Poraus Allim Fan Iten Chon Ekkewe Muu Meinisin

“Oupwe chon pwarata usi . . . lon unusen fonufan meinisin.”​—FOFOR 1:8.

EKKAN sense mi lipwakoch ra kan pippi esap chok minne ra aiti ngeni nour kewe chon sukul pwe pwal ifa ussun ra kan asukuler. Pokiten kich senseen ekkewe poraus mi enlet lon Paipel, sia pwal ina ussun. Sia kan pippi ewe poraus sia akkafalafala me met sia akkaea lon ena angang. Ewe poraus sia uwei, nge iei poraus allimen an Kot we Muu, esap siwil, nge sia kan siwili lapalapen ach afalafal. Met popun? Popun, pun sia mochen pwe ena poraus epwe tori aramas meinisin.

² Ren ach sissiwili lapalapen ach afalafal, sia kan appiru noun Kot kewe chon angang lom lom. Awewe chok, nengeni mwo ewe aposel Paul. Iei alon: “Ua lapalapeni lapalapen re Jus ngeni re Jus . . . Ua lapalapeni lapalapen emon mi nom lukun ewe alluk ngenir mi nonnom lukun ewe alluk . . . Ua lapalapeni lapalapen emon mi apwangapwang ngeni ir mi apwangapwang pwe upwe liapeni ekkewe ir mi apwangapwang. Nge ua fen lapalapeni lapalapen sokkun aramas meinisin ngeni sokkun aramas meinisin, pwe upwe liapeni ekkoch aramas ren mettoch meinisin.” (1 Korint 9:19-23) An Paul sissiwili lapalapen an afalafal a efisata uwaochun an angang. Sipwe pwal kuna uwaochun ach angang ika sipwe tipemecheresin alapalapa ewe poraus sia uwei pwe epwe fichiiti emon me emon sipwe kapas ngeniir.

Ngeni “le Sopwun Fonufan”

³ Eu mettoch mi weires ngeni ir kewe mi afalafala ewe poraus allim, iei wachemukun ar leenien afalafal, weween, “unusen fonufan meinisin.” (Mattu 24:14) Lon ekkewe ipuku ier ra lo, chommong chon angang ngeni Jiowa ra angang weires pwe repwe tori minefoon fonu ren ar repwe achoufetalei ewe poraus allim. Met mwiriloon? A mmen amairu lapaloon ewe angang won unusen fonufan. Mwirin 1900, ewe angangen afalafal a pwonuta lon ekkoch chok fonu, nge iei, Chon Pwarata Jiowa ra akkafalafal lon 235 fonu! Enlet, poraus allimen ewe Muu a ekkesilefeil tori “le sopwun fonufan.”​—Aisea 45:22.

⁴ Met popun a feffeita ena angang? A wor chommong popun. A mmen watte alillisin ekkewe misineri mi sukul lon ewe Watchtower Bible School of Gilead, iwe, kanoto chok, alillisin ekkewe lap seni 20,000 mi sochungio seni ewe Ministerial Training School. A pwal watte alillisin ekkewe Chon Pwarata Jiowa mi pwisin monatiu liwinin ar mwokut ngeni ekkan fonu ikewe a watte osupwangen chon afalafala porausen ewe Muu ie. Ekkena chon Kraist mi pennuku manauer, nge ir mwan me fefin, kukkun me chinnap, lipich me pupulu, ra awora watte alillis fan iten ar repwe afalafala porausen ewe Muu won unusen fonufan. (Kol Fel 110:3; Rom 10:18) Sia fokkun aucheaniir. Nengeni mwo minne ekkoch kisin ofes ra makkoto ussun ekkewe chon ekis mi angang lon ekkewe fonu mi nom fan ar tumun, nge ekkena fonu ra osupwang ren chon afalafal.

