Ami Sam Me In​—Met Oua Mochen Fan Iten Noumi Kewe Lon Mwach Kkan?

“Ekkewe aluwol me ekkewe fopul meinisin . . . Repwe mwareiti iten ewe SAMOL.”​—KÖLFEL 148:12,13.

1. Sam me in ra kan lolileniesini met ussun nour kewe?

SAM me in meinisin ra ekieki ussun met epwe fis ngeni nour kewe lon mwach kkan. Seni uputiuen emon monukol, pwal mwo nge mwen an uputiu, seman me inan ra lolileniesini met epwe fis ngeni. Epwe pochokkul? Epwe maaroch? Mei pwal wor ekkoch mettoch repwe ekieki ussun lupwen a watteta. Sam me in ra kan mochen pwe nour kewe repwe kuna feioch lon manauer.​—1 Samuel 1:11, 27, 28; Kol Fel 127:3-5.

2. Met popun sam me in ikenai ra mochen pwe nour kewe repwe sopwoch me pwapwa lon manauer lupwen ra watteta?

² Iwe nge, ikenai a weires ngeni sam me in ar repwe awora ekkewe mettoch mi murinno seni meinisin fan iten nour kewe. Manauen chommong sam me in a weires pokiten maun, osukosuk lefilen nouwis, nafangauen moni, semmwen, me metakan. Ina popun rese mochen pwe nour kewe repwe pwal kuna ekkena sokkun osukosuk. Lon ekkewe fonu mi wouoch, ekkewe sam me in ra kuna pwe noun chiener me aramaser kewe ra ussun ita sopwoch me pwapwa lon manauer. Ina popun, ra angang weires le alisi nour kewe pwe repwe pwal kinamwe lon manauer lupwen ra watteta.​—Än Salomon Afalafal 3:13.

Filata Manau Mi Murinno

3. Chon Kraist ra filata pwe repwe fori met?

³ Pokiten chon Kraist ra tapwelo mwirin Jises Kraist, ra fen filata le fangelo manauer ngeni Jiowa. Ra fen lefareni an Jises kewe kapas: “Are emon a mochen feito mwiri, epwe pwisin peluku ekiekin, pwal mwarei an irapenges iteiten ran, o tapweto mwiri.” (Luk 9:23; 14:27) Pwungun pwe emon chon Kraist epwe pennukuolo manauan. Nge, saminne epwe woungau me osupwang. Manauen emon chon Kraist a pwapwa, menemenoch, me murinno pokiten an liffang ngeni aramas. Jises a apasa, “feiochun liffang mi lap seni feiochun angei.”​—Fofor 20:35.

4. Met Jises a pese ngeni noun kewe chon kaeo ar repwe kukkutta?

⁴ Aramas lon ranin Jises ra fokkun riaffou. Saminne repwe chok atufichi manauer, nge ra pwal likiitu fan nemenemengauen Rom me fan ekkewe chommong eoreni me allukun ar lamalam. (Mattu 23:2-4) Nge, chommong aramas mi rongorong ussun Jises ra pennukuolo pwisin ar kewe mochen, pwal mwo nge ar business, fan iten ar repwe tapwelo mwirin i. (Mattu 4:18-22; 9:9; Kolose 4:14) Ekkena chon kaeo ra feiengau pokiten filier? Ekieki mwo alon Jises: “Nge iteiten aramas meinisin mi likitalo imwan kewe, are pwin kewe, are fefinan kewe, are seman, are inan, are noun kewe, are fonuen kewe, fan itei, epwe angei fan ipuku, o epwe kuna manau esemuch.” (Mattu 19:29) Jises a alukuluku noun kewe chon kaeo pwe Semer lon lang a silei met ra osupwang ren. Ina popun a peseer: “Nge oupwe kuttafichi lom an mu o an pung; iwe, ekkeei mettoch meinisin repwap kapach ngenikemi.”​—Mattu 6:31-33.

