Apposa Letipom Lupwen Emön Nau a Älleäsolap
EMON fin Kraist sipwe eita ngeni Joy (sap wesewesen itan) a achocho le ämääraatä nöün we ät pwe epwe echeni Jiowa Kot. Iwe nge, lupwen a tori 18 ika 19 ierin, nöün we a ü ngeni me a sü seni imwer we. Joy a apasa, “Use mwo küna fän eü ei sokkun letipechou. Ua meefi lichippüng, letipeta, me riäfföü. Ussun itä nge ua chök ekieki pwe mettoch meinisin esap chüen sopwöch.”
Neman ka pwal achocho le ämääri noum kewe pwe repwe echeni Kot me angang ngeni—nge emön are ekkoch leir ra sape seni i. Ifa ussun kopwe tongeni likiitü fän om lichippüng mi chou? Met epwe älisuk le üppos lon om angang ngeni Jiowa?
Atun Nöün Jiowa kewe Ra Sape Seni
Akkom, kopwe silei pwe Jiowa a weweiti meefiom. Aisea 49:15 a apasa: “Ifa usun, eman fefin epwe tongeni manlükala nöün mönükol, pwe esap tongeäsini nöün won inisin? Nge are epwe fen manlükala, ngang üsap manlukuk.” Ewer, Jiowa a meefi minne ekkewe sam me in ra meefi. Ina minne, anchangei mwo an pwapwa lupwen nöün kewe chonläng meinisin ra mwareiti me angang ngeni i. Lupwen a pölüeni Jop “seni lon ewe mölümöl,” Jiowa a chechchemeni ekkewe fansoun pwapwa ren an we familien ngün mi tipeeüfengen, a apasa: “Ia ka nom ie, lupwen üa föri longolongun fanüfan? . . . Lupwen ekewe fün lesosor ra kölfengen, nge nöün Kot kewe chon läng meinisin ra mweireir fän pwapwa?”—Hiop 38:1, 4, 7.
Mwirin och fansoun, ewe Kot mi enlet a küna emön nöün kewe chonläng mi unusöch a ü ngeni i, iwe, a wiliti Setan, weween, “Chon Ü Ngeni.” Jiowa a pwal küna nöün we äemönün aramas, Atam, me pwülüwan we mi unusöch, If, ar ra fiti Setan le ü ngeni i. (Keneses 3:1-6; Pwarata 12:9) Mwirin, pwal ekkoch chonläng “ra likitala wesewesen lenier” me ü ngeni Kot.—Juta 6.
Ewe Paipel ese affata meefien Jiowa lupwen ekkoch me lein nöün kewe mi unusöch ra ü ngeni i. Iwe nge, ewe Paipel a affata: “Iwe, ewe Samol mi Lapalap a küna pwe än aramas föföringau a fokun wattela won fonüfan, nge ekiekin leluker a chök ngauala fansoun meinisin. Iwe, ewe Samol mi Lapalap a lamalamala ren an föri aramas won fonüfan, letipan a pwal fokun weires ren.” (Keneses 6:5, 6) Än chon Israel ü ngeni i, nge ir nöün Kot kewe mi filitä, a pwal “achouu” me “aletipengaua” i.—Kölfel 78:40, 41.
Esor ach tipemwaramwar pwe Jiowa a tongei ekkewe sam me in mi meefi letipechou me letipeta ren lükümachen nöür kewe. Lon an we Kapas, ewe Paipel, a fen awora kapasen fön me apöchökkül pwe epwe älisi ekkena sam me in ar repwe mökürochou. Kot a peseer ar repwe isetä woon i minne ra aürek ren, atipetekisoneretiu, me ü ngeni Setan ewe Tefil. Sipwe ppii ifa ussun om älleäsochisi ena kapasen fön epwe älisuk le üppos ika noum we epwe lükümach.
Isetä Woon Jiowa Minne Ka Aürek ren
Jiowa a silei pwe esor och mettoch ekkewe sam me in repwe aüreki lap seni ar meefi pwe nöür kewe repwe efeiengaüa pwisin ir are repwe feiengaü ren aramas. Ewe aposel Piter a äitikich eü mettoch epwe älisikich le pwäkini ei me pwal ekkoch osukosuk. A makkei: “Oupwe iseta won i mettoch meinisin, minne oua aurek ren, pun a fen tongeikemi.” (1 Piter 5:7) Met popun ei kapasen pesepes a äkkäeüin weneiti semen me inen emön nau mi lükümach?
Lupwen noum we a kükkün, ka tinikken le tümünü i seni minen efeiengaü, iwe, neman i a tipemecheres ngeni om emmwen mi tong. Iwe nge, lupwen a wattetä, eli a kükkünülo om nemenem woon, nge ese kükkünülo om mochen tümünü i seni feiengaü. Pwüngün pwe a fen wattelo.
