Ämi kana Säräfö, Föratä eü Longolong mi Mürinnö fän iten Mwachkkaan
1. Pwata ekkewe Chon Kraist säräfö repwe ämääraatä lükü mi pöchökkül?
1 Met ka akkomwa lon ekiekum? Ka chök ekkekieki mettoch mi weneituk lon ekkeei rän, are ka kan akkafota ekiekum woon mwachkkaan me än Jiowa kewe pwon? (Mt. 6:24, 31-33; Luk 8:14) A lamot lükü mi pöchökkül pwe emön epwe mwöküt ren än Jiowa kewe pwon usun chök Eperiam me Moses. (Ipru 11:8-10, 24-26) Ifa usun kopwe ämääraatä ena sokkun lükü me aüetä “eu longolong mi nükünük fän iten ewe fansoun epwe feito”?—1 Tim. 6:19.
2. Met sia käeö seni än King Josaia leenien äppirü?
2 Kükkütta Jiowa: A mürinnö ika mi wor än om famili kokkotun angang lon pekin lükü. Nge kosap ekieki pwe kaworen chök ena sokkun kokkot epwe pükün apöchökküla om lükü. Ren om kopwe “fefeitä lon om silei Kot,” kopwe pwisin kükkütta Jiowa.” (SalF. 2:3-5; 1 Kron. 28:9) Ewe alüwöl King Josaia a ina usun. Inaamwo ika an we famili ese alamota mettochun lükü, nge atun a 15 ierin, a poputä le kükkütta me “fel ngeni än Tafit an we lewo we Kot.”—2 Kron. 34:3.
3. Ifa usun ekkewe chon Kraist säräfö ikenäi repwe kükkütta Jiowa?
3 Ifa usun kopwe kükkütta Jiowa? Kopwe etittinafichi ekkewe mettoch ka lükü me ‘pwisin änneta ngonuk’ pwe ina wesewesen ewe enlet. (Rom 12:2) Ren chök äwewe, en mi tongeni äweweei met ewe Paipel a apasa usun chcha are änneta pwe än Kot we Mwu a poputä le nemenem lon läng lon 1914? Om “silei ewe let,” ina kinikinin fförütään eü longolong mi mürinnö fän iten mwachkkaan.—1 Tim. 2:3, 4.
4. Ifa usun ekkewe chon afalafal rese mwo papatais repwe pwäraalo ar feffeitä?
4 Än Josaia kükkütta Jiowa a sopwöch. Me mwen an a tori 20 ierin, a pworacho le amoielo fel mi chofona lon fönüan we. (2 Kron. 34:3-7) Pwal ina chök usun, om feffeitä lon pekin lükü epwe pwäpwäälo ren om kewe föfför. (1 Tim. 4:15) Ika en emön chon afalafal kesaamwo papatais, achocho le lipwäköchülo lon om angangen afalafal. Ese naf om kopwe chök anöünöü puk ngeni aramas. Nge kopwe achocho le nöünöü ewe Paipel, äweweöchü ngeni aramas, me ämääraatä än aramas mochen käeö Paipel. (Rom 12:7) Epwe älisuk le feffeitä lon pekin lükü me föratä eü longolong mi mürinnö fän iten mwachkkan.