Ifa Usun Upwe Poputá?

Met sókkun mettóch epwe álisuk óm kopwe pwapwaiti óm álleaan Paipel me angei watteen feiéch seni? Ikkeei nimu minen pesepes ra fen álisi chómmóng.

Kútta eú leeni mi kinamwe. Sótun kútta eú leeni mi mosonoson kopwe nóm ie. Ekisikisaaló ekkewe mettóch repwe tongeni erikukóló seni minne ka álleani. Eú leeni mi múrinné saraman me ásepwálin epwe tongeni álisuk.

Eáni eú ekiek mi pwúng. Pokiten ewe Paipel a feito seni Semach we lón láng, kopwe kúna álillis seni ika ka eáni ekiekin emén semirit mi tipemecheres le káé seni seman are inan mi tong. Ika a wor och memmeef mi ngaw ka meefi lón letipom fán iten ewe Paipel mwen óm álleani, achocho le péútaaló pwe Kot epwe tongeni asukulok.​—Kölfel 25:4.

Iótek mwen kopwe állea. Ewe Paipel a masou ren ekiekin Kot, iwe a ffat pwe a lamot ngenikich an álillis pwe sipwe weweiti. Kot a pwonei pwe epwe fang an we manaman mi fel ngeni chókkewe mi tittingorei i. (Lukas 11:13) Ena manaman a tongeni álisuk óm kopwe weweiti án Kot ekiek. Ló, ló, ló, epwe suuki ekiekum pwe kopwe weweiti “pwal mwo nge ekewe ekiekin Kot mi alolol.”​—1 Korint 2:10.

Álleani óm kopwe weweiti. Kosap chék állea ren óm kopwe chék áwesaaló ewe kinikin ka álleani. Kopwe fókkun ekieki minne ka álleani. Pwisin eisinuk ekkeei esin kapas eis: ‘Met sókkun napanap ua kúna seni ei aramas ua álleani pwóróusan? Ifa usun upwe apwénúetá lón manawei?’

Tichikietiw met kopwe achocho ngeni. Ren óm kopwe kúna feiéch seni óm álleaan Paipel, achocho le káé mettóch epwe enletin ámúrinnééló manawom. Ka tongeni achocho ngeni ekkeei esin mettóch: ‘Ua mochen káé pwal ekkóch pwóróus usun Kot.’ ‘Ua mochen ámúrinnééló napanapei.’ ‘Ua mochen aéchúeló napanapei napanapen emén mwán pwúpwúlú are fin pwúpwúlú.’ Mwirin filatá ekkewe kinikin lón Paipel epwe álisuk le tikeri met ka achocho ngeni.a

Ekkena nimu minen pesepes repwe álisuk le poputá. Nge ikkefa pwal ekkóch mettóch ka tongeni féri pwe óm állea epwe apwapwa? En lesen mwirin ei a awora ekkóch pesepes.