Kapas Eis Seni Ekkewe Chon Allea
Sipwe tipis ika sipwe nnielo emon man sia foleni pokiten a semmwen me chinnap?
Lape-ngeni aramas ra saani me pwapwaesini sokkopaten man. Ekkoch man mi fesir ra tongeni wiliiti chienen aramas. Ren chok awewe, ekkewe konak ra itefoulo pokiten ar unusen alleasochisi me tongei nour kewe masta. Ina popun sia mecheresin weweiti ewe popun aramas ra tongei ena esin man, akkaewin ika ewe man a fen nonnom rer ren chommong ier.
Iwe nge, manauen chommong man ese ttam. Ekkewe konak me kattu ra tongeni manau lefilen 10 me 15 ier chok, nge a alongolong won ewe sokkun konak are kattu. Lupwen ekkewe man ra chinnapelo, epwe semmwenilo me osukosuk me chokkewe mi foleniir repwe tongeni letipengau lupwen ra chechchemeni ewe fansoun lupwen ekkeei man ra chuen kukkun me pochokkul. Sipwe tipis ika sipwe nnielo ekkena sokkun man pwe resap chuen riaffou?
Emon chon Kraist epwe mochen pwe an foffor ngeni ekkewe man repwe tipeeu ngeni letipen Kot. Kirikiringau ngeni ekkewe man a u ngeni letipen Kot, pokiten an we Kapas a apasa: “Eman chon pwung a tumwunuochu noun man.” (An Salomon Fos 12:10) Iwe nge, sap minne pwe an Kot ekiek ussun ekkewe man mi wewe chok me an ekiek ussun aramas. Lupwen Kot a forata aramas, a pwarata pwe ra sokko seni me ekkewe man. Ren chok awewe, a ngeni aramas ewe apilukulukun manau esemuch, nge ese ngeni ekkewe man ei apilukuluk. (Rom 6:23; 2 Piter 2:12) Pokiten i ewe Chon Forata, mei wor an pwung le affata epwe ifa ussun ekkewe riri mi pwung lefilen ekkewe aramas me ekkewe man.
Keneses 1:28 a aitingenikich ifa ena riri. Kot a ereni ekkewe aewin aramas: “Oupwe nemeni ekewe ikenen leset me ekewe mansusu me monun won unusen fonufan.” A ekis ussun we chok Kol Fel 8:6-8: “Ka [Kot] fen isetiu mettoch meinisin fan pechen [aramas], ekkewe siip me ekkewe kou meinisin, o pwal ekkewe man mi nom lein petewel, ekkewe man-susu fan lang, o ekkewe ik le set; mettoch meinisin minne mi fefetal lon ekkewe al le set.”
Kot a affata pwe aramas repwe tongeni nnielo me nounouochu ekkewe man. Ren chok awewe, repwe tongeni nounou unucher fan iten ufer. Kot a pwal mutata an aramas ochei futuken man mwirin ewe Nooter lon ranin Noa we, pwe repwe mongo futuk fengen me uwan ekkewe ira Kot a akkom ngeniir pwe repwe ani.—Keneses 3:21; 4:4; 9:3.
Kot ese mutata ngeni aramas nninniiloon ekkewe man fan iten urumot. Lon Keneses 10:9, ewe Paipel a apasa pwe Nimrot “eman chon tapweri man.” Nge ei wokisin a pwal apasa pwe a “u ngeni Kot.”
Ina popun, inaamwo ika aramas ra nemeni ekkewe man, resap aeamwaalli ena manaman nge ar nemeni man epwe tipeeu ngeni ekkewe kapasen alongolongun alluk lon an Kot we Kapas. Eli epwe kapachelong ach sise mut ngeni an ewe man epwe riaffou pokiten chinnap, feiengau watte are semmwen mi chou. Lon ei sokkun osukosuk, ewe chon Kraist epwe filata met epwe fori. Ika a filata pwe epwe umoumoch an esap mut ngeni sopwosopwoloon an ewe man riaffou lupwen ese chuen tongeni chikarsefal, iwe, eli epwe filata an epwe nnielo ewe man.