5. Met meefien ekkoch sam me in ussun alon Jises pwe Kot epwe tumunu noun kewe chon angang?

⁵ A wewe chok ikenai. Jiowa a silei met sia osupwang ren. Aramas mi akkomwa ekkewe mettoch mi weneiti ewe Muu, akkaewin chokkewe mi afalafal full-time, ra tongeni lukuluk pwe Jiowa epwe tumunur. (Malakai 3:6, 16; 1 Piter 5:7) Iwe nge, ekkoch sam me in ra tipemwaramwar. Ra mochen pwe nour kewe repwe feffeita lon angangen Jiowa, me lo, lo, lo, pwe repwe pioneer. Nge, lupwen ra ekieki ifa ussun nour kewe repwe atufichi manauer me met sokkun angang repwe fori, ekiekir pwe a lamot ngeni ekkewe sarafo ar repwe sukul akkom pwe repwe kuna eu angang mi murinno. Ngeniir, a lamot pwe nour kewe repwe sukul tekia.

Ammonlata Fan Iten Mwach Kkan

6. Ifa weween ekkewe kapas “sukul tekia” lon ei lesen?

⁶ Mi sokkofesen kokkotun sukul lon fonu me fonu. Ren chok awewe lon Merika, ekkewe sukulen muu ra akkota pwe emon epwe sukul 12 ier. Mwirin, ekkewe chon sukul ra tongeni feilo university are college ren ruaanu ier are lap seni. Iwe ra tongeni angei eu bachelor’s degree me kaeo ngeni tokter, lawyer, engineer, me metakan, mwirin. Ina weween “sukul tekia” lon ei lesen. Nge mei pwal wor och sukul mi awora ekkewe course mi mwochomwoch fan iten kaeoon eu angang. Mwirin, emon epwe angei echo certificate are diploma fan iten ewe angang a kaeo.

7. Met sokkun sossot a tori ekkewe chon high sukul?

⁷ Ikenai, ekkewe high sukul ra kan menlapei ewe lamoten sukul tekia. Ina popun, chommong high sukul ra akkomwa ekkewe subject mi atufichi an ekkewe chon sukul 4 point lon entrance test fan iten university nge rese akkomwa ekkewe course epwe alisi ekkewe chon sukul le kuna angang mi atufichi manauer. Ekkewe sense, counselor, me chiener chon sukul ra etipetipa ekkewe chon sukul ar repwe sukul lon university. Ita iei ussun repwe angei ekkewe degree mi atufichi ar kuna angang mi watte peioffun.

8. Met sokkun kefil a suuk ngeni sam me in chon Kraist ikenai?

⁸ Iwe, met sam me in chon Kraist repwe fori? Pwungun pwe ra mochen pwe nour kewe repwe sopwoch lon sukul fan iten ar repwe tufich lon mwach kkan. (An Salomon Fos 22:29) Nge repwe ita pesei nour kewe le etiwa ewe ekiekin fonufan pwe wouoch me sopwoch mi lamot seni meinisin? Iwe met ra pesei nour kewe ar repwe achocho ngeni ren ar kapas are pwisin ar kewe foffor? Ekkoch sam me in ra angang weires pwe epwe naf ewe moni fan iten an nour kewe sukul tekia. Ekkoch ra liwinimmang. Iwe nge, kesap ekieki pwe moni chok ewe liwinin sukul tekia.​—Luk 14:28-33.

Liwinin Sukul Tekia

9. Ifa liwinin sukul tekia ikenai?

⁹ Sia kan ekieki ussun moni lupwen sia ekieki ussun ewe liwin. Lon ekkoch fonu, chon sukul mi tipatchem rese mooni ar sukul tekia pokiten ewe muu a liwiniir. Iwe nge, lon chommong fonu, sukul tekia a liwinimmong me liwinin a chok lallapelo. Eu poraus lon echo simpung (Op-Ed, New York Times) a apasa: “Me loom, aramas ra ekieki pwe sukul tekia eu minen atufichi aramas. Nge iei sukul tekia a alapalo ewe refiref lefilen aramas mi wouoch me aramas mi ekis tufich.” Weween pwe, ekkewe sukul tekia mi murinno ra wiliiti leenien ekkewe aramas mi wouoch me foummong mi atufichi nour kewe ar repwe pwal wouoch me foummong. Ina met sam me in chon Kraist repwe filata fan iten nour kewe?​—Filipai 3:7, 8; Jemes 4:4.

