Án Kot Kewe Kapwúng​—Itá Kot A Awora Naféchún Fansoun le Éúréúra Aramas?

EMÉN chón angangen weather a etittinafichi sasingin repotun weather. A kúna pwe eú mélúmél mi efeiengaw epwele eniito wóón eú leeni ikewe chómmóng aramas ra nónnóm ie. Pokiten a fókkun mochen án aramas resap feiengaw, a féri úkúkún an tufich le éúréúra aramas me mwen an epwe serlupwan.

Pwal ina chék usun, lón ei fansoun Jiowa a kan éúréúra chón fénúfan usun warotoon eú mettóch mi fókkun efeiengaw lap seni ekkewe mélúmél sia rongorong seni pwóróusen weather. Ifa usun Kot a féri ena? Pwata sia tongeni lúkúlúk pwe a ngeni aramas naféchún fansoun pwe repwe mmólnetá? Ren ach sipwe silei pélúwen ekkena kapas eis, sipwe akkomw nengeni ekkóch pwóróusen án Jiowa éúréúra aramas lón fansoun lóóm.

ATUN KOT A ÉÚRÉÚRA ARAMAS

Lón fansoun lóóm, Jiowa a éúréúra aramas lupwen epwele awaraato an kewe sókkopaten kapwúng, are mélúmél lón kapas áwewe, wóón chókkewe mi filatá le álleasolapa an kewe allúk. (SalF. 10:25; Jer. 30:23) Lón eú me eú atun, a esile ngeni ekkewe aramas ren fite ier me mwen an epwe fis ewe kapwúng me ereniir ar repwe féri ekkesiwil lón manawer pwe epwe tipeeú ngeni letipan. (2 King 17:12-15; Ne. 9:29, 30) Ren án Jiowa epwe álisiir le féri ekkewe siwil mi lamot, fán chómmóng a néúnéú néún kewe chón angang mi tuppwél wóón fénúfan ar repwe esile ngeniir kapasen kapwúng me lamoten ar repwe mwittir féri siwil.​—Am. 3:7

Noa, emén me lein néún Kot kewe chón angang mi tuppwél. Ren fite fite ier, fán pwora a éúréúra aramas mi ngaw me mwánesól lón ránin we usun warotoon ewe Noter. (Ken. 6:9-13, 17) A pwal ereniir met mi lamot repwe féri pwe repwe kúna manaw, ina popun a iteni “ewe chon afalafala usun pwüng.”​—2 Pet. 2:5.

Inaamwo ika Noa a achocho, nge ekkewe aramas rese áfánni ena pwóróus mi feito seni Kot. Ra pwári watteen nafangawen lúkú. Iwe, pokiten ena, ra máló lupwen ewe Noter a “war o niirela meinisin.” (Mat. 24:39; Ipru 11:7) Lupwen repwele angei ar kapwúngún máló, resap tongeni erá pwe Kot ese éúréúrer.

Lón pwal ekkóch fansoun, Jiowa a éúréúra aramas me mwen chék an epwe fis an we kapwúng. Nge inaamwo ika a ina usun, nge a kan féri pwe epwe naféch ewe fansoun fán iten án aramas repwe tongeni mmólnetá ika repwe aúselinga. Áwewe chék, atun Kot a wato ewe Engol Riáfféú wóón chón Isip lóóm, a awora kapasen éúréúr me mwan. Áwewe chék, Jiowa a tiinaaló Moses me Aaron ar repwe éúréúra Farao me néún kewe chón angang usun warotoon ewe efisuen riáfféú, ewe útten faú mi chou mi efeiengaw. Pokiten epwele púngútiw ewe útten faú sorotáán ewe rán, iwe itá a naf ewe fansoun Kot a ngeniir ren ar repwe kútta ar leenien op me kúna túmún seni? Ewe Paipel a apasa: “Iö mi niueiti alon ewe Samol mi Lapalap me lein nöün Farao kewe nöüwis, a amüttiri le asüelong le imw ekewe aramas a nöüniir amanau me nöün man. Nge iö esap afäli alon ewe Samol mi Lapalap, a chök likitala lemäl ekewe aramas a nöüniir amanau me nöün man.” (Eks. 9:18-21) A ffat pwe Jiowa a ngeniir naféchún fansoun pwe chókkewe mi mwittir aúseling resap feiengaw ren ena riáfféú.

