Angangen Pioneer Ina Alen Áeáéchún Ach Fansoun!
1, 2. Ikkefa ekkewe weires ekkóch ra likiitú fan pwe repwe pioneer?
1 ‘A kon chukuchukutá ai angang! Itá epwe eú alen tipachem ngeniei ai upwe pioneer lón ei atun?’ Ina ekiekin emén Chón Kraist fefin lupwen a aúseling ngeni ewe afalafal emén mwán mi ásimaw mi pioneer a eáni lón ewe ruu ránin mwichelap. Itelapen an afalafal, “Feffeitá ren ewe Angangen Pioneer.” Pwal emén Chón Kraist mwán mi pwal aúselinga ena afalafal a ekieki, ‘Ifa usun ena mwán mi ásimaw a tongeni pioneer? Esap ngang emén mwán mi ásimaw, nge ketá iei me chómmóngun ai angang!’
2 Ewe mwán mi ásimaw a sópweló le apwóróusa ekkewe feiéch a tori emén mi pioneer, a kapas eis ngeni ekkóch pioneer lón ekkewe mwichefel. Emén mi mwék, emén pwúlúwan ese fiti lón an lúkú me emén a likitaló an angang mi watte peioffun nge a chék menemenéch ren met a wor ren. Chókkana ra áweweei usun met ra féri pwe repwe tongeni pioneer me ifa usun Jiowa a fókkun efeiéchú ar achocho. Iwe, lupwen ewe Chón Kraist mwán me ewe Chón Kraist fefin ra rong ifa usun ekkeei pioneer ra sópwéch lón ar angang ren álillisin Jiowa, ra poputá le etittinasefáli pwisin ar ekiek me nónnómur. Iwe, sia etiwok le pwal féri ina usun.
3. Ikkefa ekkewe mettóch sipwe ekiekifichi ika sia mochen pioneer?
3 Sia silei pwe Jiowa i ewe Chón Fératá me ewe Sou Nemenemen Unuselapen Láng me Fénúfan me sia manaw pokiten i. (Tan. 4:17; Föf. 17:28) A ffat ngenikich pwe Jiowa a áeá eú chék mwicheich. Eú feiéch ach angang me án Kot we mwicheich fán tuppwél me álisatá ewe “chon angang mi allükülük o tipachem” le esilefeili ewe Mwú me mwen ewe sópwólóón epwe war. (Mat. 24:45; 25:40; 1 Pet. 2:9) Pokiten sia manaw le muchúlóón “ekewe ränin lesopolan,” sia silei pwe ach fansoun afalafal epwele much. (2 Tim. 3:1) Iwe, a pwal lamot ach sipwe atufichi ach famili lón pekin aion. (1 Tim. 5:8) Nge peioffun emén ikenái ese chúen naf usun me lóóm. Eli sise chúen péchékkúl usun lóóm. Nge kich sia pwal mochen epwe wor ekis fansoun me moni fán itach. (SalAf. 3:12, 13) Ina popun, eli sipwe tipemwaramwar ika a eú alen tipachem ach sipwe pioneer.
4. Pwata emén me emén leich epwe etittina nónnómun manawan?
4 Wisen emén me emén leich an epwe etittinaéchú nónnómun me filatá ika epwe pioneer. (Rom 14:12; Kal. 6:5) A eú minen apéchékkúl ngenikich le kúna lallapólóón chóchóón ekkewe ra poputá le pioneer. Inaamwo ika a wor fansoun weires me osukosuk lón ekkeei ránin lesópwólóón nge ewe repotun angangen afalafal lón 2014 Yearbook a pwáraatá pwe arapakkan 1,500,000 néún Jiowa kewe aramas wóón unusen fénúfan ra achocho lón ewe angangen pioneer. Ese lifilifil ika ra angang fán nafangawen moni are waar, semmwen are pwal ekkóch osukosuk me weires nge pwiich keei rese achanú le féri minne mi múrinné, iwe sia mwareiti ar angang. (Kal. 6:9) Ra fen ngúúri án Jiowa apasa pwe repwe sótuni i. (Mal. 3:10) Ra meefi pwe ewe angangen pioneer, ina eú al mi fókkun tipachem ren áeáéchún ar fansoun me tufichiir mi aúkúk, me Jiowa a pwal wesewesen efeiéchúúr pokiten ra akkóta manawer pwe repwe poputá me sópweló lón ewe angangen pioneer.