10. Ifa ussun sukul tekia a riri ngeni kalisitaan mwokutukutun ei fonufan?

¹⁰ Inaamwo ika sukul tekia ese kamo fan iten ekkoch nge, mi chuen wor wiiser. Ren chok awewe, eu simpung (The Wall Street Journal) a apasa pwe lon eu fonu Otiuuren Esia, ewe muu a “akkota pwe ekkewe chon sukul mi tipatchem repwe fokkun feioch.“ Weween pwe repwe sukul lon Oxford me Cambridge lon England, Harvard me Yale lon Merika, are pwal eu sukul mi itefoulo. Ewe muu a awora ena esin alillis ren an epwe “awouochuaalo ewe fonu.” Eli ewe sukul ese kamo nge ewe chon sukul epwe mooni ren an unusen achocho le alisata mwokutukutun fonufan. Inaamwo ika chommong aramas ra chei ena sokkun manau nge, ina ewe sokkun manau sam me in chon Kraist ra mochen pwe nour kewe repwe manaueni?​—Jon 15:19; 1 Jon 2:15-17.

11. Met ekkewe pekin kaeo ra pwarata ussun aeangauen safeien opuchopuch me lisowu mwaal lefilen chon sukul lon university?

¹¹ Sipwe pwal ekieki ussun met a fiffis lon ekkewe university me college. Ekkewe sukul tekia ra itengau pokiten fofforingau. Aeangauen safeien opuchopuch me sakau, lisowu mwaal, churi lon test, eriaffoun aramas, me metakan ra choufetal. Ekieki mwo ussun aeangauen sakau. Iei met echo chassi (New Scientist) a mak ussun an aramas un sakau pwe repwe sakauolo: “Orun 44 percentin [ekkewe chon sukul lon an Merika kewe university] ra unnupuch fan eu iteiten ruu wiik.” A pwal ina ussun ekkewe sarafo lon Australia, Britain, Russia, me pwal chommong fonu. Lupwen ekkewe chon sukul ra fos ussun “hooking up,” Newsweek a apasa pwe ra wewe ngeni “chufengen fan eu chok lefilen aramas rese kon sissileifengenniir, ren ar repwe kiss are lisowu mwaal.” Eu pekin kaeo a pwarata pwe lefilen 60 tori 80 persentin ekkewe chon sukul ra fori ei mettoch. Emon fefin mi fori research a apasa: “Me ren ekkewe chon sukul lon college, esor ngauen ar ‘hook up.’”​—1 Korint 5:11; 6:9, 10.

12. Ikkefa ekkewe osukosuk a tori ekkewe chon sukul tekia?

¹² Fengen me ekkena sokkun fofforingau, a pwal wor osukosuk seni homework me test. A lamot ngeni chon sukul ar repwe fori homework pwe repwe angoch lon test. A lamot ngeni pwal ekkoch ar repwe angang part time lupwen ra sukul. Ekkeei mettoch ra aea watteen ar fansoun me pochokkul. Iwe, epwe ifa ukuukun ewe fansoun me pochokkul lusun fan iten wiiser lon pekin ngun? Ika a wattelo osukosuk, menni angang repwe akkom likitalo? Repwe chuen akkomwa are repwe likitalo minne mi lamot lon pekin ngun? (Mattu 6:33) Iei met ewe Paipel a pese ngeni chon Kraist: “Iei minne, oupwe fakkun nengenifichi usun ami fefetal, esap usun ekkewe aramas mi tiparoch, pwe usun ekkewe mi tipatchem. Oupwe achocho ngeni lon ei fansoun, pun ekkeei ran mi chok ingau.” (Efisus 5:15, 16) A fokkun alolilen pwe ekkoch ra fen rikilo seni ewe luku pokiten ra akkomwa ar angang lon sukul are pokiten ra atai an Kot alluk lupwen ra feilo college!

