“Ewe Äeüin Manausefäl”—A Fis Iei!

“Chokewe ra fen mäla lon ar lükü Kraist repwe akomwen manausefäl.”—1 TESALONIKA 4:16.

“EKKEWE chon manau ra silei pwe repwe mäla.” A enlet ena pworaus seni ewe fansoun Atam a tipis. Lon uruwon aramas, iteiten aramas meinisin ra silei pwe repwe mälo, nge chommong ra ekieki: ‘Met epwe fis mwirin? Ifa napanapen ekkewe mi mälo?’ Ewe Paipel a pölüeni: “Ekewe sotup resap silei och mettoch.”—Än Salomon Afalafal 9:5.

² Ika a ina, mei wor äpilükülükün ir kewe mi fen mälo? Ewer. Pwüngün pwe a lamot ena ika epwe pwönütä otaen Kot ngeni aramas seni lepopun. Ren fitepükü ier, nöün Kot kewe chon angang mi tuppwöl ra anganga ar lükü woon än Jiowa we pwon ussun ewe Mwirimwir mi epwe nielo Setan me amoielo ekkewe minen efeiengaü a efisi. (Keneses 3:15) Lape ngeniir ra fen mälo. Ren ar repwe küna pwönüetään ena pwon me än Jiowa kewe ekkoch pwon, a lamot ar repwe manausefäl. (Ipru 11:13) Mei tufich ena? Ewer, mei tufich. Ewe aposel Paul a apasa: “Epwe fis ewe manausefal ren ekkewe mi pung pwal ekkewe rese pung.” (Fofor 24:15) Lon eü fansoun Paul a amanauasefällietä emön alüwöl itan Iutikus, ätewe a turutiu seni eü asamwocho lon aülüngätin sessärin eü imw, iwe, “ra ekieta, nge a malo.” Iei säingoon me lein ekkewe tiu pworausen angangen manausefäl a mak lon Paipel.—Fofor 20:7-12.a

³ Ekkena tiu manausefäl ra awora popun ach sipwe lükü alon Paul. Ra apöchökkülatä ach lükülük ussun enletin alon Jises: “Fansoun epwe feito, nge chon peias meinisin repwe rong leuwan [leüwen Jises], o repwe tou.” (Jon 5:28, 29) A ifa me watteen apwapwaan ena pworaus! Iwe, a pwal ina eü minen aurur ngeni ekkewe fitu milion aramas mi fen mä seniir attonger kewe!

⁴ Lap ngeni chokkewe mi manausefäl repwe manausefäl woon eü fönüfan mi kinamwe fän nemenemen än Kot we Mwu. (Kölfel 37:10, 11, 29; Aisea 11:6-9; 35:5, 6; 65:21-23) Iwe nge, me mwen an epwe fis ena, pwal ekkoch repwe manausefäl. Akkom, a lamot pwe Jises Kraist epwe manausefäl pwe epwe mwei ngeni Kot aüchean an we asor fän itach. Jises a mälo me manausefäl lon 33 C.E.

⁵ Mwirin, ekkewe chon kepit, “ewe Israelin Kot” repwe eti ewe Samol Jises Kraist lon läng, ikewe ie repwe “nonnomfengen me ewe Samol fansoun meinisin.” (Kalesia 6:16; 1 Tesalonika 4:17) A iteni “ewe aeuin manausefäl.” (Pwarata 20:6) Lupwen a wes ena manausefäl, epwe tori ewe fansoun pwe fite milion aramas repwe manausefäl woon fönüfan fän ar äpilükülükün küna manau esemuch lon ewe Paratis. Ina minne, ese lifilifil ika sipwe äpilükülüküni manau lon läng are woon fönüfan, nge sia fokkun mochen silei ussun “ewe aeuin manausefäl.” Epwe met sokkun manausefäl? Ineet epwe fis?

“Ren Menni Sokkun Inis?”