5. Ifa usun emén Chón Kraist fefin a álisi néún nengngin seni leuputiwan?
5 Pioneer Ra Kúkkúna Feiéch: Emén Chón Kraist fefin lón ewe fénú itan Cameroon mei wor néún kúkkúnún nengngin nge iei met a áweweei usun an pioneer: “Seni leuputiwen nei we nengngin a fen fiffitiei lón ewe angangen afalafal. Pwal mwo nge me mwen a poputá le fetál, ua achchékú lón eché mangaku. Iwe, atun ua afalafal lón eú soran, ua asésé lón eú leenien amémé ppen ewe al. Nei a eipweipweló me a uwei fitu puk seni ai pwotou. A eipweipweló ngeni emén chón amémé mi chék kkan. Inaamwo ika ese kon ffat met a apasa nge a anéúnéú ngeni eú puk. Ewe fefin a fókkun máirú le kúna pwe ena esin kúkkún semirit a tongeni féri ei sókkun angang. A fókkun pwapwa le néúni ewe puk me mochen káé Paipel!”
6. Met emén mwán mi ásimaw a tufichin féri inaamwo ika a chómmóng an angang?
6 Pokiten ewe kékké fán iten auxiliary pioneer, emén mwán mi ásimaw me mékúren famili lón Zambia mi pwal angang full-time pwe epwe atufichi an famili, a filatá le auxiliary pioneer inaamwo ika a fókkun chómmóng an angang. A mochen isetiw eú leenien áppirú ngeni ewe mwichefel me an famili. Fán ekkóch, epwe onómu waan we ppen ewe al me ettiki ewe teip usun The Secret of Family Happiness (Ewe Kiien Pwapwaan Famili). A etiwa ekkewe aramas mi fetál wóón ewe al pwe repwe feito me aúseling ngeni ewe teip. Ren an féri ena, a anéúnéú ngeni aramas 29 puk me poputá káé ngeni rúúemén.
7. Ifa usun a pwáló ewe pwapwaan pioneer lón unusen ewe mwichefel?
7 A fókkun pwáló ewe pwapwaan pioneer lón ewe fénú Zimbabwe. Eú mwichefel a wor 117 chón afalafal, a repotei pwe 70 auxiliary me 9 ra regular pioneer. Pwal eú mwichefel mei wor 94 chón afalafal lón a wor 58 auxiliary pioneer. Pwal eú mwichefel, mei wor 126 chón afalafal lón, a repotei pwe 58 ra auxiliary pioneer, iir ra afalafalfengen me ekkewe 4 regular pioneer. Inaamwo ika pwiich kewe Chón Kraist mwán ikena ie ra fókkun osukosuk ren ar angang fán iten ar famili, angang lón ewe mwichefel me kaútáán ewe keangen ofesilap, nge ra achocho le áeáéchú ar fansoun fán iten ewe angangen afalafal.
8. Ifa usun Jiowa a álillis atun sia akkomwa an we Mwú?
8 Ekkewe pioneer ra silei pwe ar poputá me likiitú lón ewe angangen pioneer ese lóngólóng wóón pwisin ar péchékkúl. Iir ra silei pwe mettóch meinisin ra tufichin féri pokiten ‘ükükün ar pöchökül Kot a ngeniir.’ (1 Pet. 4:11) Ar lúkú a atufichiir le sópwósópwóló lón ar angangen afalafal rán me rán. Lap seni ar kútta pwisin aséséén me kinamween manawer, ekkewe pioneer mi lipwákéch ra weweiti pwe chiechian ar repwe tongeni feffeitá, neman “riaffou chapur,” nge mwirilóón repwe kini chómmóng feiéch.—1 Tes. 2:2, TF.
