Popun Kot A Etiwakich le Iótek

Kot a etiwakich ach sipwe chiechi ngeni.

Ekkewe chiechi ra kan fóffósfengen lefiler pwe ar ririin chiechi epwe péchékkúl. Pwal ina chék usun ren Kot, i a etiwakich ach sipwe fós ngeni, me ena mettóch a suuki ngenikich ach sipwe chiechi ngeni. A apasa: “Oupwe köriei, oupwe feito o iotek ngeniei, nge ngang üpwe aüselingakemi.” (Jeremaia 29:12) Ika ka fós ngeni Kot, kopwe ‘arap ngeni i, iwe, epwe arap ngonuk.’ (James 4:8) Ewe Paipel a alúkúlúkú ngenikich pwe Jiowa “a arap ngeni ir meinisin mi köri.” (Kölfel 145:18) Lapólóón ach iótek ngeni Kot, pwal ina péchékkúlelóón ewe ririin chiechi lefilach me i.

Kot a mochen álisuk.

Jesus a apasa: “Iö leimi ämi kana sam nöün epwe tüngorei eföü pilawa, nge epwe ngeni eföü fau? Nge are epwe tüngor eman ik, epwe ngeni eman serepenit? Iwe, are mwo ämi . . . oupwe fang ngeni nöümi lifang mi mürina, epwe fen ifan me watten än Sememi lon läng fangala mettoch mi mürina ngeni chokewe mi tüngorei!” (Mateus 7:9-11) Ewer, Kot a etiwok óm kopwe iótek ngeni pokiten ‘a ekieki met kopwe feiöch ren’ me a mochen álisuk. (1 Petrus 5:7) A pwal mwo nge etiwok óm kopwe pwári ngeni óm kewe osukosuk. Ewe Paipel a apasa: “Ousap lolilenäsini och mettoch, nge lon ämi osupwang meinisin oupwe iotek o tüngor ngeni Kot pwe epwe alisikemi. Oupwe tüngor fansoun meinisin fän kilisou.”​—Filipi 4:6.

Aramas ra pwúkún meefi lamoten ar repwe silei Kot.

Ekkewe sou káé ekiekin me eérenien aramas ra kúna pwe fitepúkú million aramas ra meefi lamoten ar repwe iótek. Pwal mwo ekkóch mi tipemwaramwar ika mi wor Kot are rese fen lúkú pwe mi wor, ra pwal kapachelong lein chókkana.a Iwe, ena mettóch a ánnetatá pwe aramas ra fférútá nge ra pwúkún meefi lamoten ar repwe silei Kot. Jesus a apasa: “Aramas resap manau ren mongö chök, pwe ra manau ren iteiten kapas Kot a apasa.” (Mateus 4:4) Eú mettóch a tongeni álisikich ach sipwe silei Kot, ina ach sipwe fóffós ngeni i iteitan.

Ika sia etiwa án Kot etiwakich pwe sipwe iótek ngeni, met sókkun feiéch sia tongeni ápilúkúlúkún kúna?