⁵ “Ekkeei Chon Pwarata mi achengicheng ra kan sou emmweni ewe angangen afalafal lon leeni mi towau seni telinimw, ra awora alillis fan iten forutaan minefoon mwichefel, me ra alisi pwiich kewe pwe repwe asimaueta lon pekin ngun.” (Ecuador) “Ika ekkeei fitepuku chon ekis mi angang ikei ie repwe feilo seni ei fonu, neman esap lien nukunukoch ekkeei mwichefel. A mmen watte feiochun ar nonnom rech.” (Dominican Republic) “Lon chommong ach keei mwichefel, a kan chocho ekkewe sister, iwe, fan ekkoch a tori 70 percent. (Kol Fel 68:11) A lap me leir ra keran tolong lon ewe enlet, nge ekkeei pioneer sister mi lipich, nge ra feito seni fonuen ekis, ra awora alillis mi fokkun auchea ren ar kait ngeni ekkeei minefo. Ekkeei sister seni fonuen ekis wesewesen eu liffang ngenikich!” (Eu fonu lon Eastern Europe) Ka fen ekieki ussun om kopwe feilo afalafal lon pwal eu fonu?​—Fofor 16:​9, 10.

“Engol Mwan Seni Ekkewe Fos Meinisin”

⁶ Iei pwal eu ussun ita mettoch mi weires lon ach angang, ekkewe chommong sokkun fos chon fonufan ra eani. Iei eu oesini lon an Kot we Kapas: “Epwe fis lon ekkena ran pwe engol mwan seni ekkewe fos meinisin an ekkewe muu repwe angeta won ufen emon re Jus, iwe, repwe apasa: ‘Am aupwe eti ami kana aramas, pun am aua rong pwe Kot a nonnom ren ami kana aramas.’ ” (Sekaraia 8:​23, NW) Ren pwonutaan ena oesini lon ei fansoun, ekkena engol mwan ra liosueta ewe mwich mi lapalap, nge ewe oesini lon Pwarata 7:9 a kapas ussur. Iwe nge, nengeni mwo pwe me ren ena oesini lon Sekaraia, sap minne ekkena “engol mwan” repwe chok feito seni sokkun muu meinisin, nge repwe pwal feito “seni ekkewe fos meinisin an ekkewe muu.” Sia fen ita kuna pwonutaan ena mettoch mi lamot lon ena oesini? Ewer, fokkun ina.

⁷ Nengeni mwo ekkoch poraus. Lime ier lom nouch kewe puk ra peres lon 90 fos. Lon ei fansoun, ena nampa a fen watteta ngeni lap seni 400. “Ewe chon angang mi tuppwel me tipatchem” a fori minne a tufich ngeni pwe epwe awora ekkan puk ren pwal mwo nge ir kewe mi eani ekkewe sokkun fos chokisikis chok ra fosuniir. (Mattu 24:45) Ren chok awewe, ekkan puken aweween Paipel ra for lon fosun Greenland (chon eani ena fos 47,000), fosun Palau (chon eani ena fos 15,000), me fosun Yap (chon eani ena fos ra kis seni 7,000).

“Eu Asamelap” mi Suuk ngeni Minefoon Angang

⁸ Iwe nge, eli lon ei fansoun, esor lamoten ach sipwe feilo ekis fan iten ach sipwe uwei ngeni aramas mi eani sokkopaten fos meinisin ewe poraus allim. Lon ekkewe ier kanoto chok, fite milion choisa me chon siamu ra wareiti ekkan fonu mi watte wouur, iwe, a fisilo pwe chokeei mi eani chommong sokkun fos ra nonnom lon chommong minefoon telinimw. Ren chok awewe, lon Paris, France, aramas ra eani ina epwe 100 sokkun fos. Lon Toronto, Canada, a wor 125 sokkun fos; iwe, lon London, England, a wor lap seni 300 sokkun fos! Pokiten an a wor aramas seni fonuen ekis lon ekkan leeni mi nom fan tumunuun chommong mwichefel, iwe, a suuk “eu asamelap” mi emmwen ngeni minefoon kokkotun angang fan iten an epwe rongfeil ewe poraus allim ngeni chon ekkewe muu meinisin.​—1 Korint 16:9.

⁹ Fite ngerou Chon Pwarata Jiowa ra achocho le apwonueta ewe angangen afalafal ren ar kaeo pwal eu fos. Ren chommong leir, ina eu mettoch mi weires, nge ewe chengel ra kuna seni ar alisi ekkan chon siamu me choisa pwe repwe kaeo minne mi enlet lon an Kot we Kapas a fokkun lap seni weiresin ar kaeo pwal eu fos. Lon eu ier kanoto chok, arapakan 40 percent me lein ir meinisin mi papatais lon ekkewe district convention lon eu fonu lon Western Europe ra feito seni pwal eu fonu.

