Ineet án Kot we Mwú a Poputá le Nemenem?​—Kinikin 2

EKIS ENNIWILI PWÓRÓUSEN ÁN NEPUKATNESAR TTAN

Cameron: Ua pwapwa Jon pwe sia chufengensefál. Ua kan pwapwaiti ach káéfengen Paipel iteitan wiik.a Ifa usum?

Jon: Kilisou pwe ngang mi péchékkúl.

Cameron: Ua pwapwa pwe ka péchékkúl. Lón ewe atun ua feito sia fósfengen usun ika pwata Chón Pwáraatá Jiowa ra apasa pwe án Kot we Mwú a poputá le nemenem lón 1914.b Atun sia fen pwóróusfengen sia kúna ewe pisekin ánnet mi lamot lón ewe oesini mi nóm lón puken Taniel sópwun 4. Ka chemeni met a mak lón?

Jon: Pwóróusen án King Nepukatnesar ttan usun efóch irá mi watte.

Cameron: Ewer, mi pwúng. Lón an we ttan, Nepukatnesar a kúna efóch irá mi fókkun watte epwele tikeri láng. Mwirin a rongorong emén néún Kot chónláng a allúkú pwe ewe irá epwe pékúpék, nge a erá pwe epwe likitaló ewe popun me waran lón ewe pwúl. Mwirin “fisu ier” ewe irá epwe máársefál.c Sipwe pwal pwóróusfengen ika ifa usun ewe oesini a wor ruu pwénútáán. Ka chemeni ifa ewe áeúin pwénútáán?

Jon: A fis ngeni pwisin Nepukatnesar, ika met? A umwes lón úkúkún fisu ier.

Cameron: Mi fókkun pwúng. Nepukatnesar a umwes lón ekis fansoun ina pwata an we nemenem a kaúló. Nge pwénútáán ewe oesini mi lap ina án Kot nemenem a kaúló lón úkúkún fisu fansoun. Usun met sia fen weweiti pwe ewe fisu fansoun a poputá atun Jerusalem a taló lón 607 B.C.E. Seni ena atun, ese chúen wor king wóón fénúfan mi tupuni Jiowa Kot le nemeni néún kewe aramas. Iwe nge, lemuchúlóón ewe fisu fansoun Kot epwe seikaatá emén seni láng pwe epwe ewe mineféén Sounemenem wóón néún kewe aramas. Ren pwal och weween, muchúlóón ewe fisu fansoun nge ina poputáán nemenemen án Kot we Mwú lón láng. Sia fen pwóróus usun ineet a poputá ewe fisu fansoun. Ika sia tongeni silei ifa ttamen ena fansoun, iwe, sipwe pwal silei ineet atun án Kot we Mwú a poputá le nemenem. En mi ekis weweiti met ua apasa?

Jon: Ewer, ach enniwili ei pwóróus a álisiei le chemeni.

Cameron: Mi éch. Iwe, sipwe sópweló ach pwóróusfengen usun ttamen ewe fisu fansoun. Ua kerán pwal wes le álleani ewe pwóróus pwe epwe áchemaei ekkewe pwóróus mi lamot. Iwe, upwe achocho le áweweéchú ngonuk.

Jon: Iwe.

MUCHÚLÓÓN EWE FISU FANSOUN, POPUTÁÁN EWE RÁNIN LESÓPWÓLÓÓN

Cameron: Lón ewe áeúin pwénútáán ewe oesini a weneiti Nepukatnesar, ewe fisu fansoun ina wesewesen fisu ier. Nge ewe pwénútáán mi lap seni ena, ewe a weneiti án Kot we Mwú, ewe fisu fansoun epwe ttam lap seni fisu ier.

Jon: Met weween alom na?

Cameron: Chechchemeni pwe ewe fisu fansoun a poputá atun Jerusalem a taló lón 607 B.C.E. Iwe ika sia poputá le álleani seni ena ier, ewe fisu ier epwe chék much lón ewe ier 600 B.C.E. Iwe ese wor mettóch mi lamot a fis lón ena ier mi riri ngeni án Kot we nemenem. Pwal usun chék met sia fen pwóróusfengen usun lón ewe, fitepúkú ier a ló atun Jesus a nóm wóón fénúfan, a apasa pwe ese mwo wes ewe fisu fansoun.

Jon: Ewer, iei ua chemeni.

Cameron: Fán ekkóch lón án Paipel oesini, eú rán a wewe ngeni eú ier.d Ina popun esap wesewesen fisu ier, nge ewe fisu fansoun epwe eú rán wewe ngeni eú ier.

