Watchtower ONLINE LIBRARY
Watchtower
ONLINE LIBRARY
Chuuk
  • PAIPEL
  • PUK
  • MEETINGS
  • w05 3/1 p. 11-16
  • Riaffou Mwaal Nge Pwapwa

Ese wor video fán iten ei kinikin.

Omusaaló, a wor osukosuk le eppietá ewe video.

  • Riaffou Mwaal Nge Pwapwa
  • Ewe Leenien Mas a Esilefeili án Jiowa We Mwú—2005
  • Itelap Kisikis
  • Pwal Ekkóch
  • Riaffou Pokiten Mi Pwung
  • Riaffou Fan Iten Kraist
  • Pwapwa Pokiten Ra Kuna Riaffou Mwaal Ussun Chok Ekkewe Soufos
  • Ekkoch Popun Mi Lamot Sia Pwapwa
  • Chengel Me Pwapwa Pokiten Ewe Liwin
  • Aramas Ra Eriaffouur Pokiten Ar Fori Minne Mi Pwung
    Ewe Leenien Mas a Esilefeili án Jiowa We Mwú—2004
  • Met Epwe Wesewesen Efisata Pwapwa
    Ewe Leenien Mas a Esilefeili án Jiowa We Mwú—2004
  • Pwapwa Inaamwo Sia Kúna Riáfféúmwáál
    Manawach Chón Kraist me Ach Angangen Afalafal​—Minen Káé fán Iten Mwich—2022
  • Ka Tongeni Likiitú Atun Kopwe Kúna Riáfféúmwáál
    Eáni Manaw mi Pwapwa Tori Feilfeiló!​—Eú Káéén Paipel
Pwal Och
Ewe Leenien Mas a Esilefeili án Jiowa We Mwú—2005
w05 3/1 p. 11-16

Riaffou Mwaal Nge Pwapwa

“Oupwe pwapwa lupwen ra turunufaseekemi me eriaffoukemi are chofanata sokkun mi ingau meinisin ussumi pokitei.”​—MATTU 5:​11, NW.

LUPWEN Jises a akkom tiinalo noun kewe aposel ar repwe afalafala ewe Muu, a ouroureer pwe aramas repwe u ngeniir. A ereniir: “Aramas meinisin repwe oput ami pokiten itei.” (Mattu 10:​5-​18, 22) Iwe nge, lon an Afalafal Won Ewe Chuuk, Jises a alukuluku ekkewe aposel mwen an tiiniirelo, pwe ar pwapwa esap pout seniir lupwen aramas repwe u ngeniir. Ren enletin, Jises a ariri pwapwa ngeni ar kuna riaffou mwaal pokiten ir chon Kraist! Ifa ussun riaffou mwaal a tongeni wato pwapwa?

Riaffou Pokiten Mi Pwung

2 Iei ewe awaluen popun fan iten pwapwa Jises a fos ussun: “Ra feioch, [pwapwa, NW], ir mi kuna riaffou pokiten mi pung, pun nour ewe muun lang.” (Mattu 5:​10) Sap minne sipwe feioch pokiten sia riaffou mwaal. Ewe aposel Piter a makkei: “Pun are oupwe fori tipis o kuna ninni ren, meet sokkun win epwe torikemi are oupwe likiitu lon ewe ninni? Nge are oupwe kuna ninni ren ami fofor-murinno, o likiitu lon ewe ninni, iei mi murinno fan mesen Kot.” Iwe, Piter a pwal apasa: “Nge oupwe tumunukemi pwe emon leimi ete kuna riaffou usun chok emon chon nielo aramas, are chon sola, are chon fori mi ingau, are chon etileepat. Nge are emon epwe kuna riaffou pokiten i emon Chon Kraist, iwe, esap sau ren, nge epwe chok alingalo Kot pokiten ei it.” (1 Piter 2:​20; 4:​15, 16) Me ren an Jises kewe kapas, riaffou a wato pwapwa lupwen sia likiitu pokiten minne mi pwung.

