Eú Fénúfan Ese Wor Lifilifil Aramas Ineet Epwe Fis?

“A WOR ai áneán.” Iei alon Martin Luther King, Jr. nime ier lóóm lón August 28, 1963. I emén chón Merika sou apéchékkúla án aramas pwúúng me a apasa ekkena kapas lón an we afalafal mi iteféúló. Minne Martin Luther a apasa mi achchúngú letipen aramas, a pwáraaló an na áneán are ápilúkúlúk pwe lón eú rán aramas repwe pwapwaiti ewe sókkun manaw ese wor lifilifil aramas. Ikaamwo an na áneán a apasa fan iten chón Merika, nge minne a áneánei, aramas lón chómmóng fénú ra etiwa me ra pwal mochen achocho le apwénúetá.

Lón November 20, 1963, úlúngát maram mwirin án Martin Luther we afalafal, lap seni 100 fénú ra tipeeú ngeni án United Nations esilesil pwe epwe achocho le amóeló meinisin sókkun aapaap pokiten án emén lewo. Nge mwirin, ekkóch fénú ra pwal esilesil pwe repwe pwal achocho le áwesi aapaap, iwe chómmóng fénú ra pwal etiwa. Meinisin ar kana achocho a efisatá eú kapas eis, Met mwirilóón ar achocho?

Lón March 21, 2012, ewe meilapen United Nations itan Ban Ki-moon a apasa: “A wor chómmóng etipeeú mi aúchea me minen álillis, pwal sókkópaten kókkót wóón unusen fénúfan fán iten eppetin me kamólóón aapaap pokiten án emén lewo, me án aramas fókkun oput are niweiti chón ekkóch fénú, pwal ekkóch sókkun féfférún aapaap. Nge, án aramas lifilifil ngeni chókkewe mi sókkóló ar lewo a chúen efisatá riáfféún fite million aramas wóón unusen fénúfan.”

Inaamwo ika lón ekkóch fénú ra ekis feffeitá lón ar achocho le amóeló aapaap ngeni aramas mi sókkóló ar lewo me pwal ekkóch sókkun féfférún lifilifil aramas, nge a chúen wor kapas eis mi lamot: Itá ar kana achocho a wesewesen urusawu me lón alóllóólun letipen aramas ar memmeefin lifilifil, are ra chék áiti aramas ar repwe túmúnú pwe resap pwáraaló ar lifilifil? Ekkóch ra lúkú pwe án aramas achocho le eppeti ewe féfférún lifilifil a chék eppeti ena féffér nge ese unusen urusawu ewe memmeefin lifilifil me lón letiper. Pwata mwo? Pún féfférún lifilifil a pwá ngeni mesen aramas, iwe a tongeni kúna kapwúng me ren ewe allúk. Nge memmeefin lifilifil ese pwá, mi weneiti ekiekin me meefien aramas, iwe mi weires epwe kapwúng me ren allúkún mwú.

Ina minne, án aramas achocho le sótun amóeló lifilifil aramas itá esap chék pinei féfférún lifilifil nge epwe pwal siwili ekiekin me meefien emén usun ekkewe ekkóch aramas. Nge epwe wesewesen tufich ei mettóch? Ika ewer, iwe ifa usun epwe fis? Sipwe nengeni pwóróusen ekkóch aramas epwe álisikich le kúna pwe mi tufich ngeni aramas ar repwe siwil, me a wor mettoch a tongeni álisiir le féri ewe siwil.

EWE PAIPEL A ÁLISIIR LE PWORACHO NGENI LIFILIFIL ARAMAS

Linda: Ua uputiw lón South Africa. Me rei, ekkewe chón South Africa mi chól iir aramas kisikis. Me rei, iir rese sukul, use lúkúlúkúr me iir néún ekkewe chék mi pwech chón angang. Lón alóllóólun letipei ua lifilifil aramas nge use mwo fen esilla. Iwe nge, a poputá le siwil ekieki atun ua káé Paipel. Ua káé pwe “Kot esap lifilifil aramas,” nge letipen aramas a fen lamot lap seni aluwen únúchach are kapasen ewe fénú sia eáni. (Föför 10:34, 35; Än Salomon Fos 17:3) Minne a mak lón Filipi 2:3 a álisiei le mirititi pwe ika upwe ekieki pwe ekkewe ekkóch ra múrinné seniei, iwe ua tongeni pworacho ngeni lifilifil aramas. Ai manaweni manawei me ren ekkewe kapasen emmwen lón Paipel usun ekkena wokisin a álisiei le áfánni ekkewe ekkóch ese lifilifil aluwen únúcher. Iei, ua meefi pwe ua fen ngase seni ewe fétekin lifilifil aramas.

Michael: Ua mááritá lón ewe leeni lape ngeni aramasan iir chón Australia nge iir mi pwechepwech, me a pwal mááritá watteen ai oput ekkewe chón Asia, ákkáeúin chón Saini. Lupwen ua kan ssá wóón wai we me kúna emén mi mesemesen chón Saini, iwe ua minatiw kilasen asammwachoon wai, ua púchér me ereni ekkewe kapas mi asúfélúngaw, áwewe chék ren, “Liwiniti fénúom, chón Asia!” Ló, ló, ló, ua poputá le káé Paipel iwe ua káé án Kot ekiek usun aramas. Kot a tonger ese lifilifil ia ra feito me ie are mesemeser. An tong a achchúngú letipei, iwe ai koput a siwil ngeni tong. Ei siwil watte a kon amwarar. Iei ua fókkun pwapwa le chiechi ngeni aramas mi sókkópat nónnómur me fénúer. Ei mettóch a suuki mesei ren ifa usun upwe nengeni manaw, me a atoto watteen pwapwa.

