Kraist​—⁠ewe Menlapen Oesini

“Ewe pwarata usun Jises iei mi ngunun oesini.”​—PWARATA 19:10.

LON 29 C.E. chommong chon Israel ra fokkun meseik lon ar porausfengen ussun ewe Messaia mi pwonetiu. An Jon Papatais angangen afalafal a alapalo ar ekieki ussun Messaia. (Luk 3:​15) Jon a apasa pwe esap i ewe Kraist. A fos ussun Jises seni Nasaret lupwen a apasa: “Ua fen kuna, o ua pwal pwarata pwe atei Noun Kot.” (Jon 1:​20, 34) Muttir chok, aramas ra tapwelo mwirin Jises ren ar repwe auselinga aitian kewe me ren ar repwe pochokkulelo seni semmwen.

² Lon ekkewe maram mwirin ena, Jiowa a awora eu pwarata mi watte ussun Noun we. A nom ren aramas mi kaeo ewe Paipel me kuna fofforun Jises kewe, eu longolongun luku mi nukuchar fan iten lukuluk won Jises. Iwe nge, lape-ngeni noun Kot kewe aramas mi riri ngeni ren eu pwon, rese luku. Chokisikis ra apasa pwe Jises ewe Kraist, Noun Kot we. (Jon 6:​60-​69) Epwe ifa ussum ika ka nonnom lon ena fansoun? Kopwe luku pwe Jises ewe Messaia me wiliiti noun we chon kaeo? Ekieki mwo ewe pisekin annet Jises a awora lupwen aramas ra tipi ngeni pwe a ataielo ewe allukun Sapat, me ekieki ekkewe pisekin annet a apasawu mwirin ren an epwe apochokkula lukuen noun kewe chon kaeo mi tuppwol.

Jises A Awora Ewe Pisekin Annet

³ Fansoun Pasofer lon 31 C.E., Jises a nonnom lon Jerusalem. A keran chok apochokkula emon mwan mi semmwen 38 ier. Nge ekkewe chon Jus ra eriaffou Jises pokiten a apochokkula ewe mwan lon ewe Sapat. Me rer, Jises a esiita Kot me ra mochen nnielo i pokiten a apasa pwe Kot Seman. (Jon 5:​1-9, 16-​18) Ifa ussun Jises a polueni ar tipi ngeni i a awora ulungat minen annet repwe anneta ngeni chon Jus mi letip wenechar pwe Jises ewe Messaia.

⁴ Jises a akkom achema ngeniir ussun ewe pwarata Jon Papatais a awora ren an apasa: “Ami oua fen akunoulo ekkoch aramas ngeni Jon, nge atewe a fen pwarata ewe enlet. Atewe Jon mi eu lamp mi pulopul pwal tinoch, o ami oua mochen pwe oupwe pwapwa ekis chok fansoun lon an saram.”​—Jon 5:​33, 35.

⁵ Jon Papatais eu “lamp mi pulopul pwal tinoch” pokiten, mwen Herot a kalapusei i, Jon a apwonueta wiisan seni Kot ren an epwe ammonlata ewe aal fan iten ewe Messaia. Jon a apasa: “Iei popun ua feito papatais ren konik, pwe atei [Messaia] epwe pwa ngeni Israel. . . . Ua kuna ewe Ngun mi fefetiu seni lang, usun chok emon lisom, o a nonnom won atei. Iwe, ngang use mo sinei i, nge ewe emon a tinieito pwe upwe papatais ren konik a pwal apasa ngeniei, ‘Lupwen kopwe kuna pwe ewe Ngun a sotiu o nonnom won emon, iwe, ina i atewe epwe papatais ren Ngun mi Fel.’ Iwe, ngang ua fen kuna, o ua pwal pwarata pwe atei Noun Kot.”a (Jon 1:​26-​37) Jon a titchik ren an apasa pwe Jises Noun Kot​—⁠ewe Messaia mi pwonetiu. Pokiten a wesewesen ffat an Jon pwarata, walu maram mwirin Jon a malo, chommong chon Jus mi letip wenechar ra apasa: “Mettoch meinisin minne Jon a apasata ren atei mi chok enlet.”​—Jon 10:41, 42.