¹⁰ A enlet pwe a lap me leich resap tongeni kaeo pwal eu fos. Nge sipwe tongeni alisi chon ekis ren ach nounoufichi ewe minefoon kukkun puk itan Good News for People of All Nations,a nge lon ei puk a wor eu poraus mi murinno seni ewe Paipel lon chommong sokkun fos. (Jon 4:​37) En mi kan nonnounou ena puk lon ewe angangen afalafal?

Lupwen Aramas ra Tenechepwak

¹¹ Lon ei fansoun lupwen an a lapalapalo an Setan pochokkul won chon fonufan, iei pwal eu mettoch sia kukkuna fan chommong, nge a ussun ita aweiresi ach angang. Lon ekkoch leeni aramas rese mochen auseling. Pwungun pwe sise mairu ren ena mettoch, pun Jises a oesini pwe ena mettoch epwe fis. Iei alon lupwen a kapas ussun ach ei fansoun: “Chommong aramas epwe patapatelo ar tong.” (Mattu 24:12) A enlet pwe chommong rese lien luku Kot me rese lien sufoliiti Paipel. (2 Piter 3:​3, 4) Ina minne, lon ekkoch fonu, a chokisikis chok ekkan aramas mi wiliiti minefoon chon tapwelo mwirin Kraist. Iwe nge, esap weween pwe a lamot mwaal angangen pwiich kewe chon Kraist mi achengicheng, ir kewe mi tuppwol le afalafal lon ekkena fonu ikewe aramas resap lien mochen auseling ie. (Ipru 6:​10) Met popun? Ekieki mwo ena poraus mi mak fan.

¹² Ewe puken Poraus Allim Mattu a wiisen makkei a menlapei ruu populapen ach angangen afalafal. Ewe aewin a weneiti ach angangen “foralo chon kaeo seni chon ekkewe muu meinisin.” (Mattu 28:​19, NW) Oruuan, porausen ewe Muu “eu minen pwarata.” (Mattu 24:​14, NW) Ir me ruu ekkena mettoch ra lamot, nge ena oruuan a akkaewin lamot. Met popun?

¹³ Ewe sou makken Paipel itan Mattu a makkei ei kapas eis ekkewe chon kuno ra eisini Jises: “Epwe ifa esissinnen om ka war me sopwoloon ei otot?” (Mattu 24:​3, NW) Ren poluan, Jises a apasa pwe epwe wor eu lapalap mi sokkolo lamotan lon ena esissin, nge iei eu angangen afalafal won unusen fonufan. A ita kapas ussun ewe angangen foralo chon kaeo? Aapw. Iei alon: “Ei poraus allimen ewe muu epwe afalafalfeil won unusen fonufan pwe epwe eu minen pwarata ngeni ekkewe muu meinisin.” (Mattu 24:​14, NW) Ina popun, Jises a pwarata pwe ewe angangen afalafal ussun ewe Muu epwe eu lapalap mi lamot lon ewe esissin.

¹⁴ Ina minne, fansoun ach sipwe afalafala poraus allimen ewe Muu, sia kan chechchemeni pwe inaamwo ika sisap tongeni foralo chon kaeo, nge sia akkapwonueta “eu angangen pwarata.” Ese lifilifil ika mei fet meefien aramas, nge ra silei met sia foffori, iwe, a ina ussun sia kapachelong lon pwopwpwonutaan an Jises we oesini. (Aisea 52:7; Pwarata 14:​6, 7) Iei alon Jordy, emon Chon Pwarata sarafo lon Western Europe: “A watte ai pwapwa pokiten ai silei pwe Jiowa a nounouei le apwonueta Mattu 24:14.” (2 Korint 2:​15-​17) Ese mwaal a pwal ina ussun meefiom.