3 Sia auku pwung mi enlet ren ukuukun an emon atipeeu manauan ngeni letipen Kot me an alleasochisi an Kot kewe alluk. Ina popun riaffou mwaal pokiten minne mi pwung a wewe ngeni riaffou pokiten sia fiu ngeni etipetipaen fonufan mi etipetipakich le tunalo an Kot kewe minen aukuuk are alluk. Ekkewe aposel ra kuna riaffou mwaal pokiten rese ukutiu seni ar afalafal lon iten Jises. (Fofor 4:​18-​20; 5:​27-​29, 40) Iwe, a pout seniir ar chengel are ra ukutiu seni ewe angangen afalafal? Aapwi. “Iei minne, atekkewe ra tou seni mwen mesen ewe mwichen sou nemenem. Ra chok pwapwa, pun a pwalo pwe a fich ngeniir ar repwe kuna itengau ren ewe it. Nge iteiten ran meinisin, rese mo ukutiu seni ar afalafala o apasata pwe Jises ewe Kraist, lon ewe imwen fel, o pwal lon pwisin leenier.” (Fofor 5:​41, 42) Ei riaffou mwaal a wato chengel me a apochokkuleereta fan iten ewe angangen afalafal. Mwirin, ekkewe chon Kraist loom ra kuna riaffou mwaal pokiten rese fel ngeni ewe meilapen Rom.

4 Lon ei fansoun, Chon Pwarata Jiowa ra kuna riaffou mwaal pokiten resap ukutiu seni ar afalafala “ei kapas allim usun ewe mu.” (Mattu 24:14) Lupwen a pinepin ar mwichfengen, ra likiitu fan riaffou mwaal mwen repwe ukutiu seni ar mwichfengen me ren ewe alluk lon Paipel. (Ipru 10:​24, 25) Ra riaffou mwaal pokiten rese pekini eu pekin lupwen a fiffis maun are pokiten ar ti seniir chcha. (Jon 17:14; Fofor 15:​28, 29) Iwe nge, ar uppos fan iten minne mi pwung a wato ngeni noun Kot kewe aramas kinamween letiper me pwapwa.​—1 Piter 3:​14.

Riaffou Fan Iten Kraist

5 Ewe atiuen popun fan iten pwapwa Jises a fos ussun lon an Afalafal Won Ewe Chuuk a weneiti riaffou mwaal. A apasa: “Oupwe pwapwa lupwen ra turunufaseekemi me eriaffoukemi me chofanaata sokkun mi ingau meinisin ussumi pokitei.” (Mattu 5:​11, NW) Ewe popunlapen noun Jiowa kewe aramas ra kuna riaffou mwaal, pokiten rese fitipacheiti ei otot mi ngau. Jises a ereni noun kewe chon kaeo: “Nge are ami chon chok fonufan, iwe, ewe fonufan epwe acheni noun. Nge pokiten ami ouse mo chon fonufan, pun ua fen filata ami seni fonufan, iwe, ina popun ewe fonufan a chok oput ami.” (Jon 15:19) A ussun chok met ewe aposel Piter a pwal apasa: “Ra weitifengen pokiten ami ouse mo chuen eti ar we sokkun lukumach mi lapalap, o ra turunufasei ami.”​—1 Piter 4:4.

6 Sia fen kaeo pwe ekkewe chon Kraist loom ra kuna riaffou mwaal pokiten rese ukutiu seni ar afalafal fan iten Jises. Kraist a awiisa ngeni noun kewe: “Oupwe chon pwarata usi . . . lon unusen fonufan meinisin.” (Fofor 1:⁠8) Lusun pwiin Jises kewe mi kepit fengen me chiechier kewe chon ewe “mwich mi fakkun lapalap,” ra tinikken le apwonueta ena wiis. (Pwarata 7:9) Ina ewe popun Setan a maunei “nusun mwirimwirin [ewe fefin, ewe kinikinin an Kot mwicheich lon lang], . . . mi amwochu ekkewe allukun Kot, o uwei ewe pwarata usun Jises.” (Pwarata 12:​9, 17) Pokiten kich Chon Pwarata Jiowa, sia afalafal ussun Jises, ewe King a nemenem iei lon ewe Muu epwe ataielo ekkewe muun fonufan mi eppeti waren an Kot fonufan sefo mi pwung. (Taniel 2:​44; 2 Piter 3:​13) Iei ewe popun aramas ra turunufasei me eriaffoukich, nge sia pwapwa pokiten sia riaffou fan iten Kraist.​—1 Piter 4:⁠14.

