Kirokiroch Sise Fich Ngeni A Amanauakich Nge Sap Ach Kewe Foffor
‘Ami oua kuna amanauen ngunumi . . . pokiten luku . . . esap seni angang, pwe esap wor emon epwe sikasini.’—EFISUS 2:8, 9.
ARAMAS ra kan pwapwaiti tufichir kewe me met ra fori, nge ra tongeni muttir sikasiniir. Ekkewe chon Kraist ra sokkolo. Rese kan menlapei pwisin ar kewe tufich me foffor, pwal mwo nge lupwen minne ra fori a weneiti fel mi enlet. Ra pwapwaiti uwan angangen noun Kot kewe aramas nge rese menlapei pwisin ar kewe foffor. Ra silei pwe lon an Jiowa angang, letip mi murinno a lamot lap seni uwan an emon angang. Emon epwe angei ewe liffangen manau esemuch pokiten an luku me pokiten an Kot kirokiroch rese fich ngeni, nge esap pokiten pwisin ar foffor.—Luk 17:10; Jon 3:16.
2 Ewe aposel Paul a fokkun silei enletin ena poraus. Mwirin a tingor fan ulungat pwe epwe ngase-seni ‘efoch folun ira lon fitukan,’ a iei ussun Jiowa a polueni: “Ai chen [kirokiroch aramas rese fich ngeni, NW] mi ku[u] ngonuk, pun unusochun ai manaman epwe pwarata lon apwangapwang.” Paul a etiwa filien Jiowa ren tipetekison: “Iei minne, upwe fakkun pwapwa o sikasini ai apwangapwang, pwe ewe manamanen Kraist epwe nonnom rei.” Sipwe appiru an Paul tipetekison.—2 Korint 12:7-9.
3 Inaamwo ika Paul emon chon angang fan iten Kraist mi fokkun angangoch nge, a silei pwe uwaochun an angang esap pokiten pwisin an kewe tufich. A apasa ren tipetekison: “Inaamo ika ua kisifochofoch me lein ekkewe aramas mi fel meinisin, nge a fen ngeniei ei chen, pwe upwe esineifeili ngeni ekkewe Jentail ewe pisekin Kraist, ewe sise tongeni aukuk.” (Efisus 3:8) Paul ese sikasini an angang are menlapei pwisin an pwung. “Kot a u ngeni chon lamalam tekia, nge a ngeni chon tipetekison umoumoch.” (Jemes 4:6; 1 Piter 5:5) Sia appiru Paul ren ach ekieki pwe sia kisikis fan pwiich kewe?
“Ekieki Pwe Ekkewe Ekkoch Ra Murinno Seni Ami”
4 Ewe aposel Paul a fonou ekkewe chon Kraist: “Ousap fori och ren kirikiringau are ren lamalam tekia, nge lon ami tipetekison oupwe chok ekieki pwe ekkewe ekkoch ra murinno seni ami.” (Filipai 2:3) Ach fori ena a tongeni weires, akkaewin lupwen a wor wiisach. Eli a weires pokiten etipetipaen ewe ngunun emisfengen a choufetal lon fonufan. Neman sia fen kaeo pwe sipwe emisfengen me pwiich kewe are chienach kewe chon sukul. Eli aramas ra kan pesekich ach sipwe achocho ngeni ach sipwe nampa eu lon basket are eani point mi tekia seni meinisin lon sukul. Pwungun pwe a murinno ach unusen achocho me ren ach tufich lon ekkewe angang sia fori. Iwe nge, ekkewe chon Kraist rese achocho fan iten ar repwe ussun ita opu sewi mwer, are fan iten ar repwe alamota ekkewe feioch ra pop seni ewe angang. Iwe nge, ach kutta ifa ussun aramas repwe mwareitikich pokiten kich nampa eu a tongeni efeiengauakich. Ifa ussun?
5 Ika emon ese nemeni eu ngunun emisfengen are an lamalam tekia, a tongeni wiliiti emon mi sufolungau me lamalam tekia. A tongeni lolowoiti aramas mi angangoch are lolowoiti wiiser kewe. Iei alon An Salomon Fos 28:22: “Eman aramas mi tipemong a mochen muttir kuna pisekisek, nge esap silei pwe woungau epwe tori.” Eli epwe kutta sokkopaten wiisan kewe rese fich ngeni. Ren an epwe anneta pwungun an kewe foffor, a tongeni ngunungunungau me esiita aramas—ekkewe sokkun lapalap chon Kraist repwe ti seniir. (Jemes 3:14-16) Ren enletin, a tongeni wiliiti emon aramas a aucheaani pwisin i chok.
