Lamalam Meinisin mi Mürinnö?
LON ach ei fönüfan a mmen chommong sokkopaten lamalam. Eü repot a erä pwe mei wor 19 sokkun lamalam mi watte iteföüloon me 10,000 som lamalam mi kisikis woon unusen fönüfan. Ren chommongoloon sokkopaten lamalam lon ach ei fansoun a pwal chommongolo än aramas kefil woon menni lamalam repwe fiti. Nge, mi lifilifil menni lamalam kopwe filatä?
Ekkoch aramas ra erä pwe sokkopaten lamalam ra usun chök sokkopaten al mi aletä woon eü chuuk. Me rer, ese pwal lifilifil menni al repwe filatä pun meinisin ekkewe al mi feilo ngeni eü chök leeni. Ra erä pwe pokiten mei wor emön chök Kot, iwe, meinisin lamalam repwe feilo ngeni.
Meinisin Ekkewe Al mi Emmwenikich Ngeni Kot?
Met Jises, ewe sense mi fokkun ammafel lon uruwoon aramas, a erä usun ei mettoch? “Oupwe tolong lon ewe asam mi pwangkukkun.” Pwata? “Pun mi pwangwatte ewe asam o mi chölap ewe al a alelo ngeni kiteter; iwe, mi chommong mi tolong lon. Pun mi pwangkukkun ewe asam o mi chökukkun ewe al a alelo ngeni manau; iwe, mi chokisikis mi kuna.”—Mattu 7:13, 14, Testament Mi Fö Pwal Kol Fel.
Me ren Jises, ekkoch lamalam repwe feilo ngeni “kiteter” are a chök fos usun ekkewe rese lükü Kot ra fetäl woon ewe al chölap? Are, meinisin mi lükü Kot ese lifilifil ar lamalam, ra feil ngeni manau me fetäl woon ewe al mi chökükkün?
Mwirin än Jises kapas usun ekkewe ruuofoch al, a erä: “Oupwe mammasa kemi seni ekkewe soufos chofona. Ir repwe feito remi non napanapen siip, nge non nenuker ra ussun chok ekkewe manmwacho.” (Mattu 7:15, Ewe Kapasen God) Mwirin a pwal erä: “Esap aramas meinisin mi aita ngeniei ‘Samol, Samol’ repwe tolong lon Mwün Läng, nge chokewe chök mi föri letipen Semei lon läng.” (Mattu 7:21, Paipel are Testamentin Lom me Testament Söfö) Ika emön a fen iteni soufos are kör ngeni Jises “Samol,” sia tongeni erä pwe mei wor an lamalam, me i emön chon lükü Kot. A ffat pwe Jises a öüröürakich pwe ese mürinnö lamalam meinisin me sisap lükülük woon meinisin nöüwisen lamalam.
Mi Tufich Ach Sipwe Esilla ewe Al mi Chökükkün?
Pokiten al meinisin rese alelo ngeni Kot, nge epwe ifa usun sipwe tongeni küna ewe al mi chökükkün mi alelo ngeni manau lein ekkewe al mi chommong sipwe filatä? Nengeni ei kapas äwewe: Ekieki mwo ika ka rukolo me lon eü telinimw mi watte, iwe ka tingor älillis. Emön aramas a fokkun lükü pwe kopwe feitä. Pwal emön a erenuk pwe kopwe feitiw. Mwirin, pwal emön a erä pwe kopwe chök filatä menni al ka meefi pwe epwe öch ngonuk. Iwe, säingonoon emön a äiti ngonuk mapün ewe telinimw me ewe al mi pwüng kopwe aleni. A ngonuk ewe map pwe lon om säi kopwe kan chechcheki ika mi pwüng ewe al ka feffetäl woon. Iwe, iei kese le meefi lükülüköch pwe ka tongeni tikeri ewe leeni kopwe säi ngeni?
Pwal ina chök usun lon ach filatä ewe al mi emmwen ngeni lamalam mi pwüng, mi lamot ngenikich ewe sokkun map are emmwen mi alükülük. Mei wor ena esin map? Ewer, ina ewe Paipel, ewe mi apasa: “Iwe, kapasen lon ekewe Toropwe mi Pin meinisin ra pop seni Ngünün Kot, ra aüchea fän iten afalafala ewe kapas mi let, ra amiritikich, ra apwüngükich o aiti ngenikich usun ach sipwe manau fän pwüng.”—2 Timoti 3:16, PT.
Mei wor fitu Paipel mi kawor lon fosun Chuuk en mi tongeni nöünöü pwe ina ewe map epwe emmwenuk ngeni ewe fel mi enlet. Ina minne, lon ach nengeni ei itelap usun ach sipwe esilla ewe lamalam mi mürinnö me lamalam mi ngaw, ekkeei pworaus lon ekkeei lesen ra aloni ekkewe kapas seni ekkewe sokkopaten kapiin Paipel mi afföü lon fosun Chuuk, ekkewe lamalam ra pwal aücheaniir.
Kopwe älleani ekkeei pworaus epwe tapwoto mwirin me alöllöfengeni met ka fen silei ngeni met ewe Paipel a apasa. Chechchemeni alon Jises we ren ifa usun sipwe alefila menni lamalam mi mürinnö me menni lamalam mi ngaw. A apasa: “Irä mi mwirinnö, a pwal mwirinnö uwaar, nge efoch irä mi ngaw a pwal ngaw uwaan. Efoch irä mi mwirinnö esap tongeni an epwe uwääni uwa mi ngaw, nge efoch irä mi ngaw esap tongeni an epwe uwääni uwa mi ööch.” (Mattu 7:17, 18, Paipel: Än Kot Kapas Testament Söfö) Sipwe nengeni ülüngät uwa ewe Paipel a kapas usun pwe sipwe esilla ewe “irä mi mwirinnö.”
[Ekis Pworous lon pekin taropwe 3]
Ewe Paipel a usun chök eü map mi alükülük epwe tongeni emmweni emön ngeni ewe lamalam mi enlet