7 Jises a apasa pwe noun kewe repwe pwapwa pwal mwo nge lupwen aramas ra “chofonaata sokkun mi ingau meinisin” ngeniir pokiten i. (Mattu 5:​11) Ina met a fis ngeni ekkewe chon Kraist loom. Lupwen Paul a kalapus lon Rom, orun 59-61 C.E., ekkewe nouwis lon ewe lamalamen Jus ra fos ussun chon Kraist: “Pun ren ei pekin lamalam, am aua sinei pwe aramas ra chok esiita ekis meinisin.” (Fofor 28:22) Aramas ra tipi ngeni Paul me Sailas pwe “ra kulluetiu fonufan” me “u ngeni ekkewe allukun Sisar.”​—Fofor 17:​6, 7.

8 Ewe sou kaeo uruwo, K. S. Latourette, a makkei porausen ekkewe chon Kraist atun muun Rom a nemenem. A apasa: “A wor sokkopaten mettoch ra tipi mwaal ngeniir. Pokiten rese pwapwaiti ekkewe ran mi pin an ekkewe lamalamen lukun, aramas ra apasa pwe Chon Kraist rese luku Kot. Pokiten rese angolong lon chommong mwokutukutun ekkewe sopw me telinimw​—⁠ran mi pin fan iten lamalam me sokkopaten kulou . . .​—⁠ra apasa pwe chon Kraist ir chon oputa aramas. . . . Ra pwal apasa pwe chon Kraist mwan me fefin ra mwichfengen le pwin . . . me mwirin ra lisowu mwaal. Pokiten chon luku chok ra fiti ewe [chechchemenien maloon Kraist], ewe ekiek a poputa pwe chon Kraist ra kan nnielo emon monukol me ra unumi chchaan me ochei fitukan.” Pwal och, pokiten rese fel ngeni ewe meilapen Rom, aramas ra apasa pwe chon Kraist ra u ngeni ewe muu.

9 Ekkena poraus mi chofana rese pinei ekkewe chon Kraist loom seni ar apwonueta wiiser le afalafala ewe kapas allim ussun ewe Muu. Lon 60-​61 C.E., Paul a apasa pwe ewe “kapas allim” a “ukkuwa o mamarita lon fonufan meinisin” me a afalafalfeil “ekis meinisin fan lang.” (Kolose 1:​5, 6, 23) Pwal ussun chok ikenai, aramas ra tipimwaal ngeni Chon Pwarata Jiowa ussun chok ra tipi mwaal ngeni ekkewe chon Kraist loom. Iwe nge, ikenai ewe angangen afalafala porausen ewe Muu a uwaoch me ena angang a wato pwapwa wachemuk ngeni chokkewe mi fiti.

Pwapwa Pokiten Ra Kuna Riaffou Mwaal Ussun Chok Ekkewe Soufos

10 Jises a awesalo an awewe won ewe atiwuen popun aramas repwe pwapwa ren an apasa: “Ami oupwe chengel o pwapwa chapur, . . . pwe a iei usun ar eriaffou ekkewe soufosun lom, ekkewe mi akkom mwemi.” (Mattu 5:​12) Chon Israel mi lukumach rese etiwa ekkewe soufos Jiowa a tinato ren an epwe ouroureer, me fan chommong ra eriaffour. (Jeremaia 7:​25, 26) Ewe aposel Paul a tipeeu ngeni enletin ena poraus lupwen a makkei: “Meeta upwe pwal apasa? Pun esap naf ngeni ai fansoun are upwe aporausa usun . . . ekkewe soufos . . . ra kuna riaffou ren esiit are wichi, ewer, pwal selimecha are iolo le imwen fotek.”​—Ipru 11:​32-​38.