Lupwen Aramas ra Oput Ach Poraus

¹⁵ Iei pwal eu mettoch mi ussun ita aweiresi ach angangen afalafala poraus allimen ewe Muu, weween, an aramas oput ei poraus. A iei ussun an Jises ouroura noun kewe chon kaeo: “Ekkewe einang meinisin repwe oput ami pokiten itei.” (Mattu 24:9) Ussun chok ekkewe popun chon Kraist, aramas ra oput, u ngeni, me eriaffou noun Jises kewe chon kaeo lon ei fansoun. (Fofor 5:​17, 18, 40; 2 Timoti 3:​12; Pwarata 12:12, 17) Lon ekkoch fonu, ekkewe muu ra pinei ar angang. Nge, pokiten ar alleasochis ngeni Kot, chon Kraist lon ekkena fonu ra chuen chok akkafalafala porausen allimen ewe Muu. (Amos 3:8; Fofor 5:​29; 1 Piter 2:​21) Met a atufichiir fitifengen me meinisin Chon Pwarata Jiowa won unusen fonufan pwe repwe fori ena mettoch? Jiowa a kan apochokkuler ren an we ngun mi fel.​—Sekaraia 4:6; Efisus 3:​16; 2 Timoti 4:​17.

¹⁶ Jises a menlapei ifa ussun an Kot we ngun mi fel me ewe angangen afalafal ra ririfengen lon alon ei ngeni noun kewe chon kaeo: “Nge oupwe angei manaman, lupwen ewe Ngun mi Fel epwe feito womi. Iwe, oupwe chon pwarata usi . . . lon unusen fonufan meinisin.” (Fofor 1:8; Pwarata 22:17) Tettelin poraus lon ena wokisin a lamot. Akkom, ekkewe chon kaeo ra angei ewe ngun mi fel, iwe mwirin, ra popueta ewe angangen afalafal won unusen fonufan. Ren chok alillisin an Kot we ngun mi fel epwe wor ar pochokkul pwe repwe likiitu le uwei “eu minen pwarata ngeni ekkewe muu meinisin.” (Mattu 24:13, 14; Aisea 61:​1, 2) Ina minne, a pwung an Jises apasa pwe ewe ngun mi fel, ina “ewe chon alillis.” (Jon 15:26) A apasa pwe an Kot we ngun mi fel epwe kait ngeni me ekkemmweni noun kewe chon kaeo.​—Jon 14:16, 26; 16:13.

¹⁷ Ifa ussun an Kot we ngun mi fel a akkalisikich lupwen epwe watte an aramas u ngeni ewe angangen afalafala ewe poraus allim? An Kot we ngun mi fel a kan apochokkulakich, me a appolua ir kewe mi eriaffoukich. Ren ach sipwe affata ena, ekieki mwo eu mettoch a fis lon manauen King Saul.

An Kot we Ngun mi Fel a U Ngeni Saul

¹⁸ Le poputaan a murinno nemenien Saul lon wiisan we, wiisen akkaemonun kingen Israel, nge mwirin, a alleasolap ngeni Jiowa. (1 Samuel 10: 1, 24; 11:14, 15; 15:17-​23) Ina popun, an Kot we ngun mi fel ese chuen peni ena king. Saul a wesewesen ningeringeriiti Tafit, ewe mi kepit pwe epwe wii Saul lon ewe wiis king, iwe, Tafit a feioch pokiten an ewe ngun mi fel peni i. (1 Samuel 16:​1, 13, 14) A ussun ita ese fokkun wor minen eppetin feiengau ren Tafit. A ina ussun pun a chok nom ren Tafit ewe arp, nge a nom ren Saul efoch siles. Ina minne, eu ran lupwen Tafit a ettiki ewe arp, “Saul a posu ngeni Tafit ewe siles, pun a ekiekin apwera ngeni ewe tit. Nge Tafit a mar seni fan ruu.” (1 Samuel 18:10, 11) Mwirin, Saul a auseling ngeni noun we, Jonatan, nge i chienen Tafit, iwe, a iei ussun an akapwon: “Mwo manauen ewe Samol mi Lapalap, Tafit esap ninnila.” Nge, Saul a pwal “ekiekin apwera Tafit ngeni ewe etip.” Iwe nge, Tafit “a muttir olu wokun Saul we, pwe a chok kuw ewe etip.” Tafit a su seni, nge Saul a chei. Lon ena fansoun osukosuk watte, an Kot we ngun mi fel a u ngeni Saul. Ifa ussun?​—1 Samuel 19:​6, 10.