⁶ Lon nöün we äeüin taropwe ngeni ekkewe chon Korint, Paul a eäni eü kapas eis ussun ewe äeüin manausefäl: “Ifa usun an ekkewe mi malo manausefal, ren menni sokkun inis repwe pwato?” Mwirin, a pölüeni ena kapas eis, a erä: “Mettoch ka fotukatiu esap manaueta ika esap mo malo. . . . Nge Kot epwe ngeni sokkun inis minne a pwisin filata . . . Lingen ekkewe inisin lang eu sokkun, o lingen ekkewe inisin fonufan pwal eu sokkun.”—1 Korint 15:35-40.

⁷ Alon Paul kana ra pwäratä pwe Chon Kraist mi seikitä ren ewe ngün mi fel repwe akkom mälo mwen ar repwe tongeni angei liwiniir lon läng. Mwirin ar mälo, inisiir inisin aramas epwe liwiniti süsüün pwül. (Keneses 3:19) Lon ewe fansoun Kot epwe filatä, repwe manausefällitä ren eü sokkun inis mi atufichiir ar repwe manau lon läng. (1 Jon 3:2) Kot a pwal ngeniir ewe sokkun manau pwe resap chüen tongeni mälo. Esap ina eü mettoch ra eäni seni le uputiuer, ussun itä nge a usalong lon inisiir eü ngün mi esap tongeni mälo. Paul a apasa: “Ei mettoch mi epwe malo epwe ufouf minne esap malo.” Än emön esap chüen mälo, iei eü liffang seni Kot ir kewe repwe fiti ewe äeüin manausefäl repwe “ufouf.”—1 Korint 15:50, 53; Keneses 2:7; 2 Korint 5:1, 2, 8.

⁸ Ekkewe chök 144,000 aramas repwe küna ewe äeüin manausefäl. Jiowa a poputä le filiretä lon Pentikos 33 C.E., ekiselo chök mwirin an amanauasefällietä Jises. “Itan [Jises], o pwal iten Seman we, a mak won chamwer” meinisin. (Pwarata 14:1, 3) Ina minne, rese filitä seni chommong sokkopaten lamalam. Ir meinisin chon angang ngeni Kraist, me pwapwaesini ar uwei iten ewe Sam—Jiowa. Lupwen repwe manausefäl, repwe angei wiser le angang lon läng. Iwe, ra fokkun pwapwa ren ar tufichin angang ngeni Kot.

A Fen Poputä?

⁹ Ineet epwe fis ewe äeüin manausefäl? Mei wor ekkewe chommong pisekin annet pwe a fen poputä. Awewe chök, alöllöfengenni ruu sopwun lon ewe puken Pwäratä. Akkom, nengeni Pwäratä sopwun 12. Ikewe ie, sia älleäni pwe ewe mineföön King Jises Kraist eti nöün kewe chonläng mi fel, ra maun ngeni Setan me nöün kewe timon. (Pwarata 12:7-9) Ussun ei chassi a fen äiti ngenikich fän chommong, ena maun a poputä lon 1914.b Iwe nge, nengeni pwe ese apasa fän eü pwe nöün Kraist kewe chon angang mi kepit ra eti Jises lon ena maun lon läng. Iei, nengeni sopwun 17 lon ewe puken Pwäratä. Ikena ie, sia älleäni pwe mwirin kitetterin “Papilon mi Lapalap,” ewe Lam epwe pworacho ngeni ekkewe mwu. Mwirin a pwal apasa: “Pwal ir kewe a köri o filatä o ra tuppwöl, repwe eti i.” (Pwarata 17:5, 14, NW) Ese mwääl, ir kewe a “köri o filatä me ra tuppwöl” ra fen manausefäl ika repwe eti Jises le asopwalo än Setan fönüfan. Ina minne, ekkewe mi kepit mi mälo mwen Armaketon repwe manausefällitä lefilen 1914 me Armaketon.