13. Ikkefa ekkewe kapas eis sam me in chon Kraist repwe ekieki ussun?

¹³ Pwungun pwe, lisowu mwaal, fofforingau, me osukosuk rese chok fisita lon college me university. Iwe nge, chommong sarafo ra meefi pwe ekkena sokkun mettoch kinikinin ar sukul, me rese osukosuk rer. Ekkewe sam me in chon Kraist repwe mutata an nour kewe nonnom lein chommong aramas mi eani foffor mi annou ren ruaanu ier are eli lap seni? (An Salomon Fos 22:3; 2 Timoti 2:22) Ifa ussun lupwen ka alollofengenni ekkewe feioch seni college me ewe tufichin feiengau? Kopwe pwal ekieki mwo ei kapas eis mi lamot, ekkewe sarafo repwe kaeo le akkomwa met lon manauer?a (Filipai 1:10; 1 Tesalonika 5:21) A lamot pwe sam me in repwe ekiekifichi ussun ekkeei kapas eis, fiti iotek. Repwe pwal ekieki ussun ewe feiengau epwe tori nour kewe lupwen ra sukul lon pwal eu telinimw are fonu.

Met Sipwe Tongeni Fori?

14, 15. (a) Menni fon seni Paipel a weneitikich inaamwo ika chommong aramas rese tipeeu ngeni? (b) Ikkefa ekkewe kapas eis ekkewe sarafo repwe pwisin eisiniir?

¹⁴ Ikenai, aramas ra kan luku pwe university ewe chok alen feioch fan iten ekkewe sarafo. Iwe nge, a lamot pwe ekkewe chon Kraist repwe auselinga ewe kapasen emmwen seni Paipel nge esap met aramas ra saani. A apasa: “Ousap appiru pwomen fonufan, nge oupwe wililo ren asefosefallin letipemi, pwe oupwe pwarata minne letipen Kot, minne mi murinno o fich o unusoch.” (Rom 12:2) Ifa letipen Kot fan iten noun kewe aramas, kukkun me chinnap, le muchuloon ei fansoun sopwolon? Iei met Paul a pese ngeni Timoti: “Nge en, kopwe chok ononoto ren mettoch meinisin, o likiitu fan riaffou; kopwe fori angangen sounpetaken ewe kapas allim, o kopwe apwonueta wisom.” Ekkeei kapas ra weneitikich meinisin ikenai.​—2 Timoti 4:5.

¹⁵ Pwe sisap kkuf fan an ei fonufan ekiek ussun pisek me sopwoch, a lamot ach sipwe ‘ononoto,’ are silefichi menni aal sipwe fetal won lon pekin ngun. Ika en emon sarafo, kopwe pwisin eisinuk: ‘Ua unusen achocho le “apwonueta wiisei,” pwe upwe fich ngeni ai upwe afalafala ewe Kapasen Kot? Ifa ai kokkot pwe upwe alapalo ai angangen afalafal? Ua fen ekiekin pioneer?’ Ekkeei kapas eis ra weires, akkaewin lupwen ka kuna pwe chommong sarafo ra chei pwisin letiper ren ar repwe ‘kutta mettoch mi watte fan iter,’ mi ussun ita emmwen ngeniir manau mi kinamwe. (Jeremaia 45:5) Ina popun, sam me in chon Kraist ra tumunu me emmweni nour kewe lon pekin ngun seni le kukkunuur.​—An Salomon Fos 22:6; Än Salomon Afalafal 12:1; 2 Timoti 3:14, 15.

