PWÓRÓUS LÚKÚNPÉÉN | IÉ KEWE CHÓN PWÁRAATÁ JIOWA?
A Feito me ia Monien Ám Angang?
Iteiten ier aua féri me eineti fitepúkú million Paipel me puken álillisin Paipel. Aua aúetá me túmúnú keangen ofesilap me leenien ffér puk wóón unusen fénúfan. Fitepúkú ngeréú ekkewe mwichefel ra mwich lón leeni mi iteni Leenien Mwich mi múrinné me núkúnúkéch. Ia a feito me ie monien ekkeei mettóch?
Ewe chék asor a álisatá ám angang. (2 Korint 9:7) Lón 1879 ewe oruuen peresin Zion’s Watch Tower (iei iten ei Leenien Mas me lóóm) a erá: “Aua lúkú pwe JIOWA, i ám chón álillis, nge ám ause fókkun tingor fetál are kútta álillis.” Tori ikenái esap mwo fán eú aua tingor fetál álillis.
Aua tiinaaló ám asor ngeni eú me lein ekkewe keangen ofesilap are aua isenalong lón eú pwórun asor mi kawor lón ewe Leenien Mwich. Nge ause eáni ewe sókkun asor leengol, asawa sepien asor are ause angei liwinin ekkewe angang aua féri me ekkewe puk. Ause peiof seni ám afalafal, asukula aramas lón ewe mwichefel are álillis le aúetá ekkewe leenien mwich. Esap pwe Jesus a apasa: “Oua angafatei . . . oupwe pwal fangafat.” (Mateus 10:8) Meinisin chón lón ám kewe ofesilap me keangen ofesilap kapachelong ewe Mwichen Soupwúngúpwúng án Chón Pwáraatá Jiowa rese peiof.
“Ina usun met Chón Pwáraatá Jiowa ra kan féfféri lón meinisin ar angang, a fiffis kataween ar angang pokiten ewe monien asor, emén me emén leir a pwisin apwúngaló úkúkún me ineet epwe awora an ‘monien asor.’”—Kapwúng Tekia mi Túmúnú án Aramas Pwúúng lón Iurop, 2011
Ewe monien asor a pwal álisi osupwang lón ekkewe feiengaw watte. Chón Kraist me lóóm ra pwapwa le waló ar asor fán iten álillisin chókkewe a toriir riáfféú watte. (Rom 15:26) Aua pwal álisiir le aúsefálietá imwer me ar leenien mwich, awora mwéngé, úf me sáfei.