⁶ Iwe iei, Jises a sotun anneta pwe i ewe Messaia ren pwal eu sokkun poraus. A apasa pwe an kewe foffor murinno ra anneta pwe Kot a alisi. A apasa “Nge mi wor rei och pwarata mi lap seni ewe an Jon, pun ekkewe angang ewe Sam a fen awisa ngeniei pwe upwe efisata, ekkeei angang ua fori ra pwarata usi, pwe ewe Sam a fen kunoueito.” (Jon 5:​36) Pwal mwo nge chon koputaan Jises rese tongeni tunalo ei pisekin annet a kapachelong chommong manaman. Ekkoch leir ra eani kapas eis mwirin: “Meeta sipwe fori? Pun atewe a fori chommong esisin.” (Jon 11:47) Iwe, ekkoch ra ekiekoch me ra apasa: “Iwe, lupwen ewe Kraist epwe feito, ifa usun, epwe fori chommong esisin lap seni ekkewe atei a fen fori?” (Jon 7:​31) Aramas mi auselinga Jises ra tongeni kuna an ewe Sam kewe lapalap lon ewe Nau.​—Jon 14:9.

⁷ Le sopwoloon, Jises a fos ussun eu pwarata ese tongeni kkuf. “Ekkewe puk ra pwarata usi.” Jises a pwal apasa: “Pun are oua luku Moses, oupwe pwal lukuei, pun atewe a fen mak usi.” (Jon 5:​39, 46) Iwe, Moses emon chok lein ekkewe chon pwarata loom a mak ussun ewe Kraist. Minne ra makkei a kapachelong fite puku oesini Messaia epwe apwonueta me porausen tettelin ewe Messaia. (Luk 3:​23-​38; 24:44-​46; Fofor 10:43) Iwe, ifa ussun ewe pwarata ren ewe Allukun Moses? Paul a makkei: “Iei ussun ewe alluk a wiliti ach chon emmweni tori Kraist.” (Kalesia 3:​24) Ewer, “ewe pwarata usun Jises iei mi ngunun [are ewe popun] oesini.”​—Pwarata 19:10.

⁸ Esap pwe unusen ekkeei pisekin annet​—⁠an Jon pwarata mi titchik, angangen Jises kewe mi amwarar, lapalapan kewe mi ussun chok lapalapen Kot kewe, me ewe pwarata mi watte lon ewe Paipel​—⁠epwe anneta ngonuk pwe Jises ewe Messaia? Emon mi tongei Kot me an we Kapas epwe weweiti ena me eani luku pwe Jises ewe Messaia. Iwe nge, ese kan wor ena esin tong lon Israel. Jises a ereni chon koputaan: “Nge ua chok sinei usumi, pwe esor remi ewe tongen Kot lon pwisin ami.” (Jon 5:​42) Rese “kutta ewe ling seni ewe chok emon Kot,” nge ra chok kutta ‘ling seni lefiler.’ Ina popun ra u ngeni Jises, pun Jises a ussun chok Seman mi oputa ena esin ekiek!​—Jon 5:​43, 44; Fofor 12:21-​23.

Pochokkulelo Ren Eu Langepwi Mi Ussun Chok Oesini

⁹ Lap seni eu ier a fen lo seni ewe fansoun Jises a awora ekkewe pisekin annet mi anneta pwe i ewe Messaia. Pasofer lon ewe ier 32 C.E. a fen wes. Chommong mi luku rese chuen fiti Jises, neman pokiten riaffou mwaal, tongen pisek me moni, are pokiten aurekin manauer. Pwal ekkoch ra fitikoko are lichipung pokiten Jises ese tipeeu lupwen aramas ra seikata pwe king. Lupwen ekkewe nouwis lon ewe lamalamen Jus ra kutta eu esissin, Jises ese fori och esissin seni lang mi alingalo i pwisin. (Mattu 12:38, 39) Eli ekkoch ra fitikoko lupwen Jises ese mochen fori ena. Pwal och, Jises a pwaralo ngeni noun kewe chon kaeo poraus mi weires ngeniir​—⁠“epwe fakkun feilo Jerusalem, pwal kuna chommong riaffou me ren ekkewe chinnap me ekkewe samol-fel mi lap me ekkewe soumak, o epwe pwal kuna malo.”​—Mattu 16:21-​23.