11 Atun nemenemen ewe king mi ngau, Ahap me puluwan we Jesepel, chommong lein noun Jiowa kewe soufos ra nninniilo. (1 King 18:​4, 13; 19:10) Ewe soufos Jeremaia a ares me ra annuku pechen lefilen ira me mwirin a oturalong lon eu leenien iseisin konik mi pwakak. (Jeremaia 20:​1, 2; 38:⁠6) Ewe soufos Taniel a koturulong lon ewe pwangen laion. (Taniel 6:​16, 17) Ekkeei soufos mi manau mwen fansoun Jises ra kuna riaffou mwaal pokiten ra fiu fan iten fel mi enlet ngeni Jiowa. Ekkewe nouwis lon ewe lamalamen Jus ra eriaffou chommong soufos. Jises a apasa pwe ekkewe soumak me farisi ra “upun won chon nielo soufos.”​—Mattu 23:⁠31.

12 Ikenai, Chon Pwarata Jiowa ra kuna riaffou pokiten ar tinikken le afalafala ewe kapas allim ussun ewe Muu. Chon koput ra apasa pwe sia ‘kon sennuk le asoulangalo aramas,” nge a pwal ina ussun aramas loom ra tipi ngeni noun Jiowa kewe. (Jeremaia 11:21; 20:​8, 11) Me rech ena riaffou mwaal mi auchea lupwen sia riaffou pokiten ewe chok popun ekkewe soufos loom ra pwal kuna riaffou mwaal. Ewe chon kaeo Jemes a makkei: “Pwi ami, oupwe angei ekkewe soufos mi kapas fan iten Jiowa ussun ami leenien appiru, lon ar kewe riaffou fan ingau me ar mosonottam. Nengeni, sia apasa pwe ir kewe mi likiitu ra pwapwa.”​—Jemes 5:​10, 11, NW.

Ekkoch Popun Mi Lamot Sia Pwapwa

13 Sise letipechou pokiten riaffou mwaal nge, sia meefi auruuruun letipach ren ach silei pwe sia tapwelo lon ipwen ekkewe soufos, ekkewe chon Kraist loom, me Jises Kraist. (1 Piter 2:​21) Sia menemenoch lupwen sia alleaani poraus lon ewe Paipel, ussun chok an ewe aposel Piter kewe kapas: “Ami mi achengicheng, ousap weitifengen ren sokkun riaffou mi feito remi usun chok ekkei pwe epwe sotunikemi usun chok ita och mettoch mi fo a torikemi. Oupwe chok kuna feiochumi [oupwe pwapwa, NW], are ra lalengau ngenikemi fan asengesin iten Kraist, pun ewe Ngunun Kot mi ling a nom womi.” (1 Piter 4:​12, 14) Sia silei seni kunaen manauach pwe sia tongeni uta lon nukuchar fan riaffou mwaal pokiten ngunun Jiowa a apochokkulakich. Alillis seni ngun mi fel a anneta pwe an Jiowa feioch a nonnom rech, me ach silei ena a wato pwapwa wachemuk.​—Kol Fel 5:​12; Filipai 1:​27-​29.

14 Riaffou mwaal pokiten sia foffori minne mi pwung a anneta pwe sia manaueni manauen chon Kraist mi fich ngeni Kot me ina pwal eu popun sia pwapwa. Ewe aposel Paul a makkei: “Ir meinisin mi mochen manaueni ewe manau mi fich ngeni Kot lon Kraist Jises repwe kuna riaffou.” (2 Timoti 3:​12) Sia fokkun pwapwa pwe ach amwochu tuppwol fan sossot a anneta pwe a mwakel an Setan kapas pwe noun Jiowa kewe meinisin ra chok angang ngeni pokiten ewe feioch. (Hiop 1:​9-​11; 2:​3, 4) Sia fokkun chengel pwe sia ekis chok alisata aitochuloon an Jiowa nemenem mi pwung.​—An Salomon Fos 27:⁠11.

