Jises Kraist Ükükün Manamanen An Afalafal

“A ffat pwe ewe äkkäeüin popun aramas ra ingeiti ewe sou tipatchem seni Kapernaum, pun a chüen achchüngü ekiekin me letipen aramas tori iei.”a​—SOUMAK GREGG EASTERBROOK

EKKEWE kapas a wor manamaner. Kapasen tipatchem mi fich a tongeni achchuüngü letip, awora äpilükülük allim, me siwili manauen aramas. Esor emön a manaman an kapas lap seni Jises Kraist. Emön mi fen rongorong eü me lein än Jises afalafal mi iteföülo a makkeei: “Lupwen Jises a awesalo ekkeei kapas, ekkewe aramas ra weitifengen ren an afalafal.”—Mattu 7:28.

Tori ikenäi, aramas woon unusen fönüfan ra fen silei chommong me lein än Jises kewe afalafal. Ikkeei ekkoch an kewe afalafal mi fokkun aüchea.

“Ousap tongeni angangepök ngeni Kot me wöün fanüfan.”​—Mattu 6:24.

“Oupwe föri ngeni aramas usun mine oua mochen repwe föri ngenikemi.”​—Mattu 7:12.

“Oupwe ngeni Sisar mine än Sisar, nge oupwe ngeni Kot mine än Kot.”​—Mattu 22:21.

“Sia feiöch ren ach fang lap seni ach angei mettoch.”​—Fofor 20:35.

Nge Jises ese chök apasa ekkeei kapas mi aüchea. Ewe pworaus a afalafala a wor manamanan pun a pwäratä minne mi enlet usun Kot, äiti ngeni aramas pwe mi wor wesewesen popun manauer, me affata met epwe pwäkini än aramas kewe riäfföü meinisin, ina än Kot we Mwu. Lupwen sipwe nengeni ena pworaus lon ekkewe lesen repwe tapwoto, sipwe küna ewe popun Jises a “chüen achchüngü ekiekin me letipen chommong aramas tori iei.”

[Pwóróus fan]