PWÓRÓUS LÚKÚNPÉÉN | IFA USUN KOPWE PWAPWAITI ME FEIÉCH SENI ÓM ÁLLEAAN PAIPEL?
Met Epwe Efisi An Epwe Apwapwa?
Epwe ifa usun óm álleaan Paipel? Epwe echchipwang? Are apwapwa? Lap ngeni, epwe chék lóngólóng wóón ifa usun kopwe féri óm állea. Sipwe ppii met ka tongeni féri epwe alapaaló óm pwapwaiti.
Filatá eú afféún Paipel mi alúkúlúk me mecheres kapasen lón. Ika ka álleani eú Paipel mi masou ren kapas mi weires óm kopwe weweiti are aramasen chék lóóm ra nénnéúnéú, iwe neman kosap pwapwaiti le álleani. Iwe ppii eú Paipel mi néúnéú kapas mi mecheres óm kopwe weweiti epwe achchúngú letipom. Iwe nge, epwe pwal lamot afféún ena Paipel epwe pwúng me túmúnúéch.a
Néúnéú ekkewe minen computer. Lón ei fansoun, ese chék kawor ewe Paipel lón puk, nge a pwal kawor wóón minen computer. Ekkóch Paipel ka tongeni álleani wóón Internet are kapiinawu wóón noum computer, tablet, are cell phone. Ekkóch sókkun minen álleani Paipel wóón computer ra tongeni eppiietá pwal ekkóch wokisin mi weneiti eú pwóróus are masouen pwal ekkóch afféún Paipel. Ika ka sani óm kopwe aúseling ngeni Paipel nge esap fen álleani, iwe mi kawor lón ekkóch fós lón ewe napanap kopwe aúseling ngeni. Chómmóng ra pwapwaiti le aúseling atun ra fiti bus, train, taxi, me metakkan, are féri ekkóch ar angang. Ika ka sani eú me lein ekkeei mettóch, iwe pwata kese sótuni?
Néúnéú ekkewe minen álillisin káéén Paipel. Ekkena minen álillis ra wesewesen tongeni álisuk le pwapwaiti me kúna feiéch seni óm álleaan Paipel. A wor map fán iten ekkewe leeni mi mak lón Paipel epwe álisuk le silei ia a nóm ie ekkewe leeni ka álleani pwóróusan me alapaaló óm weweiti minne a fis. Ekkewe lesen, áwewe chék ren ekkewe lón ei esin puk itan Ewe Leenien Mas are ekkewe wóón ewe website jw.org, ra tongeni álisuk le kúna weween chómmóng mettóch lón Paipel.
Sótuni sókkopaten napanapen állea. Ika ka meefi pwe óm álleani Paipel seni lepoputáán tori lesópwólóón usun itá mi áweires, iwe, pwata kese féri óm kopwe pwapwaiti ren óm poputá lón eú kinikin ka sani? Ika ka mochen silei pwóróusen ekkewe aramas mi iteféúló lón Paipel, ka tongeni akkóta óm állea me ren pwóróusen emén aramas lón Paipel. A wor emmwen ren ifa usun ka tongeni féri ena lón ei pwóór itelapan, “Alóllóólu Óm Káé Paipel ren Óm Silei Pwóróusen Aramas Lón.” Are ka tongeni álleani Paipel ren óm poputá me wóón eú me eú itelap are me ren tettelin fisin ekkewe mettóch. Pwata kese sótuni eú me lein ekkena napanapen állea?
a Chómmóng aramas ra kúna pwe ewe afféún Paipel New World Translation of the Holy Scriptures a pwúng, alúkúlúk, me a mecheres álleaan. Ei Paipel, férien Chón Pwáraatá Jiowa, a kawor lón lap seni 130 fósun fénúfan. Ka tongeni kapiinawu lón fósun Merika seni wóón ewe website jw.org are ka tongeni álleani me wóón ewe JW Library app. Are, Chón Pwáraatá Jiowa ra tongeni uwei ngeni imwom eú wesewesen kapiin ika ka mochen.
b Ese wor lón fósun Chuuk, nge a kawor lón sókkopaten fósun fénúfan.
c Ese wor lón fósun Chuuk, nge a kawor lón sókkopaten fósun fénúfan.
d Ese wor lón fósun Chuuk, nge a kawor lón sókkopaten fósun fénúfan.
e Ese wor lón fósun Chuuk, nge a kawor lón sókkopaten fósun fénúfan.