9. Ifa usun sia tongeni kúna álillis seni án ewe aposel Paulus we leenien áppirú?
9 Áppirú án Paulus Angang: Ewe Paipel a makkeei ekkewe mettóch ewe aposel Paulus a fen féri lón ewe angangen afalafal me álilliséchún ngeni chómmóng aramas. Nge ika mi wor emén a kon chómmóng an angang, ina i Paulus. A likiitú fán riáfféú mwáál me riáfféún pwisin manawan pwe epwe tongeni afalafala ewe kapas allim me apéchékkúlatá ekkewe mwichefel. A pwal likiitú fán semwenichou. (2 Kor. 11:21-29; 12:7-10) A fókkun mochen áeáéchú an fansoun. A apasa pwe a féri an angang meinisin ren álillisin Jiowa. (2 Kor. 4:7) Esap mwo emén me lein ekkewe aramas Paulus a álisi epwe ekieki pwe a solap án Paulus fansoun me achocho lón an angang ngeni Jiowa are ekieki pwe itá epwe fen achocho lón pwal eú angang. Tori ikenái, sia chúen kúna feiéch seni án Paulus áeáéchú an we fansoun! A ifa me watteen ach aúcheani án Paulus kewe kapasen fén seni Kot mi álisikich le akkomwa minne mi lamot me fitipachei ewe enlet lón ekkeei fansoun mi weires!
10. Pwata a fókkun lamot ach sipwe áeáéchú ach fansoun iei?
10 Iei, “esap chüen langatam ach fansoun” lap seni me lóóm fán iten ach sipwe afalafala ewe kapas allim. (1 Kor. 7:29; Mat. 24:14) Ina popun, a lamot ach sipwe pwisin eisinikich, ‘Ika upwe má lesor, ua tongeni ereni Jiowa pwe ua fen áeáéchú ai fansoun?’ (Jas. 4:14) Pwata kese fós ngeni Jiowa lón iótek iei me apasa óm mochen áeáéchú óm fansoun usun emén me lein néún kewe Chón Pwáraatá? (Kölf. 90:12) Iótek ngeni Jiowa pwe epwe álisuk le ámecheresaaló nónnómun manawom. Inaamwo ika eli ka ekieki me lóóm pwe kese tongeni pioneer, nge met, kese mwo kúna ika ka tongeni fiti ewe angangen pioneer iei?
11. Ifa ewe minen apéchékkúl fán iten meinisin néún Jiowa kewe chón angang ese lifilifil ika kich emén pioneer are esap?
11 Áeáéchú Nónnómun Manawom: Sia weweiti pwe pokiten mi sókkofesen nónnómun manawen aramas, esap meinisin mi mochen regular pioneer mi tongeni tikeri 70 awa iteiten maram. Iwe nge, chómmóng chón afalafal ra akkóta pwe repwe tongeni fiti ewe angangen auxiliary pioneer ren 50 awa lón eú maram, fán fitu lón eú ier are iteiten maram. Ika nónnómun manawom iei ese atufichi óm kopwe auxiliary are regular pioneer, kesap lólilen. Likiitú lón óm iótek pwe epwe siwil nónnómun manawom. Iwe, ika kese tongeni siwili kókkótun manawom, amwo kopwe pwapwa óm chechchemeni pwe Jiowa a pwapwaiti óm angang seni eú letip mi unus. (Mat. 13:23) A silei pwe ka úppós lón óm lúkú i me ka fókkun achocho pwe kopwe chón afalafal mi tuppwél me ka kúkkútta alen óm kopwe akkafalafal ngeni aramas iteitan maram. Neman kopwe feffeitá ren óm alapaaló óm tufichin afalafala aramas, me achocho pwe kopwe lipwákéchúló usun emén chón afalafal me senseen ewe kapas allim.—1 Tim. 4:16.
12. Met sisap fókkun itá ekieki?
12 Pokiten án Jiowa “ran mi lap o eniwokus” a arapoto, a lamot ach sipwe áeáéchú ewe lusun fansoun ika sipwe tufichin áwesi ewe angang a fen ewisa ngenikich. (Sow. 2:31) Satan a silei pwe an we fansoun a chék mwochomwoch me a fókkun achocho lap seni me lóóm le aosukosuka manawach me sótun áweiresi ach sipwe akkomwa ekkewe mettóch mi lamot. (Fil. 1:10; Pwär. 12:12) Kosap fókkun ekieki pwe Jiowa ese chúnguk. Jiowa a tongeni álisuk le ámenemenéchú manawom me lipwákéchúló lón ewe angangen afalafal. (Kölf. 145:16) A mmen apwapwa pwe mwirin án chómmóng etittinasefáli nónnómun manawer, ra kúna pwe ra tongeni auxiliary are regular pioneer. Pwúngún, ekkewe pioneer ra fókkun menemenéch ren áeáéchún ar fansoun. Ka tongeni emén leir?