Met A Wesewesen Fis Ngeni Emön Atun A Mälo?

“Aramas meinisin rese tongeni mälo, pwal mwo nge ekkewe mi ngaü . . . Esap tongeni much ar riäfföü seni ewe ekkei ese kul. Pokiten resap mälo, ese pwal tufich repwe ngaselo seni ar riäfföü.”​—Clement seni Alexandria, emön sou mak mi manau orun 1800 ier loom.

USSUN Clement, ekkewe mi apöchökküla ewe afalafal pwe ell ina eü leenien riäfföü, ra lükü pwe a wor ngünün aramas ese tongeni mälo. Nge mei pwüng ena me ren ewe Paipel? Sipwe ppii ifa ussun ewe Paipel a pölüweni ekkena kapas eis fan.

Mwirin och fansoun, met a fis ngeni Atam mwirin an a tipis? Kot ese apasa pwe liwinin an tipis, epwe riäfföüfochofoch lon ell. Nge ewe Paipel a erä pwe Kot a apasa: “Kopwe mongö anom fän molonom tori om kopwe wiliti pwül ka för seni. Pun pwül en, iei popun om kopwe wiliti pwül.” (Ken. 3:19) Kot ese apasa pwe eü mettoch lon inisin Atam a manau mwirin an a mälo. Atun Atam a mälo, a wesewesen mälo.

Mei wor emön ese tongeni mälo? Ese wor. Ewe Paipel a apasa lon Än Salomon Afalafal 3:20: “Iwe, ir meinisin ra feila lon eu chök leni. Ir meinisin ra för seni pwül, repwe pwal liwiniti pwül.” Ewe aposel Paul a makkei: “Iwe, ren eman mwän [Atam] tipis a tolong lon fanüfan, nge an tipis a atoto mäla. Iei popun mäla a tori aramas meinisin, pun ir meinisin ra tipis.” (Rom 5:12) Aramas meinisin chon tipis, iwe, aramas meinisin repwe mälo.

Ekkewe mi mälo ra silei are meefi och? Ewe Paipel a apasa: “Pun ekewe chon manau ra silei pwe repwe mäla. Nge ekewe sotup resap silei och mettoch.” (Än Salomon Afalafal 9:5) Lon an kapas ussun met a fis ngeni aramas atun ra mälo, ewe Paipel apasa: “Repwe liwinlo ngeni en me an pwul; lon ewe chok ran ekiekin letiper kewe repwe poutmwalilo.” (Kölfel 146:4, TF) Ika ekkewe mi mälo rese chüen “silei och mettoch” me “ekiekin letiper kewe repwe poutmwalilo,” ifa ussun ra tongeni meefi riäfföü lon ell?

Jises Kraist ese apasa pwe mi chüen wor ekiek, are memmeef, mwirin mäloon emön, nge a apöpööü mälo ngeni möür. (Jon 11:11-14) Iwe nge, eli ekkoch repwe apasa pwe Jises a afalafala pwe ell a fokkun pwichikkar me ekkewe mi tipis repwe koturulong lon ewe ekkein ell. Sipwe käeö met Jises a wesewesen apasa ussun ell.