Lupwen Emön Attongach A Likitalo Jiowa
1 Mark me Louise, iir Chon Pwäratä Jiowa. Ra emiriti nöür kewe fän tong me tümün ussun met ewe Paipel a fokkun pese ngeni ekkewe sam me in ar repwe föri. (Än Salomon Fos 22:6; 2 Timoti 3:15) Iwe nge, mi alolilen pwe esap meinisin nöür kewe ra sopweilo le angang ngeni Jiowa lupwen ra wattetä. “Ua fokkun pwositi nei kewe mi fen mwalechelo,” Louise a apasa. “Ifa ussun upwe tongeni tükümi ai riäfföü iteiten rän? Lupwen ekkoch ra fos ussun nöür kewe ät, a chechchech leüwei me ua achocho ngeni pwe esap supwutiw chönün mesei.”
2 Ewer, lupwen emön a filatä pwe epwe likitalo Jiowa me än we emmwen seni ewe Paipel, lusun chon ewe famili mi tuppwöl ra letipeta. Irene a apasa: “Ua fokkun tongei pwii we watte. Upwe föri mettoch meinisin fän itan pwe epwe liwinsefälliti Jiowa!” Mongean Maria a sü seni Jiowa me eäni eü manau mi sikepwach. Maria a apasa: “A mmen weires ai upwe pwäkini ei sossot pokiten mongeei we a kirekiröch ngeniei. Ua fokkun pwositi i lupwen meinisin äm kewe famili aua parifengen.”
3 Pwata A Mmen Weires? Pwata än emön nau are pwal ekkoch attonger kewe mi mwalechelo a efisatä letipechou ngeni märäriir kewe Chon Kraist? Pokiten ra silei pwe ewe Paipel a pwonei manau esemuch lon paratis woon fönüfan fän iten chokkewe mi amwöchü ar tuppwöl ngeni Jiowa. (Kol Fel 37:29; 2 Piter 3:13; Pwarata 21:3-5) Ra äneän pwe repwe pwapwaesini ekkena feiöch fengen me pwülüwer, nöür, semer me iner, pwiir me mongeer kewe me nöün, nöür kewe. A metek lon letiper ar ekieki pwe ekkena feiöch repwe tongeni pöüt seni attonger kewe mi fen likitalo Jiowa! Pwal mwo nge ren manauer ikenäi, Chon Kraist ra weweiti pwe än Jiowa kapasen emmwen ra tongeniefeiöchüür. Ina pwata, a tatakkis letiper lupwen ra küna pwe minne atonger kewe ra fotukatiu, repwele kini feiengaü seni.—Aisea 48:17, 18; Kalesia 6:7, 8.
4 Epwe tongeni weires ren ekkoch resaamwo küna än attonger kewe mwalechelo ar repwe unusen weweiti ükükün weiresin emön mi fis ngeni ena. A kkü iteiten kinikinin manauan. Louise a apasa: “A weiresilo ngeniei le mommot lon ekkewe mwich me küna an ekkewe sam me in tattakirfengen me pwopworausfengen me nöür kewe. Ese lifilifil menni fansoun apwapwa epwe fis nge epwe chök ta pokiten ai pwositi attongei mi fen mwalechelo.” Emön elter a chechchemeni ekkewe rüänü ier nöün pwülüwan we nengngin a ükütiu seni än chiechi ngeniir. A apasa: “Fän chommong, ewe ‘fansoun apwapwa’ a aletipechoukem. Ika ua ngeni pwülüwei we eü liffang are am aua kukkunöüfengen lon wiikend, pwülüwei we epwe chök mwittir kechiu, pun a chemeni nöün we nengngin an ese fitikem lon äm pwapwa.”
5 Enlet, pöütuloon attongach lon pekin ngün, ina eü mettoch mi kon eriäfföü ngeni chon fel ngeni Jiowa. (Fofor 14:22) Jises a apasa pwe än emön etiwa an we afalafal epwe tongeni etipefeseni ekkoch famili. (Mattu 10:34-38) Esap weween pwe ewe pworaus seni Paipel a äimufesenni ewe famili. Nge ewe refiref lefilen ewe famili a fis pokiten ewe emön ese lükü are ese tuppwöl a oput, sü seni me pwal mwo nge ü ngeni ewe enlet. Iwe nge, sipwe tongeni kilisou ngeni Jiowa pun ese likitalo nöün kewe mi tuppwöl nge a fen awora minen älillis fän iten ar repwe pworacho ngeni ekkewe sossot ra toriir. Ika ka letipechou iei ren attongom we mi fen mwalechelo, ikkefa ekkewe kapasen emmwen seni Paipel epwe tongeni älisuk pwe kopwe likiitü fan ewe riäfföü me chüen küna pwapwa me menemenöch?