¹⁰ Sia tongeni titchiki ineet epwe poputä ewe äeüin manausefäl? Eü esissil a nom lon Pwäratä 7:9-15, pun ewe aposel Jon a mak ussun an längipwi ussun “eu mwich mi fakkun lapalap, esor emon mi tongeni alleani iteiter.” Emön me lein ekkewe 24 elter a pwär ngeni Jon esissilen chon ena mwich mi lapalap, iwe, ekkeei elter ra liosuetä ekkewe 144,000 aramas mi eti Kraist le alemwir lon läng.c (Luk 22:28-30; Pwarata 4:4) Jon a pwisin eäni ewe äpilükülükün manau lon läng, nge pokiten a chüen manau woon fönüfan lupwen ewe elter a fos ngeni, lon ewe längipwi Jon a liosuetä ekkewe mi kepit woon fönüfan resaamwo angei liwiniir lon läng.

¹¹ Ina minne, met sia tongeni weweiti seni ewe pworaus pwe emön me lein ekkewe 24 elter a pwär ngeni Jon esissilen chon ewe mwich mi lapalap? Eli chon ewe mwichen 24 elter mi fen manausefäl ra pwal wisen esileto ekkewe pworaus mi enlet seni Kot ikenäi. Pwata a lamot ena mettoch? Pun a pwälo ngeni nöün Kot kewe chon angang mi kepit woon fönüfan lon 1935 pwüngün esissilen ewe mwich mi lapalap. Ika emön me lein ekkewe 24 elter a esileto ena pworaus mi enlet, epwe wewe ngeni pwe a fen manausefällitä lon läng mwen 1935. Iwe, weween, ena äeüin manausefäl a fen poputä lefilen 1914 me 1935. Sipwe tongeni titchiki ineet a wenewenen fis?

¹² Iei, eli epwe älisikich ach sipwe ekieki ussun eü pworaus seni Paipel mi itä weneiti minne a fis lon ach ei fansoun. Jises Kraist a seikitä pwe epwap wisen Kingen än Kot we Mwu lefilen September me November 29 C.E. Ülüngät esopw ier mwirin, lefilen Mas me May 33 C.E., a manausefäl me wiliti emön ngün mi manaman. Iwe, kapas eis: Pokiten Jises a wiseni wisan we lefilen September me November lon ewe ier 1914, epwe tufich pwe manausefällin nöün kewe chon äppirü mi kepit a poputä ülüngät esopw ier mwirin, lefilen Mas me May, lon 1918? Tufichin ena a achüngü ach ekiek. Inaamwo ika ewe Paipel ese affataöchü, nge a tipeeü ngeni pwal ekkoch wokisin mi esissilatä pwe ewe äeüin manausefäl a poputä ekiselo chök mwirin poputään än Kraist nonnom.

¹³ Awewe chök, Paul a makkei: “Kich ekkewe mi chuen manau o nonom tori warotoon ewe Samol, [nge sap le muchuloon an nonnom] sisap akkom mwen ekkewe mi mourelo. Pun ewe Samol epwe pwisin feitiu seni lang lon an aruor, lon kokoon ewe samolun chonlang, lon tikin rappwa an Kot. Iwe, ekkewe mi malo lon Kraist repwe uta akkom, o mwirin, kich ekkewe mi manau, mi chuen nonom, sipwe eti ir atekita lon kuchu, pwe sipwe churi ewe Samol fan lang. O iei usun sipwe nonnomfengen me ewe Samol fansoun meinisin.” (1 Tesalonika 4:15-17) Ina minne, Chon Kraist mi kepit mi mälo mwen än Kraist nonnom ra manausefällitä läng mwen ir kewe mi chüen manau atun än Kraist nonnom. Weween pwe ewe äeüin manausefäl a poputä ekiselo mwirin a poputä än Kraist nonnom me sopwosopwolo “atun an nonnom.” (1 Korint 15:23, NW) Manausefällin ir meinisin ese fis lon eü chök fansoun, nge ewe äeüin manausefäl a fis ren fitu ier.