16. Ifa ussun ekkewe sam me in chon Kraist ra tongeni alisi nour kewe pwe repwe akkomwa ekkewe mettoch lon pekin ngun?

¹⁶ Iei alon ewe mwanichi lein ulumon at nge iner a pioneer ren chommong ier: “Mama a tumunuochu io am aua chiechi ngeni. Ause fiti chienem lon sukul nge chokkewe chok lon ewe mwichefel mi achocho lon pekin ngun. Mama a etiwa ekkewe misineri, ekkewe chon afalafal mi saifetal, chon Bethel, me ekkewe pioneer ngeni imwem fan chommong. Lupwen aua rongorong porauser me kuna ar pwapwa, a achungu letipem le afalafal full-time.” A mmen apwapwa pwe ikenai, ekkewe ulumon pwipwi ra afalafal full-time. Emon a angang lon Bethel, emon a fiti ewe Ministerial Training School, me ewe emon a pioneer.

17. Ifa ussun sam me in ra tongeni alisi nour kewe lupwen ra filata menni subject repwe kaeo lon sukul me menni angang repwe achocho ngeni?

¹⁷ Sam me in resap chok alisi nour kewe ar repwe akkomwa ekkewe mettoch lon pekin ngun nge, repwe pwal emmweniir lupwen ra filata ekkewe subject me angang repwe kaeo lon sukul. Pwal emon sarafo mi angang lon Bethel iei a apasa: “Semei me inei ra pioneer mwen me mwirin ra pupulu. Iwe, ra achocho le alisi chon ewe famili ar repwe pwal apiruur. Lupwen aua filata eu subject lon sukul are och mettoch epwe weneiti manauem lon mwach kkan, ra alisikem le filiochu ekkewe mettoch mi alisata am angang part time me pioneer.” A lamot pwe sam me in me nour kewe repwe filata ekkewe course mi alisata angang ngeni Kot, esap ekkewe subject epwe alisata ar kaeo lon eu university.b

18. Met sokkun angang ekkewe sarafo repwe ekiekin fori?

¹⁸ Lon chommong fonu, esor angang fan iten aramas mi sochungio seni university nge ese naf ekkewe chon taiku, mechanic, cook me chon alimelim. Ewe chassi USA Today a apasa pwe “lon mwach kkan esap wor lamoten ruaanu ier degree seni college fan iten 70% ekkewe chon angang, nge epwe lamot ruu ier degree lon eu college are echo taropwe mi affata pwe ra silefichi eu sokkun angang.” Mei wor chommong course mi mwochomwoch ussun angang lon ofes, mechanic, computer repair, chon ffor paip, fich mokur, me pwal chommong sokkopaten angang. Mi och ekkeei angang? Ewer! Eli ekkoch ekkeei sokkun angang rese kon lien ling me ren aramas nge, ir mi och fan iten chokkewe mi wesewesen mochen angang ngeni Jiowa full-time pokiten repwe tufich me ra tongeni filata ineet repwe angang.​—2 Tesalonika 3:8.

19. Met epwe atoto rech manau mi pwapwa me menemenoch seni meinisin?

¹⁹ Ewe Paipel a apasa: “Ekkewe aluwol me ekkewe fopul meinisin, . . . repwe mwareiti iten ewe SAMOL, pun itan we chok mi tekia; an we ling mi tekia seni fonufan o pwal seni lang.” (Kol Fel 148:12, 13) Ach angang ngeni Jiowa full-time epwe atoto rech pwapwa me menemenoch mi lapalap seni meinisin. Esap ina ussun met ewe fonufan epwe ngenikich. Lefareni met ewe Paipel a apasa: “Feioch seni ewe Samol mi Lapalap a awouukich, nge i esap apacha och riafou ngeni.”​—An Salomon Fos 10:22.

[Footnote]

En Mi Tongeni Awewe?

• Chon Kraist ra eani lukuluk won met pwe repwe pwapwa lon mwach kkan?