¹⁰ Lon pwal tiu are engol maram, epwe tori fansoun Jises “epwe feilo seni ei fonufan ngeni ewe Sam.” (Jon 13:1) Jises a lolileniesini noun kewe chon kaeo mi tuppwol, me a pwon ngeniir och mettoch ese mochen pwar ngeni ekkewe chon Jus mi lukulukummang​—⁠eu esissin seni lang. Jises a apasa: “Enlet, upwe apasa ngenikemi, pwe mi wor ekkoch leir kewe mi uta ikei resap malo pwe repwe mo kuna an ewe Noun-Aramas waroto lon muun.” (Mattu 16:28) A ffat pwe Jises ese apasa pwe ekkoch lein noun kewe chon kaeo repwe chuen manau lupwen a fisita Muun Messaia lon 1914. Jises a ekiekin pwar ngeni ulumon lein noun kewe chon kaeo liosun an ling lupwen a eani wiisan lon Muun we. Ei langepwi mi ussun chok eu oesini a kawor lupwen Jises a wililo.

¹¹ Wonu ran mwirin, Jises a emmwenaata Piter, Jemes, me Jon won eu chuuk mi tekia​—⁠neman eu leeni mi tekia won ewe Chuuk Hermon. Ikena ie, Jises a “wililo me fan meser, o won mesan a molupolup usun akkar, nge ufan a pwechepwech maruoru usun chok saram.” Ekkewe soufos Moses me Elias ra pwal pwa, me ra porausfengen me Jises. Ika a fiffis le pwin, met ra kuna epwe fokkun lingemwarar. Ren enletin, a ussun och mettoch mi wesewesan me rer pun Piter a mochen aueta ulungat imwen mangaku​—⁠eu fan iten emon me emon, Jises, Moses, Elias. Piter a chuen foffos lupwen eu kuchu mi saramaram a anuraalo ir me ra rongorong leuwen emon seni lon ewe kuchu: “Iei nei at mi achengicheng rei, ua unusen pwapwa ren. Oupwe auseling[a] i.”​—Mattu 17:​1-6.

¹² Pwungun pwe Piter a keran pwarata pwe Jises “ewe Kraist, Noun ewe Kot mi manau.” (Mattu 16:16) Nge ekieki mwo an Piter rongorong leuwen Kot lupwen a pwisin apasawu ena pwarata mi anneta pwe Jises Noun we mi kepit me affata wiisan we! Mwa met ren pochokkuleloon lukuen Piter, Jemes, me Jon pun ra kuna Jises lupwen a wililo. Ren ar luku mi pochokkuleta, ra mmonleta fan iten met epwe fis me fan iten wiiser mi lamot lon ewe mwichefel epwap fisita lon mwach kkan.

¹³ Ekkewe chon kaeo ra fokkun chechchemeni Jises lupwen a wililo. Lap seni inik ier mwirin, Piter a mak: “Pun lon ewe fansoun a angei an we iteuoch o ling me ren Semach Kot, lupwen ewe mongungu a feito ren ewe ling mi lapalap, ‘Iei nei at mi achengicheng rei, ua unusen pwapwa ren,’ am aia rong ewe mongungu mi feitiu seni lang pun am aia pwal eti i won ewe chuk mi fel.” (2 Piter 1:​17, 18) Jon a pwal ingelo ren met a fis. Lap seni 60 ier mwirin, a mak ussun met a fisita ren ekkeei kapas: “Am aua fen katol an we ling, usun chok lingen ewe Alaemon me ren ewe Sam.” (Jon 1:​14) Iwe nge, wililoon Jises esap ewe saingoon langepwi noun Jises kewe chon kaeo ra kuna.

Pwal Ekkoch Saram Fan Iten Noun Kot Kewe Mi Tuppwol

¹⁴ Mwirin an manausefal, Jises a pwa ngeni noun kewe chon kaeo unukkun ewe Noomun Kalili. A ereni Piter: “Are ua mochen pwe atenan [Jon] epwe chok nonnom tori ai upwe feito, meeta reom?” (Jon 21:​1, 20-​22, 24) Weween an kewe kapas pwe Jon epwe manauattam lap seni ekkewe ekkoch aposel? Wuu, pun Jon a angang ngeni Jiowa ren pwal arapakkan 70 ier. Iwe nge, Jises ese chok awora poraus ussun ttamen manauen Jon.

