Kapas Eis Seni Chon Alleani Ei Chassi
Jiowa a mut ngeni noun kewe chon angang loom loom, weween, chon Israel, are repwe puluweni lap seni emon, nge ese mutata ena mettoch iei. A kan ita sissiwil an alluk?
Jiowa ese siwili an ekiek ussun an aramas puluweni lap seni emon. (Kol Fel 19:7; Malakai 3:6) Ena mettoch ese kapachelong lon an we kokkot ngeni aramas me le poputaan, me ese pwal kapachelong iei. Lupwen a forata If pwe epwe puluwen Atam, Jiowa a apasa pwe iei an alluk mi fel, pwe emon aramas epwe wor emon chok puluwan. “Iei mine eman mwan epwe likiti saman me inan o pachei ngeni pwuluan, nge ekewe ruoman repwe wiliti eu chok inis.”—Keneses 2:24.
Lupwen Jises Kraist a nom won fonufan, a affatasefalli ena alluk lupwen a polueni ir kewe mi eis ussun mufesen me pupulusefal. Iei alon: “Ouse mo alleani pwe ewe Chon Fori aramas me le popun a fori mwan me fefin, o a apasa ‘Iei minne, emon mwan epwe likitalo seman me inan o epwe pacha ngeni puluan, nge ekkewe ruemon repwe wiliti eu chok fituk’? Iei minne, resap chuen ruemon pwe emon chok.” Jises a pwal apasa pwe “Are emon a poutalo puluan, nge esap ren lisou, o a pwal pulueni emon, iwe, a lisou.” (Mattu 19:4-6, 9) A ffat seni ena poraus pwe emon a tipisin lisowu mwaal ika epwe puluweni lap seni emon fefin.
Iwe, pwata a mumuta an aramas puluweni lap seni emon lon fansoun loom loom? Sipwe chechchemeni pwe ena foffor ese popu seni Jiowa. Lon ewe Paipel, a mak pwe Lamek, emon mwirimwirin Kein, i ewe akkaemonun le puluweni lap seni emon. (Keneses 4:19-24) Lupwen Jiowa a apwungatiu ewe Noter lon fansoun Noa we, Noa a puluweni emon chok, iwe, a pwal ina ussun noun kewe ulumon mwan. Meinisin mi puluweni lap seni emon ra nninniilo lon ewe Noter.
Fitepuku ier mwirin lupwen Jiowa a fili chon Israel pwe repwe noun aramas, a fen wor ekkoch leir mi puluweni lap seni emon, nge neman a lap me leir ra puluweni emon chok. Kot ese foratiu eu alluk mi era pwe epwe katatiu familien ekkewe mwan mi puluweni lap seni emon fefin. Nge, a foratiu alluk mi tichchik ussun ena foffor.—Ekistos 21:10, 11; Tuteronomi 21:15-17.
A ffat pwe Kot a mut ngeni aramas ar repwe puluweni lap seni emon ren och chok fansoun esap chok ren alon Jises ussun an Jiowa alluk fan iten pupulu me le poputaan pwe pwal ren minne ewe aposel Paul a makkei fan ewe emmwen seni an Kot we ngun mi fel. Iei alon: “Ekkewe mwan repwe angei en me pwisin puluan, o ekkewe fefin repwe pwal angei en me pwisin puluan.” (1 Korint 7:2) Paul a pwal makkei fan emmwen seni ena ngun mi fel pwe ika emon mwan epwe seikita fan iten ewe wiis chon mas are ministerial servant lon ewe mwichefelin Kraist, “puluan epwe emon chok.”—1 Timoti 3:2, 12; Taitos 1:6.
Ina minne, a ukutiu an Jiowa mut ngeni aramas ar repwe puluweni lap seni emon lupwen a poputa ewe mwichefelin Kraist 2,000 ier loom. Lon ena fansoun, ewe allukun pupulu a liwinisefalliiti ususun we chok le poputaan an Kot foratiu mwan me fefin: weween, ika emon mwan are fefin a pupulu, epwe wor emon chok puluwan. Ina ewe alluk noun Kot kewe aramas won unusen fonufan ra nonnom fan lon ei fansoun.—Mark 10:11, 12; 1 Korint 6:9, 10.