• Met sokkun mettoch sam me in chon Kraist repwe ekieki ussun lupwen ra filata met epwe ochulo manauen nour kewe lon mwach kkan?

• Met sipwe ekieki ussun lupwen sia filata ika mi och are ese och ach feilo sukul tekia?

• Ifa ussun sam me in repwe alisi nour kewe ar repwe filata le angang ngeni Jiowa?

[Pwoor lon pekin taropwe 15]

Ifa Aucheaan Sukul Tekia?

Chommong aramas mi feilo university ra apilukulukun angei eu degree pwe repwe kuna angang mi murinno me watte peioffun. Iwe nge, ekkoch pekin kaeo, fforun eu Muu, ra pwarata pwe chokisikis ra sopwoch pokiten arapakan 25 percent chok lein ekkewe ra feilo college ra angei eu degree mwirin wonu ier. Nge meinisin mi angei ewe degree ra angei eu angang mi murinno? Ekieki mwo met ekkewe pekin kaeo iei ra pwarata.

“Saminne emon epwe angei eu angang mi murinno me mi watte peioffun pokiten chok a feilo Harvard are Duke [university]. . . . Ekkewe kompani rese silei ifa lapalapen ekkewe sarafo mi mochen angang. Eli aramas ra ingeiti emon mi fen sochungio seni eu university mi itefoulo. Nge mwirin, met aramas ra tongeni fori are rese tongeni fori, ina ewe mettoch mi lamot ngeni ewe pos.”​—Newsweek, November 1, 1999.

“Ewe U.S. Department of Labor a ekieki pwe tori 2005, eli eu na aulungatin ekkewe mi sochungio seni college resap kuna eu angang mi fichiiti ar degree.”​—The Futurist, July/​August 2000.

Inaamwo ika a lapelo ewe lamoten kaeo lon eu sukul fan iten chommong angang nge . . . , ewe sile mi lamot fan iten ekkeei angang a kawor lon high sukul. Weween pwe ewe math, allea, me mak, emon a kaeo lupwen a tori mwichen tiu . . . , nge esap lupwen a feilo college. . . . Ekkewe chon sukul ra tongeni kuna eu angang mi murinno inaamwo ika ese feilo college, nge a lamot ar repwe silefichi met ra kaeo lon high sukul.”​—American Educator, Spring 2004.

“Chommong college rese kan alisi ekkewe chon sukul ar repwe wiliiti chon angang mwirin ra sochungio. A lapelo ekkewe aramas mi mochen feilo lon ekkewe vocational sukul. Ekkewe ra mochen feilo lon ei sokkun sukul a lapelo ren 48% seni 1996 tori 2000. . . . Nge a kisikisilo lamoten ekkewe diploma seni college aramas repwe angang ngeni ren fite ier.”​—Time, January 24, 2005.

Pokiten ekkeei poraus, a lapelo tipemwaramwaren chommong sense ussun ewe lamoten sukul tekia. Iei met a mak lon ena chassi: “Sise asukula aramas fan iten ewe angang repwe fori lon mwach kkan.” Nge iei met ewe Paipel a apasa: ”Iei alon ewe Samol mi Lapalap om Chon Amanau, Ewe mi Pin lon Israel, ’Ngang ewe Samol mi Lapalap om we Kot. Ua aiti ngonuk mine kopwe feioch ren, ua pwal emweni ngonuk ewe al kopwe fetal won. Amwo kopwe auselinga ai kewe alluk! Murin om kinamwe epwe wewe ngeni eu chanpupu, nge om pwung epwe wewe ngeni nomongun lematau.’”​—Aisea 48:17, 18.

[Sasing lon pekin taropwe 12]

Ra likitalo pwisin ar angang me ra tapwelo mwirin Jises

[Sasing lon pekin taropwe 17]

Sam me in chon Kraist ra alisi nour kewe pwe repwe pochokkul lon pekin ngun seni le kukkunuur