch Chon Pwarata Jiowa ra fori ren ar repwe u ngeni terrorism?

10. Epwe tufich pwe fofforun mwanesol repwe unusen wesilo seni fonufan?

11. Ikkefa ekkewe mettoch Jiowa a fen fori ren an epwe unusen awesalo fofforun mwanesol?

12, 13. (a) Pwata ewe ier 1914 a lamot? (b) Met an Isikiel oesini a apasa ussun chokkewe mi alisata Muun Kot?

14. Ifa ussun Chon Pwarata Jiowa ra fen kuna tumun me loom, me repwe kuna ei esin tumun fansoun meinisin?

15, 16. (a) Chon Kraist mi tongeni apilukulukoch ussun met epwe fis lon mwach kkan pokiten menni kapasen alukuluk a katowu lon ranin Jehosafat? (b) Ifa ewe leenien appiru Jehosafat me ekkewe aramas ra fen isetiu fan iten noun Kot kewe chon angang ikenai?

17, 18. (a) Ifa ewe ekiek murinno Chon Pwarata Jiowa ra eani ussun an Kok mauneer? (b) Ifa ewe fon a kawor ngeni sarafo chon Kraist?

19, 20. (a) Pwata esor popun pwe chon Kraist repwe niuokkus are ruko? (b) Ewe lesen mwirin ei epwe fori met?

[Picture on page 21]

Jises a isetiu ewe leenien appiru mi murinno ren an esap pekini eu pekin

[Pictures on page 24]

Fite ngerou chon Pwarata sarafo ra pwapwaiti ewe angangen pioneer

[Picture Credit Line on page 20]

UN SASING 186226/M. Grafman