Chengel Me Pwapwa Pokiten Ewe Liwin

15 Jises a apacha pwal eu popun fan iten chengel lupwen aramas ra turunufasei me eriaffoukich ussun chok ra ffor ngeni ekkewe soufos loom. A apasa: “Ami oupwe chengel o pwapwa chapur, pun liwinimi epwe lapalap lon lang.” (Mattu 5:​12) Ewe aposel Paul a makkei: “Pun liwinin tipis malo, nge liffangen ewe chenin Kot manau esemuch lon Kraist Jises ach Samol.” (Rom 6:​23) Ewer, manauach ewe ‘liwin mi lapalap,’ me ese ussun chok peiof fan iten angang. Manauach eu liffang. Jises a apasa pwe ewe liwin a ‘nom lon lang’ pokiten a feito seni Jiowa.

16 Chon Kraist mi kepit ra angei ewe “mwarin manau,” weween pwe manau lon lang ren Kraist, me ussun chok Kraist, rese chuen tongeni malo. (Jemes 1:​12, 17) Chokkewe mi eani apilukulukun manau won fonufan, ekkewe “ekkoch siip,” ra apilukuluk ngeni manau esemuch lon ewe paratis won fonufan. (Jon 10:16; Pwarata 21:​3-5) Fan iten ir me ruu, ewe “liwin” esap ussun chok peiof fan iten ar angang. Ra angei ei feioch pokiten “ewe chenin Kot.” An Kot chen sise fich ngeni a amwokutu Paul an epwe makkei: “Kilisou ngeni Kot ren an we liffang mi lapalap seni ach tongeni apasata.”​—2 Korint 9:⁠14, 15.

17 Paul a mak ngeni chon Kraist, ekkoch me leir repwe kuna riaffou mwaal pokiten ewe meilapen Rom itan Niro: “Sia pwal pwapwa ren ach riaffou, o sia meefi pwe riaffou epwe efisata likiitu, o likiitu epwe efisata manauoch, o manauoch epwe efisata apilukuluk allim. Iwe, ewe apilukuluk allim esap alichipungukich, pun Kot a fen niinalong an we tong lon letipach ren ewe Ngun mi Fel a pwal ngenikich.” A pwal apasa: “Oupwe pwapwaiti ach apilukuluk allim. Oupwe likiitu lon ami riaffou.” (Rom 5:​3-5; 12:12) Ese lifilifil ika sia apilukulukun manau lon lang are won fonufan, ewe liwinin tuppwol fan sossot a fokkun lapalap seni met a fichiitikich. A mmen watte ach chengel lupwen sia ekiek ussun ewe tufichin mwareiti Semach mi tong, Jiowa, me angang ngeni tori feilfeilo chok fan ach King Jises, pokiten sipwe manau tori feilfeilo chok. Sia fokkun “chengel o pwapwa.”

18 Lon ekkoch fonu, Chon Pwarata Jiowa ra fen, me ra chuen kuna riaffou mwaal. Lon an we oesini ussun ewe sopwoloon ei otot won fonufan, Jises a ouroura ekkewe chon Kraist: “Ekkewe einang meinisin repwe oput ami pokiten itei.” (Mattu 24:⁠9) Lon ei atun, lupwen sia akkarap ngeni ewe sopwoloon, Setan epwe efisata pwe ekkewe muun fonufan repwe fokkun oputa noun Jiowa kewe aramas. (Isikiel 38:​10-​12, 14-​16) Ina ewe esissin pwe Jiowa epwe mwokutukut. “Upwe pwarala pwe ua itetekia o pin, upwe pwal fori pwe itei epwe foula fan mesen aramasen chomong mwu. Murin repwe silei pwe ngang ewe Samol mi Lapalap [Jiowa, NW].” (Isikiel 38:23) Jiowa epwe epinalo itan mi lapalap me amanaua noun kewe aramas seni riaffou mwaal. Ina popun, “pwapwa ewe mwan mi lillikiitu.”​—Jemes 1:​12, NW.