¹⁵ Ekkewe kapas “tori ai upwe feito” ra achema ngenikich an Jises kapas ussun an “ewe Noun-Aramas waroto lon muun.” (Mattu 16:28) An Jon nonnom tori Jises a feito a weneiti an angei langepwiin warotoon Jises ussun chok i ewe Sou Nemenemen Muun we. Arap ngeni muchuloon manauen Jon, atun a choisa lon Patmos, a angei ewe Pwarata mi kapachelong an kewe oesini me esissin mi amwarar repwe pwonueta atun “ewe Ranin-Samol.” Met Jon a kuna a kon achungu letipan pwe lupwen Jises a apasa: “Ewer, upwe warekai,” Jon a polueni: “Amen. Kopwe feito, Samol Jises!”​—Pwarata 1:​1, 10; 22:⁠20.

¹⁶ Aramas mi letip wenechar lon ewe aewin ipuku ier ra luku pwe Jises ewe Messaia me ra eani lukuluk won i. Pokiten chommongun ekkewe aramas mi lukulukummang ra pwellifeiliir, wiiser kewe, me ekkewe sossot repwe kuna, a lamot pwe ekkan aramas mi luku repwe pochokkulelo. Jises a awora chommong pisekin annet mi anneta pwe i ewe Messaia me a pwal awora ekkewe langepwi mi asarama me alisi noun kewe mi tuppwol. Ikenai, sia nonnom ngeni le muchuloon “ewe Ranin-Samol.” Muttir chok, Kraist epwe ataielo unusen an Setan otot mi ngau won fonufan me amanaua noun Kot kewe aramas. Sipwe pwal apochokkula ach luku ren ach alamota minne Jiowa a awora fan iten ach pochokkul lon pekin ngun.

Manau Seni Rochopwak Me Riaffou

¹⁷ Mwirin maloon Jises, ekkewe chon kaeo ra pwora le alleasochisi an we alluk pwe repwe pwarata ussun i “lon Jerusalem, lon Jutia me Sameria, o pwal lon unusen fonufan meinisin.” (Fofor 1:8) Ra kuna chommong fansoun riaffou mwaal mi chou nge Jiowa a efeiochu ei minefoon mwichefelin chon Kraist ren saram lon pekin ngun me chommong minefoon chon kaeo.​—Fofor 2:​47; 4:​1-​31; 8:​1-8.

¹⁸ Iwe nge, a kirochelo apilukulukun ekkewe aramas mi u ngeni ewe kapas allim. A mak lon ewe puken An Salomon Fos 4:​19: “Nge ewe al ekewe aramasangau ra fetal won a usun chok rochopwak mi rochokich, ra turula, nge resap silei met ra chepetek ren.” Ewe “rochopwak” a lapelo lon 66 C.E. lupwen ekkewe sounfiu seni Rom ra tooki Jerusalem. Ese ffat ewe popun ra likitalo ewe telinimw, nge ra liwinto lon 70 C.E. Iei fansoun ra unusen ataielo ewe telinimw. Me ren ewe soukaeo uruwo itan Josephus, lap seni eu milion chon Jus ra nninniilo. Nge ekkewe chon Kraist mi tuppwol rese malo. Pwata? Pokiten lupwen ekkewe sounfiu ra feilo seni Jerusalem, ekkewe chon Kraist ra alleasochisi an Jises kapas me ra su seni ewe telinimw.​—Luk 21:20-​22.

¹⁹ A ussun chok nonnomun manauach ikenai. Ewe riaffou mi lapalap epwe wewe ngeni kataloon unusen an Setan otot mi ngau. Nge noun Kot kewe aramas resap niuokkus, pun Jises a pwonei: “O nengeni, ngang upwe nonnom remi ran meinisin, tori le sopolon ei fansoun.” (Mattu 28:20) Ren an epwe apochokkula an noun kewe chon kaeo loom luku me alisiir le ammonlata fan iten met epwe fis, Jises a ngeniir liosun an ling lon lang lupwen epwe king. Ifa ussun ren ikenai? Lon 1914, minne a oesini loom a pwonueta. An Messaia nemenemen a fokkun apochokkula lukuen noun Kot kewe aramas! Ena Muu ewe minen efisi chommong mettoch mi amwarar lon mwach kkan, me noun Jiowa kewe chon angang ra angei weweochchun angangen ena Muu. Lon ei fonufan mi kirochelo, “ewe al ekewe chon pwung ra fetal won a usun chok saramen unumweeran mi chok sasaramala tori a unusen ranila.”​—An Salomon Fos 4:​18.

