Ifa Usun Sipwe Asukula Ekkewe Semirit Usun Kot​—Ikkefa Ekkewe Napanapen Asukul Epwe Kon Mürinnö?

“Ekei kapas üa allük ngonuk ikenai repwe nom lon lelukom. Iwe, kopwe achocho le aiti ngeni noum kewe ekei kapas, kopwe pwal fos usur lupwen kopwe mot non imwom pwal lupwen kopwe fetal won al, lupwen kopwe konola, pwal lupwen kopwe pwätä.”​—TUTERONOMI 6:6, 7.

FÄN EKKOCH eli ekkewe sam me in repwe meefi weiresin wiser le emiriti nöür kewe. Iwe nge, lupwen ra kütta älillis, ra fen kon osukosuk ren chommongun ekkewe kapasen fön usun emiritin semirit. Fän chommong aramaser me chiener kewe ra mwittir uwawu meefier ngeniir. A pwal kakkatowu lon ekkewe puk me woon Internet kapasen fön fän iten ekkewe sam me in, nge fän ekkoch ekkena fön ra ü fengen.

Nge, ewe Paipel ese chök awora ngeni sam me in kapasen fön mi mürinnö ren met repwe asukula ngeni nöür kewe, nge pwal ifa usun repwe asukuler. Usun met ewe Paipel a fen apasa me asan, a lamot sam me in repwe kütta ifa usun repwe fos ngeni nöür kewe usun Kot iteiten rän. Sipwele pworaus woon ekkeei rüänü napanapen asukul mi longolong woon Paipel mi älisi chommong sam me in le asukula nöür kewe usun Kot.

1. Käeö seni förien Kot kewe. Ewe aposel Paul a apasa: “Aramas ra tongeni silei usun Kot ren ekewe mettoch I a föri. Pun seni ewe fansoun Kot a föri fanüfan ra fokun tongeni weweiti pwe an manaman a nom tori feilfeilachök, pwe I wesewesen Kot.” (Rom 1:20) Ekkewe sam me in ra fokkun tongeni älisi nöür le mirititi pwe Kot wesewesen Emön, ren ar äiti ngeniir förian kewe me älisiir le weweiti napanapen Kot kewe mi pwälo lon förian kewe.

Ina met Jises a föri atun a asukula nöün kewe chon käeö. Äwewe chök, a apasa: “Oupwe nenengeni ekewe mansüsü: resap fofot, resap pwal kinikin, esap wor ar lenien iseis, nge Sememi lon läng a fen amongöniir. Ifa usun, ämi ousap kon aüchea seniir?” (Mattu 6:26) Jises a menlapei napanapen Jiowa kewe, tong me ümöümöch. Nge a pwal älisiir le ekiekifichi ifa usun Kot a pwäratä ekkena napanap ngeni nöün kewe.

Ewe king mi tipachem Salomon a pworaus usun än Kot fang ngeni ekkewe molus ar tipachem. A eäni äwewe usur ren an menlapei eü lesen mi aüchea. A apasa: “Kopwe feila ren ekewe molus, en chon chipwang. Kopwe ekieki usun ar angang pwe kopwe tipachemela. Esap wor ar samol, esap pwal wor ar meilap ika ar sounemenem, nge ra amolätä ener lon fansoun pwichikar o ionifengeni ener mongö lon fansoun räs.” (Än Salomon Fos 6:6-8) A ifa me öchün ei napanapen asukul ren lamoten ach isetiw minne sipwe achocho ngeni me äeä pöchökkülach le tikeriir!

Ekkewe sam me in ra tongeni äppirü lipwäköchün Jises me Salomon le asukul ika repwe föri ekkeei mettoch: (1) Eisini nöür kewe menni irä me man ra sani. (2) Käeö usun napanapen ekkena irä me man. (3) Käeö och lesen usun Kot seni förian kana.

2. Äppirü än Jises ekiek usun chokkewe a asukuler. Minne Jises epwe apasa a fokkun aüchea lap seni alon aramas meinisin. Nge, a awora watte fansoun le eäni kapas eis ngeni aramas. A fokkun mochen silei ekiekiir me meefier ren minne a äiti ngeniir. (Mattu 17:24, 25; Mark 8:27-29) Pwal ina chök usun, a chommong ekkewe lesen mi lamot sam me in repwe äiti nöür kewe. Nge ren ar repwe lipwäköch, a lamot repwe äppirü Jises me peseer ar resap pireir le uwawu meefier.

Ifa usun ika ekkewe semirit ra eäni ekiek mwääl are mmang le käeö ekkoch lesen mi lamot? Ekieki föfförün Jises ngeni ekkewe aposel. Fän ekkoch ra äninifengen lefiler me ra miritimmang le aücheani lamoten ar repwe tipetekison. Nge Jises a chök mosonottam ngeniir, me ekkenniwili le äiti ngeniir lamoten ewe napanap tipetekison. (Mark 9:33, 34; Luk 9:46-48; 22:24, 25) Ekkewe sam me in mi äppirü Jises repwe pwal mosonottam le emiriti nöür, me ika mi lamot repwe ekkenniwili ewe lesen tori ar repwe unusen weweiti.a

3. Käit me ren ämi leenien äppirü. A öch ekkewe sam me in repwe aüselinga än ewe aposel Paul ei kapasen fön ngeni ekkewe Chon Kraist lon Rom. A ereniir: “En ka aiti ngeni aramas ekewe Allük, pwota kosap püsin aiti ngonuk? Ka afalafala aramas pwe resap solä, nge ifa usumw, kosap püsin solä?”​—Rom 2:21.

A lamot ena fön pokiten ekkewe semirit ra kon chechchemeni met semer kewe me iner ra föri lap seni met ra apasa. Ina popun, ekkewe sam me in mi kan föri minne ra eäni asukul, lap ngeni nöür repwe kan aüselinga alor.

4. Poputä seni le kükkünür. Timoti, chienen aposel Paul we le misineri, a iteüöch lon leenian we. (Fofor 16:1, 2) Popun pun ‘seni chök lekükünün’ a käit me ren “ekewe Toropwe mi Pin.” Inan we me inan chinnap rese chök ällea ngeni ekkewe wokisin nge ra pwal älisi an epwe wewefichiti ekkewe pworaus mi enlet a käeö.​—2 Timoti 1:5; 3: 14, 15.

Ia Kopwe Tongeni Küna me ie Älillis

Chon Pwäratä Jiowa ra föri chommong puk mi älisi ekkewe sam me in le asukula nöür kewe ewe enlet usun Kot. Ekkoch a fför fän iten ekkewe semirit. Nge ekkoch ra tongeni älisi ekkewe sam, in me nöür kewe säräfö an epwe chök sussuuk alen ar pworausfengen.b

Pwüngün, me mwen än ekkewe sam me in asukula nöür kewe usun Kot, a lamot repwe silei pölüwen ekkoch kapas eis mi weires nöür repwe eis usun. Äwewe chök, ifa usun kopwe pölüweni ekkeei kapas eis: Pwata Kot a mutatä riäfföü? Ifa än Kot kokkot ngeni fönüfan? Ia ekkewe mi mälo ra nom ie? Chon Pwäratä Jiowa ra pwapwa le älisuk le silei pölüwen ekkena kapas eis me pwal ekkoch pwe en me om famili oupwe tongeni arap ngeni Kot.​—Jemes 4:8.

[Ekkewe Pwóróus fan]