Iö A Tongeni Silei Pworausen Mwachkkan?
“Ngang chök Kot. . . . . Üa osuni me le popun mine epwe fis le sopolan, üa pwal pwäratä seni ekewe fansoun lom mettoch resamwo fis.” —Aisea 46:9, 10.
LON ei fansoun mi nükünüküngaü, ekkewe sou ätittina pworausen nemenem, sopai, me nonnomun aramas ra kan käeö uruwo me ekiekin aramas lon ei fansoun fän iten ar repwe oesini pworausen mwachkkan. Pwal fitemön mi watte ar osupwang ra küt älillis seni pween füü me angangen roong ren ar repwe silei met epwe fis ngeniir lon mwachkkan. Fän chommong, chokkana ra nichipung ren minne ra rong. Iwe met, esap tufich ach sipwe silei met epwe fis ngeni ei fönüfan, ach kewe famili, me emön me emön leich? Mei wor emön mi tongeni wesewesen silei pworausen mwachkkan?
Lon alon we ngeni ewe soufos Aisea, ewe mi mak asan, ewe Kot mi Unusen Tekia, Jiowa, a aweweei pwisin an tufichin oesini ussun pworausen mwachkkan. Me ren Aisea, Kot a oesini pwe chon Israel loom loom repwe ngaselo seni fötek lon Papilon, iwe, repwe aüsefällietä Jerusalem me ewe imwen fel. Ifa ükükün titchikin ena oesini? A pwüngü ngeni än Aisea makkei ina epwe 200 ier me mwan pwe Sairos epwe wisen akkufu Papilon. Pwal och, a pwüngü ngeni än Aisea makkei än Sairos rau, weween, epwe ärikalo konikin ewe Chanpupu Iufretis, ewe mi tümünü ena telinimw. A pwal oesini pwe atun waren Sairos, epwe chök suuk asamalapen tittin ewe telinimw. Ina minne, a mecheres än Sairos akkufu.—Aisea 44:24–45:7.
Ra sokkofesen Kot me aramas, pun aramas resap fokkun tongeni silei pworausen mwachkkan. Iei makkeien King Salomon: “Kosap sikesik usun lesor, pun kosap silei mine ewe rän epwe atoto.” (Än Salomon Fos 27:1) Mi chüen pwüng ena. Esor emön aramas a tongeni silei met epwe fis ngeni lon mwachkkan. Pwata Kot a sokko seni aramas? A unusen weweiti mettoch meinisin minne a föratä, pachelong napanapen me sokusokun aramas. Lupwen a filatä, Kot a tongeni silei titchikin pworausen met aramas me mwu repwe föri. Ese fokkun aükük an tufichin nemeni met epwe fis le sopwoloon. Jiowa a apasa: “Lupwen nei chon angang a osuni och, lupwen üa tinala nei chon künö pwe epwe pwärätä mine üa akota, üpwe pwal fokun apwönüetä mine üa eäni kapas.” (Aisea 44:26) Jiowa Kot chök a enletin tongeni föri ena mettoch.
Inaamwo ika Aisea a manau lap seni 700 ier me mwen Jises ewe Messaia, nge a oesini ussun warotoon ewe Messaia. Iwe nge, äkkäeüin seni 1700 som, chon esiita Paipel ra efisi tipemwaramwar ussun pwüngün ewe puken Aisea. Ra erä pwe makkeien Aisea kewe, esap iir wesewesen kapasen oesini nge emön sou mak a chök makkei me mwirin met a fen fis. Nge mei pwüng alor? Lon 1947, a pwä eü kapiin ewe puken Aisea me pwal ekkoch puk lon eü pokungo arap ngeni ewe Setin Mälo. Ekkewe sou käeö ra ekieki pwe ena kapi a fför lap seni ipükü ier me mwen uputiuen ewe Messaia are Kraist, emönewe ewe puk a mak ussun. Ewer, ewe Paipel a pwäralo pworausen mwachkkan!
Aisea me pwal ekkoch sou makkei puken Paipel resap tongeni oesini seni pwisin ar sile ussun met epwe fis lon mwachkkan. Iwe nge, “ren ewe Ngun mi Fel ra fen apasata kapas me ren Kot.” (2 Piter 1:21, TF) Lon ewe lesen mwirin ei, sipwe afota ekkoch titchikin pworausen manauen Jises Aisea a oesini ussun. Iwe mwirin, sipwe käeö ussun met Jises me nöün kewe chon äppirü ra oesini ussun ach ei fansoun me pwal mwachkkan.