Ina popun, lupwen noum we a lükümach me a feiengaü lon pekin ngün, pekin memmeef, are pekin aion, neman kopwe meefi mengiringir. A ina meefien Joy, ewe in sia fen kapas ussun. A apasa: “Iteiten rän, ua meefi riäfföü ren ai angangaü, ua pwal chemenisefälli pworausen loom.” Äkkäeüin, lon ena esin fansoun, Jiowa a mochen kopwe “iseta won i mettoch meinisin, minne [ka] aurek ren.” Ika ina, epwe älisuk. Ewe sou makkei kölfel a erä, “Kopwe monätä won ewe Samol mi Lapalap om weires, pwe i epwe tümwünük. Esap fokun mwütätä pwe ewe chon pwüng epwe kuf.” (Kölfel 55:22) A aururu Joy. A awewe: “Ua kapas ngeni Jiowa ussun meefien letipei meinisin. Ua chök pwärawu meefiei, iwe, ua kinamwelo.”
Eli, pokiten en kese unusöch, fän ekkoch ka mwäällilo lon om ämääri noum we. Iwe nge, pwata ka chök ekilapei ekkena fansoun? Jiowa ese föri ena, pun ewe sou makkei kölfel a kölü: “SAMOL, are kopwe chechemeni ekkewe tipis, Samol, io epwe tongeni uta?” (Kölfel 130:3) Nge meiti mwo ika en emön sam are in mi unusöch, nge mei chüen tufich noum we epwe lükümach ngonuk. Ina minne, äiti ngeni Jiowa meefiom lon iotek, iwe, epwe älisuk le mökürochou fän. Iwe nge, ika pwisin en kopwe apposa letipom lon om angang ngeni Jiowa me kesap kkuf ren Setan, a lamot om kopwe föri pwal ekkoch mettoch.
Ätipetekisona Pwisin En
Piter a makkei: “Iei mine oupwe atekisonakemi fän pöün Kot mi manaman, pwe epwe atekiakemi lon an fansoun mi fich.” (1 Piter 5:6) Pwata a lamot tipetekison lupwen emön nau a lükümach? Lükün an ämeef ngonuk mengiringir me riäfföü, eli noum we epwe pwal äsäüok. Eli kopwe lolilen pwe föfförün noum we a aitengaüa om famili, äkkäeüin, ika epwe katowu seni lon ewe mwichefelin chon Kraist. Om pwisin mengiringir me om meefi säü epwe tongeni pinei om fiffiti mwich.
Fän ena sokkun osukosuk, a lamot om kopwe mirit. Än Salomon Fos 18:1 a öüröüra: “Eman mi püsin imwüla a chök kütta an mochen, a ü ngeni meinisin mine aramas ra ekieki pwe a pwüng.” Ren om fiffiti mwich iteitan inaamwo ika ka letipechou, epwe kawor ngonuk emirit me apöchökkül. Joy a pwäri, “Le poputään, use mochen küna mesen aramas. Nge ua ächema ngeniei lamoten ai kokkot lon pekin ngün. Pwal eü, ika ua chök nonnom leimw, upwe ekilapei ai kewe osukosuk. Ekkewe mwich ra älisiei le afota ekkewe mettochun ngün mi aüfichieitä. Ua fokkun kilisou pwe use äläemönülo pwe ete pöüt seniei älillisin pwiich kewe mi apöchökkül.”—Ipru 10:24, 25.
Pwal chechchemeni mwo pwe emön me emön lon eü famili epwe “püsin mwärei wosan wosochou,” osan chon Kraist meinisin. (Kalesia 6:5) Jiowa a mochen ekkewe sam me in repwe echeni me emiriti nöür kewe. A pwal mochen pwe semirit repwe älleäsochisi me asamolu semer kewe me iner. Ika ekkewe sam me in repwe achocho ükükün ar tufich ar repwe ffoleniöchü nöür kewe “ren sokkun amirit me fonou me ren Jiowa,” repwe itöch mwen mesen Jiowa. (Efisus 6:1-4) Ika emön nau a ü ngeni än ekkewe sam me in emirit me fön mi fiti tong, ewe nau epwe itengaü. Än Salomon Fos 20:11 a erä, “Pwal lapalapen manauen eman semirit a pwä ren an föför, ika a limöch o pwüng lon mine a föri.” Än Setan ü ngeni Kot ese aitengaüa Jiowa me ren ekkewe mi silei enletin ewe pworaus.
Oupwe Ü Ngeni ewe Tefil
Piter a öüröüra: “Oupwe amolakemi o mamasa, pun Tefil, ewe chon oputakemi, a fetalfeil usun eman laion mi wörüwör, nge a kütta iö epwe oromala.” (1 Piter 5:8) Ussun chök emön laion, ewe Tefil a äkkäeüin chechcheei ekkewe mi kükkün me ir kewe resaamwo mirit. Loom loom, ekkewe laion ra feilfetäl lon Israel me ra kükkütta manauen ekkewe maan mi fesir. Ika emön kükkün lam a mwälechelo seni ewe pwin siip, epwe mecheres an epwe feiengaü. Inan we epwe pennükü manauan fän iten an epwe seläni nöün we. Iwe nge, pwal mwo nge emön siip mi watte ese tongeni akkufu emön laion. Ina popun, a lamot chon masen siip mi pwora pwe repwe tüttümünü ewe pwin siip.—1 Samuel 17:34, 35.