²⁰ Pwal mwo nge mwen 1914, ekkoch chon Kraist mi kepit ra weweiti poraus mi lamot ussun an ewe Samol liwinsefal. Ren chok awewe, pokiten ewe poraus seni ekkewe ruuemon chonlang ra awora lon 33 C.E., lupwen Jises a feffeita lang, ra weweiti pwe an ewe Samol liwinsefal esap pwalo mwen mesen aramas. Mwirin ewe kuchu a amona Jises seni meser, ekkewe chonlang ra apasa: “Atewe Jises, mi feilseni ami o feita lang, epwe pwal liwinto usun chok oua kuna an feita lang.”​—Fofor 1:​9-​11.

²¹ Ekkoch chok chon kaeo mi tuppwol ra katol lupwen Jises a feita lang. Ussun chok ewe fansoun Jises a wililo, esor eu pwin aramas mi katol; ewe fonufanen aramas ese silei met a fen fisita. Epwe pwal chok ina ussun lupwen Jises epwe waroto lupwen a wiliiti king. (Jon 14:19) Noun kewe chon kaeo mi kepit me tuppwol chok repwe miritiiti pwe Jises a wiliiti king, pwe a nonnom. Lon ewe lesen mwirin ei, sipwe kuna met ra fori pokiten ena silei, me ifa ussun fite milion aramas ra ioifengen fan iten ar repwe nonnom won fonufan fan an Jises nemenem.​—Pwarata 7:​9, 14.

[Footnotes]

En Mi Chechchemeni?

• Lupwen aramas ra tipi ngeni Jises pwe a ataielo ewe alluk ussun ewe Sapat me a esiita Kot, ifa ewe pisekin annet a awora ren an epwe anneta pwe i ewe Messaia?

• Ifa ussun noun Jises chon kaeo loom ra feioch seni ar kuna Jises lupwen a wililo?

• Met weween an Jises kapas pwe Jon epwe nonnom tori a war?

• Lon 1914, menni pwon a pwonueta?

[Ekkewe kapas eis fan iten ewe lesen]

1, 2. (a) Seni 29 C.E., ifa ewe kefil chon Israel repwe pwungupwung won? (b) Met sipwe pwungupwung won lon ei lesen?

3. Met a amwokutu Jises an epwe awora pisekin annet mi anneta pwe i ewe Messaia?

4, 5. Ifa ewe popunlapen an Jon afalafal, me ifa ukuukun an angochun apwonueta?

6. Met popun an Jises angang epwe ita anneta ngeni aramas pwe Kot a nom ren i?

7. Ifa ussun ewe Tesin Ipru a pwarata ussun Jises?

8. Met popun chommong chon Jus rese lukuluk won ewe Messaia?

9, 10. (a) Met popun ewe fansoun pwaloon eu esissin a fokkun alisi ekkewe chon kaeo? (b) Ifa ewe pwon mi amwarar Jises a pwon ngeni noun kewe chon kaeo?

11. Awewei met a fisita lupwen Jises a wililo.

12, 13. Ifa ussun an Jises wililo a achungu letipen noun kewe chon kaeo, me met popun?

14, 15. Ifa ussun ewe aposel Jon epwe nonnom tori warotoon Jises?

16. Met popun a fokkun lamot ach akkapochokkula ach luku?

17, 18. Me loom, ifa sokkofesennin noun Jises kewe me chokkewe mi u ngeni letipen Kot, me ifa mwiriloon fan iten ekkeei ruu mwichen aramas?

19, 20. (a) Pwata esor popun pwe noun Kot kewe aramas repwe niuokkus iei atun sia akkarap ngeni ewe sopwoloon? (b) Ifa ewe sile mi amwarar Jiowa a ngeni noun kewe aramas lon ekkewe ier mwen 1914?

21. Met epwe awewe won lon ewe lesen mwirin ei?

[Lios lon pekin taropwe 6]

Jises a awora pisekin annet mi anneta pwe i ewe Messaia

[Lios lon pekin taropwe 8]

Luku a pochokkulelo lupwen Jises a wililo

[Lios lon pekin taropwe 9]

Jon epwe nonnom tori ‘warotoon’ Jises