6 Ina popun ewe Paipel a pesei ekkewe chon Kraist: “Sisap lamalam tekia, sisap koko le fiufengen [sisap emisfengen, NW], sisap pwal lolowofengen.” (Kalesia 5:26) Ewe aposel Jon a fos ussun emon chon Kraist a kkuf ren ei sokkun ekiek: “Ua fen mak och ngeni ekkewe chon mwichefel, nge Taiotrefis, atewe mi mochen seikata pwisin i, ese mo alleasochisi ngang. Iwe, are upwe feilo remi, upwe chechemeni ekkena mettoch a fen fori ren an esiitaei ren kapas ingau.” A mmen solap ika emon chon Kraist a ina ussun!—3 Jon 9, 10.
7 Pwungun pwe, emon chon Kraist ese tongeni unusen ti seni emisfengen. Eli lon an angang a wiisen emis ngeni ren aramas are business mi fori pisek are awora alillis ussun chok an we business. Iwe, pwal mwo nge lon pekin business, emon chon Kraist epwe chuen fori an angang ren sufol, tong, me ekiekoch. Esap fori och mettoch mi atai alluk are ese fich ngeni chon Kraist me esap sinnelo ussun chok emon a fori ese lifilifil met ren an epwe win. Esap eani ewe ekiek pwe an wiliiti nampa eu—lon ese lifilifil menni angang are foffor—ewe mettoch mi lamot seni meinisin lon manauan. Ika mei pwung ena esin ekiek ren ekkewe mettoch mi weneiti fonufan, iwe, ifa me enletin ena esin ekiek ren ekkewe mettoch mi weneiti an fel ngeni Kot!
“Esap Awewei Met I A Fori Ngeni Met Eman A Fori”
8 Ewe ekiek mi fich ngeni chon Kraist ussun ar fel ngeni Kot a ffatolo lon ekkeei kapas mi pop seni ngunun Kot: “Eman me eman epwe pusin apwungu an fofor. Are a murina, murin a tongeni pwapwa ren met a fori, nge esap awewei met i a fori ngeni met eman a fori.” (Kalesia 6:4) Pokiten ekkewe elter lon eu mwichefel ra silei pwe rese emisfengen, iwe, ra angangfengen fan tipeeu ussun chok ekkewe kinikin lon eu inis. Ra pwapwaiti ar tufichin alisata pochokkulen ewe mwichefel. Iei ussun ra ti seniir emisfengen mi efisata osukosuk me ra isetiu eu pisekin nengeni fan iten meinisin lon ewe mwichefel.
9 Pokiten ierir, kunaen manauer, me pwisin ar kewe tufich, ekkoch elter ra angangoch mwen chiener kewe, are neman ar weweoch a watte seni an chiener kewe. Ina popun ekkewe elter ra eani sokkopaten wiiser kewe lon an Jiowa mwicheich. Rese ekkekieki ukuukun watteen pwisin ar tufich mwen ekkewe ekkoch, nge repwe chechchemeni ei fon: “Usun chok oua fen angei en me liffangan, oupwe alamota ir, emon fan asengesin emon, usun chon souani ewe chenin Kot mi sokkosokkopat.” (1 Piter 4:10) Ren enletin ei wokisin a weneiti noun Jiowa kewe chon angang meinisin, pokiten meinisin ra angei ewe liffangen sile mi enlet me meinisin ra eani wiiser mi auchea lon ewe angangen afalafal.
10 Ach angang mi pin a apwapwai Jiowa lupwen sia fori ewe angang pokiten tong, nge esap pokiten sia mochen atekiatakich won ekkewe ekkoch. Ina popun a fokkun lamot pwe sipwe ekiekoch ussun ach angang mi alisata fel mi enlet. Sise tongeni silei ekkewe popun aramas repwe apasa are fori och mettoch nge, Jiowa a “atittina leluken aramas.” (An Salomon Fos 24:12; 1 Samuel 16:7) Ina popun a murinno pwe, fan ekkoch, sipwe pwisin eisinikich: ‘Ifa ewe popun ua eani ai angang fan iten Jiowa?’—Kol Fel 24:3, 4; Mattu 5:8.
Ekiek Mi Pwung Ussun Ach Kewe Foffor
11 Ika ach kewe fofforun luku esap ir minne mi lamot seni meinisin fan iten ach sipwe apwapwai Kot, iwe, epwe ifa ukuukun ach lolileniesini foffor? Lupwen sia fori ach angang ren unusen letipach, iwe, mei wor lamoten ach makketiu met me ukuukun met sia fori? Ir kapas eis mi murinno pun sise mochen akkomwa nampa mwen luku, are fori ach angang pokiten sia mochen amasoua eu repot mi murinno.