19 Iei, ewe ran mi lapalap, ‘ranin Jiowa,’ a akkarapakkaneto. Amwo sia chengel pokiten ‘a fich ngenikich ach sipwe itengau ren ewe it.’ (2 Piter 3:​10-​13; Fofor 5:​41) Ussun chok ekkewe chon Kraist loom, amwo sisap ‘mwo ukutiu seni ach afalafala me apasata’ ewe kapas allim ussun Kraist me Muun we atun sia wikiti liwinich lon an Jiowa fonufan sefo mi pwung.​—Fofor 5:​42; Jemes 5:​11.

Sipwe Enniwili Ewe Poraus

• Met weween riaffou pokiten mi pwung?

• Ifa ussun riaffou mwaal a kku ekkewe chon Kraist loom?

• Met popun sia tongeni apasa pwe Chon Pwarata Jiowa ra kuna riaffou mwaal ussun chok ekkewe soufos loom?

• Met popun sia “chengel o pwapwa” lupwen aramas ra eriaffoukich?

[Ekkewe kapas eis fan iten ewe lesen]

1. Ifa ussun Jises a alukuluku noun kewe ussun pwapwa fan riaffou mwaal?

2. Me ren Jises me ewe aposel Piter, met sokkun riaffou a wato pwapwa?

3. (a) Ifa weween ach sipwe kuna riaffou mwaal fan iten minne mi pwung? (b) Ifa ussun riaffou mwaal a kku ekkewe chon Kraist loom?

4. Ikkefa ekkoch popun aramas ra eriaffou chon Kraist?

5. Ifa ewe popunlap aramas ra eriaffou noun Jiowa kewe aramas ikenai?

6. (a) Pwata aramas ra turunufasei me eriaffou lusun ekkewe mi kepit me chiechier kewe? (b) Ena turunufas a ekisalo ach pwapwa?

7, 8. Met sokkun mettoch ekkewe chon koput ra tipimwaal ngeni ekkewe chon Kraist loom?

9. Met ekkewe chon Kraist loom ra fori lupwen aramas ra tipimwaal ngeniir, me met a fiffis ikenai?

10, 11. (a) Ifa ussun Jises a awesalo an poraus ussun ewe atiuen popun fan iten pwapwa? (b) Met popun aramas ra eriaffou ekkewe soufos? Awewei mwo.

12. Met popun Chon Pwarata Jiowa ra luku pwe ar riaffou mwaal, ussun chok ekkewe soufos loom, a wewe ngeni eu wiiser mi auchea?

13. (a) Met popun riaffou mwaal ese aletipechoukich? (b) Met a atufichi ach uta lon nukuchar, me met a letelo seni ena?

14. Ikkefa ekkewe popun sia tongeni chengel lupwen sia kuna riaffou mwaal pokiten ach foffori minne mi pwung?

15, 16. (a) Me ren Jises, ikkefa ekkewe popun sipwe “chengel o pwapwa”? (b) Ifa ewe liwin a wikiti ekkewe chon Kraist mi kepit lon lang, me ifa ussun chiechier, ekkewe “ekkoch siip” repwe angei eu liwin?

17. Met popun sia tongeni “chengel o pwapwa” lupwen aramas ra eriaffoukich?

18. Met ekkewe muu repwe fori lupwen sia arap ngeni ewe sopwoloon, me met Jiowa epwe fori?

19. Met sipwe fori atun sia wikiti ewe ran mi lapalap “ranin Kot”?

[Lios lon pekin taropwe 14]

“Oupwe pwapwa lupwen ra turunufaseekemi me eriaffoukemi”

[Lios lon pekin taropwe 15]

Aramas lon kalapus: Chicago Herald-American

    Meinisin mi Peres lón Fósun Chuuk (1987-2025)
    Log Out
    Log In
    • Chuuk
    • Share
    • Preferences
    • Copyright © 2025 Watch Tower Bible and Tract Society of Pennsylvania
    • Terms of Use
    • Privacy Policy
    • Privacy Settings
    • JW.ORG
    • Log In
    Share