Met Ekkewe Semirit Repwe Käeö?

“Kapasen lon ekewe Toropwe mi Pin meinisin ra pop seni . . . Kot, ra aüchea fän iten afalafala ewe kapas mi let, ra amiritikich, ra apwüngükich o aiti ngenikich usun ach sipwe manau fän pwüng.”​—2 TIMOTI 3:16.

A LAMOT ngeni ekkewe semirit ar repwe käeö ewe enlet usun Kot. Nge ia repwe käeö me ie? Seni ewe Paipel, ina ewe puk mi chöüfetäl woon unusen fönüfan me aramas ra süföliti.

Ewe Paipel a usun chök echö taropwe seni Kot. Nge lon ena taropwe, Kot a pwäraalo usun i me awora kapasen emmwen usun minne mi pwüng me mwääl ngeni meinisin nöün kewe, kapachelong ekkewe semirit. Ekieki mwo ekkoch käit seni Paipel me ekkewe lesen ekkewe semirit ra pwal mwo nge tongeni käeö seniir.

Met Kot a mochen ach sipwe silei usun i?

◼ Ifa äitien ewe Paipel: “Ua fen pwä ngeni Abraham, Isaac me Jacob ussun God Mi Manaman, nge use pwarieino ngenir ren itei we mi pin, Yahweh [Jiowa].”​—Ekistos 6:3, Ewe Kapasen God.

Lesen: Kot wesewesen Emön me a wor pwisin itan.

◼ Ifa äitien ewe Paipel: “Ewe Samol mi Lapalap a etittina letip meinisin o weweiti iteiten akot me ekiek. Are ka kul ngeni Kot, i epwe etiwok.”​—1 Kronika 28:9.

Lesen: Jiowa Kot a chchüngükich meinisin, kapachelong ekkewe semirit. (Kölfel 10:14; 146:9) A mochen ach sipwe käeö usun i.

◼ Ifa äitien ewe Paipel: “Ousap ariaföüü ekewe . . . mi mäsen. Pun are oua eriaföüür, nge ir repwe siö ngeniei, üpwe fokun aüselinga ar siö.”​—Ekistos 22:22-24.

Lesen: Jiowa a pwal mwo nge aüselinga än ekkewe semirit iotek. Sia tongeni fos ngeni Kot iteitan me pwär ngeni alolloolun ekiekich me meefiach.

◼ Ifa äitien ewe Paipel: “Ra sotuni Kot fän chomong o asonga Ewe mi Pin me lon Israel.”​—Kölfel 78:41.

Lesen: Ach kapas me föfför ra tongeni kküü meefien Jiowa, ina popun sipwe akkomw ekiek me mwen ach sipwe fos me föri mettoch.

Epwe ifa föfförüch ngeni chokkewe iir mi sokkolo senikich?

◼ Ifa äitien ewe Paipel: “Kot esap lifilifil aramas, nge a etiwa aramas mi niuokusiti i o föri mine a pwüng seni ekewe mwü meinisin.”​—Fofor 10:34, 35.

Lesen: Ika Kot a etiwa aramas meinisin mi sokkolo nonnomur, iwe, sisap pwal lifilifil aramas pokiten chök a sokkolo aluwen ünücher me mesemeser senikich.

◼ Ifa äitien ewe Paipel: “Oupwe ammolata fansoun meinisin polueni emon are epwe eis usun popun ewe apilukuluk allim mi nonnom lon ami, nge oupwe fori ei sokkun fan mosonoson o mennin.”​—1 Piter 3:15, TF.

Lesen: Lupwen sia fos ngeni aramas usun lamalam, sipwe äweweei ach lükü fän lükülük lon eü napanap mi mosonoson. Sipwe pwal süföliti chokkewe mi sokkolo ar lükü seni ach.

Epwe ifa föfförüch ngeni chon ach famili?

◼ Ifa äitien ewe Paipel: “Ämi nau kana, oupwe aleasochisi sememi me inemi lon mettoch meinisin, pun iei met Kot a pwapwa ren.”​—Kolose 3:20.

Lesen: Ekkewe semirit mi älleasochis ra pwäratä pwe ra tongei semer me iner, me ra pwal mochen apwapwaai Kot.

◼ Ifa äitien ewe Paipel: “Oupwe songomangfengen o amusamusfengen are eman a chou ngeni eman. Oupwe fokun amusamusfengen usun ach Samol a amusala ämi tipis.”​—Kolose 3:13.

Lesen: Fän ekkoch chon ach famili me aramas repwe elichippüngükich. Nge ika sia mochen pwe Jiowa epwe omusakichelo, iwe, sipwe pwal omusaalo tipisin ekkoch.​—Mattu 6:14, 15.

Pwata sipwe wenechar me kirekiröch?

◼ Ifa äitien ewe Paipel: “Ousap chüen kapas chofona. Oupwe eäni kapas wenechar ngeni pwimi kewe.”​—Efisus 4:25.

Lesen: Sia äppirü Kot me apwapwaai i atun sia kapas enlet. Ika sia eörenaalo le kakkapas chofona, iwe, sipwe usun ewe Tefil “semen chon chofona,” ewe Kot a oputa.​—Jon 8:44; Taitos 1:2.

◼ Ifa äitien ewe Paipel: “Oupwe föri ngeni aramas usun mine oua mochen repwe föri ngenikemi.”​—Mattu 7:12.

Lesen: Sipwe äfänni meefien, ekiekin me osupwangen chon ach famili me aramas lon sopwuch we. Ika sia meefieni meefier, iwe, repwe pwal kirekiröch ngenikich.​—1 Piter 3:8; Luk 6:38.

Sia fen küna pwe ekkeei lesen seni Paipel ra tongeni älisi ekkewe semirit le pwäppwäratä kilisou, mennin, me meefieni meefien ekkewe ekkoch. Nge, iö epwe wisen asukula ekkewe semirit ekkena lesen?