12 Nengeni met ewe puk Organized to Do Jehovah’s Will a apasa: “Noun Jises Kraist kewe chon kaeo loom ra mochen rongorong porausen feffeitaan ewe angangen afalafal. (Mark 6:30) Ewe puken Fofor a aporausakich pwe orun 120 ra nonnom lupwen ewe ngun mi fel a niitiu won ekkewe chon kaeo lon ranin Pentekos. Ekiselo chok choochoon ekkewe chon kaeo a lapelo won 3,000 me mwirin ngeni 5,000. . . . (Fofor 1:15; 2:5-11, 41, 47; 4:4; 6:7) A ifa me watteen ewe apochokkul ekkewe chon kaeo ra angei pokiten ei poraus!” Iei popun Chon Pwarata Jiowa ra mochen fori repot mi titchik ussun ar angangen afalafal a fisita pokiten ar apwonueta alon an Jises kewe kapas: “Iwe, ei kapas allim usun ewe mu epwe esineifeili won unusen fonufan, pwe epwe pwar ngeni einang meinisin. Iwe, a ina sopolon.” (Mattu 24:14) Ekkena repot ra aporausakich ussun met a fiffis lon unusen fonufan. Ra pwal ait ngenikich ikkewe ia a wor osupwangen alillis ie me met sokkun me fitecho puk mi lamot fan iten kalisitaan ewe angangen afalafal.
13 Ina popun ekkewe repotun ach afalafal a alisata pwonuetaan wiisach le esileifeili ewe kapas allim ussun ewe Muu. Pwal och, sise kan pochokkulelo lupwen sia rongorong porausen angangen pwiich kewe lon ekkewe ekkoch fonu? Porausen lapeloon me watteloon ach angang won unusen fonufan a apwapwai kich, amwokutukich le alapalo ach angang, me a alukulukukich pwe Jiowa a efeiochu ewe angang. Iwe, sia pwal pwapwa ren ach silei pwe pwisin ach we repot a kapachelong lon ewe repot fan iten unusen fonufan! Ach repot a kukkun lupwen sipwe atola kapachalapen ekkewe repot meinisin nge Jiowa a silei met sia fori. (Mark 12:42, 43) Chechchemeni mwo pwe repotun ach angang won fonufan esap unus ika om repot ese kapachelong.
14 Pwungun pwe mettoch meinisin emon chon Pwarata a fori ren an epwe apwonueta wiisen emon mi fangolo manauan ngeni Jiowa ese pwalo lon noun we repot. Ren chok awewe, ewe repot ese kapachelong ekkewe awa fan iten an kaeo ewe Paipel, fiffiti ekkewe mwich, wiisan kewe lon ewe mwichefel, kaworen alillis ngeni chienan kewe chon luku, are ewe moni a eani asor fan iten angangen ewe Muu won unusen fonufan, me meta-kan. Iwe, ekkewe repot mi lamot me ra alisata ach tinikken me ra alisikich ach sisap tinikkopelo nge, sipwe eani ekiek mi pwung ussur. Eu repot mi murinno esap wewe ngeni eu passport ngeni manau esemuch.
“Achocho Ngeni Fofor-Murinno”
15 A ffat pwe inaamwo ika foffor-murinno resap amanauakich nge, ir mi chuen lamot. Pokiten ar foffor-murinno, Kot a “nounir” me a eita ngeniir “aramas mi achocho ngeni fofor-murinno.” Paul a peseer le ‘apochokkula emon me emon . . . lon tong o fofor-murinno.” (Taitos 2:14; Ipru 10:24) A fokkun ffat alon Jemes: “Pun inisich mi imu seni ngunuch a malo; iwe, pwal usun chok, luku mi imu seni fofor a pwal malo.”—Jemes 2:26.
16 Ewe popun aramas ra eani foffor-murinno a lamot ussun chok ekkewe foffor. Ina popun mei wor aucheaan fan ekkoch ach sipwe atittina ekkewe popun sia angang ngeni Jiowa. Pokiten sise tongeni wesewesen silei ekkewe popun aramas ra fori och angang, sise tongeni apwungur. Iei ewe kapas eis: “En io, pwata kopwe apungu noun emon chon angang?” Me iei ussun a polu: “Iwe, epwe uta, pun ach Samol a tongeni auta i.” (Rom 14:4) Jiowa, Mastaan kich meinisin, me noun we Soukapwung mi seikita, Kraist Jises, repwe apwungukich, esap chok me ren ach kewe foffor, nge sipwe pwal kapwung me ren ekkewe popun sia foriir, ekkewe tufich a suuk ngenikich, ach tong, me ach tuppwol. Jiowa me Jises Kraist chok ra tongeni wesewesen silei ika sia fen apwonuetaochu an Paul we kapas: “Kopwe achocho [achocho me ren unusen om tufich, NW] ngeni om kopwe achengicheng me ren Kot, usun chok emon chon angang esap saueiti och mettoch, emon mi forfichi lon an anganga ewe kapas mi enlet.”—2 Timoti 2:15; 2 Piter 1:10; 3:14.