“Ra Ngenir Emon me Emon Mangaku Pwechepwech”

¹⁴ Pwal ekieki mwo ewe pisekin pwäratä lon Pwäratä sopwun 6. Ikewe ie a mak pwe Jises a wawa emön oris fän wisan we wisen King pwe epwe pworacho. (Pwarata 6:2) A fokkun watte än ekkewe mwu maunfengen. (Pwarata 6:4) A chöüfetäl lengita. (Pwarata 6:5, 6) Chommong mälapalap ra nielo chommong aramas. (Pwarata 6:8) Ekkeei mettoch meinisin mi fen oesini, a ina napanapen fönüfan seni 1914. Nge a fis pwal eü mettoch. Sia küna eü rongen asor. Iwe, fän ewe rongen asor, sia küna “ngunun ir kewe mi ninilo pokiten ewe kapasen Kot o ren ar pwarata.” (Pwarata 6:9) Pokiten “manauen mönümanau meinisin a nom lon cha,” minne a nom fän ewe rong a liosuetä chchaan nöün Jises kewe chon angang mi ninniilo pokiten ar tinikken le afalafal fän pwora.—Lifitikos 17:11.

¹⁵ Ussun chök chchaan ewe emön mi pwüng itan Epel, chchaan ekkeei Chon Kraist mi ninniilo pokiten ar lükü ra pwal kökö fän iten pwüng. (Keneses 4:10) “Ra leuwommong o pupuchor, ‘Maing Samol Lapalap, en mi fel o enlet, ifa langattamen om kosap apungu o liwini cham ngeni ir mi nonnom won fonufan?’” Met a fis mwirin? “Iwe, ra ngenir emon me emon mangaku pwechepwech o langattam, o a erenir pwe repwe mo asoso pwal ekis fansoun, tori fansoun iteiten chiener chon angang o pwir kewe repwe unusulo, ir kewe repwe ninilo usun chok ekkewe ra fen ninilo.”—Pwarata 6:10, 11.

¹⁶ Ra itä eineti ekkeei mangaku pwechepwech ngeni ewe chcha mi nom fän ewe rong? Aapwi! Ra ngeni aramas ekkena mangaku, ir kewe mi ninniilo, lon kapas monomon, woon ewe rong. Ra asoresini manauer fän iten Jises me iei, ra manausefällitä ren inisin ngün. Ifa ussun sia silei ena mettoch? Lon ewe puken Pwäratä, sia älleäni: “Emon mi pworacho epwe ufouf mangaku pwechepwech, o usap toluelo itan seni lon ewe puken manau.” Pwal chechchemeni mwo pwe ekkewe 24 elter “ra ufouf mangaku pwechepwech, o a wor mwarer gold won mokurer.” (Pwarata 3:5; 4:4) Ina minne, mwirin maun, lengita, me mälapalap ra poputä le angaüa ewe fönüfan, chon ewe mwichen 144,000 mi fen mälo mi liosutiu ren ewe chcha fän ewe rong, ra manausefällitä läng me üföüf mangaku pwechepwech lon kapas monomon.

¹⁷ Ir kewe mi kerän manausefäl repwe “asoso.” A lamot ar repwe mosonottam le witiwiti än Kot ränin kapwüng. “Chiener kewe chon angang,” ekkewe Chon Kraist mi kepit mi chüen nonnom woon fönüfan, resaamwo pwäratä ar tuppwöl fän sossot. Lupwen a war ewe fansoun kapwüng, epwe muchulo ewe “asoso.” (Pwarata 7:3) Lon ena fansoun, ekkena chon manausefäl repwe eti ewe Samol Jises Kraist le nielo ekkewe mi ngaü, pachelong ir kewe mi nielo Chon Kraist mi esor tipisiir.—2 Tesalonika 1:7-10.

Met Weween Ngenikich

¹⁸ Än Kot we Kapas ese affata ewe chök rän an epwe poputä ewe äeüin manausefäl, nge a pwäratä pwe epwe sopwosopwolo ren fite ier, atun än Kraist nonnom. Ekkewe Chon Kraist mi kepit mi fen mälo mwen poputään än Kraist nonnom, repwe akkom manausefäl. Lupwen ekkewe Chon Kraist mi kepit woon fönüfan repwe mälo, le fetälin ierin än Kraist nonnom, “lon eu chok amarup” repwe wiliti ngün mi manaman. (1 Korint 15:52) Itä meinisin mi kepit repwe küna liwiniir lon läng mwen ewe maunen Armaketon? Sise silei. Iwe nge, sia silei pwe lon ewe fansoun Kot epwe filatä, meinisin ekkewe 144,000 aramas repwe ütä woon ewe Chuuk Saion lon läng.

