Asukula Nöüm kewe le Uwawu Meefier lon Mwich

PERLA, emön fin Mexico, a chechchemeni pwe le nengnginin, inan we a älisi le ammolnatä eü pworaus mi mwochomwoch epwe uwawu fansoun ewe käeö lon Ewe Leenien Mas. Iei Perla a nöüni emön ät nimu ierin. Met a föri pwe epwe pwal älisi nöün? A apasa: “A lamot upwe akkom ammolnatä ewe Leenien Mas. Atun ai ammolnatä, ua kan kütta eü parakraf nei we epwe weweiti, ewe a tongeni aweweei lon pwisin an fos. Mwirin, äm aua käeöfichi ena parakraf, nei we a kan aita ngeni ‘ai kinikin’. Ua eisini pwe epwe awewe ngeniei lon ewe kapas a weweiti. Mwirin äm aua praktis fän fitu. A kamwöch efoch amuch ussun chök nöün we ‘mike’ pwe epwe silei nöünöün ewe ‘mike’ lupwen epwe uwawu meefian. Ua fokkun pwapwa pun iteiten mwich a kan eitätä pöün me uwawu meefian. Fän chommong a feilo chuuri ewe chon emmweni ewe käeö mwen poputään ewe mwich me a ereni menni kapas eis epwe pölüeni.

Jens, emön elter lon eü kumi mi eäni fosun Hindi, a wor rüüemön nöün ät, ruu ier me rüänü ierin. Lupwen Jens me pwülüwan we ra ammolnatä fän iten ewe mwich me nöür kewe, ra ammolnatä ussun chök ewe a käeö seni seman me inan. A apasa: “Äm aua filatä menni kinikinin ewe lesen nöüm kewe ra weweiti. Mwirin, äm aua sotun aweweei masouan eü lesen are menlapen ewe pworaus. Iwe mwirin, äm aua kapas eis ussun ekkewe mettoch äm aua mochen repwe pölüeni lon mwich. Fän chommong äm aua mäirü ren ekkewe pworaus ra apasawu lon pwisin ar fos. Lapalapen ar fos a pwäratä ussun met ra weweiti. Ina popun, ar kewe memmeef lon mwich ra wenewenen mwareiti Jiowa me ra popu seni enletin ar lükü.”