17 Jiowa ese kutta senikich minne sise tufich ren. Me ren Jemes 3:17, “ewe tipatchem seni won a . . . mosonoson.” Esap eu aal mi tipatchem fan itach, pwal eu winnach, ika sipwe appiru ei lapalap? Ina popun sisap achocho ngeni minne ese ki rech are ekieki pwe pwiich kewe repwe ita achocho ngeni minne ese ki rer.
18 Lupwen sia eani ekiek mi itepok me ruuepek ussun ach kewe foffurun luku me an Jiowa chen sise fich ngeni, sipwe amwochu ewe pwapwa noun Jiowa kewe chon angang ra sinnelo ren. (Aisea 65:13, 14) Sia chengel pokiten ekkewe feioch Jiowa a ninatiu won ewe mwichen noun kewe aramas ese lifilifil ukuukun met sia tufichin fori lon an we angang. Sia likiitu lon “iotek o tingor o pwal eti kilisou.” Sipwe tittingor ngeni Kot pwe epwe alisikich ach sipwe achocho ren unusen ach tufich. Iwe, epwe fokkun fisita pwe “an Kot we kinamwe, ewe mi somelo seni ach ekiek meinisin, epwe mamasa letipemi o ami ekiek lon Kraist Jises.” (Filipai 4:4-7) Sia angei auruur me apochokkul seni ach silei pwe amanau ese pop seni foffor chok, nge seni an Jiowa chen sise fich ngeni!
En Mi Tongeni Awewei Ewe Popun Chon Kraist
• rese sikasini minne ra fori?
• ra ttielo seni eu ngunun emisfengen?
• ra repotei ar angangen afalafal?
• rese apwungu chiener kewe chon Kraist?
[Ekkewe kapas eis fan iten ewe lesen]
1. Ifa ussun chon Kraist ra sokko seni aramas ren ar ekiek ussun tufichir kewe, me met popun ra sokkolo?
2, 3. Paul a sikasini met, me met popun a sikasiniir?
4. Fan ekkoch, ifa ewe popun a weires ach ekieki pwe aramas ra tekia senikich?
5. Eu ngunun emisfengen a tongeni emmwen ngeni met ika sise nemeniochu?
6. Ifa ussun ewe Paipel a ourourakich ussun eu ngunun emisfengen?
7. Emon chon Kraist epwe ti seni met ren ewe ngunun emisfengen lon ekkewe leenien angang?
8, 9. (a) Pwata esor popun ekkewe elter chon Kraist repwe emisfengen lefiler? (b) Met popun 1 Piter 4:10 a weneiti noun Kot kewe chon angang meinisin?
10. Met sipwe fori pwe Jiowa epwe etiwa ach angang mi pin?
11. Ikkefa ekkewe kapas eis ussun ach angangen afalafal sipwe pwungupwung won?
12, 13. (a) Ikkefa ekkoch popun sipwe fori repotun ach angang fan iten Kraist? (b) Ikkefa ekkewe popun sia chengel lupwen sia nengeni repotun ach angangen afalafal won unusen fonufan?
14. Met a kapachelong lon ach fel ngeni Jiowa me lukun ach afalafala me asukula aramas?
15. Inaamwo ika foffor rese tongeni amanauakich nge, met popun ir mi lamot?
16. Met a lamot lap seni foffor, nge met sipwe tumunu seni?
17. Met popun sipwe chechchemeni Jemes 3:17 lupwen sia unusen achocho lon ach angang?
18. Sia ekiekin kuna met lupwen sia ekiekoch ussun ach kewe foffor me an Jiowa chen sise fich ngeni?
[Lios lon pekin taropwe 23]
‘Ai chen mi kuu ngonuk’
[Lios lon pekin taropwe 25]
Ekkewe elter ra pwapwaiti ewe alillis emon me emon leir a awora ngeni pochokkulen ewe mwichefel
[Lios lon pekin taropwe 27]
Ika ese kapachelong om we repot, repotun ach angang won unusen fonufan esap unus