Arap ngeni Kot

Emön mi Tongei Pwüngiöch

Ipru 10:26-31

A FIS fän eü än emön pwüngüngaü are kirikiringaü ngonuk, nge ese küna liwinin an föfföringaü, me ese pwal mengiringir? A mmen weires ena esin föfför, äkkäeüin, ika emönewe mi föri epwe itä tongeök. Eli kopwe eis, ‘Pwata Kot a mut ngeni ekkena mettoch ar repwe fis?’a A enlet pwe Jiowa a oput pwüngüngaü meinisin. An we Kapas, ewe Paipel, a alükülüküükich pwe Kot epwe apwüngü ekkewe chon tipis mi tipeförea. Sipwe käeö alon Paul kewe lon Ipru 10:26-31.

Paul a makkei: “Pun are sia chok tipeni foforun tipis mwirin ach sinei o etiwa ewe enlet, iwe, esap chuen wor asor fan asengesin tipis.” (Wokisin 26, TF) Ra fokkun ngaü ekkewe mi chök tipeni ar repwe tipis. Pwata? Äeüin, ar tipis ese fis fän eü chök pokiten ra apwangapwang, nge ina ewe sokkun föfför-mwääl kich meinisin sia föfföri pun sise unusöch. Ra tipeni föfförün tipis. Oruuan, ra pwisin filatä pwe repwe tipis. Ussun Ewe Paipel lon Fosun Merika mi Mecheres a apasa, “pwisin filier pwe repwe föri minne mi ngaü.” Pokiten ra föfföri föfförün tipis seni chök me loom, ra fen eöreni ar repwe napanapeni ekkewe napanap mi ngaü. Aülüngätin, ra tipis nge esap pokiten rese sile. Ra fen “sinei o etiwa ewe enlet” ussun met letipen Kot me an kewe al.

Ifa ekiekin Kot ussun ekkewe chon tipis mi kirikiringaü nge rese aier? Paul a apasa: “Esap chuen wor asor fan asengesin tipis.” Än Kraist asor, ina än Kot liffang ngeni aramas, a pwölüelo ach kewe tipis sia föri pun sise unusöch. (1 Jon 2:1, 2) Nge ekkewe mi föfföri tipis nge rese aier ra pwäratä pwe rese aücheani ei liffang mi aüchea. Mwen mesen Kot, ra “chepeti Noun Kot we, o ekieki usun chaan . . . pwe [ese auchea].” (Wokisin 29, TF) Ren ar kewe föfför, ra turunufasei Jises me ekieki pwe a lamotkisikis chchaan we, pwe a ussun chök chchaan aramas rese unusöch. Ekkena aramas rese meefi kilisou, resap küna älillis seni än Kraist we asor.

Met epwe fis ngeni ekkewe mi ngaü? Ewe Kot mi pwüngiöch a pwonei: “Ngang upwe liwini ngeni ir.” (Wokisin 30) Iei ewe kapasen öüröür ngeni ekkewe mi tipeni föfförün tipis. Ar älleasolapa än Kot kewe allük epwe atoto woor apwüng. Fän chommong, repwe küna chappen pwisin ar kewe föfför. (Kalesia 6:7) Inaamwo ika ese mwittir fis, nge repwe ütä mwen mesen Kot lupwen epwe amoielo pwüngüngaü meinisin seni fönüfan. (Än Salomon Fos 2:21, 22) Paul a öüröüra: “Mi amosok chapur ach sipwe iolo le poun ewe Kot mi manau.”​—Wokisin 31.

A aururu letipach me alükülüküükich ach silei pwe Jiowa Kot a oput än aramas tipeni föfförün tipis, äkkäeüin, chokkewe mi küna weires pokiten ekkewe chon föfföringaü. Sia lükülük pwe sia tongeni likiti ngeni Jiowa pwe epwe liwini ngeni chon föfföringaü, pun a oputa pwüngüngaü meinisin.

[Footnote]