¹⁹ Tafit a sulo ren ewe soufos Samuel, nge Saul a tinalo ekkoch mwan pwe repwe turufi Tafit. Iwe nge, lupwen ra tori ikewe Tafit a op ie, “ngunun Kot a feitiu won noun Saul kewe chon kuno, iwe, ra poputa le lapalapeni lapalapen soufos.” A kon watte pochokkulen an Kot we ngun mi fel woor pwe iwe ra unusen monukalo ewe popun ar ra kunolo. Lon pwal ruu fansoun mwirin, Saul a tinalo ekkoch mwan pwe repwe aweinato Tafit, nge a pwal ina chok ewe mettoch a fis. Iwe mwirin, King Saul a pwisin feilo ren Tafit, nge Saul ese tongeni uta fan manamanen an Kot we ngun mi fel. Pwungun pwe ewe ngun mi fel a pinei an tufich mwokut “lon unusen ewe ran me lon unusen ewe pwin,” ina minne, Tafit a tufichin su seni.​—1 Samuel 19:20-​24.

²⁰ A wor eu lesen mi apochokkulakich lon ena poraus ussun Saul me Tafit: Chon eriaffou noun Kot kewe chon angang resap tongeni apwonueta ar ekiek ika an Kot we ngun mi fel epwe appoluer. (Kol Fel 46:11; 125:2) Letipen Jiowa pwe Tafit epwe wiisen kingen Israel. Esap wor emon epwe tongeni siwili ena. Lon ach ei fansoun, letipen Jiowa pwe “poraus allimen ewe muu epwe afalafalfeil.” Esap wor emon epwe tongeni pinei pwonutaan ena mettoch.​—Fofor 5:​40, 42.

²¹ Ekkoch nouwiis lon pekin lamalam me pekin muu ra aea kapas chofona me pwal mwo nge kawet ren ar repwe sotuni le pinei ach angang. Iwe nge, Jiowa epwe tuttumunu noun kewe aramas lon ei fansoun, ussun chok an we a tumunu Tafit lon pekin ngun. (Malakai 3:6) Ina popun, ussun chok Tafit, a iei ussun aloch fan ach lukuluk mi pochokkul: “Ua luku Kot, o use mo niuokus. Meeta aramas repwe tongeni fori ngeniei?” (Kol Fel 56:11; 121:​1-8; Rom 8:​31) Ren alillisin Jiowa, amwo sipwe pwakini sokkun minen eppet meinisin atun ach sipwe akkapwonueta wiisach we, wiisen ach sipwe afalafala poraus allimen ewe Muu ngeni chon ekkewe muu meinisin.

[Footnotes]

En mi Chechchemeni?

• Pwata sia kan sissiwili lapalapen ach afalafal?

• “Eu asam watte” a suuk ngeni met sokkun minefoon angang?

• Met a kan pwopwpwonuta ren ach angangen afalafal, lon pwal mwo nge ekkan leeni ikewe aramas rese lien mochen akkauseling ie?

• Met popun chon u ngenikich resap tongeni aukatiu ewe angangen afalafala poraus allimen ewe Muu?

[Ekkewe kapas eis fan iten ewe lesen]

1. Lon wiisach we, wiisen sense fan iten Paipel, met sia kan pippi, me met popun?

2. Lupwen sia sissiwili lapalapen ach afalafal, sia akkappiru io?

3. (a) Ifa eu mettoch mi ussun ita weires sipwe fori lon ach angangen afalafal? (b) Ifa ussun Aisea 45:22 a pwopwpwonuta lon ei fansoun?

4, 5. (a) Io kkan mi awora watte alillis le achoufetalei ewe poraus allim? (b) Met ekkoch kisin ofes ra apasa ussun ekkewe chon ekis mi etto angang lon ekkewe leeni mi nom fan tumunuun ekkena ofes?

6. Ifa ussun Sekaraia 8:​23 a affata eu mettoch lon pekin fos a ussun ita aweiresi ach angangen afalafal?

7. Menni poraus a affata pwe ewe poraus allim a tottori aramas “seni sokkun fos meinisin”?

8, 9. Ifa eu mettoch mi fiffisita kanoto chok a suuki ngenikich “eu asam watte,” me ifa ussun fite ngerou Chon Pwarata ra mwokutukut fan iten ena angang?

