Än Aramas Upsefäl Ina Longolongun Ar Repwe Küna Amanau?
IFA ussun kopwe pölüweni ei kapas eis, “Ka upsefäl”? Chommong chon lükü woon unusen fönüfan repwe fokkun apasa, “Ewer!” Ra lükü pwe upsefäl ina esissillen meinisin Chon Kraist mi enlet pwal ina chök met epwe tongeni amanaua emön. Ra tipeeü ngeni ekiekin ekkewe nöüwisen lamalam ussun Robert C. Sproul, a makkeei: “Ika emön esap upsefäl, . . . iwe, esap i emön Chon Kraist.”
En emön lein chokkewe ra lükü pwe än emön upsefäl epwe alükülükü ngeni pwe epwe küna manau? Ika ina, ese mwääl, kopwe mochen pesei aramasom me chiechiom kewe ar repwe küna ena al me poputä le fetäl woon. Iwe nge, ren ar repwe föri ena, mi lamot repwe weweiti sokkofesenin emön mi upsefäl me emön ese upsefäl. Iwe, ifa ussun kopwe äwewe ngeniir met weween än emön epwe upsefäl?
Chommong ra lükü pwe ewe kapas “upsefäl” a wewe ngeni emön a pwon ngeni Kot me Kraist pwe epwe angang ngeni ren wenecharen letipan, ina atun a fis och siwil ngeni, a ussun itä a limöch mwen mesen Kot me ririöch ngeni, ese chüen towau seni. Eü puken äweween kapas a äweweei pwe emön mi upsefäl a wewe ngeni “emön a pwon fän pwichikkaren letipan pwe epwe angang ngeni Kot, lape ngeni a fis lon ar fel atun a kon chchüng letipan epwe mwökütüküt le apasatä an pwon.”
Epwe ämäirü ngonuk ika kopwe silei pwe Paipel ese tipeeü ngeni äweween ena kapas upsefäl? Ka mochen silei met ewe Paipel a wesewesen apasa ussun än emön upsefäl? Pwata kopwe fokkun küna feiöch seni om käeöfichi ei pworaus? Pun wesewesen weween än emön upsefäl me ren Paipel epwe kküü manauom me om äpilükülük lon mwachkkan.
Met ewe Paipel a Apasa?
Ewe kapas “upsefäl” a mak lon Jon 3:1-12, a kapas ussun eü pworausfengen lefilen Jises me emön soumas lon Jerusalem. Kopwe tongeni älleani ei pworaus lon ewe pwoor lon pekin taropwe 7. Kese mochen kopwe älleaniöchü ei pworaus.
Lon ei pworausfengen, Jises a menlapei sokkopaten kinikinin pworaus ussun “upsefäl” me älisikich le pölüweni ekkeei ülüngät kapas eis mi lamot:
◼ Ifa lamoten upsefäl?
◼ Kich mi tongeni pwisin filatä pwe sipwe upsefäl?
◼ Met popun än emön upsefäl?
Sipwe käeö eü me eü ekkeei kapas eis.
[Pwoor lon pekin taropwe 7]
“Oupwe Fokun Upsefäl”
“Iwe, a wor eman mwän seni ewe mwichen Farisi itan Nikotemus, i eman me lein ekewe souemwenin ekewe chon Juta. Lon eu pwin ätei a feila ren Jesus o üreni, ‘Rabbi, äm aia silei pwe en eman sense Kot a tinato. Pun esap wor eman a tongeni föri ekei sokun manaman en ka föri are Kot esap eti.’ Jesus a üreni, ‘Enlet, üpwe wesewesen ürenuk: Esap wor eman a tongeni küna Mwün Kot are esap upsefäl.’ Nikotemus a aisini, ‘Epwe ifa usun än eman aramas epwe tongeni upsefäl lupwen a chinlap? Enlet, esap tongeni tolongsefäl lon upwen inan o uputiu fän aruuan.’ Iwe, Jesus a üreni, ‘Enlet, üpwe wesewesen ürenuk: Esap wor eman a tongeni tolong lon Mwün Kot are esap up ren koluk me Ngün. Eman aramas a upu seni saman me inan, nge manauen ngün a up ren Ngünün Kot. Kosap weitifengeniik ren mine üa ürenuk: Oupwe fokun upsefäl. Asepwäl a enien ia a mochen enila ie. Ka fen rong ngüngün, nge kosap silei ia a enito me ie, ika ia a enila ie. Ina usun chök ren chokewe mi up seni Ngünmifel.’ Iwe, Nikotemus a aisini, ‘Epwe ifa usun an epwe tongeni fis ei?’ Jesus a pölüeni, ‘En eman sense mi lap lon Israel, nge kosap weweiti usun ei? Enlet, üpwe wesewesen ürenuk: Äm aia kapas usun mine aia silei o pwärätä mine aia küna, nge esap wor eman leimi a mochen etiwa mine aia eäni afalafal. Ämi ousap lüküei lupwen üa kapas ngenikemi usun mettochun ei fanüfan. Ifa usun ämi oupwe lüküei lupwen üa kapas ngenikemi usun mettochun läng?’”—Jon 3:1-12.