Met Ewe Paipel A Apasa?

Kot a itá pélúweni meinisin iótek?

ME REOM ÁN IÉ IÓTEK KOT A KAN PÉLÚWENI . . .

• Án meinisin

• Án ekkóch chék

• Ese wor

PAIPEL A APASA

“Ewe Samol mi Lapalap a arap ngeni ir meinisin . . . mi köri fän wenechar.”​—Kölfel 145:18.

MET SIA PWAL TONGENI KÁÉ SENI PAIPEL?

• Kot ese áfánni án ekkewe chón ú ngeni i iótek. (Aisea 1:15) Iwe nge, iir ra tongeni “ekieksefäl o kul ngeni Kot” ren ar ekkesiwili manawer.​—Föför 3:19.

• Ren án Kot epwe pélúweni án emén iótek, mi lamot an iótek epwe tipeeú ngeni letipen Kot, usun minne a makketiw lón Paipel.​—1 Johannes 5:14.

Mi lamot ach sipwe eáni och sókkun pwomwen inis atun sia iótek?

EKKÓCH ARAMAS RA LÚKÚ pwe mi lamot repwe fótópwásukutiw, apwóraatiw mékúrer, are amwéchúfengeni péúr atun ar iótek. Nge en, met óm ekiek?

PAIPEL A APASA

Kot a etiwa ekkewe iótek aramas ra eáni atun ra “mot” are “ütä,” are atun iir ra “chapala won pwül” are “fotopwäsuketiu.” (1 Kronika 17:16; 2 Kronika 30:27; Esra 10:1; Föför 9:40) Me ren Kot, ese pwal lamot ach sipwe eáni och sókkun pwomwen inis atun sia iótek.

MET SIA PWAL TONGENI KÁÉ SENI PAIPEL?

• Kot a aúseling ngeni chókkewe mi tipetekison.​—Kölfel 138:6.

• Ka tongeni iótek lón ese lifilifil fósun fénúfan, are pwal mwo nge mwéngúnúngún chék.​—2 Kronika 6:32, 33; Nehemia 2:1-6.