10. A ifa ussun om nounou ewe kukkun puk Good News for People of All Nations? (Pi ena refiref “Masouen ewe Kukkun Puk itan Good News for People of All Nations,” lon pekin taropwe 18.)

11. Ifa pwal eu mettoch mi ussun ita aweiresi ach angang lon ekkoch leeni?

12. Ikkefa ekkewe ruu mettoch sia ekiekin apwonueta lon ach angangen afalafal?

13, 14. (a) Ifa eu kifetin mi sokkolo lamotan, kifetin esissinnen an Kraist waroto? (b) Ifa ewe mettoch sipwe chechchemeni, nge akkaewin ika sipwe afalafal lon ekkan leeni ikewe aramas rese lien mochen akkauseling ie?

15. (a) Jises a ouroura noun kewe chon kaeo ussun met? (b) Met a atufichikich lon ewe angangen afalafal, inaamwo ika aramas repwe u ngenikich?

16. Ifa ussun Jises a affata pwe ra ririfengen ewe angangen afalafal me an Kot we ngun mi fel?

17. Ika epwe watte an aramas oputakich, ifa ussun ewe ngun mi fel epwe tongeni alisikich?

18. (a) Ifa ussun lapalapen Saul a wesewesen ngauolo? (b) Met Saul a fori pwe epwe eriaffou Tafit?

19. Ifa ussun an Kot we ngun mi fel a tumunu Tafit?

20. Ifa ewe lesen sia tongeni kaeo seni porausen an Saul eriaffou Tafit?

21. (a) Lon ei fansoun, mei fet fofforun ekkoch mi u ngenikich? (b) A kan watte ach lukuluk won met?

[Lios lon pekin taropwe 15]

Nouch kewe puken aweween Paipel ra for iei lon lap seni 400 fos

[Lios lon pekin taropwe 15]

GHANA

[Lios lon pekin taropwe 15]

PHILIPPINES

[Lios lon pekin taropwe 15]

LAPLAND (SWEDEN)

[Lios lon pekin taropwe 16]

En mi tongeni feilo afalafal lon ekkan fonu ikewe a wor osupwangen chon afalafala porausen ewe Muu ie?

[Lios lon pekin taropwe 16]

ECUADOR

[Lios lon pekin taropwe 17]

DOMINICAN REPUBLIC

[Lios lon pekin taropwe 18]

Masouen ewe Kukkun Puk Itan Good News for People of All Nations

Lon ewe kukkun puk itan Good News for People of All Nations, a wor eu poraus mi mak lon 92 sokkun fos, nge ukuukun ttaman, eu pekin taropwe. Ititin kapasan a ussun ita sia pwisin fos ngeni aramas. Ina minne, lupwen aramas repwe alleani ena poraus, a ussun ita sia foffos ngeniir.

Ika sia suukalo lukunupoon, a wor eu mapen fonufan lon. Sipwe nounou ena map fan iten ach sipwe forata ekiekoch lefilach me ewe aramas sia fos ngeni. Eli sia tongeni aiti ngeni ewe emon menni fonu sia nonnom lon me ereni pwe sia mochen silei ika menni fonu a feito seni. Eli epwe ina ussun ach sipwe tufichin pesei pwe epwe uwawu meefian me forata ewe ngunun chiechifengen me kinamwefengen.

Ewe kapasen suukun poraus lon ena kukkun puk a eiteita met sipwe fori ren ach sipwe awora ewe sokkun alillis mi wesewesen fichiiti io kkan mi eani eu fos sise weweiti. Kese mochen kopwe alleafichi mwo ena kokkotun alillis me achocho le apwonueta.

Lon ewe pekin taropwe mi mak masouen ena puk, ese chok tettelitiu eu me eu fos, nge a pwal mak en me esissinnan. Ena mettoch a kan alisikich pwe sipwe tongeni silei esissinnen eu me eu fos mi mak won nouch kewe tract me ekkewe pwal fitu puk mi for lon ekkewe fitu sokkun fos.

[Lios lon pekin taropwe 18]

En mi nonnounou ei kukkun puk lon ewe angangen afalafal?

[Lios lon pekin taropwe 18]

Good News for People of All Nations