Sandra: Inei a feito seni Umunede lón Delta State, Nigeria lón Africa. Iwe nge, án semei famili a feito seni Edo State me a fós fósun Esan. Pokiten sókkofeseniir, aramasen semei we ra fókkun lifilifil ngeni inei we tori an máló. Ina popun ua pwon pwe usap fókkun mwo nge kkan ngeni emén mi fós fósun Esan me usap fókkun pwúlúweni emén chón Edo State. Nge lupwen ua káé ewe Paipel, ua poputá le siwili ai ekiek. Pokiten ewe Paipel a apasa pwe Kot ese lifilifil aramas me a etiwa ié chék mi niwokkusiti, iwe epwe met ai pwúúng le oput aramas pokiten ar einang are ewe fós ra eáni? Ua siwili ekieki me achocho ai upwe kinamwefengen me án semei we famili. Ai apwénúetá ekkewe kapasen emmwen lón Paipel a atoto ngeniei pwapwa me kinamwe. A pwal álisiei le chiechiéch ngeni ekkewe ekkóch ese lifilifil nónnómur, lewor, ar fós me fénúer. Iwe, ewe mwán ua pwúlúweni, i seni Edo State me a fós lón fósun Esan!

Pwata ewe Paipel a tongeni álisi ekkeei aramas me pwal ekkewe ekkóch le pworacho ngeni ar oput me ekiekin lifilifil aramas mi pwúk waran lón alóllóólun letiper? Popun pún ewe Paipel, ina án Kot we Kapas. A wor an manaman le siwili án emén ekiek me memmeef usun ekkewe ekkóch. Pwal och, ewe Paipel a pwáraatá met a pwal lamot epwe fis pwe meinisin sókkun lifilifil aramas epwe wesiló.

ÁN KOT WE MWÚ EPWE ÁWESAALÓ MEINISIN SÓKKUN LIFILIFIL ARAMAS

Ewe sile lón Paipel a tongeni álisi aramas le nemeni me urusawu ekkewe memmeef mi péchékkúl, nge mi pwal wor ruu mettóch mi lamot repwe móló ren an epwe unusen wesiló ewe napanap lifilifil aramas. Áeúin, ewe tipis me apwangapwangen futukach. Ewe Paipel a affata: “Esap wor eman esap föri tipis.” (1 King 8:46) Ina minne, ikaamwo sia resin achocho, nge sia chúen meefi ewe fiu lón letipach aposel Paulus a pwal meefi, a makkeei: “Lupwen üa mochen föri mine a mürina, üa chök filätä ai üpwe föri mine a ngau. ” (Rom 7:21) Ina popun, pokiten ese unuséch letipach, fan ekkóch epwe liwiniti le eáni “ekiek mi ngau” mi tongeni emmwenikich ngeni lifilifil aramas.​—Markus 7:21.

Oruuan, Satan ewe Tefil a etipetipa aramas. Ewe Paipel a erá pwe i “eman chon niela aramas” me a kan “atupu unusen chon fanüfan.” (Johannes 8:44; Pwärätä 12:9) Ina ewe popun lifilifil aramas a fókkun chéúfetál me aramas ra kúna riáfféú fán ekkeei napanap aapaap, lifilifil aramas, féfférún ninniilóón eú einang, me pwal ekkewe ekkóch sókkun lifilifil aramas pokiten lewor, nónnómur me ar lamalam.

Ina minne, me mwen epwe unusen móló lifilifil aramas, a lamot epwe mwo wesiló án aramas tipis, apwangapwangen futuk, me etipetipaen Satan ewe Tefil. Ewe Paipel a pwáraatá pwe án Kot we Mwú epwe féri ena mettóch.

Jesus Kraist a áiti ngeni néún kewe chón káé le iótek ngeni Kot me epwe iei usun: “Mwum epwe war, letipom epwe fis won fanüfan usun chök lon läng.” (Mateus 6:10) Án Kot we Mwú epwe amóeló meinisin pwúngúngaw kapachelong meinisin sókkun aapaap me lifilifil aramas.

Lupwen epwe war án Kot we Mwú me nemeni fénúfan, Satan epwe “föfö,” are wesewesen kalapus pwe “esap chüen tongeni tufichin atupu chon ekewe mwü.” (Pwärätä 20:2, 3) Iwe, epwe fis “eu fanüfan mi fö,” are mwichen aramas, ikewe ia “pwüng epwe chöchöla ie.”a​—2 Petrus 3:13.

Chókkewe repwe manaw lón ewe ótót sefé mi pwúng repwe unuséchúló me ngaseló seni tipis. (Rom 8:21) Pokiten iir chón án Kot we Mwú, resap féri “och mettoch mi ngaw are afeiengaw.” Pwata? Pokiten “ewe fonu epwe ne ureno ren tipachemen ewe SAMOL.” (Aisea 11:9, Kapasen God) Lón ena atun, aramas meinisin repwe silei napanapen án Jiowa féri mettóch me áppirú napanapan mi tong. Enlet ei mettóch, epwe wewe ngeni wesilóón meinisin sókkun lifilifil aramas, pún “Kot esap lifilifil aramas.”​—Rom 2:11.