Jon: Ua weweiti met ka mochen apasa pwe eú rán epwe eú ier.

Cameron: Mi pwúng. Ewe puken Pwärätä, ewe puk mi riri ngeni puken Taniel, a álisikich le silei wesewesen ttamen ewe fisu fansoun. A erá pwe ewe úlúngát esopw fansoun a wewe ngeni 1,260 rán.e Ina popun fisu fansoun, epwe úlúngát esopw fansoun állea ngeni ruu a wewe ngeni 2,520 rán. Ka chúen weweiti?

Jon: Ewer. Nge use weweiti ifa usun ei pwóróus a apasa pwe án Kot we Mwú a poputá le nemenem lón 1914.

Cameron: Iwe, nge pwata chék sisele ppii ifa usun ra ririfengen. Iwe ika sia fiti ewe pwóróus pwe eú rán a wewe ngeni eú ier, iwe ewe fisu fansoun epwe wewe ngeni 2,520 ier. Iwe, ena 2,520 ier ika sipwe állea seni 607 B.C.E., iwe, epwe much lón 1914.f Ina ewe popun sia apasa pwe 1914 ina ewe ier a much ewe fisu fansoun lón, me ina ewe ier Jesus a poputá le nemenem usun emén King lón án Kot we Mwú. Pwal met a amwarar pwe seni 1914 a fis wóón fénúfan ekkewe mettóch ewe Paipel a fen oesini fán iten ewe ránin lesópwólóón.

Jon: Met sókkun mettóch?

Cameron: Ekieki alon Jesus we lón Mateus 24:7. Iei met a erá epwe fis wóón fénúfan, atun epwe poputá le nemenem seni láng: “Fanü me fanü repwe fiufengen o mwü me mwü repwe maunfengen. Epwe wor lengita me chechechin fanü ekis meinisin.” Nengeni Jesus a oesini pwe epwe wor lengita me chechchechin fénú lón ena atun. Esap pwe sia kúna ena sókkun osukosuk lón ekkeei ier ra ló?

Jon: Enlet pwúngún.

Cameron: Lón ei wokisin, Jesus a pwal oesini pwe epwe wor maun atun an wiseni wisan we King lón Mwúún Kot. Pwal och, ewe puken Pwärätä a pwal oesini pwe ekkewe maun esap chék fis lón ekkóch leeni nge epwe fis wóón unusen fénúfan atun ewe ránin lesópwólóón.g En mi chemeni ineet a fis ewe áeúin maunen fénúfan?

Jon: Lón 1914, ewe ier ka erá pwe Jesus a poputá le nemenem. Use mwo ekieki me mwan pwe ra ririfengen.

Cameron: A fókkun ffat atun sia eririfengeni meinisin ekkewe oesini usun ewe fisu fansoun me pwal ekkewe ekkóch oesini lón Paipel usun ewe ránin lesópwólóón. Chón Pwáraatá Jiowa ra lúkúlúk pwe Jesus a poputá le nemenem usun emén King lón án Kot we Mwú lón 1914 me pwal ina ewe ier a poputá ewe ránin lesópwólóón.h

Jon: Ngang mi chúen achocho pwe upwe weweiti ei pwóróus.

Cameron: Ua fókkun weweiti meefiom. Usun met ua fen apasa me mwan pwe a pwal ttam ewe fansoun ai upwe weweéchúti ei pwóróus. Nge ren mwo iei, ua áneán pwe amwo itá ach pwóróusfengen epwe álisuk pwe ikaamwo ewe ier 1914 ese wesewesen mak lón Paipel nge ka kúna pwe Chón Pwáraatá Jiowa ra wesewesen lónguni ar lúkú usun ena ier wóón án Kot Kapas.

Jon: Ewer. Fen ina met ua ingeitikemi ren pún ese lifilifil met oua erá nge oua chék néúnéú Paipel. Nge esap chék pwisin meefiemi. Nge ua chék ekieki ika pwata a weires áweween. Pwata Kot ese chék erenikich lón Paipel pwe 1914 ina ewe ier Jesus epwe poputá le nemenem seni láng?

Cameron: A mmen éch óm na kapas eis Jon. Ren enletin, a wor chómmóng mettóch nge ese tichikin apasa lón Paipel. Iwe pwata Kot a makkeei ewe Paipel lón ewe napanap a lamot achocho pwe aramas repwe weweiti? Neman sia tongeni pwóróus usun ena lón pwal eú fansoun upwe chuuruk.

Jon: Ua sani ena.