¹⁹ Sia pwal silei pwe a lap me lein ekkewe 144,000 aramas ra fen nonnom ren Kraist. Chokisikis chök ra chüen nonnom woon fönüfan. A ifa me watteen ewe pisekin pwäratä pwe a mwittirito än Kot kapwüng! Ekiselo chök, epwe kitetterilo unusen än Setan ototen fönüfan. Setan epwe koturulong lon ewe apis. Mwirin, epwe tongeni poputä manausefällin ekkewe ekkoch aramas, iwe, woon longolongun än Jises asorun möön kepich, aramas mi tuppwöl repwe tongeni unusöchülo, nge ina ewe sokkun manau Atam a asechalo. Lon ei fansoun, a pwönüetä än Jiowa we oesini mi mak lon Keneses 3:15. A ifa me watteen apwapwaan ach manau lon ena fansoun!

[Footnotes]

Ka Tongeni Aweweei?

•Ifa ussun ekkewe wokisin mi mak fan ra älisikich le mirititi ineet epwe fis ewe “aeuin manausefal”?

• Pwarata 12:7; 17:14

• Pwarata 7:13, 14

• 1 Korint 15:23; 1 Tesalonika 4:15-17

• Pwarata 6:2, 9-11

[Ekkewe kapas eis fan iten ewe lesen]

1, 2. (a) Ifa äpilükülükün ekkewe mi fen mälo? (b) Om lükü ewe mettoch manausefäl a alongolong woon met? (Nengeni ewe footnote.)

3. Ifa ussun alon Jises lon Jon 5:28, 29, a aururuk, me pwata?

4, 5. Ikkefa ekkewe sokkun manausefäl ewe Paipel a kapas ussun, me menni leir sipwe käeö lon ei lesen?

6, 7. (a) Met a lamot an epwe fis mwen ekkewe Chon Kraist mi kepit repwe feitä läng? (b) Met sokkun inis repwe inisini?

8. Pwata sia silei pwe Kot ese filatä ekkewe 144,000 aramas seni lein chon fiti chommong sokkopaten lamalam?

9. Ifa ussun Pwäratä 12:7 me 17:14 ra älisikich le esissilatä ewe fansoun lupwen epwe poputä ewe äeüin manausefäl?

10, 11. (a) Met ekkewe 24 elter ra liosuetä, me met emön leir a pwär ngeni Jon? (b) Met sia weweiti seni ei pworaus?

12. Aweweei mwo ewe popun epwe tufich ach sipwe ekieki pwe ewe äeüin manausefäl a tongeni poputä lefilen Mas me May lon 1918.

13. Ifa ussun 1 Tesalonika 4:15-17 a esissilatä pwe ewe äeüin manausefäl a poputä ekiselo mwirin le poputään än Kraist nonnom?

14. (a) Ineet ekkewe längipwi lon Pwäratä sopwun 6 repwe pwönütä? (b) Met a fis lon Pwäratä 6:9?

15, 16. Aweweei mwo ewe popun alon Pwäratä 6:10, 11 a kapas ussun ewe äeüin manausefäl.

17. Met weween ar repwe “asoso” ir kewe mi üföüf ekkewe mangaku mi pwechepwech?

18, 19. (a) Ikkefa ekkewe popun kopwe tongeni lükü pwe a fis iei ewe äeüin manausefäl? (b) Met meefiom pokiten om weweiti pworausen ewe äeüin manausefäl?

[Lios lon pekin taropwe 30]

Ikkefa ekkewe manausefäl repwe fis mwen ekkewe ekkoch aramas repwe manausefällitä seni mälo?

[Lios lon pekin taropwe 31]

Met weween ekkoch mi möür lon mälo ra angei üfer mangaku mi pwechepwech?