4 Likitalo Om kewe Tipemwaramwar

“Ka lükükisikis! Pwota ka tipemwaramwar?”​—Mattu 14:31.

IFA EWE MINEN EPPET? Fän ekkoch, nöün Jises kewe chon käeö ra pwal tipemwaramwar. (Mattu 14:30; Luk 24:36-39; Jon 20:24, 25) Ren enletin, ewe Paipel a äweweei osupwangen lükü a ussun chök eü “sokun tipis mi alikafifikich.” (Ipru 12:1) Ewe aposel Paul a makkeei: “Pun sap aramas meinisin ra lükü ewe kapas.” (2 Tesalonika 3:2) Esap weween pwe ekkoch rese tufichin eäni ewe napanap lükü, nge chommong rese chök mochen angang woon. Kot epwe efeiöchü iir kewe mi achocho le eäni eü lükü.

IFA USSUN KOPWE PWÄKINI EWE MINEN EPPET? Esissillatä ekkewe popun ka tipemwaramwar. Äwewe chök, inaamwo ika ekkewe ekkoch chon käeö ra apasa pwe ra fen küna Jises pwe a fen manausefäl, nge Tomas a chüen tipemwaramwar. Tomas a mochen küna eü pisekin ännet. Iwe met a fis? Jises a pwär ngeni eü pisekin pwäratä pwe epwe eäni eü lükü mi pöchökkül.​—Jon 20:24-29.

Jiowa a awora ngenikich ekkewe pisekin ännet seni ewe Paipel pwe sipwe likitalo ach kewe tipemwaramwar. Ren chök äwewe chommong a pöüt seniir ar lükü pun ra tipi ngeni Kot ekkewe maun, mwänesol me riäfföü mi äweiresi aramas. Met ewe Paipel a apasa ussun ei mettoch?

Kot ese äeä mwuun aramas le nemenem. Jises a apasa pwe emön ngün itan Setan “ewe samolun ei fanüfan.” (Jon 14:30) Setan a ereni Jises pwe ika epwe fel ngeni, iwe epwe ngeni mwuun fönüfan meinisin pwe epwe nemeni. Iei alon: “Ngang üpwe ngonuk ar kewe nemenem meinisin pwal wöür kewe, pun ra nom fän nemeniei, nge ngang üa tongeni ngeni iö üa mochen ngeni.” Jises ese appölüa än Setan era pwe a nemeni fönüfan. Nge a era: “A mak lon ekewe Toropwe mi Pin, ‘Kopwe fel ngeni ewe Samol om Kot o angang ngeni i chök.’” (Luk 4:5-8) Ina minne, ekkewe riäfföü a fiffis ikenäi esap efisien Kot nge fen efisien Setan me ekkewe mwuun fönüfan.​—Pwarata 12:9, 12.

Ekiselo chök, Jiowa Kot epwele awesalo ekkewe popun riäfföü meinisin. A fen akkota eü Mwu are nemenem fän nemenien Nöün we Jises Kraist pwe epwe nemeni aramas. (Mattu 6:9, 10; 1 Korint 15:20-28) Lon pwönüetään än ewe Paipel oesini, ewe kapas allimen ewe Mwu a fen chöüfetäl woon unusen fönüfan. (Mattu 24:14) Ekiselo chök ewe Mwuun Kot epwe arosalo meinisin chon ü ngeni me epwe amoielo popun än aramas riäfföü.​—Taniel 2:44; Mattu 25:31-33, 46; Pwarata 21:3, 4.

IFA EWE FEIÖCH? Chokkewe mi tipemwaramwar ra ussun chök lo mi mamaanfeil “ren enienin asepwälin än chon likatuputup afalafal.” (Efisus 4:14; 2 Piter 2:1) Nge, iir kewe mi küna pölüöchün ar kewe kapas eis repwe tufichin ‘üppos lon ar lükülük.’​—1 Korint 16:13.

Chon Pwäratä Jiowa iir chon föri ei puk, ra pwapwa le älisuk le küna pölüwen ekkewe kapas eis pwe kosap chüen eäni tipemwaramwar. Ra etiwok pwe kopwe chiechi ngeniir me pwisin ätittina ar kewe afalafal. Ei mettoch epwe apöchökküla om lükü Kot.

Ren pwal ekkoch pworaus, nengeni ewe puk, Sile Mi Emmwen Ngeni Manau Esemuch, sopwun 10, itelapan “An Kot Muu A Nennemenem,” me sopwun 8, itelapan “Pwata Kot A Mutata Riaffou?”a

[Footnote]

[Sasing lon pekin taropwe 9]

Ekkewe mi küna pölüöchün ar kapas eis epwe pöchökkül longolongun ar lükü