“Oupwe Arap Ngeni Kot, Iwe, Epwe Arap Ngenikemi”

Mwen Me Mwirin A Siwil Manauan

MATSEPANG ese chüen meefi pwe a lamot manauan! I emön nengnginin Lesotho, eü fönü a nom lukanapen Ötiuen Afrika. Matsepang a määritä lon ewe lamalamen Katolik. Ese küna älillis pwe epwe arap ngeni Kot, nge ren fitu ier ekkewe nienkatek ra ngeni i moni pwe repwe lisowu ngeni.

Mwiriloon, Matsepang a lichippüng ren ena lamalam. Ese tongeni lükü pwe a wor emön Koten tong mi enletin tongei aramas. Pokiten ewe riäfföü a küna lon manauan, a watte än Matsepang osukosuk lon pekin memmeef, iwe, a meefi pwe ese lamot manauan. Atun a wattetä a mwittir föfföri föfförün akkachofesä me a rochongaü. A emmwen ngeni an a wiliti emön chon atai allük.

Lo, lo, lo, Matsepang a fiti eü gang mi soläni pisek seni aramas woon ekkewe kusa. A ares me kalapus lon Ötiuen Afrika. Mwirin, ewe mwu a eliwini ngeni Lesotho, wesetään fönüan, ikewe a sopwelo an atai allük, ünüpuch, föfförün akkachofesä, me manau mi limengaü ie.

Atun a fokkun letipechou, Matsepang a siö ngeni Kot lon iotek. A pwonei, “Kot, ika use mä, upwe angang ngonuk ükükün ai tufich.”

Ekiselo mwirin, ekkoch misineri Chon Pwäratä Jiowa ra chuuri Matsepang me ra ereni pwe repwe käeö ngeni ewe Paipel. Seni an käeö, a weweiti pwe Kot ese tenechepwäk, nge a tongei aramas. Iwe nge, a weweiti pwe Setan, “semen kapas chofona,” a raüangaü me otupu aramas pwe epwe ämmeef ngeni ekkoch pwe esor lamoten manauer me Jiowa ese tonger.​—Jon 8:44; Efisus 6:11.

Sokko seni ena, a aururu letipen Matsepang atun a käeö pwe sipwe tongeni küna süfölüch ika sipwe aier seni ach kewe tipis me loom, kütta omusomus seni Kot, me akkachocho le apwapwaai i. Ekkewe chon käeö ngeni ra älisi i le weweiti pwe “Kot mi lapalap seni letipach” me eli ekiekin Kot ussuch a sokko seni pwisin ekiekich.​—1 Jon 3:19, 20.

Matsepang a fokkun pwapwa le älleani alon Tafit: “Ewe Samol mi Lapalap a kan ngeni chokewe mi luketatakis, a amanaua chokewe mi apilükingau.” (Kölfel 34:18) Matsepang, emön mi “apilükingau,” iwe, a weweiti pwe Jiowa ese likitalo nöün kewe chon angang, pwal mwo nge ika ekkoch leir repwe äpilükülüküngaü are meefi pwe esor lamoten manauer. A pwapwa le silei pwe Kot a tongei nöün kewe siip meinisin me a tüttümünüür lon ekkewe fansoun weires. (Kölfel 55:22; 1 Piter 5:6, 7) Iei ewe wokisin a äkkäeüin aururu letipan: “Oupwe arap ngeni Kot, iwe, epwe arap ngenikemi.”​—Jemes 4:8.

Mwirin och fansoun, manamanen än Kot we Kapas, ewe Paipel, a pwä lon manauen Matsepang. A poputä le fiffiti ekkewe mwich me a pöütalo an kewe föfför ese tipeeü ngeni Paipel. Met mwiriloon? Iei, a meefi pwe a fich ngeni an epwe küna än Kot tong me chen. Seni ewe fansoun a papatais pwe epwe wiliti emön Chon Pwäratä Jiowa, a äeä fite ngeröü awa lon ewe angangen afalafal pun i emön chon afalafala ewe kapas allim ussun ewe Mwu. Inaamwo ika a watte an osukosuk me loom, nge iei, Matsepang a pwapwaesini manauan me a meefi pwe a wor lamoten manauan. Met ren pwäpwäloon manamanen ewe Paipel pwe mi tongeni amürinnölo manauen aramas!​—Ipru 4:12.

[Ekis Pworous lon pekin taropwe 11]

“Kot, ika use mä, upwe angang ngonuk ükükün ai tufich.”

[Pwoor lon pekin taropwe 11]

Ekkewe Popun Alongolongun Allük Seni Paipel mi Älillisöch

Ikkeei ekkoch popun alongolongun allük seni Paipel mi aururu letipen ekkewe mi küna kirikiringaü lon manauer:

“Lupwen a wor chomong ai öürek, en [Kot] ka achipaei o apwapwai lelukei.” (Kölfel 94:19) Än Kot kewe kapasen aurur lon an we Kapas, ina ewe minen aururu mi mürinnö. Ach äfänniir atun sia ekilonei ussur me ikkiotek epwe akinamwei ekiekich ussun ach kewe aürek me apöchökkülatä ach lükülük pwe Kot i Chiechiach mi weweiti nonnomuch kewe.

“[Jiowa] a apochokkulata ir ekkewe mi letipeta, o a finiti ar kewe kinas.” (Kölfel 147:3. TF) Ika sia kilisou ren än Jiowa ümöümöch me an älillis ren än Jises asorun möön kepich pwe epwe pwölüelo ach kewe tipis, iwe, sipwe lükü pwe sia tongeni arap ngeni Kot, nge sisap chüen meefi mengiringir. Ach silei ei mettoch epwe tongeni atoto watteen aururun me kinamween letipach.

“Esap wor eman a tongeni feito rei [Jises Kraist] are ewe Sam mi tinieito esap panato rei. Iwe, üpwe amanaua lon ewe ränin sopolan.” (Jon 6:44) Ren an we ngün mi fel me ewe angangen afalafala ewe Mwu, Jiowa a pwisin lukiikich ngeni Nöün we me a ngenikich ewe äpilükülükün manau esemuch.