6 Likiitü: “Oupwe pwisin aukemieta . . . , oupwe iseis pwisin ämi lon ewe tongen Kot.” (Juta 20, 21) Neman iei mwo, kose tongeni föri och mettoch le älisi emönnewe mi fen ükütiu seni an angang ngeni Jiowa. Iwe nge, mi lamot pwe en me chon om famili mi tuppwöl oupwe akkapöchökkülafengennikemitä. Veronica a wor ülümön nöün ät, nge rüüemön ra pöütalo ewe enlet. A apasa: “Emön a ächema ngenikem me pwülüwei lamoten äm aupwe apöchökkülakem lon pekin ngün, pwe aupwe tufichin etiwaöchü nöüm kewe ät ika ra miritsefällilo. Iö chök mwo epwe älisisefäli ewe alüwöl mi mwalechelo ika letipen seman we ese chüen pöchökkül?”
7 Kopwe achocho lon pekin ngün pwe kopwe chök pöchökkülelo. A kapachelong om föralo eü kokkootun käeö ekkewe pworaus mi alolloon lon Paipel me om fiffiti ekkewe mwich. Awora om fansoun le älisi ekkewe ekkoch lon ewe mwichefel ükükün om tufich. Eli le poputään epwe ekis weires om kopwe föri ekkeei mettoch. Veronica a apasa: “Äkkäeüin, ua mochen eimueilo seni aramas ussun chök emön man a feiengaü. Nge pwülüwei we a chök apöchökkülaei pwe upwe sopwelo le fiti meinisin äm angang lon pekin ngün. A tümünü pwe aupwe fiti mwich iteitan. Lon fansoun mwichelap, a mmen weires ngeniei le fiti me chuuri chommong aramas. Nge ewe mwich a rifengenikem me Jiowa. Nöüm we ät mi tuppwöl a pwal küna pöchökkül seni ewe mwichelap.”
8 Maria, ewe a fen mak pworausan akkom, a äkkäeüin küna älillis seni än osukosuk ren an fiffiti ewe angangen afalafal me iei a kan älisi fömön aramas le käeö ewe Paipel. Pwal ina ussun met Laura a apasa: “Inaamwo ika ua chüen kechiu iteiten rän, nge ua kilisou ngeni Jiowa. Pwüngün use sopwöch lon ai emiriti nei kewe ussun ekkewe ekkoch sam me in, nge, a nom rei ewe pworaus mi mürinnö seni Paipel mi tongeni älisi ekkewe famili lon ekkeei ränin le sopwoloon.”
9 Kopwe äpilükülüköch. Tong a “luku mettoch meinisin.” (1 Korint 13:7) Ken a apasa: “Lupwen nöüm kewe ra likitalo ewe al mi enlet, me rei a ussun itä nge ra fen mälo. Nge, mwirin mäloon lippweei we, a siwil ai ekiek. Ua kilisou pwe nei kewe rese wesewesen mälo nge Jiowa a chüen suuki ewe al pwe repwe tongeni liwinsefäl.” Ren enletin, chommong lein ekkewe mi sü seni ewe enlet ra liwinsefäl.—Luk 15:11-24.
10 Ü ngeni ewe ekiekin pwisin etipisuk. Ekkewe sam me in ra kan chemenisefälli ussun napanapen ar föfför ngeni nöür kewe nge ra niamam pokiten ra meefi pwe rese förfichi wiser. Iwe nge, Isikiel 18:20 a affata pwe Jiowa a apwüngü ewe chon tipis pokiten än filingaü nge esap fen apwüngü seman me inan. Lon ewe puken Än Salomon Fos a wor chommong pesepes fän iten ekkewe sam me in ar repwe emiriti nöür kewe, nge a fen kon chommong seni ena ekkewe pesepes ngeni ekkewe nau ar repwe älleäsochisi semer kewe me iner. Ewer, wisen ekkewe nau ar repwe älleäsochisi än semer me iner kewe käit seni Paipel. Inaamwo ika ka meefi pwe ka fen mwäällilo fän fite me ir tipisum, nge esap weween pwe om kana föfför mwääl ra efisi an attongom we sü seni ewe enlet. Esor lamoten om kopwe ekkekieki “itä ika ua chök föri ien me ien, neman ese pwal fis ngeni ena mettoch.” Kopwe käeö seni om kewe mwääl, apposa letipom pwe kosap chüen försefälliir me tingor omusomus seni Jiowa lon iotek. (Kol Fel 103:8-14; Aisea 55:7) Nefotofot ngeni fansoun mwach, kosap lesöküriti met a fis me loom.