Ren an epwe tüttümünü nöün kewe siip lon kapas monomon seni ewe “laion mi orior,” Jiowa a akkota an epwe wor chon masen siip lon pekin ngün ar repwe tüttümünü ewe pwiin siip fän ewe “Meilapen Chonmas,” Jises Kraist. (1 Piter 5:4) Piter a pesei ekkena mwän mi seikitä: “Oupwe föri ämi angang, sap fänäsengesin ämi chök mochen angei liwin, nge seni wesewesen ämi mochen föri ewe angang.” (1 Piter 5:1, 2) Ren älillisin ämi kana sam me in, ekkena chon masen siip repwe tongeni älisi ewe nau an epwe awenechara alan lon pekin ngün.
Lupwen epwe lamot ekkewe chon Kraist chon masen siip repwe fönöü noum we mi lükümach, eli kopwe mochen tümünü i seni ewe angangen emirit. Iwe nge, epwe fokkun mwääl om kopwe föri ena. Piter a apasa: “Oupwe u ngeni i [ewe Tefil]”—nge ousap ü ngeni ekkewe chon mas lon pekin ngün.—1 Piter 5:9.
Lupwen A Chou ewe Angangen Emirit
Ika noum we emön chon Kraist mi papatais nge ese aier, eli epwe fis ngeni ewe angangen emirit mi chou seni meinisin—epwe katowu seni ewe mwichefel. Seni ena atun, ükükün om nonnom ren epwe alongolong woon ierin me pwal ekkoch napanap.
Ika noum we esaamwo tori 21 ierin me a nonnom lon imwom we, pwüngün pwe kopwe chüen chök tüttümünü lon pekin aion. Epwe pwal lamot om kopwe wisen emiriti me fönöü. (Än Salomon Fos 1:8-18; 6:20-22; 29:17) Eli kopwe wisen käeö ngeni Paipel, me i epwe fiffiti mwökütükütün. Kopwe pwal äiti ngeni ekkoch wokisin lon Paipel me ekkewe puk mi kawor ren “ewe chon angang mi tuppwel o tipatchem.” (Mattu 24:45) Kopwe pwal tongeni uwei noum we ngeni ekkewe mwich me epwe mot ünükküm. Sia äneänei pwe epwe lefareni ekkewe kapasen fön seni Paipel.
Iwe nge, mi sokkolo ika ewe nau mi katowu ese chüen kükkün ierin me ese chüen nonnom lon imwom we. Ewe aposel Paul a fönöü ekkewe chon Kraist lon Korint loom: “Oute chiechi ngeni emon mi iteni pwich, are a fori lisou, are mochenia, are fel ngeni anumwal, are lalingau, are unupuch, are mocho; ousap eti ekkeei sokkun aramas le mongo.” (1 Korint 5:11) Inaamwo ika fän ekkoch, epwe lamot oupwe mwichfengen pwe oupwe pwüngüpwüng woon osukosuk lon ämi famili, nge emön chon Kraist sam are in epwe aükükü an chiechi ngeni nöün we mi katowu.
Lupwen ekkewe chon Kraist chon mas ra fönöü noum we mi lükümach, esap pwäri mirit ika kopwe pöönalo are tunalo ar föfför mi alongolong woon Paipel. Om peppeni noum we mi lükümach ren om pöönalo än ekkewe elter angangen emirit esap tüttümünü i seni ewe Tefil. Pwüngün pwe kopwe efeiengaüa pöchökkülen om lükü. Iwe nge, ren om apöchökküla än ekkewe chon mas angangen emirit, kopwe “lukuchar lon [om] luku” me awora älillis mi lamot chapur ngeni noum we.—1 Piter 5:9.
Jiowa Epwe Alikiitük
Ika noum we epwe ü ngonuk, chechchemeni pwe kese äläemön chök. Ena sokkun osukosuk a pwal tori ekkoch pwüpwülü. Ese lifilifil met sokkun sossot epwe torikich, nge Jiowa epwe alikiitükich.—Kölfel 68:19.
Eäni lükülük woon Jiowa lon iotek. Fiffiti mwökütükütün ewe mwichefelin chon Kraist iteitan. Apöchökküla ewe angangen emirit än ekkewe chon mas mi seikitä. Ren om föfföri ekkena mettoch, kopwe apposa letipom. Iwe, om isetiu eü leenien äppirü mi mürinnö epwe tongeni älisi noum we an epwe ngüüri än Jiowa etiwetiw pwe epwe liwiniti I.—Malakai 3:6, 7.
[Lios lon pekin taropwe 9]
Angei pöchökkül seni iotek me ewe mwichefelin chon Kraist