Kot a pwal éúréúra Farao me néún kewe chón angang me mwen fisin ewe áengolun riáfféú. Nge rese aúseling. (Eks. 4:22, 23) Iwe pokiten ena, néúr kewe mwánichi ra máló. A ifa me elichippúngún! (Eks. 11:4-10; 12:29) Itá a naf ewe fansoun ar repwe aúseling ngeni ewe kapasen éúréúr? Ewer! Moses a mwittir éúréúra ekkewe chón Israel usun warotoon ewe áengolun riáfféú me áiti ngeniir ifa usun repwe tongeni kúna manaw me ar famili. (Eks. 12:21-28) Fitemén aramas ra aúseling? Me ren ekkóch állea, lap seni úlúngát million aramas, kapachelong ekkewe chón Israel me “sokopaten mwichen aramas” chón lúkún Israel me chón Isip ra ló seni Isip me kúna manaw seni án Kot we kapwúng.​—Eks. 12:38, NW; ftn.

Ekkena pwóróus ra áiti ngenikich pwe fansoun meinisin, Jiowa a kan ngeni aramas naféchún fansoun pwe repwe tongeni aúseling ngeni an kewe kapasen éúréúr. (Tut. 32:4) Pwata Jiowa a kan féri ena? Aposel Petrus a áweweei pwe Jiowa “esap mochen pwe eman epwe pöütmwälila, nge a fen mochen pwe meinisin repwe ekieksefäl.” (2 Pet. 3:9) Ewer, Kot a tongei aramas. A mochen ar repwe aier me féri ekkewe ekkesiwil mi lamot me mwen warotoon an kapwúng.​—Ais. 48:17, 18; Rom 2:4.

AKKAÚSELING NGENI ÁN KOT KAPASEN ÉÚRÉÚR LÓN EI FANSOUN

Lón ei fansoun, a pwal lamot ngeni meinisin ar repwe aúseling ngeni ewe kapasen éúréúr mi esilesil wóón ei fénúfan. Lupwen Jesus a nóm wóón fénúfan, a éúréúra pwe ótóten ei fénúfan epwe kataló atun ewe riáfféú mi lapalap. (Mat. 24:21) A eáni eú oesini mi tichik usun ena kapwúng epwe fis lón fansoun mwach. Lón ena oesini a áweweei ngeni néún kewe chón káé met repwe kúna lón ena atun. Ina minne, Jesus a áweweei ekkewe mettóch mi lamot repwe fis wóón unusen fénúfan, nge ina met sia kúkkúna lón ei fansoun.​—Mat. 24:3-12; Luk. 21:10-13.

Ren ena oesini, Jiowa a peppesei meinisin ar repwe filatá le angang ngeni me álleasochisi. A mochen pwe aramas mi álleasochis repwe pwapwaiti eú sókkun manaw mi múrinné iei me pwal kúna ekkewe feiéch mi amwarar lón an we ótót sefé. (2 Pet. 3:13) Jiowa a mochen álisi aramas le eáni lúkú wóón an kewe pwon. A álisiir le féri ena ren an awora ngeniir eú pwóróus epwe amanawer. Ina “ewe Pworausen Manau usun ewe Mwün Kot,” ewe Jesus a oesini pwe aramas repwe “afalafalafeili . . . won unusen fanüfan, pwe epwe eu minen pwärätä ngeni aramas meinisin.” (Mat. 24:14) Kot a fen féri pwe chón fel ngeni mi tuppwél repwe kókkótéch le awora ena “minen pwärätä,” are esilefeili an na pwóróus lón 240 som fénú. Jiowa a mochen pwe chómmóng aramas repwe aúseling ngeni ewe kapasen éúréúr me kúna túmún seni warotoon an we kapwúng mi pwúng.​—Sef. 1:14, 15; 2:2, 3.

Ekkena pisekin pwáraatá ra ánnetatá pwe Jiowa a kan ngeni aramas naféchún fansoun le aúseling an kewe kapasen éúréúr. Ina minne, sisap tipemwaramwar ren ena. Nge fen ewe kapas eis mi lamot: Itá aramas repwe aúseling ngeni án Kot kapasen éúréúr lupwen a chúen suuk ngeniir? Amwo kich néún Kot kewe chón afalafal sipwe sópweló le álisi aramas úkúkún ach tufich ar repwe kúna manaw atun epwe sópwóló ótóten ei fénúfan.