11 Suföliiti än Jiowa we kokkoot fän iten emirit. Ika märärum a küna kapwüng seni ewe mwichefel, kopwe chechchemeni pwe än Jiowa na kokkoot fän iten emirit epwe kan efeiöchü meinisin, kapachelong ewe chon tipis. (Ipru 12:11) Ina popun, achocho ngeni om kosap kütta mwäälin ekkewe elter mi wisen angang woon än nöüm we osukosuk. Nge chechchemeni pwe ach fitipacheiti än Jiowa we kokkoot epwe uwaani uwa mi mürinnö nge ach ü ngeni än we kokkot epwe chök alapalo ach riäfföü.
12 Mwirin än Israel ngaselo seni Isip, Moses a wisen eäni ewe wis sou kapwüng. (Ekistos 18:13-16) Pokiten lon pwüngüloon ewe kapwüng a kan wor emön epwe feiöch me pwal emön epwe osupwang, iwe ese mwääl mei wor ekkoch ra lichippüng ren än Moses kewe minen kapwüng. Neman ren än ekkoch chon Israel kütta mwäälin än Moses kewe minen kapwüng a efisatä ar ü ngeni än Moses emmwen. Iwe nge, Jiowa a nöünöü Moses le emmweni Nöün kewe aramas. Ina popun, Jiowa a apwüngü ekkewe chon ü ngeni pwal chon ar famili mi fitiir nge ese apwüngü Moses. (Numperis 16:31-35) Sia tongeni käeö seni ei lesen pwe sipwe achocho le süföliti me tipemecheres ngeni ekkewe minen apwüng chon emmweni ach mwicheich ra föri ikenäi.
13 Lon ei pworaus, Delores a chechchemeni pwe a weires ngeni än epwe eäni eü ekiek mi pwüng lupwen nöün we nengngin a küna kapwüng seni ewe mwichefel. A apasa: “Ai äkkälleäni fän fite ekkewe pworaus mi weneiti ussun tipachchemen än Jiowa we kokkoot a mmen älisiei. Ua makkei lon eü puk ekkewe pworaus me afalafal mi tongeni älisiei le likiitü me sopweilo ai angang fän iten Jiowa.” Mei pwal wor eü mettoch epwe älisikich le likiitü.
14 Uwawu om memmeef. Epwe tongeni älisuk ika kopwe uwawu om memmeef ngeni emön are rüüemön chiechiom ka meefi lükülük woor. Filiöchü chiechiom kewe repwe tongeni älisuk le eäni eü ekiek mi mürinnö. Epwe pwal fokkun älisuk ika ka ‘niinalo masouen letipom’ ngeni Jiowa lon iotek. (Kol Fel 62:7, 8) Pwata? Pun a sileöchü alolloonun riäfföün letipom. Ren chök awewe, neman ka meefi pwe ese pwüng pwe ka pwisin küna ena esin riäfföü. Sanne, en ewe a pöütalo Jiowa. Uwawu meefiom ngeni Jiowa lon iotek me tingorei an epwe älisuk pwe kosap kon letipechou ren met a fis ngonuk.—Kol Fel 37:5.
15 Lo, lo, lo, kopwe tongeni nemeni om kewe memmeef. Nge iei mwo, kosap achanu le apwapwai Semach we lon läng me kosap ekieki pwe ekkeei mettoch mi lamot-mwääl. (Kalesia 6:9) Chechchemeni mwo pwe ika sia likitalo Jiowa, ekkewe osukosuk repwe chüen nom rech. Iwe nge, ika sipwe chök amwöchü ach tuppwöl ngeni I, epwe wor rech än Jiowa älillis fän ekkewe sossot. Kopwe lükülük pwe Jiowa a äfänni ükükün om riäfföü me epwe akkapöchökkülok lon fansoun mi fich.—2 Korint 4:7; Filipai 4:13; Ipru 4:16.
[Pwóór lón pekin taropwe 4]
Ifa Ussun Kopwe Likiitü
◆ “Oupwe pwisin aukemieta . . . , oupwe iseis pwisin ämi lon ewe tongen Kot.”—Juta 20, 21.
◆ Kopwe äpilükülüköch.—1 Korint 13:7.
◆ Ü ngeni ewe ekiekin pwisin etipisuk. —Isikiel 18:20.
◆ Süföliiti än Jiowa we kokkoot fän iten emirit.—Ipru 12:11.
◆ Uwawu om memmeef.—Kol Fel 62:7, 8.